Ŋwed Alma
eyen Alma

1 Idahaemi edikem ete ke akpa isua ukara mme ebiere ikpe nnɔ ikɔt Nephi, tɔŋɔ ke ini emi ka iso, edidem Mosiah ke amakaka usuŋ ofuri ererimbot, ke amakaŋwana eti eŋwan, asaŋa nnennnen ke iso Abasi, ikpɔŋke owo ndomo kiet akara ke itie esie; edi enye ama asiak mme mbet, ndien mme owo ema eda mmɔ; ke ntak oro ama ɔbɔp mmɔ ete enim mme mbet emi enye akanamde.

2 Ndien edikem ete ke akpa isua ukara Alma ke itie ikpe, owo ama odu emi ekedade edi ke iso esie man ebiere ikpe esie, erenowo okponde idem, ndien efiɔk enye enɔ akwa odudu esie.

3 Ndien enye amaka ke otu mme owo, ɔkwɔrɔ ɔnɔ mmɔ se enye okokotde ikɔ Abasi, odomo ndibiat ufɔk Abasi; ɔdɔhɔ mme owo ete ke akpana mme oku ye andikpep ewɔrɔ etop; ndien ke ikpinaha mmɔ enam utom ye ubɔk mmɔ, edi ete ke akpana mme owo ewam mmɔ.

4 Ndien enye ŋko etie ntiense ɔnɔ mme owo ete ke ana enyaŋa kpukpru owo ke akpatre usen, ndien ete mmɔ ekufehe ndik unyuŋ unyeŋ idem, edi ete mmɔ emenere ibuot mmɔ enyuŋ edarseit; koro Jehovah okobot kpukpru owo, ndien ŋko ama afak kpukpru owo; ndien, ke akpatre, kpukpru owo na enyene nsinsi uwem.

5 Ndien edikem ete enye ama ekpep mme ŋkpɔ emi tutu ete ata ediwak ema ebuɔtidem ke mme ikɔ esie, kpa ata ediwak tutu ete mmɔ etɔŋɔ ndiwam enye nyuŋ nnɔ enye okuk.

6 Ndien enye ɔtɔŋɔ ndimenere ke ntaŋidem esit esie, ye ndisine ata nsɔŋ urua ɔfɔŋ, iŋ, onyuŋ ɔtɔŋɔ ndisiak ufɔk Abasi nte asaŋade ye ukwɔrɔ ikɔ esie.

7 Ndien edikem nte enye akakade, ndikwɔrɔ ikɔ nnɔ mbon emi ekebuɔtde idem ke ikɔ esie, enye osobo ye erenowo emi ekedide eke ufɔk Abasi Abasi, iŋ, kpa andikpep mmɔ kiet; ndien enye ɔtɔŋɔ ndineni ye enye ke ɔkpɔsɔŋ, man enye ada mbon ufɔk Abasi ɔwɔrɔ ɔkpɔŋ usuŋ; edi erenowo oro afaŋa ye enye, eteme enye ye mme ikɔ Abasi.

8 Idahaemi enyiŋ erenowo oro ekedi Gideon; ndien enye ekedi ŋkpɔ utom ke ubɔk Abasi ke ndinam ikɔt Limhi ebɔhɔ ewɔrɔ ke ufin.

9 Idahaemi, ke ntak emi Gideon akafaŋade ye enye ye mme ikɔ Abasi enye ama ayaresit ye Gideon, onyuŋ osio akaŋkaŋ esie ndien ɔtɔŋɔ ndimia enye. Idahaemi sia Gideon ɔkɔsɔŋde ye ediwak isua, ke ntak oro enye ikikanke iyɔ mme ita esie, ke ntak oro ema ewot enye ye akaŋkaŋ.

10 Ndien erenowo emi okowotde enye mbon ufɔk Abasi ema emum, enyuŋ eda enye edi ke iso Alma, man ebier ikpe nte asaŋade ye mme idiɔk ŋkpɔ emi enye akanamde.

11 Ndien edikem ete enye ada ke iso Alma onyuŋ etiŋ ikɔ ye ɔkpɔsɔŋ uko ndinyaŋa idem esie.

12 Edi Alma ɔdɔhɔ enye ete: Sese, emi edi akpa ini emi ŋkari oku odukde ke otu mbon emi. Ndien sese, afo uduehe ke abaŋa ŋkari oku ikpɔŋ, edi omodomo ndinam enye ke odudu ye ke akaŋkaŋ; ndien edieke akpanade nte enam ŋkari oku ke otu mbon emi enye okpo osobo mmɔ ofuri ofuri.

13 Ndien afo ɔmɔduɔk iyip nnen nnen erenowo, iŋ, erenowo emi anamde ediwak nti ŋkpɔ ke otu mbon emi; ndien edieke nnyin iyakde fi iyip esie oyodoro nnyin ke idem ke usiene.

14 Ke ntak oro ikpe etip fi ete akpa, nte asaŋade ke mbet emi Mosiah, akpatre edidem nnyin, ɔkɔnɔde nnyin; ndien mbon emi enyime ntre; ke ntak oro ana nte mbon emi ekpono mbet oro.

15 Ndien edikem ete mmɔ emum enye; ndien enyiŋ esie ekedi Nehor; ndien mmɔ emen enye eka ke enyɔŋ obot Manti, ndien do enam enye, mme ke nditim ntiŋ ama enyime, ke ufɔt mme enyɔŋ ye isɔŋ, ete ke se enye ekekpepde mme owo ikisaŋake ye ikɔ Abasi; ndien do enye ɔbɔ ndutuhɔ mkpa but.

16 Edi, emi ikitreke ifɔt ndisuana ke ofuri isɔŋ; koro ediwak ema edu emi ekemade mme ikpikpu ŋkpɔ ererimbot, ndien mmɔ eka iso ekwɔrɔ mme nsu nsu ukpep-ŋkpɔ; ndien emi mmɔ ekenam ke ntak inyene ye ukpono.

17 Edi, mmɔ ikanke isu nsu, edieke efiɔkde, ke ntak ebakde mbet, koro ema emia mme osu nsu ufen; ke ntak oro mmɔ enam ŋkari ndikwɔrɔ ikɔ nte asaŋade ye se mmɔ enimde ke akpanikɔ; ndien idahaemi mbet ikanke inyene odudu ke owo ndomo kiet kabaŋa se enye enimde ke akpanikɔ.

18 Ndien mmɔ ikanke iyip inɔ, ke ntak ebakde mbet, koro ema emia mme utɔ owo oro ufen; ŋko mmɔ ikanke ibɔ ke nkanubɔk, mme ewot owo, koro enye emi eke owotde owo ema emia enye ufen ye mkpa.

19 Edi edikem ete owo ekededi emi mikidukke ufɔk Abasi Abasi ɔtɔŋɔ ndikɔbɔ mbon emi ekedukde ufɔk Abasi Abasi, ye emi ekedade enɔ idem mmɔ enyiŋ Christ.

20 Iŋ, mmɔ ema ekɔbɔ mmɔ, enyuŋ enam ukut esim mmɔ ye kpukpru utɔ ikɔ, ndien emi ke ntak nsuhɔre-idem mmɔ; koro mmɔ ikitaŋke idem ke enyin mmɔ, ŋko koro mmɔ ema ekwɔrɔ ikɔ Abasi, enɔ kiet eken, idige ke okuk inyuŋ idige ke ekɔm urua.

21 Idahaemi ɔkpɔsɔŋ mbet ama odu ke otu mbon ufɔk Abasi, ete yak owo ndomo kiet, emi odukde ufɔk Abasi, okudaha uda unyuŋ ukɔbɔ mbon emi midukke ufɔk Abasi, ndien ete yak okɔbɔ ukudu ke otu mmɔ.

22 Edi, ediwak ema edu ke otu mmɔ emi eketɔŋɔde etaŋidem, enyuŋ etɔŋɔ ndineni ke iyaresit ye mme asua mmɔ, kpa ke ita; iŋ, mmɔ emia kiet eken ye ubɔk mmɔ.

23 Idahaemi emi ekedi ke ɔyɔhɔ isua iba ke ukara Alma, ndien emi ekedi ntak uwak ukut ɔnɔ ufɔk Abasi; iŋ, emi ekedi ntak uwak idomo ke ufɔk Abasi.

24 Koro mme esit ediwak owo ema esɔŋ, ndien ema esɔhi enyiŋ mmɔ esio, tutu owo itihi mmɔ aba ke otu ikɔt Abasi. Ndien ŋko ediwak esioŋo idem mmɔ efep ke otu mmɔ.

25 Idahaemi emi ekedi akwa idomo ɔnɔ mbon emi ekesɔŋɔde eda ke mbuɔtidem; edi, mmɔ ema esɔŋɔ eda inyuŋ isikke ke ndinim mme mbet Abasi, ndien mmɔ eyɔ ye ime ukɔbɔ emi ekedoride mmɔ ke idem.

26 Ndien kini mme oku ekpɔŋde utom mmɔ man ekwɔrɔ ikɔ Abasi enɔ mme owo, mme owo ŋko ekpɔŋ mme utom mmɔ man ekop ikɔ Abasi. Ndien kini oku ama ɔkɔkwɔrɔ ikɔ Abasi ɔnɔ mmɔ mmɔ kpukpru efiak enyɔŋ ye ntiŋ-enyin ebine utom mmɔ; ndien oku, isehe idem esie nte ke imikpon ikan mbon emi ekopde enye, koro ɔkwɔrɔ ikɔ ikifɔnke ikan andikop, ŋko andikpep ifɔnke ikan enyemi enye ekpepde; ndien ke ntem mmɔ edi ukem ukem, ndien kpukpru mmɔ enam utom, owo kiet kiet nte ukeme esie edide.

27 Ndien mmɔ ebuana inyene mmɔ, owo kiet kiet nte enye enyenede, enɔ mme ubuene, ye mbon unana, ye mbon udɔŋɔ, ye mbon ukut; ndien mmɔ ikisineke nsɔŋ urua ɔfɔŋ, edi mmɔ esana enyuŋ eyie.

28 Ndien ke ntem ke mmɔ ekesiak mme ŋkpɔ ufɔk Abasi; ndien ke ntem ke mmɔ ekefiak enyene emem eka iso, isehe kpukpru ukɔbɔ mmɔ.

29 Ndien idahaemi, ke ntak nsɔŋɔ nda ufɔk Abasi mmɔ ema etɔŋɔ ndiforo ata eti eti, enyene nte minyeneke ibat kpukpru ŋkpɔ emi mmɔ ekoyomde—mme ufene ye mme enaŋ emi minyeneke ibat, ye mme enaŋ ubom ke utɔ ke utɔ, ŋko ye mkpasip emi minyeneke ibat, ye gold, ye silver, ye mme ŋkpɔ uto, ye silk ye eti edifiak linen emi minyeneke ibat, ye kpukpru utɔ eti ɔfɔŋ emi midɔŋɔke ndise.

30 Ndien ntem, ke idaha uforo mmɔ, mmɔ ikibinke owo ndomo kiet emi ekedide iferi isio, mme emi biɔŋ ɔkɔdɔŋde, mme emi itɔŋ akasatde, mme emi ɔkɔdɔŋɔde, mme emi owo mikibɔkke; ndien mmɔ ikisinke esit mmɔ ke inyene; ke ntak oro mmɔ efɔn ido ye kpukpru owo, akwaowo ye eyenɔwɔŋ mbiba, ifin ye eyen isɔŋ mbiba, eren ye ŋwan mbiba, mme edi ke midige ke esit ufɔk Abasi mme edi ke esit ufɔk Abasi, iteŋeke mme owo emi ekeyomde enyin.

31 Ndien ke ntem mmɔ ema eforo enyuŋ ekabare enyene ŋkpɔ ekan mbon emi mikidukke ufɔk Abasi mmɔ.

32 Koro mbon emi mikidukke ufɔk Abasi mmɔ ema esin idem mmɔ ke mme idiɔŋ, ye ke ukpono ndem mme ifu, ye ŋkeŋinua, ye ke mme ufip ye eŋwan; esine nsɔŋ urua ɔfɔŋ; emenere ke ntaŋidem enyin mmɔ; ekɔbɔ, esu nsu, eyip inɔ, ekan owo ubɔk, enam mme use, ye uwot owo, ye kpukpru utɔ ibak; edi, ema enim mbet enɔ kpukpru mbon emi ekeduede enye, ke adaŋa nte ekekemede.

33 Ndien edikem ete ke ndinam mbet ke idem mmɔ, owo kiet kiet okut ndutuhɔ nte asaŋade ye se enye akanamde, mmɔ etim esɔŋ eda, ndien ikanke inam ibak ndomo kiet edieke efiɔkde; ke ntak oro, ata emem ama odu ke otu ikɔt Nephi tutu ɔyɔhɔ isua ukara ition eke mme ebiere ikpe.