1 Ere chiney, ireray e thin ku Ammon ngakʼ pi walagen, ni gaʼar: Walageg nge pi gidiiʼ rog, musap gaed gube yoeg ngomed, ni ribaʼfan ni ngad falfalaenʼ gaed; ya gul rayog ni ngad lemniged faram ko ngiyalʼ ni kad chuw gaed ko fare binaw nu Zarahemla, nra piiʼ Got ngodaed e tiney e tawaʼath?

2 Ere chiney, gube fithmed, mang e pi tawaʼath ni thʼabi gaaʼ ni ke gagyeg nag nga dakeandaed? Rayog ni nga moeged?

3 Musap gaed, bay gupiiʼ e fulweg riy ni paʼmed; ya pi walagdaed, ni fapi Lamanites, e ur moyed u fithikʼ e lumor, arragon, u lan ba loew ni thʼabi lumor mab toʼaer, machane musap gaed, ini yaed e kan fekraed iyib kar guyed fare tamilang ku Got! Ere biney e ireray fare tawaʼath ni kan gagyeg nag nga dakeandaed, ni nge yog ni ngad manged talin e muruwel u paʼ Got ni ngad muguʼuliyed e re muruwel ney ni thʼabi felʼ.

4 Musap gaed, yu biyuʼ i yaed e kar falfalaenʼ gaed, ma kan fekraed nga lan e ulung ku Got.

5 Musap gaed, farengi raed e ke loel, ma nge felʼ waʼathmed, ya kam furuyed e kama romed, kam kunuyed e waʼamngin u gelingmed, arragon, nib poloʼ e rran ni kam muruwel gaed; ere musap gaed, ngam guyed urngin e thum ni ke yog ngomed! Ma bay ni kunuy raed nga naʼun ko grain, ni nge dabi kireb.

6 Arragon, ni nga dabra puth gaed nga butʼ ko yokoʼ ko bin tomur e rran; arragon, ara rapuw gaed ngalang ko nifeng ni gel; machane napʼan nra yib e yokoʼ ma bay ni kunuy raed nga taʼabang nga tagilʼ raed, ni nge dabiyog ni rich e yokoʼ ngoraed; arragon, ara lulubiy raed e nifeng u butʼ ko gin ni be finey e toʼogor roraed ni nge fekraed iyaen ngay.

7 Machane musap gaed, yaed bay u paʼ fare Somoel ni ma piiʼ e tawaʼamngin, mab milsuwraed ngakʼ; ma ra fekraed ngalang ko bin tomur e rran.

8 Ngad oged e magaer ngakʼ e Got rodaed; maroed ngad tang gaed ngad oged e magaer ngakʼ, arragon, maroed ngad oged e magaer ngakʼ u fithingan nib thothupʼ, ya ire ma rinʼ e muruwel nib matʼaw ni gubinfen.

9 Ya faʼan gomanga dadbaed nga wuruʼ fare binaw nu Zarahemla, ma pichaʼaney ni walagdaed ni rib tʼuf rodaed, ni kuʼur tʼufeged gadaed, e kar pired ni yaed ba fananikayed gadaed, arragon, ma kar pired ni dar nanged Got.

10 Ere yibi buch u napʼan ni Ammon e ke yoeg e pi thin ney, ma Aaron ni walagen e chiyliy ngakʼ, ni be gaʼar: Ammon, gube rus ngay ni falfalaenʼ rom e nge fekem iyaen ko ʼufʼuf.

11 Machane Ammon e gaʼar ngakʼ: Dagur ʼuf nga gelingig, ara gonop ni bay rog; machane musap, ka rigel e falfalaenʼ rog, arragon, gumʼirchaʼ rog e ke sug ke mapʼ nga butʼ ko falfalaenʼ, ere nggu falfalaenʼ ko Got rog.

12 Arragon, gag e gumnang ni dariy rogog; ni faʼanra gelingiy e nga noeg, me gag e gub moʼowaer; ere gag e dabgu ʼuf ngog, machane gura ʼuf ko Got rog, ya dakean gelingin e rayog ni ngug rinʼ gubin banʼen riy; arragon, musap, boʼor bogi maʼangʼang ni kad rinʼed u lan e giney e nam, ni aramfan ni ngad oged e magaer u dakean fithingan ni gubinfen.

13 Musap, in e biyuʼ i walagdaed ni ke bayuliyraed ko fare gechig ni amith nu infiernoʼ; me yog ni ngar tang niged e falfalaenʼ ni kan bayuliyraed u dakean e murnguy, ma bachan fare gelingin e thin rokʼ ni bay roraed, ere dariy tapgin nib gel ni ngad falfalaenʼ gaed?

14 Arragon, bay tapgin ni ngad oged e magaer ngakʼ ni gubinfen, ya ir fare Got ni Thʼabi Tolang, ma ke chuweg pi walagdaed ko fare chen nu infierno.

15 Arragon, ur moyed nib liyeg raed farengi lumor nge gafgow ni dabimus biʼid; machane musap, ke thapegraed ko tamilang rokʼ ni dabimus biʼid, arragon, nga lan ba yafos ni dabimus biʼid; ma ke liyegraed e tʼufeg rokʼ ni dariy u bayang; arragon, ma kuʼud manged talin e muruwel u lan paʼ ni fan ko re muruwel ney nib gaaʼ mab maʼangʼang.

16 Ere, ngad ʼuf gaed, arragon, ngad ʼuf gaed ngakʼ Somoel; arragon, ngad falfalaenʼ gaed, ya falfalaenʼ rodaed e kari gel; arragon, ngad oged e magaer ku Got rodaed ni gubinfen. Musap, miniiʼ e rayog ni nge ʼuf ngakʼ Somoel nge pag rogon? Arragon, miniiʼ e rayog rokʼ ni nge weliy morngaʼagen gelingin nge pag fini yoʼor yay, nge murnguy rokʼ, nge gumaenʼ rokʼ ko gafgow ni tay ni fan ngakʼ e gidiiʼ? Musap gaed, gube yoeg ngomed, dabiyog ni nggu weliy e gin thʼabi achichig riy u laninʼug.

17 Miniiʼ e yog ni nang ni Got rodaed e basug ko murnguy ni nge chuweg daed ko rangi dodow rodaed nib kireb, mab sug ko denen, nge gafgow?

18 Musap gaed, u daroed iyaen u fithikʼ e damomuw, ni gadaed be guy rogon ni ngad gatheayed e galasia rokʼ.

19 O ere, mangfan ni de piiʼ daed nga fithikʼ e gafgow ni ubchiyaʼ, arragon, ma mangfan ni de pag e sayden ko gechig rokʼ nge aw nga dakeandaed, me dugliy daed ko tagilʼ ni dariy e athap riy ni manechubog?

20 O, yaʼel rog, e be chugur, ni chuw rog ni kemus nggu lemnag. Musap gaed, de gagyeg nag e justice rokʼ nga dakeandaed, machane murnguy rokʼ nib gel e ke fek daed u dakean e binem e loew ko yamʼ nge gafgow ni dabimus biʼid, nge yibi madaʼ ko thap rodaed ni poloʼ.

21 Ere chiney e musap gaed, pi walageg, miniiʼ e re gidiiʼ nib fekyath ni manang e pinnʼey? Gube yoeg ngomed, ni dariy beeʼ ni manang e pinnʼey, ma kemus ni piʼin be kalngaenʼ.

22 Arragon, chaʼ ni ra kalngaenʼ me muruwel ko mich rokʼ me rinʼ e pi muruwel nib mangil, me puthputhuy e meybil ni dabi tal—e ireram e chaʼ ni yira piiʼ ngakʼ ni nge nang e tin riyulʼ ku Got nib miith; arragon, ireram e chaʼ ni yira piiʼ ngakʼ ni nge yiʼiy nag e pinʼen ni dawor ni yiʼiy nag; arragon, ma yira piiʼ ngakʼ e chaʼanem ni nge yognag e kalngaenʼ ngakʼ yu biyuʼ e gidiiʼ, ni boed ni kan piiʼ ngodaed ni ngad feked e piʼin walagdaed ney iyib ko kalngaenʼ.

23 Ere chiney e kagmed manang, o pi walageg, ni faʼan doeged ngakʼ pi walagdaed u lan fare binaw nu Zarahemla, ni nga daroed ko fare binaw ku Nephi, ni ngad machib niged pi walagdaed, ni fapi Lamanites, mar minmingaed maʼur muning niged gadaed?

24 Ya ragaʼar gaed ngodaed: Gimed be lemnag ma ra yog romed ni ngam feked fapi Lamanites nge tamilang laniyaenʼraed ko tin riyulʼ? Gimed be lemnag ma ra yog romed ni ngam micheged u waenʼ fapi Lamanites ni dematʼaw fapi yalen ko pi chitamangraed, ni yaed bogi gidiiʼ ni aram fini ʼelʼel laniyaenʼraed; ni yaed e piʼin ni yaed baʼadag e puʼoeg rachaʼ; ni yaed e piʼin ni kar pired u lan e pi rran roraed u fithikʼ e denen ni thʼabi kireb; ni yaed e piʼin ni woʼraed e woʼen e tagan ni aram ko sommʼon? Ere chiney o pi walageg, ka gimed manang ni ireray e thin roraed.

25 Nge ku boech ni ka roeged: Ngad feked e talin e cham rodaed nga daroed ngoraed ni cham, ngad liiʼedraed ngar chuw gaed nge pi denen roraed u dakean e nam, nge siy ragel gaed ngodaed mar liiʼed gadaed.

26 Machane musap gaed, o pi walageg nib tʼuf rog, kad baed nga lan wuruʼ e binaw ni gathi kad nomeged ni ngad liiʼed pi walagdaed, ya gadaed be nomeg ni gomanga yog ngad ayuweged boechi yaed.

27 Chiney e napʼan ni moʼowaer laniyaenʼ daed, me yaen ni ngad suloed, musap gaed, fare Somoel e piiʼ e gapas nga laniyaenʼ daed me gaʼar: Mmaroed nga fithikʼ pi walagmed, ni fapi Lamanites, ma ngam gumʼaenʼiyed e pi gafgow romed, ma bay gupiiʼ ngomed ni nge yog ni ngam muguʼuliyed.

28 Ere chiney e musap gaed, kad baed, ma kadaroed u fithikʼraed iyaen; ma kuʼud gumʼaenʼ gaed u fithikʼ e pi gafgow rodaed, ma kad pirʼeged gubin e pi moʼomawʼ; arragon, ka danoed u rebo naʼun nga reb, ni be pagaenʼdaed ko murnguy nu fayleng—ma gathi kemus ni yigoʼ murnguy nu fayleng ya ku aram rogon ko murnguy ku Got.

29 Ma kadaroed nga naʼun roraed ngad filed ngoraed, ma kad filed ngoraed u lan e pi kanawoʼ roraed; arragon, kad filed ngoraed u dakean e pi yungi falang roraed; ma ku daroed nga langgin e pi temple roraed nge pi tagilʼ e moʼolung roraed ngad filed ngoraed; ma ka ninʼdaed nga wean, ma kan muning nagdaed, ma kan thuw nga dakeandaed, ma kan bat nag linglingidaed; ma kan malang nagdaed, ma kan fek daed ni kan mʼag daed ko gaf, ma kaninʼ daed nga kalbus; mu dakean gelingin nge gonop ku Got e ke chuweg daed riy bayay.

30 Ma kad pirʼeged gubin mit e gafgow, ni fan gubin e pinnʼey e gomanga yog ni ngad thapeged boech e gidiiʼ; ma uda lemniged nra gel e falfalaen rodaed ni faʼanra yog ni ngad thapeged boech e gidiiʼ.

31 Ere chiney e musap gaed, rayog ni ngad sap gaed ma gaed guy waʼamngin e pi muruwel rodaed; ere kad guyed niba lich? Gube yoeg ngomed, Dangay, ya yaed bayoʼor; arragon, ma rayog ni ngad guyed faraed yulʼyulʼ, ni bachan e murnguy roraed ngakʼ pi walagraed nge gadaed.

32 Ya musap gaed, ka yugub felʼ ni ngar maligach niged e yafos roraed ko bin ni ngar feked e yafos ko toʼogor roraed; ma kar kʼeyaged e pi talin e cham roraed nga fithikʼ e butʼ nib toʼaer, ni bachan e murnguy roraed ngakʼ pi walagraed.

33 Ere chiney musap gaed gube yoeg ngomed, ki immoy ba tʼufeg ni aram fini gel u bingyalʼ u lan gaʼangin yang e nam? Musap gaed, gube yoeg ngomed, Dangay, dariy bingyalʼ, ni aram rogon u fithikʼ fapi Nephites.

34 Ya musap gaed, yaedra fek talin e cham roraed ni ngar liiʼed pi walagraed; dabra paged yaed ngan liiʼraed. Machane musap gaed ini yaed e kar paged yaed kan liiʼraed; ma gaed manang ni kar piiʼed yaed ngakʼ e Got roraed, ni bachan e adag roraed nge bachan e fananikan roraed nib kun ko denen.

35 Ere chiney e dariy tapgin ni ngad falfalaenʼ gaed? Arragon, gube yoeg ngomed, dariy bingyalʼ ni immoy e gidiiʼ ni bay tapgin ni ngar falfalaenʼ gaed ni boed rogdaed, ni kaʼaram iyib ko ngiyalʼ nni sunmiy e fayleng riy; arragon, nge falfalaenʼ rog e ke fekeg iyaen, ni nggu ʼuf ko Got rog; ya ir gubin e gelingin, nge gubin e gonop, nge gubin e nangaenʼ; ma gubin banʼen ma rayog rokʼ, ma ir Beeʼ nib sug ko murnguy, nge madaʼ ko ngiyalʼ ni ke yog e yafos ni manemus, ngakʼ e piʼin ni yaedra kalngaenʼ me michaenʼraed nga fithingan.

36 Ere chiney e faʼanra ireray e ʼufʼuf, me ere nggu ʼufʼuf; ya ireray e yafos rog nge tamilang rog, falfalaenʼ rog, nge thap rog, nge bayul rog ni nggu chuw ko fare gafgow ni dariy nʼumngin i napʼan. Arragon, gube oge magaer nga fithingan e Got rog, niʼir e yug be lemnag e pi gidiiʼ ney, ni yaed ba paʼ i paʼangin fare ke gakʼiy ku Israel, ma ke malog ko kenggin u lan ba nam; arragon, gube gaʼar, gube oge magaer nga fithingan e Got rog, niʼir e yug ma lemnagdaed, ni gaed be maletheay iyaen u lan ba nam.

37 Ere chiney o pi walageg, kad guyed ni Got e ma lemnag gubin e gidiiʼ, ni demutrug ko kun nam e yaed bay riy; arragon, manang urngin e gidiiʼ rokʼ, nge murnguy u lan ngorngoren e bay ngakʼ gubin e gidiiʼ nu fayleng. Ere chiney e ireray e falfalaenʼ rog, nge wup magaer rog nib gel; arragon, gura oge magaer ni gubinfen ngakʼ e Got rog. Amen.