1 Chiney e yibi buch u napʼan ni mus e yafos ku Korihor, me thap e thin ku Alma ni fapi Zoramites e yaed be thilyeg fapi yalen Somoel, ma Zoram, niʼir e gaaʼ roraed, e be wawliy e gumʼirchaʼ ko fapi gidiiʼ ni ngar siroʼ gaed ko liyos ni dabi non, ma arame ki tabab ni makʼar mʼar nga gumʼirchaʼen ni bachan e pi denen ko fapi gidiiʼ.

2 Ya ireram tapgin e kirbaenʼ nib gel ni yib ngakʼ Alma ni ke nang morngaʼagen e denen ni bay u fithikʼ e pi gidiiʼ rokʼ; ere ri kirbaenʼ ni rib gel ni bachan e kiiʼ ni ke tay fapi Zoramites rokʼ fapi Nephites.

3 Ere chiney e fapi Zoramites e kar kunuyed yaed nga taʼabang nga lan bbinaw ni kanoeg ni Antionum, ni bay ko ngek ko fare binaw nu Zarahemla, ni bay nib chugur nga mathil u dappʼelʼay, ni bay nga yimuch ko fare binaw nu Jershon, ni kubay nga mathil u wuruʼ e binaw ko yimuch, ni ireram e re wuruʼ e binaw nib sug ko fapi Lamanites.

4 Ere fapi Nephites e riyaed be magar nag fapi Zoramites ni richey me taʼareb e puruyʼ roraed fapi Lamanites, ya ra yaeni aw ni arame yamʼ ni almarin ngakʼ fapi Nephites.

5 Ere chiney, e bachan e machib ko fare thin e be mʼug riy ni wawliy fapi gidiiʼ ni ngar rinʼed e tin nib matʼaw—arragon, ma bagaʼ angin ni aw nga laniyaenʼ fapi gidiiʼ nga rogon ni rinʼ e sayden, ara yug banʼen, ni ke buch roraed—ere Alma e lemnag nib gamog ni ngar gayed rogon falʼngin fare thin ku Got.

6 Ere fek Ammon, nge Aaron, nge Omner; ma Himni e pag nge paer u galasia u Zarahemla; machane fa dalip ni baʼaram e fek ngar uned ngakʼ, nge Amulek nge Zeezrom, ni ur moyew u Melek; ma kifek lʼagruw e pagael ni fak.

7 Chiney e bin nib nganniʼ ko pi pagael ni fak e de fek nge un ngakʼ, ni fithingan e Helaman; ma fithingan e piʼin ni ke fek nge un ngakʼ e Shiblon nge Corianton; ma ireray fithingan e piʼin ni ruʼuned ngakʼ nga ranoed nga fithikʼ fapi Zoramites, ni ngar machib niged raed ko fare thin.

8 Ere chiney e fapi Zoramites e bogi gidiiʼ nra chuw gaed rokʼ fapi Nephites; ere kan muʼ i machib nag fare thin ku Got ngoraed.

9 Machane kar mul gaed nga fithikʼ e wagagaey nib gel, ya dar koeled falan fapi motochiyel ku Got, nge pi yalen rokʼ, u rogon fare motochiyel ku Moses.

10 Ara rafol gaed ko pi muruwel ko galasia, ni ngar ʼulʼul gaed ko meybil nge liyoer ngakʼ Got ni gubin e rran, ni nge siy i lumelaenʼ raed ko denen.

11 Arragon, ra ngan ngochngoch nag i yoeg, ma kar thilyeged fapi yalen rokʼ Somoel u fithikʼ boʼor banʼen; ere, aray fan, ni Alma nge pi walagen e ranoed nga lan fare binaw ni ngar machib niged fare thin ngoraed.

12 Ere chiney, e napʼan ni rabaed nga lan fare binaw, ma arame, gin oewchraed ngay ni kar pirʼeged ni fapi Zoramites e kar toeyed tafen e moʼolung, ma yaed ma kunuyed yaed nga taʼabang u rebo rran u rebo wik, nib ba rran ni karoeged ni fare rran ku Somoel; ma yaed ma liyoer ngakʼ u ba yalen ni dawori guy Alma nge pi walagen bingyalʼ;

13 Ya kar falʼeged ba tagilʼ u lulukungun fare tafen e moʼolung roraed, bangi tagilʼ e sakʼiy, nib tolang nga loelugey; ma ginnʼem e kemus ni taʼbeeʼ e rayog ni paer riy.

14 Ere, en ni baʼadag ni nge meybil ma thingari yaen nge sakʼiy nga dakean, me kʼiyeg paʼ nga tharmiy, me non nib gaaʼ laman, nibe gaʼar:

15 Ba thothup, ba thothup Got; mich u wunʼmaed ni gur Got, mab mich u wunʼmaed ni gur e gab thothup, me gur e ummoy ni gab yaʼel, ma gur e gab yaʼel, ma bay um paer ni gab yaʼel ni gubinfen.

16 Got nib thothup, mich u wunʼmaed ni gur e kam kiiʼeg maed rokʼ pi walagmaed; ma dar mich u wunʼmaed ko fapi yalen rokʼ pi walagmaed, ni af u rebo mfen ngo reb iyib ngoraed nga butʼ u dakean e pi papngin e bitir ko pi chitamangraed; machane ba mich u wunʼmaed ni gur e kam melʼeg maed ni nggu manged bitir rom nib thothup; ma ku gur e kamoeg ngomaed ni dariy Kristus.

17 Ya gur e taʼab rogom fowap, nge dabaʼ nge gubinfen; me gur e kam melʼeg maed ni nggu thap gaed, ko ngiyalʼ ni gubin e gidiiʼ u charmaed ma kam melʼeg raed ni nga ninʼraed u dakean e damomuw rom nga infierno; ya fanam thothup, O Got, gamaed be oge magaer ngom; ma ka gamaed be oge magaer ngom ni kam melʼeg maed, ni nga dab ni wawliymaed nga orel u fithikʼ fapi yalen ni meechiyang rokʼ pi walagmaed, niʼir e be mʼag raed u butʼ ko mich ngakʼ Kristus, niʼir e be wawliy gumʼirchaʼraed rom nga orel, gur, Got romaed.

18 Nge kub yay gamaed be oge magaer ngom, O Got, ni gamaed bogi gidiiʼ ni kan melʼeg maed ma gamaed ba thothup. Amen.

19 Ere chiney e yibi buch u tomuren ni ke rungʼag Alma nge pi walagen nge pi pagael ni fak e pi meybil ney, me gin laniyaenʼraed ni dawori buch bayay ni aram rogon.

20 Ya musap gaed, gubin e gidiiʼ me yaen nge piiʼ e pi meybil ney ni taʼareb rogon.

21 Chiney e re ginnʼem e karoeged ni Rameumptom, ni kan piliyeg fan ni, fare tagilʼ e thothup.

22 Chiney, ma dakean e rangi tagilʼ ney e ra piiʼed e meybil riy, ni gubin e gidiiʼ, ngakʼ Got ni taʼab yilʼ i meybil, ni yaed be oge magaer ko Got roraed niʼir e ke melʼegraed, ma ku de wawliyraed ngar leaked fare yalen rokʼ pi walagraed, nge gumʼirchaʼraed ni dan pingeg ni nge michaenʼraed ko pinʼen ni bay yib, ni dariy banʼen ni yaed manang u morngaʼagen.

23 Ere chiney, e tomuren ni fapi gidiiʼ ni yaed gubin ni kar muʼ gaed i pining e magaer ni aray rogon, mar suloed nga taferaed, ma da kur weliyed morngaʼagen e Got roraed bayay nge madaʼ ko ngiyalʼ ni kar moʼolung ngad nga taʼabang bayay ko farengi tagilʼ nib thothup, ni ngar oged e magaer ni rogon e yalen roraed.

24 Ere chiney e napʼan ni guy Alma e biney, mari kirbaenʼ, ya ke guy ni yaed bogi gidiiʼ nib sug ko denen mab ʼelʼel laniyaenʼraed; arragon, i guy ni gumʼirchaʼraed e kar yiglʼiyed nga dakean e gol, nge silber, ngo dakean gubin mit e chugum ni falelʼ.

25 Arragon, ma ki guy ni gumʼirchaʼraed e ke langlang ngalang ko ufanthin, u fithikʼ e ʼufʼuf roraed.

26 Me meybil nib gaaʼ laman nga tharmiy, me non, ni gaʼar: O, uw nʼumngin i napʼan, O Somoel, ni ngam pag e pi tapigpig rom ngar pired u roey u butʼ u lan e dowef, ni ngar guyed e tiney e ngongol ni kireb u fithikʼ e gidiiʼ?

27 Musap, O Got, yaed be meybil ngom, machane pi gumʼirchaʼ roraed e basug ko ʼufʼuf roraed. Musap, O Got, yaed be meybil ngom nga lʼugunraed, machane yaed ba ʼufʼuf, ma yaed be lemnag ni yaed e thʼabi felʼ, ma yaed ba falfalaenʼ ko tinu fayleng banʼen.

28 Musap, O Got rog, ngam guy e mad roraed nib totolang puluwon, nge pi luwaw roraed, nge pi bachael roraed, nge pi nunuw ni gol roraed, nge gubin e tin nib gaʼfan banʼen ni kar nunuw gaed ngay; ere musap, ireram e pinʼen ni kar yiglʼiyed e pi gumʼirchaʼ roraed nga dakean, ni yug aram rogon ma yaed be meybil ngom ni yaed be gaʼar—Gamaed be oge magaer ngom, O Got, ya gamaed bogi gidiiʼ ni kan melʼeg maed ni nggu manged gidiiʼ rom, ma tin kubay e yaedra yimʼ.

29 Arragon, ma yaed be yoeg ni gur e kamoeg ngoraed ni dariy Kristus.

30 O Somoel ni Got, uw nʼumngin i napʼan ni ngam pag nge paer e tiney e ngongol ni kireb nge tin de yulʼyulʼ u fithikʼ e pi gidiiʼ ney? O Somoel, mu piiʼ ngog gelingig, ni nge yog ni ngug athamgil u fithikʼ e pi moʼowaer rog. Ya gub moʼowaer, ma tiney e ngongol ni kireb u fithikʼ e pi gidiiʼ ney e be amith nag e tafnaey rog.

31 O Somoel, gumʼirchaʼeg e kari gafgow ko kirbaenʼ; mu piiʼ e gapas nga laninʼug u dakean Kristus. O Somoel, mu bing woʼen ngog ni nge yib gelingig, ni nge yog ni ngug fil amithun u fithikʼ e gumʼaenʼ e pi kirbaenʼ ney ni bay yib ngog, ni bachan e denen ko pi gidiiʼ ney.

32 O Somoel, mu gapaseg laninʼug, mag piiʼ e ayuw ngog ko muruwel rog, nge piʼin gamaed nga muruwel ni yaed bay rog—arragon, Ammon, nge Aaron, nge Omner, nge Amulek nge Zeezrom, nge fagal pagael ni fakag—arragon, yaed gubin ni ngam piiʼ e gapas nga laniyaenʼraed, O Somoel. Arragon, mu piiʼ e gapas nga laniyaenʼraed u dakean Kristus.

33 Mu piiʼ ngoraed ni nge yog ni nge yib gelingraed, ni nge yog nra kʼadaenʼ gaed ko pi kirbaenʼ roraed ni bay yibi aw nga dakeanraed ni bachan e pi denen ko pi gidiiʼ ney.

34 O Somoel, mu piiʼ e ayuw ngomaed ni nge yog ni ngug sulweged yaed bayay ngom u dakean Kristus.

35 Musap, O Somoel, yaʼel roraed e rib gaʼfan, mab yoʼor i yaed e walagmaed; ere, mu piiʼ ngomaed, O Somoel, e gelingin nge gonop ni nge yog nug feked e pichaʼaney, ni walagmaed, bayay iyib ngom.

36 Ere chiney e yibi buch u napʼan ni yoeg Alma e pi thin ney, me tay paʼ nga dakean gubin e piʼin ni yaed bay rokʼ. Ere musap gaed, napʼan ni tay paʼ nga dakeanraed, me suguy raed fare Kan ni Thothup.

37 Ma tomuren ni kan tay paʼay nga dakeanraed ma ranoed ni kar kiiʼ gaed, ni darur lemniged ko mang e ngar kayed, fa mang e ngar unumed, fa mang e ngar chuw gaed ngay.

38 Ma fare Somoel e piiʼ ngoraed e ggan ni nge dabra mʼaed ko bilig, ara ra mʼaed ko balel; arragon, ma ki piiʼ gelingraed, ni dariy ba mit e gafgow ni kirbaenʼ ni yaedra pirʼeg, ya ke mʼay u dakean e falfalaenʼ roraed ngakʼ Kristus. Chiney e biney e buch u rogon e meybil rokʼ Alma; ni fan e biney e i meybil u fithikʼ e mich.