1 Ndien idaha emi edikem ete ke ini Alma ama eketiŋ mme ikɔ emi ɔnɔ mmɔ enye ɔsuhɔre etie ke isɔŋ, ndien Amulek adaha adada onyuŋ ɔtɔŋɔ ndikpep mmɔ, ete:

2 Nditɔ eka mi, ami nkere ke usuŋ iduhe mbufo ndinana ifiɔk mbaŋa mme ŋkpɔ emi emi etiŋde abaŋa edidi Christ, emi nnyin ikpepde ite ke edi Eyen Abasi; iŋ, ami mefiɔk nte ke ema etim ekpep mbufo mme ŋkpɔ emi mbemiso eneni mbufo ye nnyin.

3 Ndien nte mbufo eyomde eto edima eyen eka mi ete enye anam mbufo efiɔk se anade nte mbufo enam, ke ntak mme ukut mbufo; ndien enye etiŋ ekpri ɔnɔ mbufo ete mbufo ebeŋe esit mbufo; iŋ, ndien enye ama eteme mbufo ete enyene mbuɔtidem ye ime—

4 Iŋ, tutu ete yak mbufo enyene akwa mbuɔtidem tutu ke nditɔ ikɔ oro ke esit mbufo, man mbufo edomo ufɔn ŋkpɔ emi ese.

5 Ndien nnyin imikut ite ke akwa mbume emi odude ke esit mbufo edi mme ikɔ emi edi Eyen Abasi, mme mme Christ ididuhe.

6 Ndien mbufo nko emekut ete ke eyen eka mi owut mbufo, ke ediwak ini, ete ke ikɔ emi odu ke Christ ɔnɔ erinyaŋa.

7 Eyen eka mi etiŋ abaŋa mme ikɔ Zenos, ete ke erifak edi oto Eyen Abasi, nko ye mme ikɔ Zenock; ndien nko enye etiŋ abaŋa Moses, ndiwut nte ke mme ŋkpɔ emi edi akpanikɔ.

8 Ndien idaha emi, sese, ami nyetie ntiense nnɔ mbufo ke idem mi nte ke mme ŋkpɔ edi akpanikɔ. Sese, ami ndɔhɔ mbufo, nte ke ami mefiɔk ke Christ eyedi ke ufɔt nditɔ owo, man ada mme ndudue ikɔt esie odori ke idem esie, ndien ete ke enye eyefak mme idiɔk ŋkpɔ ererimbot; koro Jehovah Abasi ɔdɔhɔ.

9 Koro ɔfɔn ete enam usio-isop; koro nte akwa uduak Nsinsi Ete edide ana nte enam usio-isop, mme midighe ntre kpukpru ubon owo ekpe etak owo ikanke inyaŋa; iŋ, kpukpru esɔŋ ibuot; iŋ, kpukpru eduɔ enyuŋ esop, ndien ana nte etak ibɔhɔke oto ke usio-isop emi ɔfɔnde ete ke anam nte enam.

10 Koro ɔfɔn ete ke ana nte akamba ye akpatre uwa odu; iŋ, idighe uwa eke owo, inyuŋ idighe eke unam, inyuŋ idighe eke utɔ inuen ndomo kiet; koro inaha nte edi uwa emi owo anamde; edi ana edi anana utit ye nsinsi uwa.

11 Idaha emi owo ndomo kiet iduhe emi ekemede ndiwa iyip esie emi edifakde mme idiɔk ŋkpɔ owo efen. Idaha emi, edieke owo owotde owo, sese ndi mbet nnyin, emi edide edinen, eye ada uwem eyen eka esie? Ami ndɔhɔ mbufo, Iŋ iŋ.

12 Edi mbet oyom uwem owo emi owotde owo; ke ntak oro ŋkpɔ ndomo kiet ikemeke ndidu emi midihe anana utit usio-isop emi edikemde ye mme idiɔk ŋkpɔ ererimbot.

13 Ke ntak oro, ɔfɔn ete ke ana akamba ye akpatre uwa odu, ndien ke ini oro ke edidu, mme ke edifɔn ete ana odu, nditre ndiduɔk iyip; ke ini oro ke mbet Moses edisu; iŋ, kpukpru eyesu, kpukpru ntɔi ye ekpri ŋkpɔ, ndien ndomo kiet idibehe ifep.

14 Ndien sese, emi edi ofuri se mbet ɔwɔrɔde, kpukpru ŋkpɔ owut akamba ye akpatre uwa oro; ndien akamba ye akpatre uwa oro edi Eyen Abasi, iŋ, anana utit ye nsinsi.

15 Ndien ke ntem enye eyeda erinyaŋa ɔsɔk kpukpru mbon emi ebuɔtde idem ke enyiŋ esie; emi edi ntak akpatre uwa, ndida mme esit mbɔm ndi, emi okponde akan nnen nnen ido, onyuŋ adade usuŋ ɔnɔ mme owo man mmɔ enyene mbuɔtidem enɔ erikabare esit.

16 Ndien ke ntem ke mbɔm akan ɔyuhɔ se nnen nnen ido oyomde, onyuŋ akanare mmɔ ke mme ubɔk ukpeme, ke ini eyakde enye emi minyeneke mbuɔtidem inɔ erikabare esit enɔ kpukpru mbet emi nnen nnen ido oyomde; ke ntak oro eda enye emi enyenede mbuɔtidem esim erikabare esit edi akamba ye nsinsi uduak erifak.

17 Ke ntak oro yak Abasi ɔnɔ mbufo, nditɔ eka mi, ete mbufo etɔŋɔ ndinyene mbuɔtidem mbufo nnɔ erikabare esit, man mbufo etɔŋɔ ndikot edisana enyiŋ esie, man enye enyene mbɔm abaŋa mbufo;

18 Iŋ, eseme enɔ enye ke ntak mbɔm; koro enye ɔsɔŋde ke erinyaŋa.

19 Iŋ, esuhɔre idem mbufo, enyuŋ eka iso ke akam enɔ enye.

20 Eseme enɔ enye ke ini edude ke mme iŋwaŋ mbufo, iŋ, ebaŋa mme ufene mbufo.

21 Eseme enɔ enye ke mme ufɔk mbufo, iŋ, ebaŋa kpukpru ikɔt ufɔk mbufo, ke usen ubɔk, uwemeyo, ye mbubreyo.

22 Iŋ, eseme enɔ enye ebaŋa odudu mme asua mbufo.

23 Iŋ, eseme enɔ enye ebaŋa satan, emi edide asua ɔnɔ kpukpru nnen nnen ido.

24 Eseme enɔ enye ebaŋa se etɔde ke mme iŋwaŋ mbufo, man mbufo eforo ke mmɔ.

25 Eseme ebaŋa mme ufene iŋwaŋ mbufo, man mmɔ etɔt.

26 Edi emi idighe kpukpru; ana nte mbufo eŋwaŋa esit mbufo ke mme ubet mbufo, ye mme ebiet udibe mbufo, ye wilderness mbufo.

27 Iŋ, ndien ke ini mbufo misemeke inɔ Jehovah, eyak esit mbufo eyɔhɔ, etiene enye ke akam kpukpru ini ebaŋa ufɔn mbufo, nko ye ufɔn mbon emi edude ye mbufo.

28 Ndien idaha emi sese, ndima nditɔ eka mi, ami ndɔhɔ mbufo, ekukere ke emi edi kpukpru; koro ke ini mbufo ema enam kpukpru ŋkpɔ emi, edieke mbufo esinde ndiŋwam mbon unana, ye mbon edide iferi, enyuŋ esin ndikise mbon udɔŋɔ ye mbon ukut, nyuŋ nnɔ mbon emi eyomde uŋwam inyene mbufo, edieke mbufo enyenede—ami ndɔhɔ mbufo, edieke mbufo minamke baba mme ŋkpɔ emi, sese, akam mbufo edi ikpikpu, ndien inyeneke ufɔn inɔ mbufo, ndien mbufo etie nte mbon mbubik emi ekaŋde akpanikɔ.

29 Ke ntak oro, edieke mbufo mitihi ndinyene ima, mbufo edi mbio, emi mbon emi enamde asana etopde eduɔk, (koro minyeneke ufɔn) ndien edigi ke ukot.

30 Ndien idaha emi, nditɔ eka mi, ami meyom nte, ke ini mbufo ema ekebɔ ediwak ntiense, ke ntak emi ndisana ŋwed Abasi etiede ntiense ebaŋa mme ŋkpɔ emi, mbufo edi enyuŋ eŋwum mfri emi ekemde ye erikabare esit.

31 Iŋ, ami meyom nte mbufo edi ndien ukusɔŋ esit mbufo aba; koro sese, idaha emi edi ini ye usen erinyaŋa mbufo; ndien ke ntak oro, edieke mbufo edikabare esit inyuŋ isɔŋke esit mbufo, ke nde nde oro ke edida akwa uduak erifak idi inɔ mbufo.

32 Koro sese, uwem emi edi ini ɔnɔ mme owo ndibeŋe idem ndisobo ye Abasi; iŋ, sese eyo uwem emi edi eyo mme owo ndinam mme utom mmɔ.

33 Ndien idaha emi, nte nketiŋde nnɔ mbufo ke akpa, sia mbufo ema ekenyene ata ediwak ntiense, ami mkpe mbufo ubɔk nte yak mbufo ukusik usen erikabare esit mbufo unim ke akpatre; koro ke ini uwem emi ebede, emi enɔde nnyin ete ibeŋe idem ibet nsinsi uwem, sese, edieke nnyin mikamake ini nnyin ɔfɔn ke ini idude ke uwem emi, ke ini oro ke okoneyo ekim edidi emi nnyin midinamke utom.

34 Mbufo ikemeke ndidɔhɔ, ke ini edade mbufo edi ke idiɔk ini oro, ete ke imɔ iye ikabare esit, ete ke imɔ iye inyɔŋ itiene Abasi imɔ. Iŋ iŋ, mbufo ikemeke ndidɔhɔ emi; koro ukem spirit emi okodude mbufo ke idem ke ini emi mbufo eke ekpɔŋde uwem emi, kpa ukem spirit oro eye enyene odudu ke idem mbufo ke nsinsi ererimbot oro.

35 Koro sese, edieke mbufo esikde usen ndikabare esit mbufo enɔ iso tutu mkpa, sese, mbufo eme ekabare edu ke idak spirit satan, ndien enye anam mbufo ekesie, ke ntak oro, Spirit Jehovah ɔwɔrɔ ɔkpɔŋ mbufo, ndien inyeneke ebiet ke idem mbufo, ndien satan enyene kpukpru odudu ke idem mbufo; ndien emi edi akpatre idaha mme idiɔk owo.

36 Ndien emi ami mefiɔk, koro Jehovah ɔdɔhɔ ete ke enye iduŋke ke mme temple emi misanake, edi ke esit mme ndinen owo ke enye oduŋ; iŋ, ndien enye nko ɔdɔhɔ ete ke ndinen owo eyedu ke obio ukɔŋ esie, man ukuwɔrɔ aba; edi enam mme ɔfɔŋ mmɔ efia oto ke iyip Eyen erɔŋ.

37 Ndien idaha emi, ndima nditɔ eka mi, ami meyom nte mbufo eti mme ŋkpɔ emi, ndien ete yak mbufo enam erinyaa mbufo ɔwɔrɔ usuŋ ye ndik ke iso Abasi, ndien ete yak mbufo ukukaŋ aba edidi Christ;

38 Ete mbufo ukuneni eneni aba ye Edisana Spirit, edi ete yak mbufo ebɔ enye, enyuŋ eda enɔ idem mbufo enyiŋ Christ; ete mbufo esuhɔre idem mbufo esin ntan, enyuŋ ekpono Abasi, ke ebiet ekededi emi mbufo edude, ke spirit ye ke akpanikɔ; ndien ete ke mbufo edu ke ekɔm ke usen ke usen, ke ntak ediwak mbɔm ye mme edidiɔŋ emi enye ɔnɔde mbufo.

39 Iŋ, ndien ami nko nnɔ mbufo item, nditɔ eka mi, nte mbufo ekpeme ke akam kpukpru ini, man mme idomo satan ukusim mbufo, man enye ukukan mbufo, man mbufo ukudu ke idak esie ke akpatre usen; koro sese, enye inɔhɔ mbufo eti ŋkpɔ ndomo kiet.

40 Ndien idaha emi ndima nditɔ eka mi, ami nyenɔ mbufo item nte enyene ime, ndien nte mbufo eyɔ utɔ kpukpru ukut; nte mbufo ukusuŋi mbon emi ebinde mbufo esio ke ntak ata unana mbufo, man mbufo ukukabare udi mme anam idiɔk ŋkpɔ nte mmɔ;

41 Edi ete yak mbufo enyene ime, enyuŋ eyɔ mme ukut oro, ye ata idorienyin ete ke usen kiet ke mbufo eyeduɔk odudu ke kpukpru ukut mbufo.