1 Idaha emi ke ini Alma ama eketiŋ mme ikɔ emi, mmɔ edɔŋ etop enɔ enye eyom ndifiɔk mme ana nte mmɔ ebuɔtidem ke Abasi kiet, man mmɔ enyene mfri emi emi enye etiŋde abaŋa, mmedidie ke mmɔ editɔde mkpasip oro, mme ikɔ emi enye eketiŋde, emi enye eke ɔdɔhɔde ke ana nte etɔ ke esit mmɔ; mme ke nsutɔ usuŋ ke mmɔ editɔŋɔ ndinam mbuɔtidem mmɔ.

2 Ndien Alma ɔdɔhɔ mmɔ ete: Sese, mbufo emedɔhɔ ete ke mbufo ike ikemeke ndikpono Abasi mbufo ke ntak eke ebinde mbufo esio ke mme synagogue mbufo. Edi sese, ami ndɔhɔ mbufo, edieke mbufo ekerede ete ke mbufo ikemeke ndikpono Abasi, mbufo emedue eti eti, ndien ana nte mbufo eduŋɔre mme ŋwed Abasi; edieke mbufo ekerede ete ke mmɔ ekpep mbufo emi, mmɔ iŋwaŋake mbufo.

3 Ndi mbufo emeti nte ekotde se Zenos, prophet ke eset, etiŋde abaŋa akam mme ukpono?

4 Koro enye eke ɔdɔhɔ ete: Afo edi atua mbɔm, O Abasi, koro afo eme okop akam mi, kpa ke ini nkedude ke wilderness; iŋ, afo ama atua mbɔm ke ini nkebɔŋde akam mbaŋa mbon emi ekedide mme asua mi, ndien afo ama anam esit mmɔ emem abaŋa mi.

5 Iŋ, O Abasi, ndien afo ama atua mi mbɔm ke ini nkesemede nnɔ fi ke iŋwaŋ mi; ke ini nkesemede nnɔ fi ke akam mi, ndien afo ama eyere mi.

6 Ndien nko, O Abasi, ke ini nkekade ufɔk mi afo ama eyere mi ke akam mi.

7 Ndien ke ini ami nkedukde ubet mi, O Jehovah, nyuŋ mbɔŋ akam nnɔ fi, afo ama eyere mi.

8 Iŋ, afo eme atua nditɔ fo mbɔm ke ini mmɔ esemede enɔ fi, man afo eyere mmɔ ndien idighe eke mme owo, ndien afo eyeyere mmɔ.

9 Iŋ, O Abasi, afo eme atua mi mbɔm, onyuŋ okop mme eseme mi ke ufɔt mbon-esop fo.

10 Iŋ, ndien afo nko eme okop mi ke ini ebinde mi esio ndien mme asua mi esin mi; iŋ, afo ama okop mme eseme mi, ndien ayaresit ye mme asua mi, ndien afo ama edise mmɔ ke iyaresit fo ye usɔp nsobo.

11 Ndien afo ama okop mi ke ntak mme ukut mi ye akpanikɔ mi; ndien edi ke ntak Eyen fo ke afo enyene mbɔm ntem ɔnɔ mi, ke ntak oro ami nyeseme nnɔ fi ke mme ukut mi, koro idaresit mi odu ke afo; koro afo eme ɔŋwɔŋɔre mme ubiere ikpe fo ɔkpɔŋ mi, ke ntak Eyen fo.

12 Ndien idaha emi Alma ɔdɔhɔ mmɔ ete: Ndi mbufo emebuɔt idem ke mme ŋwed Abasi oro emi mbon eset ekewetde?

13 Sese, edieke mbufo enamde, ana nte mbufo ebuɔtidem ke se Zenos eketiŋde; koro, sese enye ɔdɔhɔ ete: Afo eme ɔŋwɔŋɔre mme ubiere ikpe fo ke ntak Eyen fo.

14 Idaha emi sese, nditɔ eka mi, ami nyebup mme mbufo emekot mme ŋwed Abasi? Edieke mbufo ekotde, ntak emi mbufo mibuɔtke idem ke Eyen Abasi?

15 Koro owo iwetke ite ke Zenos ikpɔŋ eketiŋ mme ŋkpɔ emi, edi Zenock nko ama etiŋ abaŋa mme ŋkpɔ emi—

16 Koro sese, enye ama ɔdɔhɔ ete: Afo eme ayaresit, O Jehovah, ye mbon emi, koro mmɔ mimaha ndifiɔk mme mbɔm emi afo enyenede abaŋa mmɔ ke ntak Eyen fo.

17 Ndien idaha emi, nditɔ eka mi, mbufo emekut ete ke ɔyɔhɔ prophet iba ke eset etie ntiense abaŋa Eyen Abasi, ndien ke ntak emi mme owo mike ifiɔkke mme ikɔ esie mmɔ etɔŋɔ enye ke itiat ewot.

18 Edi sese, emi idighe kpukpru; mmɔ emi idighe ŋkukure mme owo emi etiŋde ikɔ ebaŋa Eyen Abasi.

19 Sese, Moses ama etiŋ abaŋa enye; iŋ, ndien sese ema emenere utɔ emi ke wilderness, ete owo ekededi emi esede enye eyedu uwem. Ndien ediwak ema ese enyuŋ edu uwem.

20 Edi ekpri ibat owo ema efiɔk se mme ŋkpɔ emi ɔwɔrɔde, ndien emi ke ntak nsɔŋesit mmɔ. Edi ediwak ema edu emi ekesɔŋde esit tutu mmɔ isehe, ke ntak oro mmɔ etak. Idaha emi ntak emi mmɔ misehe edi sia mmɔ mike ibuɔtke idem ete ke eye ɔkɔk mmɔ.

21 O nditɔ eka mi, edieke ekande ekɔk mbufo ke ndise ke enyin ikpɔŋ man ekɔk mbufo, ndi mbufo ikpe isehe ke usɔp, mme ndi mbufo ekpe esɔŋ esit mbufo ke unana mbuɔtidem, enyuŋ edi ifu, man mbufo ukuse ye enyin mbufo, man mbufo etak?

22 Edieke edide ntre, eyedɔdiɔk ɔnɔ mbufo; edi edieke midighe ntre, ndien ese ke enyin mbufo enyuŋ etɔŋɔ ndibuɔt idem ke Eyen Abasi, ete ke enye eyedifak ikɔt esie, ete ke enye eyekut ndutuhɔ onyuŋ akpa man afak mme idiɔk ŋkpɔ mmɔ; ete ke enye eyeset ke mkpa, emi edinamde eriset ke mkpa etibe, ete ke kpukpru owo eyeda ke iso esie, man ebiere ikpe ke akpatre ye ke usen ubiere ikpe, nte mme utom mmɔ edide.

23 Ndien idaha emi, nditɔ eka mi, ami meyom nte mbufo etɔ ikɔ emi ke esit mbufo, ndien nte enye ɔtɔŋɔde ndikpon kpa ntre ebɔk enye ye mbuɔtidem mbufo. Ndien sese, enye eye akabare edi eto, ɔkɔri ke mbufo edi nsinsi uwem. Ndien ke ini oro yak Abasi ɔnɔ mbufo ete mbiomo mbufo efere, oto ke idaresit Eyen esie. Ndien kpukpru emi ke mbufo ekeme ndinam edieke eduakde. Amen.