1 Ndien idahaemi, emi edi mme ikɔ Ammon ɔnɔ nditɔ eka esie, emi ɔdɔhɔde ete: Nditɔ eka mi iren ye nditɔ eka mi, sese ami ndɔhɔ mbufo nte, nsutɔ akwa ntak ke nnyin inyene ndidaresit; ndi nnyin ikpikikere kini nnyin ikitɔŋɔde ke isɔŋ Zarahemla ite ke Abasi ekpekɔnɔ nnyin mme utɔ akwa edidiɔŋ oro?

2 Ndien idahaemi, ami mbup, nsutɔ mme edidiɔŋ ke enye ɔnɔ nnyin? Ndi mbufo emekan etiŋ?

3 Sese, ami mbɔrɔ nnɔ mbufo; koro nditɔ eka nnyin, mme Lamanite, ekedu ke ekim, iŋ, kpa ke obube emi ekimde akan, edi sese, owo mmɔ ifaŋ ke eda edi ete edikut utibe uŋwana Abasi! Ndien emi edi edidiɔŋ emi ekenɔde nnyin, ete ke enam nnyin mme ŋkpɔ utom ke ubɔk Abasi ndinam akamba utom etibe.

4 Sese, mme tɔsin ke otu mmɔ edaresit, ndien eda mmɔ edisin ke ubon Abasi.

5 Sese, iŋwaŋ ama adat, ndien ɔfɔfɔn ɔnɔ mbufo, koro mbufo efuŋde ofut ukpeŋe, enyuŋ edɔk ye ukeme mbufo, iŋ, ke ofuri usen ke mbufo ekenam utom; ndien sese ibat ebek mbufo! Ndien eye etaŋ mmɔ edɔŋ ke mme ebiet ubon mkpasip, man mmɔ ekubiara.

6 Iŋ, oyobio iditimke mmɔ inim ke isɔŋ ke akpatre usen; iŋ, ŋko mme ɔkpɔsɔŋ ofum idinuakke mmɔ; edi kini oyobio edide eye etaŋ mmɔ ebok ɔtɔ kiet ke ebiet mmɔ, man oyobio ukusim mmɔ; iŋ, ŋko mme ɔkpɔsɔŋ ofum idibinke mmɔ ika ebiet ekededi emi asua emekde ndimen mmɔ ŋka.

7 Edi sese, mmɔ edu ke ubɔk Jehovah idɔk, ndien mmɔ edi esie; ndien enye eye anam mmɔ eset ke akpatre usen.

8 Ekɔm enyene enyiŋ Abasi nnyin; yak nnyin ikwɔ itoro esie, iŋ, yak nnyin inɔ edisana enyiŋ esie ekɔm, koro enye anamde nnen nnen ido ke nsinsi.

9 Koro ekpedi nnyin ikidɔkke iwɔrɔ ke isɔŋ Zarahemla, ndima nditɔ eka nnyin emi, emi emade nnyin eti eti, ekpesuk eyaresit ye usua ebaŋa nnyin, iŋ, ndien mmɔ ŋko ekpedi isen owo enɔ Abasi.

10 Ndien edikem ete kini Ammon amaketiŋ mme ikɔ emi, eyen eka esie Aaron asua ɔnɔ enye, ete: Ammon, ami nkere nte ke idaresit fo emen fi ebe oduk ke uwɔk-inua.

11 Edi Ammon ɔdɔhɔ enye ete: Ami nwɔkke inua ke odudu mi, mme ke ifiɔk mi; edi sese, idaresit mi ɔyɔhɔ, iŋ, esit mi ɔyɔhɔ ye idara, ndien ami nyedaresit ke Abasi mi.

12 Iŋ, ami mɔfiɔk nte ke ami ndighe baba ŋkpɔ ndomo kiet; ke abaŋa odudu mi ami ndi mmem mmem; ke ntak oro ami ndiwɔkke inua mbaŋa idem mi, edi ami ndiwɔk inua mbaŋa Abasi mi, koro ke odudu esie ami mekeme ndinam kpukpru ŋkpɔ; iŋ, sese, uwak ikpɔ utibe ŋkpɔ ke nnyin inam ke isɔŋ emi, ke ntak emi ke nnyin iditoro enyiŋ esie ke nsinsi.

13 Sese, tɔsin nditɔ eka nnyin ifaŋ ke enye atat ke mme ubiak hell; enyuŋ eda mmɔ edi edikwɔ erifak ima, ndien emi ke ntak odudu ikɔ esie emi odude ke nnyin, ke ntak oro ndi nnyin inyeneke akwa ntak ndidaresit?

14 Iŋ, nnyin iminyene ntak nditoro enye ke nsinsi, koro enye edide Abasi Ibom, ndien atat nditɔ eka nnyin ke mme ŋkpɔkɔbi hell.

15 Iŋ, nsinsi ekim ye nsobo ema ekanare mmɔ ekuk; edi sese, enye ada mmɔ edi nsinsi uŋwana esie, iŋ, edi nsinsi erinyaŋa; ndien anana mbiet ɔyɔhɔ ima esie akanare mmɔ okuk; iŋ, ndien nnyin imidi mme ŋkpɔ utom ke mme ubɔk esie ke ndinam akwa ye utibe utom emi.

16 Ke ntak oro, yak nnyin idara, iŋ, nnyin iyidara ke Jehovah; iŋ, nnyin iye idaresit, koro idara nnyin ɔyɔhɔ; iŋ, nnyin iyitoro Abasi nnyin ke nsinsi. Sese, anie owo ikeme ndidara nkaha ke Jehovah? Iŋ, anie owo ikeme nditiŋ nkaha mbaŋa akwa odudu esie, ye mbɔm esie, ye anyan ime esie kabaŋa nditɔ owo? Sese, ami ndɔhɔ mbufo, ke ami nkemeke nditiŋ mbaŋa ubak emi ekpride akan emi ami nkopde.

17 Anie owo ikpikikere ete ke Abasi nnyin ekpe enyene utɔ mbɔm oro ke ndiwabade nnyin nsio ke idiɔk, idiɔk ŋkpɔ, ye ndedehe edu?

18 Sese, nnyin ikika kpa ke iyaresit, ye ɔkpɔsɔŋ ifiop-esit ndisobo ufɔk Abasi esie.

19 Oh ndien, ntak emi enye mikisinke nnyin ke idiɔk nsobo, ihŋ, ntak emi enye mikiyakke akaŋkaŋ unenikpe esie ekpi nnyin, onyuŋ esin nnyin ke nsinsi ukut?

20 Oh, ukpɔŋ mi, ekpri ayak eketie nte, efehe ke ekikere oro. Sese, enye ikinamke unenikpe esie ke idem nnyin, edi ke akwa mbɔm esie ada nnyin ebe nsinsi ukpe mkpa ye ukut, tutu esim erinyaŋa ukpɔŋ nnyin.

21 Ndien idahaemi sese, nditɔ eka mi, nso utɔ owo nte obot edide odu emi ɔfiɔkde mme ŋkpɔ emi? Ami ndɔhɔ mbufo, ke ndomo kiet iduhe emi ɔfiɔkde mme ŋkpɔ emi, ibɔhɔke mmɔ emi etuade ŋkpɔfiɔk.

22 Iŋ, enye emi akabare esit onyuŋ enyenede mbuɔtidem, onyuŋ anamde nti utom, onyuŋ ɔbɔŋde akam kpukpru ini itreke—utɔ oro ke enɔ ete ɔfiɔk mme ndibe ŋkpɔ Abasi; iŋ, utɔ oro ke edinɔ ete ayarade mme ŋkpɔ emi akananam owo ndomo kiet miyarakede; iŋ, ndien eyenɔ utɔ oro ete ada mme tɔsin ukpɔŋ edi erikabare esit, kpa nte ekenɔde nnyin ndida nditɔ eka nnyin emi ndi erikabare esit.

23 Idahaemi ndi mbufo emeti, nditɔ eka mi, ete ke nnyin ima idɔhɔ nditɔ eka nnyin ke isɔŋ Zarahemla, ke nnyin idɔk ika isɔŋ Nephi, ndikwɔrɔ ikɔ nnɔ nditɔ eka nnyin, mme Lamanite, ndien ke mmɔ ema esak nnyin nsahi?

24 Koro mmɔ ema edɔhɔ nnyin ete: Ndi mbufo ekere ete ke mbufo emekeme ndida mme Lamanite ndi ifiɔk akpanikɔ? Ndi mbufo ekere ke emekeme ndinam mme Lamanite enyime ete ke mme ido mme ete mmɔ edi idiɔk, nte mme ɔsɔŋ-ibuot nte mmɔ edide; emi esit mmɔ enemde ke ndiduɔk iyip; emi ebiatde mme usen mmɔ ke ukwaŋ-ŋkpɔ emi ɔdiɔkde akan; emi mme usuŋ mmɔ edide mme usuŋ edue ibet tɔŋɔ ke eritɔŋɔ? Idahaemi nditɔ eka mi, mbufo eti ete ke emi ekedi usem mmɔ.

25 Ndien ke ndidian do mmɔ ema edɔhɔ ete: Yak nnyin iŋwana ekɔŋ ye mmɔ, man nnyin iwot mmɔ ye ukwaŋ-ŋkpɔ mmɔ isio ke isɔŋ, mbak mmɔ edikan nnyin inyuŋ iwot nnyin.

26 Edi sese, ndima nditɔ eka mi, nnyin ikidighe wilderness ye uduak ndiwot nditɔ eka nnyin, edi ye uduak ete ke ekeme ndidi ke nnyin imikeme ndinyaŋa usuk ukpɔŋ mmɔ.

27 Idahaemi kini esit nnyin ɔkɔfɔhɔde, ndien nnyin iyom ndifiak edem, sese, Jehovah ɔdɔŋ nnyin esit, onyuŋ ɔdɔhɔ ete: Eka ke otu nditɔ eka mbufo, mme Lamanite, enyuŋ eyɔ mme ukut mbufo ke ime, ndien ami nyɔnɔ mbufo erikan.

28 Ndien idahaemi sese, nnyin imidi, inyuŋ idu ke otu mmɔ; ndien nnyin iminyene ime ke mme ndutuhɔ nnyin, ndien nnyin imiyɔ unana ke utɔ ke utɔ; ihŋ, nnyin imisaŋa ke ufɔk ke ufɔk, idorienyin ke mme mbɔm ererimbot—idighe ke mme mbɔm ererimbot ikpɔŋ edi ke mme mbɔm Abasi.

29 Ndien nnyin imiduk ke esitmme ufɔk mmɔ inyuŋ ikpep mmɔ ŋkpɔ, ndien nnyin imikpep mmɔ ŋkpɔ ke mme efak mmɔ; iŋ, ndien nnyin imikpep mmɔ ŋkpɔ ke mme obot mmɔ; ndien nnyin ŋko imiduk ke esit mme temple mmɔ ye mme synagogue mmɔ inyuŋ ikpep mmɔ ŋkpɔ; ndien ebin nnyin esio, enyuŋ esahi, enyuŋ efiari etap, enyuŋ emia nnyin ke mbaŋ; ndien etɔ nnyin ke itiat, ndien emum enyuŋ ebɔp ye mme ɔkpɔsɔŋ uruk, enyuŋ esin ke ufɔk ŋkpɔkɔbi; ndien oto ke odudu ye ifiɔk Abasi efiak enamnnyin ibɔhɔ.

30 Ndien nnyin imiyɔ utɔ kpukpru ukut, ndien kpukpru emi, ete ke ekeme ndidi ke nnyin ididi usuŋ ndinyaŋa usuk ukpɔŋ; ndien nnyin ikikere ke idaresit nnyin ɔyɔyɔhɔ edieke nnyin idide usuŋ ndinyaŋa usuk.

31 Idahaemi sese, nnyin iyikan ise inyuŋ ikut mme mfri utom nnyin; ndien ndi mmɔ edi esisit? Ami ndɔhɔ mbufo, Iŋ iŋ, mmɔ ewak; iŋ, ndien nnyin imikeme nditie ntiense mbaŋa akpanikɔ mmɔ, ke ntak ima mmɔ kabaŋa nditɔ eka mmɔ ŋko ye ke abaŋa nnyin.

32 Koro sese, mmɔ enyime ndiwa uwem mmɔ utu ke mmɔ eda uwem asua mmɔ; ndien mmɔ ebuk mme ŋkpɔ ekɔŋ mmɔ ɔtuŋɔ ke isɔŋ, ke ntak ima emi mmɔ enyenede ebaŋa nditɔ eka mmɔ.

33 Ndien idahaemi ami ndɔhɔ mbufo, ndi utɔ akwa ima emi esi du ke ofuri isɔŋ emi? Sese, ami ndɔhɔ mbufo, Iŋ iŋ, iduhe, kpa ke otu mme Nephite.

34 Koro sese, mmɔ eye eka ekɔŋ ye nditɔ eka mmɔ; mmɔ iyakke ete ewot mmɔ. Edi sese ifaŋ ke otu emi eyak uwem mmɔ; ndien nnyin imifiɔk ite ke mmɔ eka ebine Abasi mmɔ, ke ntak ima mmɔ ye usua mmɔ kabaŋa idiɔk ŋkpɔ.

35 Idahaemi ndi nnyin inyeneke ntak ndidaresit? Iŋ, ami ndɔhɔ mbufo, akananam mme iren iduhe emi ekenyenede utɔ akwa ntak ndidaresit nte nnyin, tɔŋɔ ke eritɔŋɔ ererimbot; iŋ, ndien idaresit mi okpon, tutu esim ndiwɔk inua ke Abasi mi; koro enye enyene kpukpru odudu, kpukpru ɔniɔŋ, ye kpukpru ifiɔk; enye ɔfiɔk kpukpru ŋkpɔ, ndien enye edi Abasi emi enyenede mbɔm, tutu ke erinyaŋa, ɔnɔ mbon emi edikabare esit inyuŋ ibuɔtidem ke enyiŋ esie.

36 Idahaemi edieke emi edide uwɔk inua, kpa ntre ke ami ndi wɔk inua; koro emi edi uwem mi ye uŋwana mi, idaresit mi ye erinyaŋa mi, ye erifak mi nsio ke nsinsi idiɔk. Iŋ, ekɔm enyene enyiŋ Abasi mi, emi ekerede abaŋa ikɔt esie, emi edide ŋkɔk eto Israel, ndien ema esop ekpɔŋ idem esie ke esen idut; iŋ, ami ndɔhɔ, ekɔm enyene enyiŋ Abasi mi, emi ekerede abaŋa nnyin, emi iyode ke esen idut.

37 Idahaemi nditɔ eka mi, nnyin ikut ite ke Abasi ekere abaŋa kpukpru owo, ke isɔŋ ekededi emi mmɔ edude; iŋ, enye abat ikɔt esie, ndien esit mbɔm esie akara ofuri ererimbot. Idahaemi emi edi idaresit mi, ye akwa ekɔm mi; iŋ, ndien ami nyɔnɔ Abasi mi ekɔm ke nsinsi. Amen.