1 Idahaemi, nte Ammon ekekpepde ikɔt Lamoni ntem ofuri ofuri ini, nnyin iyiyɔŋ idi mbuk Aaron ye nditɔ eka esie; koro kini enye ama ɔkɔwɔrɔ ke isɔŋ Middoni Spirit ada enye usuŋ aka isɔŋ Nephi, kpa ke ufɔk edidem emi okodude ke ofuri isɔŋ oro ibɔhɔke ke isɔŋ Ishmael; ndien enye ekedi ete Lamoni.

2 Ndien edikem ete enye oduk etiene enye ke okure edidem, ye nditɔ eka esie, onyuŋ osuk ibuot esie ke iso edidem, onyuŋ ɔdɔhɔ enye ete: Sese, O edidem, nnyin idi nditɔ eka Ammon, emi afo akanamde ebɔhɔ ewɔrɔ ke ufɔk ŋkpɔkɔbi.

3 Ndien idahaemi, O edidem, edieke afo edisuhɔde uwem nnyin, nnyin iyidi nditɔ ufɔk fo. Ndien edidem ɔdɔhɔ mmɔ ete: Edaha eda, koro ami nyayak uwem mbufo nnɔ mbufo, ndien ami ndiyakke ete mbufo edi nditɔ ufɔk mi; edi ami nyeyire nte mbufo enam ŋkpɔ enɔ mi; koro afina mi ekpri ke esit ke ntak ntat-ubɔk ye mme akwa ikɔ eyen eka mbufo Ammon; ndien ami moyom ndifiɔk ntak emi enye midɔkke iwɔrɔ ke Middoni idi ye mbufo.

4 Ndien Aaron ɔdɔhɔ edidem ete: Sese, Spirit Jehovah okot enye aka usuŋ efen; enye aka isɔŋ Ishmael, ndikpep ikɔt Lamoni.

5 Idahaemi edidem ɔdɔhɔ mmɔ ete: Nso idi ŋkpɔ emi emi mbufo etiŋde ebaŋa Spirit Jehovah? Sese, emi edi ŋkpɔ emi afinade mi.

6 Ndien ŋko, nso edi ŋkpɔ emi emi Ammon eketiŋde ete—Edieke mbufo edikabarede esit eyenyaŋa mbufo, ndien edieke mbufo midikabakere esit, eyebin mbufo eduɔk ke akpatre usen?

7 Ndien Aaron ɔbɔrɔ enye onyuŋ ɔdɔhɔ enye ete: Ndi afo ɔmɔbuɔtidem ete ke Abasi odu? Ndien edidem ɔdɔhɔ ete: Ami mɔfiɔk nte ke mme Amalekite edɔhɔ ete ke Abasi odu, ndien ami mayak mmɔ nte yak mmɔ ebɔp ndisana ebiet, man mmɔ esobo idem mmɔ ɔtɔ kiet ndikpono enye. Ndien edieke idahaemi afo ɔdɔhɔ ke Abasi odu, sese ami nyɔbuɔt idem.

8 Ndien idahaemi kini Aaron okokopde emi, enye ama ɔtɔŋɔ ndinem esit, ndien ɔdɔhɔ ete: Sese, ke akpanikɔ mma uwemfo, O edidem, Abasi odu.

9 Ndien edidem ɔdɔhɔ ete: Ndi Abasi edi Akwa Spirit oro emi akadade mme ete nnyin ɔwɔrɔ ke isɔŋ Jerusalem?

10 Ndien Aaron ɔdɔhɔ enye ete: Iŋ, enye edi Akwa Spirit oro, ndien enye okobot kpukpru ŋkpɔ ke heaven ye ke ererimbot. Ndi ɔmɔ buɔtidem ke emi?

11 Ndien enye ɔdɔhɔ ete: Iŋ, ami mɔbuɔtidem nte ke Akwa Spirit okobot kpukpru ŋkpɔ, ndien ami moyom nte afo etiŋ ɔnɔ mi abaŋa kpukpru mme ŋkpɔ emi, ndien ami nyɔbuɔt idem ke mme ikɔ fo.

12 Ndien edikem ete kini Aaron okokutde ete ke edidem ɔyɔbuɔtidem ke mme ikɔ esie, enye ɔtɔŋɔ ke eribot Adam, okot mme ŋwed Abasi ɔnɔ edidem—nte Abasi okobotde owo ke mbiet esie, ye nte Abasi ɔkɔnɔde enye mme ibet, ndien ke ntak ndudue, owo ama ɔduɔ.

13 Ndien Aaron ama anam mme ŋwed Abasi aŋwaŋa enye tɔŋɔ ke eribot Adam, enim iduɔ owo ke iso esie, ye idaha obukidem mmɔ ŋko ye uduak erifak, emi ekenimde tɔŋɔ ke editɔŋɔ ererimbot, eto ke Christ, enɔ kpukpru owo ekededi emi edibuɔtde idem ke enyiŋ esie.

14 Ndien ke ntak emi owo ɔkɔduɔde enye ikemeke ndidot ndinyene ŋkpɔ ndomo kiet ke idem esie; edi mme ndutuhɔ ye mkpa Christ afak mme idiɔk ŋkpɔ mmɔ, oto ke mbuɔtidem ye erikabare esit, ye ntre nko; ndien ete ke enye esibe mme uruk mkpa, man udi okunyene edikan, ndien man ifɔt mkpa ukukan mme idorenyin ubɔŋ; ndien Aaron ama anam kpukpru ŋkpɔ emi aŋwaŋa edidem.

15 Ndien edikem ete kini Aaron ama akanam mme ŋkpɔ emi aŋwaŋa enye, edidem ɔdɔhɔ ete: Nso ke ami ndinam man ami nyene nsinsi uwem emi emi afo etiŋde abaŋa? Iŋ, nso ke ami ndinam man ami mmana ke Abasi, ewubede idiɔk spirit emi esio ke ikpanesit mi, nnyuŋ mbɔ Spirit esie, man ami nyɔhɔ ye idaresit, man okubin mi uduɔk ke akpatre usen? Sese, enye ɔdɔhɔ ete, ami nyesin kpukpru se ami nyenede, iŋ, ami nyesin obio ukara mi, man ami mbɔ akwa idaresit emi.

16 Edi Aaron ɔdɔhɔ enye ete: Edieke afo oyomde ŋkpɔ emi, edieke afo edisukde ibuot ke iso Abasi, iŋ, edieke afo edikabare esit ke kpukpru mme idiɔk ŋkpɔ fo, onyuŋ osuk ibuot ke iso Abasi, onyuŋ okot enyiŋ esie ke mbuɔtidem, enim-ke-akpaniko ete ke afo ɔyɔbɔ, kini oro ke afo edibɔ idorenyin emi afo oyomde.

17 Ndien edikem ete kini Aaron amaketiŋ mme ikɔ emi, edidem osuk ibuot ke iso Jehovah, ke edɔŋ esie; iŋ, tutu enye anyanade ana ke isɔŋ, onyuŋ ofiori ke ɔkpɔsɔŋ uyo, ete:

18 O Abasi, Aaron ɔdɔhɔ mi ete ke Abasi odu; ndien edieke Abasi odude, ndien edieke afo edide Abasi, ndi afo ayayarade idem fo ɔnɔ mi, ndien ami nyɔkpɔŋ kpukpru idiɔk ŋkpɔ mi man mfiɔk fi, ŋko man nset ke mkpa, enyuŋ enyaŋa mi ke akpatre usen. Ndien idahaemi kini edidem amaketiŋ mme ikɔ emi, odudu Abasi ama atuak enye nte enye akpakpa.

19 Ndien edikem ete nditɔ ufɔk esie efehe enyuŋ ekedɔhɔ ɔbɔŋ-aŋwan kpukpru sikitibede inɔ edidem. Ndien enye edi ebine edidem; ndien kini enye okokutde nte enye anade nte akpakpa, ndien ŋko Aaron ye nditɔ eka esie nte edade nte mmɔ edi ntak iduɔ esie, enye ama ayat-esit ye mmɔ, onyuŋ ɔnɔ uyo ete nditɔ ufɔk esie, mme nditɔ ufɔk edidem, emum mmɔ enyuŋ ewot mmɔ.

20 Idahaemi nditɔ ufɔk emi ema ekut ntak iduɔ edidem, ke ntak oro mmɔ ikanke imum Aaron ye nditɔ eka esie; ndien mmɔ ekpe ɔbɔŋ-aŋwan ubɔk ete: Ntak emi afo ɔnɔde uyo ete nnyin iwot mme irenowo emi, kini sese owo mmɔ kiet enyene odudu akan kpukpru nnyin? Ke ntak oro nnyin iyiduɔ ke iso mmɔ.

21 Idahaemi kini ɔbɔŋ-aŋwan okokutde ndik nditɔ ufɔk emi enye ŋko ɔtɔŋɔ ndifehe ndik ata eti eti, man idiɔk ama esim enye. Ndien enye ɔnɔ nditɔ ufɔk esie uyo ete mmɔ eka enyuŋ ekekot mme owo, man mmɔ ewot Aaron ye nditɔ eka esie.

22 Idahaemi kini Aaron okokutde uduak ɔbɔŋ-aŋwan, enye, ŋko kɔfiɔkde isɔŋ esit mme owo, efehe ndik man otu owo ema edisobo idem mmɔ ɔtɔ kiet, ndien ɔkpɔsɔŋ eneni ye enwan odu ke otu mmɔ; ke ntak oro enye anyan ubɔk esie onyuŋ emenere edidem ke isɔŋ, ndien ɔdɔhɔ enye ete: Dada. Ndien enye adada ke ikpat esie, ke enyenede odudu esie.

23 Idahaemi ekenam emi ke iso ɔbɔŋ-aŋwan ye ediwak nditɔ ufɔk. Ndien kini mmɔ ekekutde emi idem akpa mmɔ eti eti, ndien etɔŋɔ ndifehe ndik. Ndien edidem ɔwɔrɔ ada, onyuŋ ɔtɔŋɔ ndinam ŋkpɔ nnɔ mmɔ. Ndien enye ama anam ŋkpɔ ɔnɔ mmɔ, tutu ete ke ofuri ufɔk esie ema ekabare esit enɔ Jehovah.

24 Idahaemi otu owo ema esobo ɔtɔ kiet ke ntak uyo ɔbɔŋ-aŋwan, ndien ɔkpɔsɔŋ ŋkuni ɔtɔŋɔ ndidu ke otu mmɔ ke ntak Aaron ye nditɔ eka esie.

25 Edi edidem ada ke otu mmɔ onyuŋ anam ŋkpɔ ɔnɔ mmɔ. Ndien mmɔ emem esit ebaŋa Aaron ye mbon emi ekedude ye enye.

26 Ndien edikem ete kini edidem okokutde ete ke esit ama emem mme owo, enye anam ete Aaron ye nditɔ eka esie eda ke ufɔt otu owo, nko man mmɔ ekwɔrɔ ikɔ enɔ mmɔ.

27 Ndien edikem ete edidem ɔnɔ ntɔt ke ofuri isɔŋ, ke otuofuri ikɔt esie emi ekedude ke kpukpru isɔŋ esie, emi ekedude ke kpupru ŋkan-nkuk, emi ekenyenede adaŋa tutu ke inyaŋ, ke edem usiahautin ye edem usoputin, ye emi akabahare ye isɔŋ Zarahemla ye mfafaha itie ke wilderness, emi akasaŋade ke inyaŋ ke edem usiahautin tutu ke inyaŋ ke edem usoputin, ye ŋkan-nkuk adaŋa mben inyaŋ, ye mme adaŋa wilderness emi okodude ke edem edere ekperede isɔŋ Zarahemla, ebe ke mme adaŋa Manti, ke ibuot akpa Sidon, efehe oto ke edem usiahautin aka edem usoputin—ndien ke ntem ke ekebahare mme Lamanite ye mme Nephite.

28 Idahaemi, ediwak ubak mme Lamanite emi ekedide ifu ekeduŋ ke wilderness, enyuŋ eduŋ ke mme tent; ndien mmɔ ema esuana ke wilderness ke edem usoputin, ke isɔŋ Nephi; iŋ, ŋko ye ke edem usoputin isɔŋ Zarahemla, ke mme adaŋa mben inyaŋ, ye ke edem usoputin ke isɔŋ Nephi, ke ebiet akpa inyene mme ete mmɔ, ndien ke ntem enyene adaŋa ke mben inyaŋ.

29 Ndien ŋko ediwak mme Lamanite ema edu ke edem usiahautin ke mben inyaŋ, emi mme Nephite ekebinde mmɔ eka. Ndien ke ntem ekpri akayak mme Lamanite ndikanare mme Nephite ŋkuk; edi mme Nephite ema enyene kpukpru edem edere isɔŋ emi enyenede adaŋa ekpere wilderness, ke ibuot akpa Sidon, ɔtɔŋɔ ke edem usiahautin aka edem usoputin, akanare okuk ke ŋkaŋ wilderness; ke edem edere, tutu mmɔ edisim isɔŋ emi mmɔ ekekotde Bountiful.

30 Ndien enye enyene adaŋa ke isɔŋ emi mmɔ ekekotde Desolation, ke ntak emi enye okoyomde usuŋ ɔnɔ edem edere tutu enye oduk ke isɔŋ emi mme owo ekeduŋde enyuŋ ewotde idem mmɔ, mme ɔkpɔ mmɔ ke nnyin ikitiŋ ibaŋa, emi mbon Zarahemla ekekutde, ke enye ekedide akpa ebiet emi mmɔ ekesimde.

31 Ndien mmɔ eto do edɔk edi usuk wilderness. Ke ntem ekekot isɔŋ ke edere edere Desolation, ndien ekekot isɔŋ ke usuk usuk Bountiful, ke enye ekedide wilderness emi ɔyɔhɔde ye kpukpru utɔ unam ikɔt ke utɔ ke utɔ, usuk emi eketode isɔŋ ke edere edere edi ke ntak udia.

32 Ndien idahaemi, ekedi isaŋ usen kiet ye ibio ɔnɔ owo Nephite, ke nnen nnen adaŋa Bountiful ye isɔŋ Desolation, tɔŋɔ ke edem usiahautin ka edem usoputin inyaŋ; ndien ke ntem ekpri akayak mmɔŋ ndikanare isɔŋ Nephi ye isɔŋ Zarahemla, do ke ekpri ubak isɔŋ okodude ke ufɔt isɔŋ ke edere edere ye ke isɔŋ usuk usuk.

33 Ndien edikem ete mme Nephite ema eduŋ ke isɔŋ Bountiful, tɔŋɔ ke edem usiahautin tutu edem usoputin inyaŋ, ndien ke ntem mme Nephite ke ifiɔk mmɔ, ye mbon ukpeme mmɔ ye mbon ekɔŋ mmɔ, ema ekanare mme Lamanite ekuk ke usuk, man otodo mmɔ ekunyene aba inyeneke edere, man mmɔ ekukara isɔŋ ke edere edere.

34 Ke ntak oro mme Lamanite ikanke inyene inyene aba ibɔhɔke ke isɔŋ Nephi, ye ke ŋkanare wilderness. Idahaemi emi ekedi ifiɔk ke mme Nephite—ke ntak emi mme Lamanite ekedide asua ye mmɔ, mmɔ ikiyomke mme ukut mmɔ ke ofuri ŋkaŋ, ndien ŋko man mmɔ enyene obio emi mmɔ efehede eka, nte udɔŋ mmɔ edide.

35 Ndien idahaemi ami, ke mma nketiŋ emi mma, mfiak nka mbuk Ammon ye Aaron, Omner ye Himni, ye nditɔ eka mmɔ.