1 O ete ami mkpedi angel, ndien mkpenyene udɔŋ esit mi, man ami nka nyuŋ ntiŋ ikɔ ye ukotowo Abasi, ye uyo ndinyek ererimbot, ye ndikwɔrɔ erikabare esit nnɔ kpukpru owo!

2 Iŋ, ami nyetiŋ nnɔ kpukpru ukpɔŋ, ye uyo obuma, erikabare esit ye uduak erifak, man mmɔ ekabare esit enyuŋ edi etiene Abasi nnyin, man ukut ukudu aba ke kpukpru iso isɔŋ.

3 Edi sese, ami ndi erenowo, ndien nnam idiɔk ŋkpɔ ke udɔŋ mi; koro akpana nte ami nyuhɔ ye mme ŋkpɔ emi Jehovah ɔnɔde mi.

4 Ikpinaha nte ami nuak ke mme udɔŋ mi akpan ewuhɔ edinen Abasi, koro ami mɔfiɔk ke enye ɔnɔ mme owo nte asaŋade ye udɔŋ mmɔ, mme edi ɔnɔ mkpa mme ɔnɔ uwem; iŋ, ami mɔfiɔk ke enye ɔnɔ mme owo, iŋ, owuk mmɔ mme ewuhɔ emi mikpuhɔke, nte asaŋade ye mme uduak mmɔ, mme mmɔ edi enɔ erinyaŋa mme enɔ nsobo.

5 Iŋ, ndien ami mɔfiɔk nte ke eti ye idiɔk edu enɔ kpukpru owo; enye emi mifiɔkke ukpuhɔhere eti ye idiɔk anana ubiom ikpe; edi enye emi ɔfiɔkde eti ye idiɔk, enye ke enɔ nte mme udɔŋ esie edide, mme enye oyom eti mme idiɔk, uwem mme mkpa, idaresit mme ŋkpɔfiɔk esit.

6 Idahaemi, sia edide ke ami mɔfiɔk mme ŋkpɔ emi, ntak emi ami nyomde sikandendi nnam utom emi ekekotde mi ete nnam?

7 Ntak emi ami nyomde nte ke ami mkpedi angel, man ami ntiŋ ikɔ nnɔ kpukpru utit ererimbot?

8 Koro sese, Jehovah ɔnɔ kpukpru idut, idut mmɔ ye usem, ete ekpep ikɔ esie, iŋ, ke ifiɔk, kpukpru se enye okutde ete ke odot ete mmɔ enyene; ke ntak oro nnyin ikut ite ke Jehovah ɔnɔ item ke ifiɔk, nte asaŋade ye emi enende onyuŋ edide akpanikɔ.

9 Ami mɔfiɔk enye emi Jehovah ɔnɔde mi uyo, ndien amimburo ke enye. Ami mburoke mbaŋa idem mi, edi amimburo ke se Jehovah ɔnɔde mi uyo; ihŋ, ndien emi edi ubɔŋ mi, ete ke ekeme ndidi ke ami nyedi ŋkpɔ utom ke mme ubɔk Abasi ndida usuk ukpɔŋ ndi erikabare esit; ndien emi edi idaraesit mi.

10 Ndien sese, kini ami nkutde ediwak owo etuade ata ŋkpɔfiɔk, enyuŋ edide etiene Jehovah Abasi mmɔ, idaha oro ke ukpɔŋ mi ɔyɔhɔ ye idara; idaha oro ke ami nti se Jehovah anamde ɔnɔ mi, iŋ, kpa ete ke enye okop akam mi; iŋ, idaha oro ke ami nti ubɔk mbɔm esie emi enye aka anyanarede ɔnɔ mi.

11 Iŋ, ndien ami ŋko nti nkpɔkɔbi mme ete mi; koro ami ke akpanikɔ mɔfiɔk nte ke Jehovah ama anam mmɔ ebɔhɔ ewɔrɔ ke ufin, ndien oto ke emi ama asiak ufɔk Abasi esie; iŋ, Jehovah Abasi, Abasi Abraham, Abasi Isaac, ye Abasi Jacob, ama anam mmɔ ebɔhɔ ewɔrɔ ke ufin.

12 Iŋ, ami kpukpru ini meti nkpɔkɔbi mme ete mi; ndien Abasi kpa oro emi akanamde mmɔ ebɔhɔ ewɔrɔ ke ubɔk mme Egyptian ama anam mmɔ ebɔhɔ ewɔrɔ ke ufin.

13 Iŋ, ndien kpa Abasi oro ama asiak ufɔk Abasi esie ke otu mmɔ; iŋ, ndien kpa Abasi oro okokot mi ke edisana ikot, ete nkwɔrɔ ikɔ nnɔ mbon emi, onyuŋ ɔnɔ mi uwak eti utip, ke emi ami nyɔhɔde ye idaresit.

14 Edi ami ndat ke esit ke eti utip mi ikpɔŋ, edi idaresit mi etim ɔyɔhɔ ke ntak eti utip nditɔ eka mi, emi ekedɔkde eka isɔŋ Nephi.

15 Edi, mmɔ esin ifik enam utom, enyuŋ eda uwak mfri edi; ndien didie ke utip mmɔ edikpon!

16 Idahaemi, kini nkerede mbaŋa eti utip nditɔ eka mi emi emen ukpɔŋ esio, tutu ebahare enye esio ke idem mi, nte eketiede, idaresit mi etim ɔyɔhɔ.

17 Ndien yak Abasi ɔnɔ mmɔ, nditɔ eka mi emi, ete yak mmɔ esuhɔre etie ke obio ubɔŋ Abasi; iŋ, ŋkoye kpukpru mbon emi edide mfri utom mmɔ man mmɔ ekuwɔrɔ aba, edi man mmɔ etoro enye ke nsinsi. Ndien yak Abasi ayak ete enam nte asaŋade ye mme ikɔ mi, kpa nte ami ntiŋde. Amen.