1 Musap gaed, chiney e yibi buch ni fare pilung ko fapi Lamanites e piiʼ bbugi thin nge yaen nga fithikʼ gubin e gidiiʼ rokʼ, ni dab riliiʼed Ammon, fa Aaron, fa Omner, fa Himni, ara rebi walagraed ni bay ranoed iyaen ni yaed be machib nag fare thin ku Got, ni demutrug e gin ni yaed bay riy, u lan taferaed.

2 Arragon, i piiʼ ba morngaʼag nga fithikʼraed, ni thingar dabra koeledraed ngar mʼaged raed, fa ninʼ raed nga kalbus; ara rathuw gaed nga dakeanraed, fa ngan liiʼraed, ara ni chuwegraed u tagilʼ e moʼolung roraed, ara ni gafgow nagraed, ara ngar paged e malang ngoraed, ya ngar piiʼed matʼawngiraed ni ngar baed ko naʼun roraed, nge kupi temple roraed, nge galasia roraed.

3 Ma aray rogon ni nge yog ni nga ranoed iyaen ngar machib niged fare thin u rogon ni yaed be athapeg, ya fare pilung e ke michaenʼ ngakʼ Somoel, nge gubin chon e tabinaew rokʼ; ere ke piiʼ e morngaʼag rokʼ nga dakean gaʼangin yang e binaw ko gidiiʼ rokʼ, ni fan e fare thin ku Got e nge yaeni aw ni dariy banʼen ni nge magawon nag, ni nge yog ni garar iyaen u gaʼangin yang e nam, ni nge yog ni michaenʼ e gidiiʼ rokʼ u morngaʼagen e pi yalen nib kireb ko pi chitamangraed, ni nge yog ni mich u wunʼraed ni yaed gubin ma walag, ma thingar dabra feked e pogofan, far moroʼroʼ gaed, ara rapired e piʼin ni gathi mabgol roraed, ara rrinʼed ni demutrug ko mang ngongol ni kireb.

4 Ere chiney e yibi buch u napʼan ni fare pilung e piiʼ e biney e morngaʼag, ma Aaron nge pi walagen e ranoed iyaen u rebe binaw ngo reb, ma ranoed u rebe tafen e meybil ngo reb, ni yaed be sunmiy e galasia, ma yaed be bangbeng nag e priest nge sensey u gaʼangin yang e binaw u fithikʼ fapi Lamanites, ni ngar machib gaed mar filed fare thin ku Got ko gidiiʼ u fithikʼraed; ma aram rogon ni tabab e muruwel roraed nib felʼ rogon.

5 Ma yu biyuʼ e piʼin ni tamilang laniyaenʼraed u morngaʼagen Somoel, arragon, yu biyuʼ e piʼin ni michaenʼraed ko pi yalen rokʼ fapi Nephites; ere ni fil ngoraed fapi chep nge prophecy ni ke af iyib ke madaʼ ko ngiyalʼ ney.

6 Ma woed nib fos Somoel, e aram fini yoʼor e piʼin ni michaenʼraed, ara aram rogon fini yoʼor e piʼin ni ke tamilang laniyaenʼraed ko tin riyulʼ, u dakean e machib ku Ammon nge pi walagen, u rogon e nangaenʼ ko yiʼiy nge prophecy, nge fare gelingin Got e gagyeg nag e maʼangʼang u dakeanraed—arragon, gube yoeg ngomed, ni woed nib fos Somoel, e aram rogon fini riyulʼ ni michaenʼ fapi Lamanites ko machib roraed, me michaenʼraed ngakʼ Somoel, mar pired riy ni dar mul gaed.

7 Ya ra manged bogi gidiiʼ ni rib matʼaw; mar tayed nga butʼ e pi talin e togopluw roraed, ni arame dakur togopluw gaed ngakʼ Got, ara ngakʼ reb i walagraed.

8 Chiney, e ireray e piʼin ni michaenʼraed ngakʼ Somoel:

9 Fapi gidiiʼ ko fapi Lamanites ni ur moyed u lan fare binaw ku Ishmael;

10 Nge ku fapi gidiiʼ ko fapi Lamanites ni ur moyed u lan fare binaw nu Middoni;

11 Nge ku fapi gidiiʼ ko fapi Lamanites ni ur moyed u lan fare binaw ku Nephi;

12 Nge ku fapi gidiiʼ ko fapi Lamanites ni ur moyed u lan fare binaw nu Shilom, nge piʼin ni ur moyed u lan fare binaw nu Shemlon, ngu lan fachi binaw ku Lemuel, ngu lan fachi binaw nu Shimnilom.

13 Ere ireray fithingan e pi binaw ko fapi Lamanites ni michaenʼraed ngakʼ Somoel; ma ireray e pichaʼ nra tayed nga butʼ e pi tatlin e mael roraed, arragon, gubin i tatlin e mael roraed; ma yaed gubin ni yaed bogi Lamanites.

14 Ma fapi Amalekites e de michaenʼraed, ma kemus ni taʼbagyaed; ma dariy beeʼ ko fapi Amulonites; ya ra ʼelʼel niged gumʼirchaʼraed, nge ku gumʼirchaʼen fapi Lamanites ni yaed be paer ko gin ni yaed ma paer riy, arragon, nge gubin e pi binaw roraed nge gubin e nochi binaw roraed.

15 Ere, kad muʼ gaed i yoeg fithingan gubin e pi binaw ko fapi Lamanites ni ireram e piʼin ni kar kalgaed ngaenʼraed ma ke tamilang laniyaenʼraed ko tin riyulʼ, ma ke michaenʼraed.

16 Ere yibi buch ni fare pilung nge piʼin ni ke michaenʼraed e ra athapeged ni nge yog rebo fithingan ngoraed, niʼir e nge yog ni kiiʼegraed rokʼ pi walagraed; ere fare pilung e magow puruyʼ ngakʼ Aaron nge boech e priest roraed, u morngaʼagen e re fithingan niʼir e ngar feked nga dakeanraed, ni nge yog ni kiiʼeg raed.

17 Me yibi buch ni arame ra tunguyed fithingraed ni Anti-Nephi-Lehies; ma un piningraed ko biney e fithingan ma da kun piningraed ni Lamanites.

18 Mar manged bogi gidiiʼ ni tamuruwel; arragon, mab felʼ wokraed ngakʼ fapi Nephites; ere, ra binged ba thaʼ u thilraed, ma daki lekraed e gechig rokʼ Got.