1 Ere chiney e yibi buch u tomuren ni kan ayliy fapi gidiiʼ ku Ammon nga lan fare binaw nu Jershon, nge ku arragon fare galasia nni ayliy nga lan fare binaw nu Jershon, nge fapi salthaw ko fapi Nephites e kan tayraed nib liyeg fare binaw nu Jershon, arragon, u lan gubin e pi mathil nib liyeg fare binaw nu Zarahemla; ma fapi salthaw ko fapi Lamanites e kar laeked pi walagraed nga lan wuruʼ e binaw.

2 Ere immoy ba mael ni rib gaaʼ ntay; arragon, ni dariy reb ni yimnang morngaʼagen ni aram rogon bingyalʼ u fithikʼ fapi gidiiʼ u dakean e nam ni aram iyib ko ngiyalʼ ni chuw Lehi u Jerusalem; arragon, ma ragag e biyuʼ ko fapi Lamanites e kan liiʼraed ma boech e ra garar gaed u dakean e nam.

3 Arragon, ma kub almarin ba yamʼ ni aw nga fithikʼ fapi gidiiʼ ku Nephi; machane, fapi Lamanites e ni tuluf raed ngar werwer gaed, ma fapi gidiiʼ ku Nephi e ra suloed bayay ko binaw roraed.

4 Ere chiney e ngiyalʼ ney e bangiyalʼ i nʼen nib almarin e mayoer nge diloloʼ ni ke wer thiin u dakean gaʼangin yang e nam, u fithikʼ fapi gidiiʼ ku Nephi—

5 Arragon, mayoer ni be tay e piʼin nib ppin ni yaed be yoer nag pi figirngiraed, nge mayoer ko pi matam ni yaed be yoer nag pi pagael ni fakraed, nge pi walag ni ppin ni yaed be yoer nag walagraed ni pumoʼon, arragon, nge pi walag ni pumoʼon ni yaed be yoer nag e pi chitamangraed; ere aray rogon laman e mayoer nni rungʼag u fithikʼraed, ni yaed gubin ni yaed be yoer nag e gidiiʼ roraed ni kar mʼaed.

6 Ere chiney e riyulʼ ni ireray rebo rran nib gel e kirbaenʼ ntay riy; arragon, bangiyalʼ i nʼen nib gel e mʼingaenʼ, nge bangiyalʼ nʼen ni yibe baley nag e abich ma yibe meybil.

7 Ere aray rogon ni mus e bin ragag nge lal e duw ko fare lung ko fapi tapuf-oloboch nga dakean fapi gidiiʼ ku Nephi;

8 Ere ireray fare chep ku Ammon nge pi walagen, nge milekag roraed u lan fare binaw ku Nephi, nge pi gafgow roraed u lan e binaw, nge pi kirbaenʼ roraed, nge buchbuch ko tafnaey roraed, falfalaenʼ roraed ni dabiyog i weliy rogon, nge ayal ni tay pi walagraed u lan fare binaw nu Jershon. Ere chiney e nge falʼeg Somoel, ni fare Tabiyul ko gubin e gidiiʼ, waʼathraed ni gubinfen.

9 Ere ireray fare chep ko pi mael nge togopluw u fithikʼ fapi Nephites, nge pi mael u thilin fapi Nephites nge fapi Lamanites; ma aram me yaeni mus e bin ragag nge lal e duw ko fare lung ko fapi tapuf-oloboch.

10 Ere aram ko bin sommʼon e duw nge madaʼ ko bin ragag nge lal e ke buch riy e gafgow ni yamʼ ngakʼ bukun e biyuʼ e gidiiʼ; arragon, ke buch riy ba puʼoeg rachaʼ nib almarin.

11 Nge pi ldoew ni bukun e biyuʼ e kan kʼeyag nib toʼaer nga fithikʼ e butʼ, u napʼan ni kubay boech e ldoew ni bukun e biyuʼ ni ke meal ni yu ulung u dakean e nam; arragon, ma bukun e biyuʼ e tin be yoer nag e gidiiʼ roraed ni kar mʼaed, ya bachan e baʼfan ni ngar rus gaed, ni boed ni michmicheg Somoel, ni ngar awgaed nga ba dodow ko gafgow ni dariy nʼumngin i napʼan.

12 Napʼan ni bukun e biyuʼ e piʼin nibe yoer ni fan ngakʼ e pi gidiiʼ roraed ni kar mʼaed, ma ku yaed be falaenʼ nge falfalaenʼ u fithikʼ e athap, nge tamilngaenʼ, ni boed e michmich ni tay Somoel, ni yaedra fos ngar pired nga baʼan matʼaw i paʼ Got, u ba dodow ko falfalaenʼ ni dariy tungun.

13 Ere aray ni kad guyed fini thilthil rogon nra yaeni awe gidiiʼ ni bachan e denen nge ngongol ni kireb, nge fare gelingin ku moʼoniyanʼ, ni ma yib u dakean e lem ni sasaliyeb ni ke tay ni nge luguy nag gumʼirchaʼen e gidiiʼ.

14 Ere ireray ni kad guyed fare poeng ko lʼagaenʼ ko gidiiʼ ni ngar muruwel gaed u lan farengi mileayʼ ku Somoel; ere kad guyed tapgin e kirbaenʼ nge falfalaenʼ—kirbaenʼ ni bachan e yamʼ nge gafgow nga fithikʼ e gidiiʼ, nge falfalaenʼ ni bachan fare tamilang rokʼ Kristus nga lan e yafos.