1 Sese, idaha emi edikem ete ke ini ikɔt Ammon ema ekeduŋ ke isɔŋ Jershon, iŋ, nko ye ke ini ema ekebin mme Lamanite esio ke isɔŋ, ndien mbon isɔŋ oro ebuk mme akpa mkpa mmɔ—

2 Idaha emi owo ike abatke mme akpa-mkpa mmɔ ke ntak emi ibat mmɔ eke okponde; nko owo ike abatke mme Nephite emi eke ekpade—edi edikem ke ini mmɔ ema eke ebuk mme akpa-mkpa mmɔ, nko ye ke ini utre udia ama eke ebe, ye mfuhɔ, ye akam, (ndien ekedi ke ɔyɔhɔ isua ukara efudekiet mme ebiere ikpe nnɔ ikɔt Nephi) nka-iso emem ama ɔtɔŋɔ ndidu ke ofuri isɔŋ.

3 Iŋ, ndien mme owo ema ekpeme ndinim mme ibet Jehovah; ndien mmɔ ema etiŋ enyin ke ndinim mme edinam Abasi, nte asaŋade ye ibet Moses; koro ema ekpep mmɔ ndinim ibet Moses tutu enye osu.

4 Ndien ke ntem mme owo ikenyeneke mfina ke ofuri isua ukara efudekiet mme ebiere ikpe nnɔ ikɔt Nephi.

5 Ndien edikem ke ntɔŋɔ ɔyɔhɔ isua ukara efudeba mme ebiere ikpe, emem ama aka iso odu.

6 Edi edikem ke utit ɔyɔhɔ isua ukara efid ye iba mme ebiere ikpe, owo kiet edi isɔŋ Zarahemla, ndien enye ekedi andibiɔŋɔ Christ, koro enye ɔtɔŋɔ ndikwɔrɔ nnɔ mme owo mbiat mme prophecy emi mme prophet eketiŋde, ke abaŋa edidi Christ.

7 Idaha emi mbet ike iduhe ibaŋa se owo enimde ke akpanikɔ; koro ike isaŋake ye uyo Abasi ete mbet odu emi edinamde mme owo ukudi ukem ukem.

8 Koro ntem ke ŋwed Abasi ɔdɔhɔ ete: Mbufo emek mfin emi, enye emi mbufo edinamde utom inɔ.

9 Idaha emi edieke owo oyomde ndinam utom nnɔ Abasi, ekedi ifet esie; mme, edieke enye ɔbuɔtde idem ke Abasi ekedi ifet esie ndinam utom nnɔ enye; edi edieke enye mibuɔtke idem ke enye mbet ikeduhe ndimia enye ufen.

10 Edi edieke enye owotde owo emia enye ufen ye mkpa; ndien edieke enye akande owo ubɔk emia enye ufen nko; ndien edieke enye eyipde inɔ emia enye ufen nko; ndien edieke enye esinde efibe emia enye ufen nko; iŋ, ke kpukpru ibak emi emia mmɔ ufen.

11 Koro mbet ama odu ete edikpe ikpe inɔ mme owo nte asaŋade ye mme idiɔk ŋkpɔ mmɔ. Edi, mbet ikeduhe ibaŋa se owo enimde ke akpanikɔ; ke ntak oro, ekenɔ owo ufen ke abaŋa mme idiɔk ŋkpɔ emi enye eke anamde; ke ntak oro kpukpru owo ekedi ukem ukem.

12 Ndien anibiɔŋɔ Christ emi, emi enyiŋ esie ekedide Korihor, (ndien mbet ikenyeneke odudu ke idem esie) ɔtɔŋɔ ndikwɔrɔ nnɔ mme owo ete ke Christ ididuhe. Ndien ke utɔ usuŋ emi ke enye eke ɔkwɔrɔ, ete:

13 O mbufo emi edude ke idak ndisime ye ikpikpu idorienyin, ntak emi ekɔŋde idem mbufo ɔkpɔnɔ ye mme utɔ ndisime ŋkpɔ emi? Ntak emi mbufo eyomde Christ? Koro owo ndomo kiet ikemeke ndifiɔk ŋkpɔ ndomo kiet emi edidide.

14 Sese, mme ŋkpɔ emi mbufo ekotde mme prophecy, emi mbufo edɔhɔde ke edi ndisana prophet ekeyak enɔ, sese, mmɔ edi mme ndisime ido mme ete mbufo.

15 Didie ke mbufo efiɔk ke mmɔ edi akpanikɔ? Sese, mbufo ikemeke ndifiɔk mme ŋkpɔ emi mbufo mikwe; ke ntak oro mbufo ikemeke ndifiɔk ke Christ eyedu.

16 Mbufo ese enyuŋ edɔhɔ ete ke mbufo ekut erifen ke mme idiɔk ŋkpɔ mbufo. Edi sese, edi ekikere idat; ndien esit mbufo emi etimede oto ntak mme ido mme ete mbufo, emi enamde mbufo ete ebuɔtidem ke mme ŋkpɔ emi midihe ntre.

17 Ndien ediwak utɔ ŋkpɔ emi ke enye eketiŋ ɔnɔ mmɔ, ɔdɔhɔ mmɔ ete ke owo ikemeke ndinam usio isop nnɔ mme idiɔk ŋkpɔ mme owo, edi ke kpukpru owo edu ke uwem emi nte asaŋade nte enye akamade idem esie; ke ntak oro kpukpru owo eforo etiene nte enye ɔfiɔkde ŋkpɔ, ndien ke kpukpru owo ekan nte odudu esie edide; ndien ŋkpɔ ekededi emi owo anamde idihe idiɔk ŋkpɔ.

18 Ndien ntem ke enye eke ɔkwɔrɔ ɔnɔ mmɔ, ada esit ediwak ɔwɔrɔ, anam mmɔ emenere ibuot mmɔ ke ibak mmɔ, iŋ, ada ediwak iban ɔwɔrɔ, nko ye iren owo, ete enam use—ɔdɔhɔ mmɔ ete ke ini owo ama akpa, ke oro edi utit esie.

19 Idaha emi owo emi aka isɔŋ Jershon nko, ndikwɔrɔ mme ŋkpɔ emi ke ufɔt ikɔt Ammon, emi ke ini kiet ekedide mbon mme Lamanite.

20 Edi sese mmɔ ema efiɔk ŋkpɔ ekan ediwak mme Nephite; koro mmɔ emum enye, enyuŋ ebɔp enye, enyuŋ emen enye eka iso Ammon, emi ekedide akwa oku ɔnɔ mbon oro.

21 Ndien edikem ete enye anam ete yak emen enye ewɔrɔ ke isɔŋ oro. Ndien enye ediduk ke isɔŋ Gideon, ndien ɔtɔŋɔ ndikwɔrɔ nnɔ mmɔ nko; ndien mi enye ike itimke inam ɔfɔn, koro ema emum enye enyuŋ ebɔp enyuŋ emen eka iso akwa oku, nko ye ada ibuot mme ebiere ikpe ke isɔŋ oro.

22 Ndien edikem ete akwa oku ɔdɔhɔ enye ete: Ntak emi afo asaŋade akwaŋa mme usuŋ Jehovah? Ntak emi afo ekpep mbon emi ete ke Christ ididuhe, man etre idaresit mmɔ? Ntak emi afo etiŋde ikɔ abiat kpukpru mme prophecy eke ndisana prophet?

23 Idaha emi enyiŋ akwa oku emi ekedi Giddonah. Ndien Korihor ɔdɔhɔ enye ete: Koro ami mkpepke mme ndisime ido mme ete mbufo, nko koro ami mkpepke mbon emi ndidu ke idak ndisime mme edinam ye mme ŋkpɔ emi mme oku ke eset ekenimde, man ekan mmɔ ubɔk enyene odudu ye unen ke idem mmɔ, man enim mmɔ ke idak unana ifiɔk, man mmɔ ukumenere ibuot mmɔ, edi eduɔ ke ntak mme ikɔ fo.

24 Mbufo edɔhɔ ete ke mbon emi edi mbon emi miduhe ke ufin. Sese, ami ndɔhɔ ke mmɔ edu ke ufin. Mbufo edɔhɔ ete ke mme prophecy eke eset oro edi akpanikɔ. Sese, ami ndɔhɔ nte ke mbufo ifiɔkke ete ke mmɔ edi akpanikɔ.

25 Mbufo edɔhɔ ete ke mbon emi edue enyuŋ edi mbon emi eduɔde, ke ntak ndudue ete ye eka. Sese, ami ndɔhɔ nte ke eyen iduehe ke ntak ete ye eka esie.

26 Ndien mbufo nko edɔhɔ ke Christ eyedi. Edi sese, ami ndɔhɔ ke mbufo ifiɔkke ete ke Christ eyedu. Ndien mbufo nko edɔhɔ ete ke eye ewot enye ke ntak mme idiɔk ŋkpɔ ererimbot—

27 Ndien ke ntem mbufo eda mbon emi usuŋ ke ndisime ido mme ete mbufo, ye nte asaŋade ye mme uduak mbufo; ndien mbufo enim mmɔ ke usuhɔre itie, tutu eketie nte edu ke ufin, man mbufo edia uwem eto mme utom ubɔk mmɔ, man mmɔ ukumenere enyin ye uko, ndien man mmɔ ukunyene mme unen ye mme odudu mmɔ.

28 Iŋ, mmɔ idaha se idide eke mmɔ inyene mbak mmɔ ukudue mme oku mmɔ, emi ekɔŋde mmɔ ɔkpɔnɔ nte asaŋade ye mme uduak mmɔ, ndien enam ete mmɔ ebuɔtidem, ke mme ido mmɔ ye mme ndap mmɔ ye mme ekikere mmɔ ye mme ŋkukut mmɔ ye mme ŋkari ndibe ŋkpɔ mmɔ, man mmɔ, edieke mmɔ minamke nte asaŋade ye mme ikɔ mmɔ, edue ŋkpɔ emi mmɔ mifiɔkke, emi mmɔ edɔhɔde ke edi Abasi—ŋkpɔ emi akananam owo mikwe mme mifiɔkke, emi akananam miduhe ndien idinyuŋ iduhe.

29 Idaha emi ke ini akwa oku ye ada ibuot mme ebiere ikpe ekutde isɔŋesit mmɔ, iŋ, ke ini mmɔ ekutde ete ke enye eye suŋi Abasi, mmɔ ibɔrɔke mme ikɔ esie; edi enam ete ebɔp enye; enyuŋ eyak enye esin ke ubɔk mme anam utom, enyuŋ enɔ enye aka isɔŋ Zarahemla, man eda enye eka ke iso Alma, ye ada ibuot mme ebiere ikpe emi ekedide andikara ke ofuri isɔŋ oro.

30 Ndien edikem ete ke ini ekedade enye edi ke iso Alma ye ada ibuot mme ebiere ikpe, enye anam ukem ukem nte enye eke anamde ke isɔŋ Gideon; iŋ, enye aka iso ndisuŋi.

31 Ndien enye aka iso nditiŋ mme ɔkpɔsɔŋ ikɔ ke iso Alma, onyuŋ osuŋi mme oku ye mme andikpep, odori mmɔ uyo ete ke mmɔ eda mme owo usuŋ ke mme ndisime ido mme ete mmɔ, ke ntak ndidia uwem nto mme utom mme owo.

32 Idaha emi Alma ɔdɔhɔ enye ete: Afo emefiɔk ete ke nnyin idiaha uwem ito mme utom mbon emi; koro sese ami menam utom tɔŋɔ ke ntɔŋɔ ukara mme ebiere ikpe tutu idaha emi, ye mme ubɔk mi man ŋwam idem mi, nsehe ediwak isaŋ mi ŋkanare isɔŋ ndikwɔrɔ ikɔ Abasi nnɔ ikɔt mi.

33 Ndien nsehe ediwak utom emi ami nnamde ke ufɔk Abasi, akananam ami mbɔhɔ ekpri ŋkpɔ nte senine ke utom mi; nko nditɔ eka mi ndomo kiet ibɔhɔ, ibɔhɔke edi ke itie ikpe; ndien ke ini nnyin ibɔde ŋkpɔ edi nte asaŋade ye mbet ke ntak ini nnyin.

34 Ndien idaha emi, edieke nnyin mibɔhɔ ŋkpɔ ndomo kiet ke mme utom nnyin ke ufɔk Abasi, nso idi udori nnyin ndinam utom ke ufɔk Abasi ibɔhɔke edi ke ndikwɔrɔ akpanikɔ, man nnyin idara ke idaresit nditɔ eka nnyin?

35 Ndien ntak emi afo ɔdɔhɔde ete ke nnyin ikwɔrɔ ikɔ inɔ mbon emi man inyene udori, ke ini afo, ke idem fo, ɔfiɔkde ete ke nnyin inyeneke udori? Ndien idaha emi, ndi afo emekere ke nnyin imibiaŋa mbon emi, emi anamde utɔ idara emi ke esit mmɔ?

36 Ndien Korihor ɔbɔrɔ enye ete, Iŋ.

37 Ndien Alma ɔdɔhɔ enye ete: Ndi afo eme ɔbuɔtidem ete ke Abasi odu?

38 Ndien enye ɔbɔrɔ ete, Iŋ iŋ.

39 Idaha emi Alma ɔdɔhɔ enye ete: Ndi afo eye afiak akaŋ ete ke Abasi odu, nko onyuŋ akaŋ Christ? Koro sese, ami ndɔhɔ fi, ami mefiɔk ke Abasi odu, ndien nko ke Christ eyedi.

40 Ndien idaha emi nso ke afo enyene ndiwut ete ke Abasi iduhe, mme ete ke Christ ididihe? Ami ndɔhɔ fi nte ke afo unyeneke ndomo kiet, ibɔhɔke edi ikɔ fo ikpɔŋ.

41 Edi, sese, ami menyene kpukpru ŋkpɔ nte ikɔ ntiense nte ke mme ŋkpɔ emi edi akpanikɔ; ndien afo nko emenyene kpukpru ŋkpɔ nte ikɔ ntiense ɔnɔ fi ete ke mmɔ edi akpanikɔ; ndien ndi afo eye akaŋ mmɔ? Ndi afo eme ɔbuɔtidem ete ke mme ŋkpɔ emi edi akpanikɔ?

42 Sese, ami mefiɔk nte ke afo emenim ke akpanikɔ, edi afo emenyene spirit nsu, ndien afo emesin Spirit Abasi man enye ukunyene itie ke idem fo; edi satan enyene odudu ke idem fo, ndien enye ada fi usuŋ, anam mme ŋkari man enye osobo nditɔ Abasi.

43 Ndien idaha emi Korihor ɔdɔhɔ Alma ete: Edieke afo ediwutde mi idiɔŋɔ, man ami mfiɔk nte ke Abasi odu, iŋ, wut mi ete ke enye enyene odudu, ndien ke ini oro ke ami ndifiɔk ke mme ikɔ fo edi akpanikɔ.

44 Edi Alma ɔdɔhɔ enye ete: Afo emenyene mme idiɔŋɔ emi awakde ekem; ndi afo eye odomo Abasi fo? Ndi afo eye ɔdɔhɔ, Wut mi idiɔŋɔ, ke ini afo enyenede ikɔ ntiense eke kpukpru nditɔ eka fo emi, nko ye kpukpru ndisana prophet? Enim mme ŋwed Abasi ke iso fo, iŋ, ndien kpukpru ŋkpɔ owut ete ke Abasi odu; iŋ, kpa ererimbot emi, ye kpukpru ŋkpɔ emi edude ke iso esie, iŋ, ye isaŋ esie, iŋ, nko ye kpukpru mme ererimbot emi esaŋade ke nde mmɔ etie ntiese ete ke Andibot emi Okponde akan odu.

45 Ndien edi afo aka iso, ada esit mbon emi ɔwɔrɔ, etie ntiense ɔnɔ mmɔ ete ke Abasi iduhe? Ndien edi ndi afo eye akaŋ abaŋa kpukpru ntiense emi? Ndien afo ɔdɔhɔ ete: Iŋ, ami nyekaŋ, ibɔhɔke afo eye owut mi idiɔŋɔ.

46 Ndien idaha emi edikem ete Alma ɔdɔhɔ enye ete: Sese, ami mefuhɔ ke ntak isɔŋ esit fo, iŋ, ete ke afo eye osuk aŋwana ye spirit akpanikɔ, man esobo ukpɔŋ fo.

47 Edi sese, ɔfɔn ete ukpɔŋ fo atak akan ete afo edi ntak ndida ediwak ukpɔŋ nsuhɔre nduk nsobo, ke abiaŋa fo ye mme ikɔ nnem-inua fo; ke ntak oro edieke afo edifiakde ikaŋ, sese Abasi eyemia fi, man afo akabare edi imum, man afo ukukɔbɔre inua fo aba tutu amama, man afo ukubiaŋa mbon emi aba.

48 Idaha emi Korihor ɔdɔhɔ enye ete: Ami nkaŋke nte ke se ekotde Abasi odu, edi ami nkereke nte ke Abasi odu; ndien ami ndɔhɔ nko, nte ke afo ufiɔkke ete ke Abasi odu; ndien ibɔhɔke afo owut mi idiɔŋɔ, ami ndinimke.

49 Idaha emi Alma ɔdɔhɔ enye ete: Emi ke ami ndinɔ fi nte idiɔŋɔ, ete ke eyenam fi edi imum, nte asaŋade ye mme ikɔ mi; ndien ami ndɔhɔ, nte ke enyiŋ Abasi, eyenam fi edi imum, man afo ukutiŋ aba ikɔ.

50 Idaha emi ke ini Alma ama eketiŋ mme ikɔ emi, ema enam Korihor edi imum, man enye ukukan utiŋ ikɔ, nte asaŋade ye mme ikɔ Alma.

51 Ndien idaha emi ke ini ada ibuot mme ebiere ikpe eke okutde emi, enye anyan ubɔk esie onyuŋ ewet ɔnɔ Korihor, ete: Ndi afo eme ɔfiɔk abaŋa odudu Abasi? Ke anie ke afo eke oyom ete Alma owut idiɔŋɔ esie? Ndi afo omoyom ete enye anam ukut esim mbon efen, ndiwut fi idiɔŋɔ? Sese, enye owut fi idiɔŋɔ; ndien idaha emi ndi afo eye eneni aba?

52 Ndien Korihor anyan ubɔk esie onyuŋ ewet, ete: Ami mefiɔk ke ami ndi imum, koro ami nkanke ntiŋ ikɔ; ndien ami mefiɔk nte ke idighe ŋkpɔ ndomo kiet ibɔhɔke odudu Abasi akan ada emi odori mi ke idem; iŋ, ndien ami mma nsifiɔk nte ke Abasi ama odu.

53 Edi sese, satan eke abiaŋa mi; koro enye eke owut mi idem ke mbiet angel, onyuŋ ɔdɔhɔ mi ete: Ka nyuŋ fiak nyene mbon emi, koro kpukpru mmɔ ewɔrɔ ekpɔŋ usuŋ etiene Abasi emi owo mifiɔkke. Ndien enye ɔdɔhɔ mi ete: Abasi iduhe; iŋ, ndien enye ekpep mi se anade nte ami ntiŋ. Ndien ami mekpep mme ikɔ esie; ndien ami nkekpep mmɔ koro mmɔ ekenemde enɔ obukidem; ndien ami mkpep mmɔ, tutu ami nkan eti eti, tutu ete ami ke akpanikɔ nyime ke mmɔ edi akpanikɔ; ndien ke ntak emi ami nsin akpanikɔ, tutu ami nda akamba isuŋi emi nnɔ idem mi.

54 Idaha emi ke ini enye ama eketiŋ emi, enye ebeŋe ete Alma ɔbɔŋ akam ɔnɔ Abasi, man emen isuŋi emi ekpɔŋ enye.

55 Edi Alma ɔdɔhɔ enye ete: Edieke emende isuŋi emi ekpɔŋ fi ndi afo eye afiak ada mme esit mbon emi ɔwɔrɔ; ke ntak oro, eyedi ɔnɔ fi nte Jehovah aduakde.

56 Ndien edikem ete ema emen isuŋi oro ekpɔŋ Korihor; edi ema ebin enye esio, onyuŋ asaŋa ke ufɔk ke ufɔk ebeŋe udia esie.

57 Idaha emi ema esuan ke ndondo oro mbuk ke abaŋa se ike itibede inɔ Korihor ke ofuri isɔŋ oro; iŋ, ada ibuot mme ebiere ikpe ama ɔnɔ kpukpru owo ŋwet ke isɔŋ oro, ɔdɔhɔ kpukpru mbon emi eke ebuɔtde idem ke mme ikɔ Korihor ete mmɔ esɔp idem ekabare esit, midige ntre ukem ubiere ikpe oro eyedi etiene mmɔ.

58 Ndien edikem ete kpukpru mmɔ efiɔk ebaŋa ibak Korihor; ke ntak oro kpukpru mmɔ ekabare esit enɔ Jehovah; ndien emi ekedi utit ukwaŋ-ŋkpɔ eke utɔ Korihor. Ndien Korihor ama asaŋa ke ufɔk ke ufɔk, ebeŋe udia ndiŋwam idem esie.

59 Ndien edikem ete nte enye asaŋade ke otu mme owo, iŋ, ke otu mme owo emi ekebahare idem mmɔ esio ekpɔŋ mme Nephite ndien ekot idem mmɔ mme Zoramite, ke edide owo emi ekekotde Zoram eke ada mmɔ usuŋ—ndien nte enye asaŋade ke otu mmɔ, sese, ema enuk enye eduɔk enyuŋ efik enye, tutu enye akpa.

60 Ndien ke emi nnyin ikut utit owo emi eke akwaŋade mme usuŋ Jehovah; ndien ke emi nnyin ikut ite ke andidiɔk idiŋwamke nditɔ esie ke akpatre usen, edi ɔsɔp edri mmɔ ɔsuhɔre oduk hell.