1 Chiney u tomuren ni Alma e ke weliy e pi thin ney, mar piiʼed e thin nge yaen ngakʼ ni yaed baʼadag ni ngar nanged ko nge michaenʼraed nga taʼareb e Got fa dangay, ni gomanga yog ngoraed e re waʼamngin ney ni ke weliy morngaʼagen, ara uw rogon ni thingar ri yunged fare awoch, ara fare bugithin ni ke weliy morngaʼagen, ni faʼani yoeg ni thingar yunged nga lan gumʼirchaʼraed; ara buʼuw rogon yalen ni ngar muruwel gaed ko mich roraed.

2 Ere gaʼar Alma ngoraed: Musap gaed, kamoeged ni dabiyog ni ngam liyoer gaed ko Got romed ni bachan e ka ninʼ med nga wuruʼ e pi tagilʼ e moʼolung romed. Machane musap gaed, gube yoeg ngomed, ni faʼanra gimed be lemnag ni dabiyog ni ngam liyoer gaed ku Got, ma ri gimed be oloboch, ma rib tʼuf romed ni ngam poeyed fapi chep nib thothup; ma faʼanra gimed be lemnag ni kar filed ngomed e pinnʼey, meʼere damur nanged fan.

3 Ku bay u wunʼmed ni kam poeyed e nʼen ni yoeg Zenos, ni fare profet ni kakrom, ni yoeg morngaʼagen e meybil fa liyoer?

4 Ya gaʼar: Gur e gab sug ko wurngaenʼ, O Got, ya gur e kam rungʼag e meybil rog, ni mus nga napʼan ni ugmoy u lan wuruʼ e binaw; arragon, gur e gab sug ko wurngaenʼ u napʼan nug meybil ni morngaʼagen e piʼin ur moyed ni toʼogor rog, ere gur e kam munguy nag laniyaenʼraed ngog.

5 Arragon, O Got, nge gur e gab sug ko wurengaenʼ rom ngog u napʼan nug meybil ngom u lan e falang rog; nge napʼan nug yoer ngom u lan e meybil rog, mag motoyil ngog.

6 Nge ku bayay, O Got, ma napʼan nug sul nga tabinaew rog ma kum motoyil ngog u lan e meybil rog.

7 Ma napʼan ni guwaen nga singgil rog, O Somoel, mug meybil ngom, mag motoyil ngog.

8 Arragon, gur e gab sug ko wurengaenʼ ngakʼ pifakam u napʼan ni yaed ma meybil ngom, ni gur e ngam rungʼag e meybil roraed ma gathi gidiiʼ, ere gur e gara motoyil ngoraed.

9 Arragon, O Got, gur e ki i wureng anʼum ngog, mag motoyil ko meybil rog u fithikʼ e pi gidiiʼ rom ni kar moʼolung gaed.

10 Arragon, ma kum motoyil ngog u napʼan ni kan chuwegeg me dariy fan nigeg e pi toʼogor rog; arragon, gur e kam motoyil ko pi meybil rog, mag puwaenʼ ko pi toʼogor rog, mag yib ngoraed u fithikʼ e damomuw rom ngam gechig nagraed nib papay.

11 Ma gur e kam motoyil ngog ni bachan e kirbaenʼ rog nge yulʼyulʼ rog; nge bachan Fakam ni gur e ke wureng anʼum riy ngog, ere gura meybil ngom u fithikʼ gubin e pi kirbaenʼ rog, ya falfalaenʼ rog e bay rom; ya gur e kam chefeg e gechig rom rog nga orel, ni bachan Fakam.

12 Ere chiney e gaʼar Alma ngoraed: Ke mich u wunʼmed fapi chep nib thothup ni yoloey e piʼin kakrom?

13 Musap gaed, faʼanra ke mich u wunʼmed, ma thingari mich u wunʼmed ko mang e yoeg Zenos; ya, musap gaed i gaʼar: Gur e kam chefeg e gechig rom rog nga orel ni bachan Fakam.

14 Chiney e musap gaed, pi walageg, nggu fithmed, kam poeyed fapi chep nib thothup? Ma faʼanra kam poeyed, ere buʼuw rogon ma dar mich u wunʼmed ngakʼ fachaʼ ni Fak Got?

15 Ya gathi ni yoloey ni Zenos e goʼir e weliy e pinnʼey, ya mus ku Zenock maki weliy marngaʼagen e pinnʼey—

16 Ya musap gaed, i gaʼar: Gur e kam puwaenʼ, O Somoel, ngakʼ e pi gidiiʼ ney, ni bachan e dabra nanged fan e pi murnguy rom ni kam piiʼ ngoraed ni bachan Fakam.

17 Ere chiney, o pi walageg, kam guyed ni bin lʼagruw ngay e profet ni kakrom, e micheg fachaʼ ni Fak Got, ma fapi gidiiʼ ni dubraed ni ngar nanged fan e pi thin rokʼ e ra malang niged nge yimʼ.

18 Machane musap gaed, gathi kemus aray; galichaʼney e gathi kemus ni yigoʼ yow e kar weliyew morngaʼagen fachaʼ ni Fak Got.

19 Musap gaed, ri ire weliy Moses morngaʼagen; arragon, ere musap gaed bay ba pow nni tining ngalang u wuruʼ e binaw, ni chaʼan ra sap ngay e rayog ni nge paer nib fos. Ma rib yoʼor e piʼin ni sap mar pired ni yaed bafos.

20 Machane ri buchʼuw i yaed e nangfan e pinnʼem, ni bachan e ʼelʼel u gumʼirchaʼraed. Machane rib yoʼor i yaed nib ʼelʼel laniyaenʼ ni dubraed ni ngar sap gaed, ere ra mʼaed. Ma, fan ni dar sap gaed e de mich u wunʼraed nra gol nagraed.

21 O pi walageg, faʼan gimed ra gol ni kemus nu dakean e changar ni ngam tayed mi gimed gol, ere dab musap gaed nib papay, fa gimed baʼadag ni ngam ʼelʼel niged gumʼirchaʼmed nga fithikʼ i laniyaenʼmed nde mich, nge gamed, ni nge dab musap gaed, mi gimed yimʼ?

22 Ma faʼanra arragon, ma ra awe gafgow ngomed; ma faʼanra gathi arragon, meʼere mu changar gaed mi gimed tabolngin nag e mich romed ngakʼ fachaʼ ni Fak Got, ni bay yib ni nge bayuliy e gidiiʼ rokʼ, ma yira gafgow nag min liiʼ ngemʼ ni bayul ko pi denen roraed; ma ra fos bayay ko yamʼ, niʼir e ra yib nag e foskoyamʼ, ni nge gubin e gidiiʼ ma thingar sakʼiy gaed nga pʼoewchen, ni ngan pufthin nagraed ko bin tomur e rran ni fare rran ko pufthin, u rogon e pi muruwel roraed.

23 Ere chiney, o pi walageg, gu baʼadag ni ngam yunged e re bugithin ney nga lan gumʼirchaʼmed, ma napʼan ni bayi thow ma arame ngam fogloliyed u dakean e mich romed. Ere musap gaed, ra ngaelʼ nib ke gakʼiy, ni ra ilal u fithikʼmed iyaen ko yafos ni dabimus biʼid. Ma gomanga bing Got woʼen ngomed ni nge yog ni ngam baʼud gaed, u dakean e falfalaenʼ rokʼ Fak. Ma gubin e pinnʼey ma ra yog ni ngam rinʼed. Amen.