1 Me yibi buch ni arame ranoed iyaen, mar tabab gaed i machib nag fare thin ku Got ngakʼ e gidiiʼ, ni yaed be yaen nga lan e pi tagilʼ e moʼolung roraed, nge lan e naʼun roraed; arragon, ma kur machib niged fare thin ku Got u lan yupaʼ i kanawoʼ roraed.

2 Me yibi buch u tomuren nib gel e muruwel ni kan tay u fithikʼraed, ma arame yog nra muguʼuliyed e muruwel roraed u fithikʼ e gidiiʼ ni gafgow; ya musap gaed, ya ni chuwegraed ko fapi tagilʼ e moʼolung ni bachan e mad roraed ni defelʼ—

3 Ere dan piiʼ matʼawngiraed ni nga ranoed nga lan e pi tagilʼ e moʼolung roraed ni ngar liyoer gaed ku Got, ya bachan e yibe lemnag ni bogi gidiiʼ nib sunsungor; ere yaed ba gafgow; arragon, be tayraed pi walagraed ni taʼab rograed ko dow; ere yaed ba gafgow ko tinu fayleng banʼen; ma ku yaed ba gafgow nga laniyaenʼraed.

4 Chiney, e napʼan ni Alma e be fil ma be weliy ngakʼ fapi gidiiʼ u dakean e falang ni Onidah, me yib ba ulung i gidiiʼ ngakʼ, ni yaed fapiʼin ni kar weliyed morngaʼagen, ni yaed e piʼin nib gafgow laniyaenʼraed ni bachan e gafgow roraed ko tinu fayleng banʼen.

5 Ere rabaed ngakʼ Alma; ma chaʼ ni thʼabi gaaʼ roraed e gaʼar ngakʼ: Musap, mang e nge rinʼ e pichaʼ ni walageg ney, ya be nʼaeg gubin e gidiiʼ faraed ni bachan e gafgow roraed, arragon, ma bagaʼ ni pi priest romaed; ya kar yinʼed gamaed nga wuruʼ e pi tagilʼ e moʼolung romaed niʼir e gu toeyed nib gel e muruwel nug tayed riy nga paʼmaed; ma kar yinʼed gamaed nga wuruʼ ni bachan e ri gamaed ba gafgow; ma dariy bang ni nggu liyoer gaed riy ko Got romaed; ere musap, mang e nggu rinʼed?

6 Ere chiney e napʼan ni rungʼag Alma e biney, me chel u butʼ, nge sap ngakʼ, me guy u fithikʼ e falfalaenʼ rokʼ; ya ke guy ni pi kirbaenʼ roraed e kari sobutʼ nag laniyaenʼraed, ma arame ke bung rograed ni ngar rungʼaged fare thin.

7 Ere daki non ko fa ulung ni baʼaram e gidiiʼ ni inon ngoraed ko sommʼon; ere kʼiyeg paʼ nga mʼon, me non ngakʼ e piʼin ni ke guyraed, ni yaed e riyulʼ ni kar kalgaed ngaenʼraed, me gaʼar ngoraed:

8 Kug guy ni gimed e ke sobutʼaenʼ med; ma faʼanra arragon, ma nge felʼ waʼathmed.

9 Musap gaed walagmed e ke gaʼar, Mang e nggu rinʼed?—ya kanʼin maed nga wuruʼ e pi tagilʼ e moʼolung romaed, ni dab kiyog ni nggu liyoer gaed ko Got romaed.

10 Musap gaed gube yoeg ngomed, gimed be lemnag ma dabiyog ni ngam liyoer gaed ku Got ma kemus ni ngiyalʼ ni gimed bay u lan e pi tagilʼ e moʼolung romed?

11 Nge kureb, ni nggu fith, gimed be lemnag ni thingar mu liyoer gaed ku Got ni kemus ni taʼab yay u rebo wik?

12 Gube yoeg ngomed, rib mangil ni ka ninʼ med nga wuruʼ e pi tagilʼ e moʼolung romed, ni nge yog ni sobutʼaenʼmed, ni nge yog ni ngam filed e gonop; ya rib tʼuf ni ngam filed e gonop; ya ir e yer fan ni kan chuwegmed, ma ke nʼaeg pi walagmed famed ni bachan e ri gimed ba gafgow, ni kan fekmed iyaen ko sobutʼaenʼ; ya rib tʼuf ni ngam sobutʼ niged laniyaenʼmed.

13 Ere chiney, e bachan e kan suruymed ke sobutʼaenʼmed ere nge felʼ waʼathmed; ya gidiiʼ e yung yalʼ, e faʼanra ngan suruy ni nge sobutʼaenʼ, ma magaey rogon ni nge kalngaenʼ; ere chiney e rriyulʼ, ni enra kalngaenʼ e ra pirʼeg e murnguy; ma enra pirʼeg e murnguy me tay riy ni aram rogon nge madaʼ ko tomur, e arame chaʼ ni ra thap.

14 Ere chiney, boed ni kugog ngomed faram, ke felʼ waʼathmed ni bachan e kan suruymed ke sobutʼaenʼmed, ere damur lemniged nib gel e felʼ u waʼathan e piʼin nriyulʼ ni kar sobutʼ niged laniyaenʼraed ni bachan fare bugithin?

15 Arragon, chaʼ ni riyulʼ ni ra sobutʼeg laniyaenʼ, me kalngaenʼ ko denen rokʼ, me fol nge madaʼ ko tomur, e arame chaʼ ni ra felʼ waʼathan—arragon, ire ba felʼ waʼathan ngakʼ e piʼin ni yima suruy raed nge sobutʼaenʼ raed ni bachan e gafgow roraed nib gel.

16 Ere, rib tawaʼath e piʼin ni yaed ma sobutʼ niged laniyaenʼraed, ni danur suruyraed nge sobutʼ laniyaenʼraed; ara, ngan pingeg i yoeg, rib felʼ waʼathan e chaʼ nib mich u waenʼ e thin ku Got, min tawfe nag ni dar ʼelʼel nag gumʼirchaʼen, arragon, ma dawor ni guy rogon nge nang fare thin, ara ni tawasariy ni nge nang, u mʼon ni nge mich u waenʼraed.

17 Arragon, boʼor e piʼin ni yaed ma gaʼar: Faʼan gara dag ngomaed ba pow u tharmiy, ma fin gamaed ranang nib riyulʼ; ma arame fin ra mich u wunʼmaed.

18 Ere chiney e gube fith, ireray e mich? Musap gaed, gube gaʼar ngomed, Dangay; ya faʼanra bay beeʼ ni manang banʼen ma dakuriy rogon ni nge mich u waenʼ, ya manang.

19 Ere chiney, e buʼuw fini buch waʼathan e chaʼ ni manang e tin baʼadag Got ma dar ma rinʼ, ngakʼ e chaʼ ni kemus nib mich u waenʼ, ara kemus ni bay fan ni nge mich u waenʼ, me mul nge aw nga fithikʼ e ngongol ni kireb?

20 Chiney e pinnʼey e gimed e thingar mu kiiʼeged u wunʼmed. Musap gaed, gube yoeg ngomed, ni nʼen ni bay u barbaʼ i paʼay e bathil ko nʼen ni bay u barbaʼ; ma nʼen ni ra buch ku beeʼ e be yaen u rogon e muruwel rokʼ.

21 Ere chiney ni woed ni kug weliy faram morngaʼagen e mich—mich e gathi nge matabgol anʼuy u bogi banʼen; ere faʼanra bay e mich rom gur beeʼ ma gabe athapeg bogi banʼen ni danur guy, ma bogi banʼen nib riyulʼ.

22 Ere chiney, e musap gaed, gube yoeg ngomed, ma gubaʼadag ni ngam tayed u wunʼmed, ni Got e ba murnguy gubin e piʼin nib michaenʼraed nga fithingan; ere baʼadag, ni sommʼon riy, e nge michaenʼmed, arragon, ko thin rokʼ.

23 Ere chiney, e ke yoeg e thin rokʼ u dakean e pi angel ngakʼ e piʼin pumoʼon, arragon, ma gathi kemus ni yigoʼ pumoʼon ya kub muʼun e piʼin nib ppin ngay. Ma chiney e gathi kemus aray; mus ko piʼin bitir ma bay boech e tin ni kan piiʼ ngoraed ni ke yoʼor yay, ni be balyangaenʼ e piʼin nib gonop nge piʼin nib llowaenʼ riy.

24 Ere chiney, o pi walageg nib tʼuf rog, bachan e gimed baʼadag ni nggog ngomed ko mang e ngam rinʼed ni bachan e ke kirbaenʼmed ma kan chuweg med—ere dagur athapeg ni ngam lemniged ni kug nomeg ni nga yuggu dugliy rarogmed u laninʼug, ya nggu rinʼ u yalen e tin riyulʼ—

25 Ya dagur yoeg ni gimed gubin ma kan suruymed ngam sobutʼ niged gimed; ya rib mich u wunʼug ni bay boech i gimed u fithikʼmed ni yaedra sobutʼ niged yaed, ni demutrug e rangi dodow ni yaed bay riy.

26 Chiney, woed ni kugog faram morngaʼagen e mich—ni gathi arame llowaenʼ ni ke matabgol u wunʼuy—ni ku aray rogon nge thin rog. Dabiyog ni ngam nang nib riyulʼ ko sommʼon, me machalbog u wunʼum, ere mich e boed ba llowaenʼ ni de matabgol u wunʼuy.

27 Machane musap gaed, faʼan gimed ra od mi gimed paer nib od laniyaenʼmed, ni ngam sikeng niged e pi thin rog, mi gimed muruwel nga boechi yang e mich, arragon, ni mus ni faʼanra damur athapeged ni nge mich u wunʼmed, mu paged e re athap ney nge muruwel u fithikʼmed, nge yaeni madaʼ ko ngiyalʼ ni ke mich u wunʼmed u rogon ni rayog riy ni ngam tayed tagilʼ bochi yang ko thin rog.

28 Chiney, e ngad taʼareb niged fare bugithin nga ba awoch. Chiney, e faʼan gimed ra piiʼ tagilʼ, ba awoch ni ngan yung nga lan gumʼirchaʼmed, ma musap gaed, faʼanra ba awoch nib riyulʼ, ara ba awoch nib mangil, ma faʼanra dab mu chuweged u dakean e dar mich u wunʼmed, ni ngam keruʼuyed fare Kan ni Thothup ku Somoel, meʼere musap gaed, bayi tabab ni nge oeb u lan ngorongromed; ma napʼan ni gimed ra thamiy e tiney e thamthaem ni be oeb, ma arame bay mu tabab gaed i yoeg u laniyaenʼmed—Dabisiy ni ireray ba awoch nib mangil, ara fare bugi thin e ba mangil, ya ke tabab i gaʼnag laninʼug; arragon, ke tabab i monʼog nag e nangaenʼ rog, arragon, ke tabab ni nge mʼag anʼug ngay.

29 Ere chiney e musap gaed, dabi gel nag e biney e mich romed? Gube gaʼar ngomed, Arragon; machane dawori ilal nge madaʼ ko ngiyalʼ ni ke matabgol u wunʼuy.

30 Machane musap gaed, napʼan nra thow fare awoch, me tugul me lʼeag likʼngin, ma arame dabisiy ni gimed ra yoeg ni fare awoch e ba mangil; ya musap gaed ke thow, make tugul, ma arame ke tabab ni nge lʼeag likʼngin. Ere chiney, e musap gaed, dabi gel nag e biney e mich romed? Arragon, ragel nag e mich romed: ya gara gaʼar gumnang ni biney e ba awoch nib mangil; ya musap ke tugul ma ke lʼeag likʼngin.

31 Ere chiney, musap gaed, gimed be riyulʼ ni ireray ba awoch nib mangil? Gube gaʼar ngomed, Arragon; ya gubin e awoch ma ma piiʼ e waʼamngin ni boed ir.

32 Ere, faʼanra tugul ba awoch mab mangil, ma faʼanra dabi tugul, meʼere musap gaed, de mangil, ere ngan nʼaeg nge chuw.

33 Ere chiney, e musap gaed, bachan e kam sikeng niged, ma kam yunged fare awoch, ere ke thow make tugul, make lʼeag likʼngin, ere dabi siy ni ngam nanged ni fare awoch e ba mangil.

34 Ere chiney, e musap gaed, ke tamilang laniyaenʼmed? Arragon, ke tamilang laniyaenʼmed ko binem e nʼen, ma mich romed e baʼaen e gapas ngay; ni fan e biney e gimed manang, ya gimed manang ni fare thin e monʼog nag e pi yaʼel romed, ma kagmed manang ni ke tugul, ma tamilngaenʼ romed e ke monʼog, nge tafnaey romed e ke pithgal.

35 O ere, biney e gathi riyulʼ? Gube gaʼar ngomed, Arragon, ya ba tamilang; ma demutrug banʼen nib tamilang, mab mangil, ya ba tamilang i nangfan, ere thingar mu nanged nib mangil; ere chiney e musap gaed, tomuren ni kam riiʼed lamen e re tamilang ney, ke tamilang laniyaenʼmed?

36 Musap gaed gube gaʼar ngomed, Dangay; ma kudab mu chefeged e mich romed, ya kemus ni kam muruwel gaed ko mich romed ni ngam yunged fare awoch ni nge yog ni ngam sikeng niged ngam nanged ko ba felʼ fab kireb fare awoch.

37 Ere musap gaed, napʼan nra tabab fare ke gakʼiy ko tugul, ma gimed ra gaʼar: Maroed ngad fogloliyed nib felʼ rogon, ni nge yog ni lʼeag likʼngin, ni nge yog ni tugul nge gaaʼ, me piiʼ e waʼamngin ngodaed. Ere chiney e musap gaed, faʼan gimed ra fogloliy nib felʼ rogon ma ra thaey likʼngin, me tugul nge gaaʼ, me piiʼ e waʼamngin.

38 Machane faʼan gimed ra pag fare ke gakʼiy, ma dabi un ko lem romed rogon i fogloliy, ere musap gaed dabi thaey likʼngin; ma napʼan ni bay yib gawaelngin e yalʼ nge madedeaw nag, ni bachan e dariy likʼngin ma aram me mororoy, mi gimed pug ngalang ngam nʼiged.

39 Chiney, biney e gathi bachan e awoch e ba kireb, ara towaʼamngin ni yib riy e defelʼ; ya ri bachan e butʼ romed e dariy yongoʼolen, ma damur fogloliyed fare ke gakʼiy, ere dabiyog ni nge piiʼ waʼamngin ngomed.

40 Ere aray rogon, ni faʼanra dab mu fogloliyed fare bugithin, ma gimed be sap nga mʼon u ba oewchef nib mich ko fare waʼamngin ni bay riy, ma dariy liyiben me yog ni ngam tʼired waʼamngin fare ke gakʼiy ko yafos.

41 Machane faʼan gimed ra fogloliy fare bugithin, arragon, ni ngam fogloliyed fare ke gakʼiy u napʼan ni ke tabab ko tugul, ngo dakean e mich romed u fithikʼ e lʼagaen nge gumʼaenʼ, ni gimed be sap nga mʼon ko waʼamngin ni bay yib riy, ma ra piiʼ likʼngin; ere muguyed ra mang bake gakʼiy ni be tugul iyaen ko yafos ni dabimus biʼid.

42 Ma bachan e lʼagaen romed nge mich romed nge gumʼaenʼ romed i fogloliy fare bugithin, ni nge yog ni lʼeag likʼngin u fithikʼmed, ere musap gaed, dab ki nʼuw napʼan ma bay mu tʼired e waʼamngin ni ra yib riy, niʼir e thʼabi felʼ, niʼir e thʼabi athibthib u fithikʼ gubin e athibthib, ma ire thʼabi wechwech u fithikʼ gubin e wechwech, arragon, mab machalbog u fithikʼ gubin e machalbog; ma gimed ra kay e re waʼamngin ney nge madaʼ ko ngiyalʼ ni kam fos gaed, ma dab ki yib e makʼiy ngomed, ara ki yib e balel ngomed.

43 Ma arame, pi walageg, bay mu feked puluwon e mich romed, nge gonop romed, nge gumʼaenʼ romed, nge athamgil romed, u napʼan ni gimed be soen nag fare ke gakʼiy ni nge piiʼ waʼamngin ngomed.