1 Ere musap gaed, chiney e yibi buch ni pi Lamanites nem e rigel e damomuw ngoraed ni bachan e kar liiʼed pi walagraed; ere ra thʼaebed i micheg e falbiy ngakʼ fapi Nephites; ma dakur lemniged ni ngar liiʼed fapi gidiiʼ nu Anti-Nephi-Lehi e ngiyalʼ nem.

2 Ma arame rafeked e pi salthaw roraed ma ranoed nga lan e mathil ko fare binaw nu Zarahemla, mar oggaed ngakʼ fapi gidiiʼ ni bay u lan fare binaw nu Ammonihah ngar liiʼed yaed.

3 Ma tomuren e binem, me yoʼor e mael nra tayed fapi Nephites, min tuluf raed ma yibe liiʼraed.

4 Ma fithikʼ fapi Lamanites ni kan liiʼraed e ba chugur ni gubin fapi bitir ku Amulon nge pi walagen e bay riy, ni yaed fapi priest ku Noah, ni kar mʼaed nga paʼ fapi Nephites;

5 Ma tin ni magaey e ra miil gaed nga lan wuruʼ e binaw, u tomuren ni kar matgael gaed i gagyeg nag e gelingin nge matʼawon nga dakean fapi Lamanites, me buch riy ni yoʼor fapi Lamanites ni thingar ra mʼaed ko nifiy ni bachan e mich roraed—

6 Ya boʼor i yaed, u tomuren ni ke kirbaenʼ raed ni bachan e piʼin ni kar mʼaed nge gafgow nib yoʼor ni ke aw ngoraed, me yib ngaenʼraed fapi thin ni machib nag Aaron nge walagen ngoraed u lan taferaed; ma arame daki michaenʼraed ko fapi yalen ko pi chitamangraed, me michaenʼraed ngakʼ Somoel, niʼir e piiʼ e gelingin ngakʼ fapi Nephites; ere arame boʼor i yaed ni michaenʼraed u lan wuruʼ e binaw.

7 Me yibi buch ni piʼin gaʼlungun ni yaed e piʼin ni kar magaey gaed ko fapi gidiiʼ ku Amulon e ruguyed rogon ni ngan liiʼraed ngar mʼaed, arragon, gubin e piʼin nibe michaenʼraed ko pinnʼey.

8 Ere biney e yamʼ nge gafgow ni bachan e mich e kʼaring e damomuw ngakʼ boʼor i walagraed; me tabab e maleʼeg thin u lan wuruʼ e binaw; ere fapi Lamanites e ra tabab gaed i gay fapi bitir ku Amulon nge pi walagen mar tabab gaed i liiʼraed; mar miil gaed nga lan wuruʼ e binaw ko ngek.

9 Ere musap gaed, be gayraed fapi Lamanites ko biney e rran. Ere aray rogon fapi thin ku Abinadi ni ke yibi buch, ni faʼani yoeg ni morngaʼagen fapi bitir ko fapi priest nra guyed rogon ni nge yimʼ ko nifiy.

10 Ya gaʼar ngoraed: Nʼen ni gimed rarinʼ ngog e ireram e pinʼen ni bay yib.

11 Ere chiney e Abinadi e ire sommʼon ni gafgow ni yamʼ ko nifiy ni bachan e mich rokʼ ngakʼ Got; ere ireray e nʼen ni yipʼ fan, ni bayoʼor e piʼin ni yaedra gafgow ni yamʼ ko nifiy, ni boed rogon ni gafgow riy.

12 Me yoeg ngakʼ fapi priest ku Noah ni fakraed e yaedra mang tapgin ni nge yoʼor e gidiiʼ ni ngan liiʼraed ngar mʼaed, ni boed rogon ni kan rinʼ ngakʼ, ma bay ur garar gaed min liiʼraed, ni boed ba saaf ni demoy e chaʼ ni ma gafaliy ni ke paer ni gamanman ni malboch e be tuluf nge liiʼ; ere chiney e musap gaed, pi thin ney e ke mich nib riyulʼ, ya i tuluf raed fapi Lamanites, ma un gayraed, ma kun liiʼraed.

13 Me yibi buch u napʼan ni guy fapi Lamanites ni dabiyog roraed ni ngar gel gaed ngakʼ fapi Nephites mar suloed bayay ko binaw roraed; ma bayoʼor i yaed e ke yibi paer nga lan fare binaw ku Ishmael nge fare binaw ku Nephi, mar puthuyed yaed ko fapi gidiiʼ ku Got, ni yaed fapi gidiiʼ nu Anti-Nephi-Lehi.

14 Ere kur kʼeyaged boech talin e mael roraed, ni boed rogon ni ke rinʼ pi walagraed, ma arame mar manged boech e gidiiʼ nib matʼaw; ere u ranoed u woʼen Somoel, ma ur fol gaed ko pi motochiyel rokʼ nge pi yalen rokʼ.

15 Arragon, rafol gaed ko fare motochiyel ku Moses; ya rib tʼuf ni thingar ur fol gaed ko fare motochiyel ku Moses e ngiyalʼ innʼem, ya gathi gubin make muguʼul. Machane yug aram rogon fare motochiyel ku Moses, ma yaed be sap nga mʼon ko fare wub rokʼ Kristus, ya yaed be lemnag ni fare motochiyel ku Moses e pow ko wub nra tay, ma bachan e ba mich u wunʼraed ni thingar tayed e pi gamʼing nem nib mʼug nge madaʼ ko ngiyalʼ ni ke yibi mʼug ngoraed.

16 Chiney e darur lemniged ni woʼen e thap e yib ko fare motochiyel ku Moses; machane fare motochiyel ku Moses e be pigpig ni nge gelnag e mich roraed ngakʼ Kristus; ere aray rogon ni kar koeled ba athap u dakean e mich, ni be powiʼiyey iyaen ko woʼen e thap, ni yaed be tagaʼ ko fare nangaenʼ ko prophecy, niʼir e be weliy morngaʼagen e pinʼen ni bay yib.

17 Ere chiney e musap gaed, Ammon nge Aaron, nge Omner, nge Himni, nge pi walagraed e ra falfalaenʼ gaed ni rib gel, ni bachan e monʼog ni ke tay e muruwel roraed u fithikʼ fapi Lamanites, ni ke piiʼ Somoel ngoraed u napʼan ni kar guyed ni ke piiʼ e fulweg ko pi meybil roraed, ma kur micheged e thin rokʼ ngoraed ni gubin.