1 Idahaemi edikem ete kini mme Lamanite oro emi ekekade ekɔŋ ye mme Nephite ema ekekut, ke mmɔ ema ekeŋwana ke uwak usuŋ ndiwot mmɔ, ete ke ekedi ke ikpikpu ndiyom nsobo mmɔ, mmɔ efiak enyɔŋ edi isɔŋ Nephi.

2 Ndien edikem ete mme Amalekite, ke ntak sikitakde mmɔ, ema eyaresit eti eti. Ndien kini mmɔ ekekutde ete ke mmɔ ikanke isio usiene ito mme Nephite, mmɔ etɔŋɔ ndidemere mme owo ke iyaresit ye nditɔ eka mmɔ, mbon Anti-Lehi-Nephi; ke ntak oro mmɔ efiak etɔŋɔ ndiwot mmɔ.

3 Idahaemi mbon emi efiak esin nditaŋ mme ŋkpɔ ekɔŋ mmɔ, ndien mmɔ eyak ewot mmɔ nte asaŋade ye mme uduak mme asua mmɔ.

4 Idahaemi kini Ammon ye nditɔ eka esie ekekutde utom nsobo emi ke otu mbon emi mmɔ ekemade eti eti, ye ke otu mbon emi ekemade mmɔ eti eti—koro ekeda mmɔ nte mmɔ ekedi mme angel emi Abasi ɔdɔŋde ete edinyaŋa mmɔ osio ke nsinsi nsobo—ke ntak oro, kini Ammon ye nditɔ eka esie ekekutde akwa utom nsobo emi, mmɔ ema eyɔhɔ ye mbɔm, ndien mmɔ edɔhɔ edidem ete:

5 Yak nnyin ibok ikɔt Jehovah emi ɔtɔ kiet, ndien yak nnyin isuhɔre ika isɔŋ Zarahemla ibine nditɔ eka nnyin mme Nephite, inyuŋ ifehe iwɔrɔ kubɔk mme asua nnyin, man mmɔ ekuwot nnyin.

6 Edi edidem ɔdɔhɔ mmɔ ete: Esese, mme Nephite eyewot nnyin, ke ntak uwak uwot owo ye mme idiɔk ŋkpɔ emi nnyin inamde mmɔ.

7 Ndien Ammon ɔdɔhɔ ete: Ami nyaka nkobup Jehovah, ndien edieke enye ɔdɔhɔde nnyin, isuhɔre ika ibine nditɔ eka nnyin, ndi mbufo eyeka?

8 Ndien edidem ɔdɔhɔ enye ete: Iŋ, edieke Jehovah ɔdɔhɔde nnyin ete eka, nnyin iyisuhɔre ika ibine nditɔ eka nnyin, ndien nnyin iyidi ifun mmɔ tutu nnyin ikan ikpe utip uwak uwot owo ye mme idiɔk ŋkpɔ emi nnyin inamde ye mmɔ.

9 Edi Ammon ɔdɔhɔ enye ete: Isaŋake kiet ye mbet nditɔ eka nnyin, emi ete mi akasiakde, ete yak ifun ndomo kiet ukudu ke otu mmɔ; ke ntak oro yak nnyin isuhɔre ika inyuŋ idorienyin ke mme mbɔm nditɔ eka nnyin.

10 Edi edidem ɔdɔhɔ enye ete: Bup Jehovah, ndien edieke enye ɔdɔhɔde nnyin ete eka, nnyin iyika; midihe ntre nnyin iyikpa ke isɔŋ emi.

11 Ndien edikem ete Ammon aka okobup Jehovah, ndien Jehovah ɔdɔhɔ enye ete:

12 Sio mbon emi ke isɔŋ emi, man mmɔ ekukpa; koro Satan enyene ɔkpɔsɔŋ odudu ke esit mme Amalekite, emi edemere mme Lamanite ke iyaresit abaŋa nditɔ eka mmɔ ndiwot mmɔ; ke ntak oro wɔrɔ ke isɔŋ emi; ndien ediɔŋ mbon emi ke emana emi, koro ami nyetim mmɔ nnim.

13 Ndien idahaemi edikem ete ke Ammon aka onyuŋ ɔdɔhɔ edidem ofuri ikɔ emi Jehovah ɔkɔdɔhɔde enye.

14 Ndien mmɔ esobo kpukpru ikɔt mmɔ ɔtɔ kiet, iŋ, kpukpru ikɔt Jehovah, ndien ema ebok kpukpru ufene ye mme enaŋ mmɔ ɔtɔ kiet, ndien ewɔrɔ ke isɔŋ oro, enyuŋ ediduk wilderness emi akabahare isɔŋ Nephi ye isɔŋ Zarahemla, ndien edikpere mme adaŋa isɔŋ oro.

15 Ndien edikem ete Ammon ɔdɔhɔ mmɔ ete: Esese, ami ye nditɔ eka mi iyika ke isɔŋ Zarahemla, ndien mbufo eyebet mi tutu nnyin inyɔŋ idi; ndien nnyin iyifiɔk esit nditɔ eka nnyin, mme mmɔ eyeyak ete mbufo ediduk ke isɔŋ mmɔ.

16 Ndien edikem ete nte Ammon akakadeokoduk isɔŋ oro, ete enye ye nditɔ eka esie ema esobo ye Alma, ke ebiet emi eketiŋde ebaŋa; ndien sese, emi ekedi edisobo idara.

17 Idahaemi idaresit Ammon ama okpon tutu enye ɔyɔhɔ; iŋ, enye ama ɔyɔhɔ ye idaresit Abasi esie, tutu odudu ekure enye; ndien enye ama afiak ɔduɔ ke isɔŋ.

18 Idahaemi ndi emi ikidighe akamba idaresit? Sese, emi edi idaresit emi owo ndomo kiet minyeneke ibɔhɔke owo emi atuade ŋkpɔfiɔk ke akpanikɔ ye emi oyomde inemesit ke nsuhɔre idem.

19 Idahaemi idaresit Alma ke ndisobo ye nditɔ eka esie ama okpon ke akpanikɔ, ŋko ye idaresit Aaron, Omner, ye Himni; edi sese idaresit mmɔ ikikanke odudu mmɔ.

20 Ndien idahaemi edikem ete Alma ada nditɔ eka esie usuŋ afiak ɔnyɔŋ isɔŋ Zarahemla; aka kpa ufɔk esie. Ndien mmɔ eka enyuŋ edɔhɔ ada ibuot mme ebiere ikpe kpukpru ŋkpɔ emi eketibede ɔnɔ mmɔ ke isɔŋ Nephi, ke otu nditɔ eka mmɔ, mme Lamanite.

21 Ndien edikem ete ke ada ibuot mme ebiere ikpe ɔnɔ ntɔt ke ofuri isɔŋ, oyom uyo mme owo kabaŋa ndiyak nditɔ eka mmɔ, emi ekedide ikɔt Anti-Nephi-Lehi eduk.

22 Ndien edikem ete ke uyo mme owo edi, ete: Sese, nnyin iyisana isɔŋ Jershon iyak, emi odude ke edem usiaha utin inyaŋ, emi adianade isɔŋ Bountiful, emi odude ke usuk usuk isɔŋ Bountiful; ndien isɔŋ emi Jershon edi isɔŋ emi nnyin idinɔde nditɔ eka nnyin nte inyene.

23 Ndien sese, nnyin iyinim mbon ekɔŋ nnyin ke ufɔt isɔŋ Jershon ye isɔŋ Nephi, man nnyin ikpeme nditɔ eka nnyin ke isɔŋ Jershon; ndien emi nnyin inam inɔ nditɔ eka nnyin, ke ntak ndik mmɔ ndiŋwana ekɔŋ ye nditɔ eka mmɔ mbak mmɔ ekunam idiɔk ŋkpɔ; ndien akwa ndik mmɔ emi odu ke ntak akamba erikabare esit emi mmɔ ekenyenede, ke ntak uwak uwot owo mmɔ ye ɔkpɔsɔŋ ibak mmɔ.

24 Ndien idahaemi sese, emi ke nnyin idinam inɔ nditɔ eka nnyin, man mmɔ enyene isɔŋ Jershon; ndien nnyin iyida mbon ekɔŋ nnyin ikpeme mmɔ ibaŋa mme asua mmɔ, edieke mmɔ edinɔde nnyin ubak inyene mmɔ man aŋwam nnyin ndikama mbon ekɔŋ nnyin.

25 Idahaemi, edikem ete kini Ammon ama ekekop emi, enye ɔnyɔŋ ebine ikɔt Anti-Nephi-Lehi, ndien ŋko Alma ye enye, eka wilderness, emi mmɔ eke ewukde mme tent mmɔ, enyuŋ enam mmɔ efiɔk kpukpru ŋkpɔ emi. Ndien Alma ŋko etiŋ ɔnɔ mmɔ abaŋa nkabare esit esie, ye Ammon ye Aaron, ye nditɔ eka esie.

26 Ndien edikem ete ama anam akamba idaresit odu ke otu mmɔ. Ndien mmɔ esuhɔre eka ke isɔŋ Jershon, enyuŋ eda isɔŋ Jershon enyene; ndien mme Nephite ekot mmɔ ikɔt Ammon; ke ntak oro ekefiɔk mmɔ ye enyiŋ oro tɔŋɔ ke ini oro ka iso.

27 Ndien mmɔ ekedu ke otu ikɔt Nephi, ndien ŋko ebat mmɔ esin ke otu mbon ufɔkAbasi Abasi. Ndien ekefiɔk mmɔ ŋko ke nsin ifik mmɔ kabaŋa Abasi, ye ŋko kabaŋa owo; koro mmɔ ema enam akpanikɔ eti eti enyuŋ edi nnen nnen ke kpukpru ŋkpɔ; ndien mmɔ ema esɔŋɔ eda ke mbuɔtidem mmɔ ke Christ, tutu esim utit.

28 Ndien mmɔ ema ese ndiduɔk iyip nditɔ eka mmɔ ye ɔkpɔsɔŋ usua; ndien owo ikanke inam mmɔ enyime ndi ŋwana ekɔŋ ye nditɔ eka mmɔ; ndien mmɔ ikesehe mkpa ye adaŋa ndik ndomo kiet, ke abaŋa idorenyin ye ekikere mmɔ mbaŋa Christ ye eriset ke mkpa; ke ntak oro, ke Christ akakande mkpa ama emen mkpa ɔnɔ mmɔ.

29 Ke ntak oro, mmɔ eyeyɔ mkpa ke ata ubiak ye idiɔk usuŋ emi abiakde owo akan emi nditɔ eka mmɔ ekemede ndinam, mbemiso mmɔ ekan emen akaŋkaŋ mme cimeter ndiwot mmɔ.

30 Ndien ke ntem mmɔ ekedi mbon ekesinde ifik ye emiekemade, mbon emi Jehovah eke ɔkɔdiɔŋde eti eti.