1 Ndien edikem ke ntɔŋɔ ɔyɔhɔ isua ukara ition mmɔ eneni ɔtɔŋɔ ndidu ke otu mme owo; koro erenowo kiet, emi ekekotde Amlici, enye ekedi ata owo ŋkari, iŋ, ɔfiɔk ŋkpɔ ke ifiɔk ererimbot, enye ekedi nte utɔ erenowo emi okowotde Gideon ke akaŋkaŋ, emi ekewotde nte asaŋade ye mbet—

2 Idahaemi Amlici emi ama, ke ŋkari esie, oduri ediwak owo etiene enye; ewak tutu mmɔ etɔŋɔ ndinyene odudu eti eti; ndien mmɔ etɔŋɔ ndiyom usuŋ ndisiak Amlici nte edidem nnɔ mme owo.

3 Idahaemi emi ama anam mbon ufɔk Abasi eyomonsia, ŋko ye kpukpru mbon emi owo mikidurike itiene mme unyime Amlici; koro mmɔ ema efiɔk ete ke nte asaŋade ye mbet mmɔ ke ana nte esiak mme ŋkpɔ ntre ke uyo mme owo.

4 Ke ntak oro, edieke ekpekande eyak ete Amlici enyene uyo mme owo, enye, edide idiɔk owo, eyebɔ mmɔ mme unen ye mme odudu mmɔ ke ufɔk Abasi; koro ekedi uduak esie ndisobo ufɔk Abasi Abasi.

5 Ndien edikem ete mme owo esobo idem mmɔ ɔtɔ kiet ke kpukpru ofuri isɔŋ, owo kiet kiet nte asaŋade ye ekikere esit esie, mme enye akada ɔnɔ mme idaha inɔ Amlici, ke nsio nsio eboho, enyene uwak eneni ye mme mkpaidem eneni ye kiet eken.

6 Ndien ke ntem ke mmɔ ekesobo idem mmɔ ɔtɔ kiet nditiŋ ye uyo mmɔ ke abaŋa ŋkpɔ emi; ndien enim mmɔ ke iso mme ebiere ikpe.

7 Ndien edikem ete ke uyo mme owo ikidaha ye Amlici, ndien owo ikinamke enye edidem inɔ mme owo.

8 Idahaemi emi ama anam akamba idaresit odu ke esit mbon emi mikidaha ye enye; edi Amlici ama obumere mbon ekedade ye enye ke iyaresit abaŋa mbon mikidaha ye enye.

9 Ndien edikem ete mmɔ esobo idem mmɔ ɔtɔ kiet, enyuŋ esio Amlici enim nte edidem mmɔ.

10 Idahaemi kini ema ekenam Amlici edidem enɔ mmɔ enye ɔnɔ mmɔ uyo ete yak mmɔ etaŋ ŋkpɔ ekɔŋ ekeŋwana ye nditɔ eka mmɔ; ndien emi enye akanam man enye esin mmɔ ke idak esie.

11 Idahaemi ekediɔŋɔ ikɔt Amlici ke enyiŋ Amlici, ekot mmɔ mme Amlicite; ndien ekot mbon ekesuhɔre mme Nephite, mme ikɔt Abasi.

12 Ke ntak oro mbon mme Nephite ema efiɔk uduak mme Amlicite, ndien ke ntak oro mmɔ ema ebeŋidem ndisobo ye mmɔ; iŋ, mmɔ ema ekama mme akaŋkaŋ, ye mme ikwa, ye mme utigha, ye mme idaŋ, ye mme itiat, ye mme ikaŋ ɔkpɔ, ye kpukpru utɔ ŋkpɔ ekɔŋ, ke utɔ ke utɔ.

13 Ndien ke ntem ke mmɔ ekebeŋidem ndisobo ye mme Amlicite kini mmɔ edidide. Ndien ema emek mme etubom ekɔŋ, ye mme akamba etubom ekɔŋ, ye ada ibuot mme etubom ekɔŋ, nte ekemde ye ibat mmɔ.

14 Ndien edikem ete Amlici ama ɔnɔ mbon ekɔŋ esie kpukpru utɔ ŋkpɔ ekɔŋ ke utɔ ke utɔ; ndien enye ŋko ama emek mme andikara ye mme ada usuŋ ɔnɔ ikɔt esie, man eda mmɔ usuŋ ke ekɔŋ ye nditɔ eka mmɔ.

15 Ndien edikem ete mme Amlicite ema edi ke obot Amnihu, emi okodude ke edem usiaha utin eke akpa Sidon, emi ekefehede ke mben isɔŋ Zarahemla, ndien do mmɔ etɔŋɔ ndiŋwana ekɔŋ ye mme Nephite.

16 Idahaemi Alma, ekedide ada ibuot mme ebiere ikpe ye andikara mbon Nephi, ke ntak oro enye ɔdɔk aka ye ikɔt esie, iŋ, ye mme etubom ekɔŋ esie, ye ada ibuot mme etubom ekɔŋ esie, iŋ, ke ibuot mbon ekɔŋ esie, ndiŋwana ekɔŋ ye mme Amlicite.

17 Ndien mmɔ etɔŋɔ ndiwot mme Amlicite ke obot ke edem usiaha utin Sidon. Ndien mme Amlicite ema eŋwana ye mme Nephite ye akwa odudu, tutu ete ke mme Nephite ema eduɔ ke iso mme Amlicite.

18 Edi Jehovah ama ɔsɔŋ ubɔk mme Nephite, tutu mmɔ ewot mme Amlicite ata ediwak, ndien mmɔ etɔŋɔ ndifehe ke iso mmɔ.

19 Ndien edikem ete mme Nephite ema ebine mme Amlicite ke ofuri usen oro, enyuŋ ewot mmɔ ata ediwak, tutu ete ke ema ewot mme Amlicite tɔsin duopeba ye ikie ition ye edip ye duop ye ukpɔŋ iba; ndien ema ewot mme Nephite tɔsin itiokiet ye ikie ition ye ata ye ukpɔŋ iba.

20 Ndien edikem ete kini Alma mikikanke ibine mme Amlicite aba enye anam ete ikɔt esie ewuk mme tent mmɔ ke ebedeŋ Gideon, ekekot ebedeŋ emi edian Gideon emi ekewotde ke ubɔk Nehor ye akaŋkaŋ; ndien ke ebedeŋ emi ke mme Nephite ekewuk mme tent mmɔ ke okoneyo oro.

21 Ndien Alma ɔdɔŋ mbon-uyep ete etiene nsuhɔ mme Amlicite, man enye ɔfiɔk mme uduak ye mme ekikere mmɔ, man enye ekpeme idem esie abaŋa mmɔ, man enye etim ikɔt esie enim man owo idisobo.

22 Idahaemi ekekot mbon emi enye ɔkɔdɔŋde ete eyep nna-ekɔŋ mme Amlicite Zoram, ye Amnor, ye Manti, ye Limher; mmɔ emi ekedi mmɔ emi ekekade ye mbon ekɔŋ mmɔ ndiyep nna-ekɔŋ mme Amlicite.

23 Ndien edikem ete ke mkpɔŋ mmɔ enyɔŋ eka nna-ekɔŋ mme Nephite ke ata usɔp, ke ata mkpaidem, enyuŋ eyɔhɔ ye ndik, ete:

24 Sese, nnyin ima itiene nna-ekɔŋ mme Amlicite, ndien ke ata mkpaidem nnyin, ke isɔŋ Minon, ke enyɔŋ isɔŋ Zarahemla, ke usuŋ adade aka isɔŋ Nephi, nnyin ima ikut akwa udim mme Lamanite; ndien sese, mme Amlicite ediana ye mmɔ;

25 Ndien mmɔ ke eŋwana ye nditɔ eka nnyin ke isɔŋ oro; ndien mmɔ ke efehe ke iso mmɔ ye ufene mmɔ, ye iban mmɔ, ye nditɔ mmɔ, edi obio nnyin; ndien ibɔhɔke nnyin isɔp idem mmɔ eyebɔ obio nnyin enyene, ndien eyewot mme ete nnyin, ye iban nnyin, ye nditɔ nnyin.

26 Ndien edikem ete ikɔt Nephi etaŋ mme tent mmɔ, enyuŋ ewɔrɔ ke ebedeŋ Gideon eka ke nkaŋ obio mmɔ, emi ekedide obio Zarahemla.

27 Ndien sese, nte mmɔ ekebede akpa Sidon, mme Lamanite ye mme Amlicite, emi ekewakde ekpere, eketie nte, nte ntan inyaŋ, edisim mmɔ man ewot mmɔ.

28 Edi, mme Nephite ke ekedide ubɔk Jehovah ɔkɔnɔ mmɔ odudu, ema ebɔŋ akam ke ɔkpɔsɔŋ enɔ enye man enye anam mmɔ ebɔhɔ ke mme ubɔk mme asua mmɔ, ke ntak oro Jehovah ama okop mme eseme mmɔ, onyuŋ ɔnɔ mmɔ odudu, ndien mme Lamanite ye mme Amlicite ema eduɔ ke iso mmɔ.

29 Ndien edikem ete Alma ama aŋwana ye Amlici ye akaŋkaŋ, iso ye iso; ndien mmɔ ema eŋwana ke ata ɔkpɔsɔŋ, ye kiet eken.

30 Ndien edikem ete Alma, ke edide owo Abasi, ke okodude ke idakɔkpɔsɔŋ mbuɔtidem, eseme, ete: O Jehovah, tua mbɔm nyuŋ suhɔ uwem mi, man ami ndi ŋkpɔ utom ke ubɔk fo ndinyaŋa nyuŋ ntim mbon emi nnim.

31 Idahaemi kini Alma ama eketiŋ mme ikɔ emi enye afiak aŋwana ye Amlici; ndien enye enyene odudu, tutu ete enye owot Amlici ye akaŋkaŋ.

32 Ndien enye ŋko aŋwana ye edidem mme Lamanite; edi edidem mme Lamanite efehe afiak edem ke iso Alma onyuŋ ɔdɔŋ mbon ukpeme esie ete eŋwana ye Alma.

33 Edi Alma, ye mbon ukpeme esie, eŋwana ye mbon ukpeme edidem mme Lamanite tutu enye owot onyuŋ ebin mmɔ afiak edem.

34 Ndien ke ntem enye anam isɔŋ asana, mme mben mmɔŋ, emi ekedude ke edem usop utin akpa Sidon, otop idem mme Lamanite emi ekewotde ɔdɔŋ ke mme mmɔŋ Sidon, man otodo ikɔt esie enyene ufaŋ ndibe nyuŋ ŋwana ye mme Lamanite ye mme Amlicite ke edem usop utin akpa Sidon.

35 Ndien edikem ete kini mmɔ ema ekebe akpa Sidon ete mme Lamanite ye mme Amlicite etɔŋɔ ndifehe ke iso mmɔ, isehe ke mmɔ ema ewak ata eti eti tutu owo ikanke mmɔ ibat.

36 Ndien mmɔ efehe ke iso mme Nephite eka nkaŋ wilderness emi ekedide edem usop utin ye edem edere, ebe ekpɔŋ mme adaŋa isɔŋ; ndien mme Nephite ema ebine mmɔ ye odudu mmɔ, enyuŋ ewot mmɔ.

37 Iŋ, ema esobo ye mmɔ ke ofuri nkaŋ, enyuŋ ewot enyuŋ ebin, tutu mmɔ esuana ke edem usop utin, ye ke edem edere, tutu mmɔ ema esim wilderness, emi ekekotde Hermounts; ndien ekedi nkaŋ wilderness oro ɔkɔyɔhɔde ye mme idiɔk ye unam ikɔt.

38 Ndien edikem ete ke ediwak ema ekpa ke wilderness ke ntak mme unan mmɔ, ndien mme unam oro eta mmɔ ŋko ye mme utere enyɔŋ; ndien ema ekut mme ɔkpɔ mmɔ, ndien ema ekɔk ke isɔŋ.