1 Ndien sese, idahaemi edikem ete mme Lamanite oro ema eyaresit ekan akpa ke ntak emi mmɔ ekewotde nditɔ eka mmɔ; ke ntak oro mmɔ etomo usiene enɔ mme Nephite; ndien mmɔ ikidomoke aba ndiwot mbon Anti-Nephi-Lehi kini oro.

2 Edi mmɔ etaŋ mbon ekɔŋ mmɔ enyuŋ eka ekeduk mme adaŋa isɔŋ Zarahemla, ndien ekeŋwana ye mme owo emi ekedude ke isɔŋ Ammonihah enyuŋ ewot mmɔ.

3 Ndien kini oro ama ekebe, mmɔ ema eŋwana uwak ekɔŋ ye mme Nephite, emi ekebinde enyuŋ ewotde mmɔ.

4 Ndien ke otu mme Lamanite emi ekewotde ekpri ɔkɔsuhɔ ndidi kpukpru ubon Amulon ye nditɔ eka esie, emi ekedide mme oku Noah, ndien ekewot mmɔ ke ubɔk mme Nephite;

5 Ndien mbon emi ekesuhɔde, ke ekefehede eka edemusiaha utin wilderness, ndien ke ekekande ubɔk ebɔ odudu ye unen ebaŋa mme Lamanite, enam ete ediwak mme Lamanite ekpa ke ikaŋ ke ntak mbuɔtidem mmɔ—

6 Koro ediwak mmɔ, kini mmɔ ema eke me uwak unana ye uwak ndutuhɔ, etɔŋɔ ndidemere ke nditi mme ikɔ emi Aaron ye nditɔ eka esie ekekwɔrɔde enɔ mmɔ ke isɔŋ mmɔ; ke ntak oro mmɔ etɔŋɔ ndinana mbuɔtidem ke mme ido mme ete mmɔ, enyuŋ ebuɔtidem ke Jehovah, ndien ete ke enye ɔnɔ mme Nephite akwa odudu; ndien ke ntem ediwak mmɔ ema edu emi ekekabade esit ke wilderness.

7 Ndien edikem ete mme andikara oro emi ekedide nsuhɔ nditɔ Amulon enam ete ewot mmɔ, iŋ, kpukpru mbon emi eke ebuɔtde idem ke mme ŋkpɔ emi.

8 Idahaemi mkpa ke ntak Abasi emi ama anam ete yak ediwak nditɔ eka mmɔ edemere ke iyaresit; ndien eneni ɔtɔŋɔ ndidu ke wilderness; ndien mme Lamanite etɔŋɔ ndiyom ubon Amulon ye nditɔ eka esie enyuŋ etɔŋɔ ndiwot mmɔ; ndien mmɔ efehe eduk edem usiaha utin wilderness.

9 Ndien sese mme Lamanite ke eyom mmɔ mfin emi. Ke ntem mme ikɔ Abinadi ema osu, emi enye eketiŋde abaŋa ubon mme oku emi ekenamde enye eme mkpa ke ikaŋ.

10 Koro enye ɔkɔdɔhɔ mmɔ ete: Se mbufo edinamde mi eyedi utɔ mme ŋkpɔ emi edidide.

11 Ndien idahaemi Abinadi ekedi akpa ndikpa ke ikaŋ ke ntak mbuɔtidem esie ke Abasi; idahaemi emi edi se enye eketiŋde, ete ke ediwak eyekpa ke ikaŋ, ukem nte enye akakpade.

12 Ndien enye ama ɔdɔhɔ mme oku Noah ete ke ubon mmɔ eyenam ewot ediwak, ke ukem usuŋ nte ekewotde enye, ndien ke eyesuan mmɔ ke aŋwa enyuŋ ewot mmɔ, kpa nte mme unam ikɔt esuande erɔŋ enyuŋ ewot mmɔ emi minyeneke andikpeme; ndien idahaemi sese, mme ikɔ emi ema etibe ntre, koro mme Lamanite ema ebin mmɔ, ndien ema eyom mmɔ, enyuŋ emia mmɔ.

13 Ndien edikem ete kini mme Lamanite ekekutde ete ke mmɔ inyeneke odudu ikan mme Nephite mmɔ efiak enyɔŋ eka isɔŋ mmɔ; ndien ediwak mmɔ edi ndiduŋ ke isɔŋ Ishmael ye ke isɔŋ Nephi, enyuŋ edian idem mmɔ ye ikɔt Abasi, emi ekedide ikɔt Anti-Nephi-Lehi.

14 Ndien mmɔ ŋko ema ebuk mme ŋkpɔ ekɔŋ mmɔ, kpa nte nditɔ eka mmɔ ekenamde, ndien mmɔ etɔŋɔ ndidi ndinen owo; ndien mmɔ ema esaŋa ke mme usuŋ Jehovah, enyuŋ ekpeme ndinim mme ibet esie ye mme ewuhɔ esie.

15 Iŋ, ndien mmɔ ema enim ibet Moses; koro ama ɔfɔn ete mmɔ enim ibet Moses ke idaha oro, koro kpukpru ikiwɔrɔke isu. Edi ke misehe ibet Moses, mmɔ ema etiŋ enyin ese edidi Christ, eda ibet Moses nte ekedi utɔ edidi esie, ndien ebuɔtidem ete ke ana mmɔ enam mme edinam emi ekutde ke enyin emi tutu ini emi enye ediyarade inɔ mmɔ.

16 Idahaemi mmɔ ikikereke ete ke erinyaŋa okoto ibet Moses; edi ibet Moses ama anam mbuɔtidem mmɔ ke Christ ɔsɔŋ; ndien ke ntem mmɔ ema enyene idorienyin eto mbuɔtidem, ebaŋa nsinsi erinyaŋa, edorienyin ke spirit prophecy, emi eketiŋde abaŋa mme ŋkpɔ emi akanade nte edi.

17 Ndien idahaemi sese, Ammon, ye Aaron, ye Omner, ye Himni, ye nditɔ eka mmɔ ema edaresit eti eti, ke eti utip emi mmɔ ekenyenede ke otu mme Lamanite, ke ekutde ete ke Jehovah ama ɔnɔ mmɔ nte asaŋade ye mme akam mmɔ, ndien ete ke enye ŋko ama anam ikɔ esie osu ɔnɔ mmɔ ke kpukpru usuŋ.