1 Fakag, mu lʼegilim ko pi thin rog; ya gube micheg ngom, ni nʼumngin i napʼan ni gara fol ko pi motochiyel ku Got ma ra felʼ rogom u lan e binaw.

2 Gubaʼadag ni ngam rinʼ ni woed ni kug rinʼ, ni ngam tay u wunʼum fare kalbus ntay ngakʼ e pi chitamangdaed; ya ur moyed u kalbus, ma dariy beeʼ ni yog ni nge pagraed ma kemus ni fare Got ku Abraham, ni fare Got ku Isaac, ni fare Got ku Jacob; ma rriyulʼ ni chuwegraed u fithikʼ e pi gafgow ko kirbaenʼ roraed.

3 Ere chiney, O Helaman ni fakag, musap, gur e kagab pagael, ere, gube wenig ngom ni ngam motoyil ko thin rog mag falwok rog; ya gumnang ni piʼin ni yaedra tay e pagaenʼ roraed ngakʼ Got e yira ayuwegraed u fithikʼ e pi moʼomawʼ roraed, nge magawon roraed, nge pi kirbaenʼ roraed, ma yira chibiy raed ngalang ko bin tomur e rran.

4 Ma dabug ni ngam lemnag ni kayug gunang rog e pinnʼey—ya gunang ni gathu dakean e tin u fayleng banʼen ya nangaenʼ nu tharmiy, ma gathu dakean e lem ko gidiiʼ ya lem ku Got.

5 Ere chiney, e musap, gube yoeg ngom, ni faʼan gomanga dawor gu thap ngak Got ma dabiyog ni nggu nang e pinnʼey; machane Got e manang, ma angel rokʼ nib thothup, e ke yoeg e pinnʼey ngog, ni gathi bachan e gag e gub yalʼuw;

6 Ya ku guwaen iyaen ni gamaed fapi pagael ni fak Mosiah, ni gamaed be gay rogon ni nggu gatheayed fare galasia ku Got; machane musap, Got e lʼoeg e angel rokʼ nib thothup ni nge tileg maed u kanawoʼ.

7 Ere musap, i non ngomaed, ni boed gaʼangin i lingan e dirraʼ, ma fare fayleng ni gaʼangin e rur u tan aey maed; ma gamaed gubin nug thiggaed nggu awgaed nga butʼ, ya ke yib madguwan fare Somoel ngomaed.

8 Ere musap, fare lam e gaʼar ngog: Mu suwon ngalang. Mug suwon mug sakʼiy ngalang, mug guy fare angel.

9 Me gaʼar ngog: ni mus ni faʼanra gabaʼadag ni ngan gatheayem, ma dab kum gay rogon ni ngam gatheay fare galasia ku Got.

10 Me yibi buch nug thig nggu aw nga butʼ; ma dalip e rran nge dalip e nepʼ nʼumngin i napʼan nug paer ni dakiyog nug bing lʼugnag, ara gu mithmitheg paʼag nge ayig.

11 Ma fare angel e ki weliy ngog boech banʼen nib yoʼor, ni i rungʼag pi walageg, machane gag e dag rungʼag; ya napʼan nug rungʼag fapi thin—ni mus ni faʼanra gabaʼadag ni ngam gatheayem, ma dab kum gay rogon ni ngam gatheay fare galasia ku Got—mug chafin nag e murus me sukʼ laninʼug ngay ni sana rayog ni ngan gatheayeg, ma arame gu aw nga butʼ ni dakug rungʼag banʼen.

12 Machane ni gechig nigeg ko gafgow ni amith ni manechubog, ya yaʼel rog e yaeni madaʼ nga ba dodow ni ke magafaenʼ ko gechig ni amith ni bachan gubin e pi denen rog.

13 Arragon, yib nganʼug gubin e pi denen rog nge ngongol rog nib kireb, niʼir e kug gafgow riy ko gechig ni amith nu infierno; arragon, gguy niʼug togopluw ngakʼ e Got rog, ma dagur fol ko pi motochiyel rokʼ nib thothup.

14 Arragon, ma kug thang e pogofan ko bitir rokʼ nib yoʼor, ara kug wawliyraed iyaen nga orel nga fithikʼ e gafgow; arragon, ere ngan ngochngocheg i yoeg ni pi denen rog e rib almarin, ni gura lemnag e wub nga pʼoewchen Got ma be gafgow e yaʼel rog ko tamdag ni dabiyog i weliy rogon.

15 O, rug lemnag, ni gomanga gu chuw nge mʼay e yaʼel rog nge dagur rog nga bayang, ni nga dab kun fekeg nggu sakʼiy nga pʼoewchen e Got rog, ni ngan pufthin nigeg ko pi ngongol rog.

16 Ere chiney, e dalip e rran nge dalip e nepʼ ni kug gafgow, ni gechig ko amith ni matay e yaʼel.

17 Me yibi buch u napʼan ni kug gafgow ko amith, u napʼan ni ke magaf anʼug ko pi denen rog nib yoʼor ni gube lemnag, ma musap, ma kiyib nganʼug ni gu rungʼag chitamag nibe prophesy nag ngakʼ fapi gidiiʼ ni morngaʼagen fare wub rokʼ beeʼ ni Yesus Kristus, ni Fak Got, ni nge bayul nag e gidiiʼ nu fayleng ko pi denen roraed.

18 Chiney, e napʼan ni koel e tafnaey rog e biney e lem, mug yoer nag i yoeg u lan gumʼirchaʼeg: O Yesus, ni gur Fak Got, murnguyeg, ya kar guʼaw nga fithikʼ i luben e amith, ma kan liyegeg ko fapi chen ni mʼagan e yamʼ.

19 Ere chiney, e musap, napʼan nug lemnag e rennʼey, ma daki yib nganʼug e pi amith ni bay rog; arragon, ma daki magaf anʼug ko pi denen rog.

20 Ere, o mang falfalaenʼ, nge mang tamilang e ray ni rib felʼ ni kug guy; arragon, laninʼug e kari sug ko falfalaenʼ nib gel ni woed fini gel e amith nug tay!

21 Arragon, gube yoeg ngom, o fakag, ni dakuriy banʼen ni arfini kireb mab moʼoy ni woed e pi amith ni kug tay. Arragon, nge ku bayay ni gube yoeg ngom, o fakag, ni nga barbaʼ i paʼay, e dakuriy banʼen ni arfini felʼ mab athibthib ni woed e falfalaenʼ nug tay.

22 Arragon, gu lemnag ni kug guy, ni boed e chitamangdow i Lehi ni guy, Got nibe paer u dakean e chiya ni gilʼelung rokʼ, nib liyeg e pi angel nib yoʼor nga yalen e mathaʼeg, ni yaed be tang ma yaed be oge magaer ko Got roraed; arragon, ma yaʼel rog e ribe athpeg ni gomanga bay u roem.

23 Machane musap, paʼag nge ayig e ki sul gelingin bayay, mug sakʼiy ngalang, mug dag ko fapi gidiiʼ ni kug piiʼeg ku Got.

24 Arragon, ma ngiyalʼ innʼem nge madaʼ ko chiney, e kug muruwel ni dagur tal, ni gomanga yog nug miliy e gidiiʼ iyaen ko kalngaenʼ; ni gomanga yog ni ngug wawliyraed ngar nanged falʼngin fare falfalaenʼ ni kug thamiy; ni nge yog nra piiʼed yaed ku Got, mar sug gaed ko fare Kan ni Thothup.

25 Arragon, nge chiney e musap, O fakag, fare Somoel e ke piiʼ e falfalaenʼ ngog ni rib gel u daken waʼamngin e pi muruwel rog;

26 Ya bachan fare thin ni ke tamilang nag ngog, ere musap, boʼor e gidiiʼ ni kar piiʼed yaed ku Got, ma kar riiʼed lamen ni boed ni kug riiʼ lamen, ma kar guyed nga oewchraed ni boed ni kug guy; ere yaed manang morngaʼagen e pinnʼey ni kug weliy, ni boed ni gumnang; ma re tamilngaenʼ ni bay rog e yib rokʼ Got.

27 Ma kuʼun ayuwegeg u tane pi moʼomawʼ nge pi magawon ni gubin mit, arragon, nge gubin mit i yalen e pi gafgowaenʼ; arragon, Got e ke chuwegeg u kalbus, ma ki pithig e gaf rog, ma ke chuwegeg u paʼ e yamʼ; arragon, ere gube tay e pagaenʼ rokʼ ngakʼ, ma kura chuwegeg ko gin nib tʼuf ni nggu chuw riy.

28 Ma gumnang ni ra chibiyeg ngalang ko bin tomur e rran, ni nggu paer rokʼ u fithikʼ e rir; arragon, gura oge magaer ngakʼ ni gubinfen, ya i fek e pi chitamangdaed ngar chuw gaed u Egypt, me tharey fapi gidiiʼ nu Egypt ko day u lan e Red Sea; me powiʼiyraed u dakean gelingin iyaen nga lan farengi nam nni michmicheg; arragon, ma ke chuwegraed u paʼ e sib nge kalbus u bayay ngo bayay.

29 Arragon, mi ki fek e pi chitamangdaed ngar chuw gaed u lan fare binaw nu Jerusalem; ma kirinʼ bayay, ko fare gelingin ni dabimus biʼid, ni chuwegraed u paʼ e sib ngo kalbus, u bayay ngo bayay ni aram rogon iyib ke madaʼ ko biney e rran; ma gubin e ngiyalʼ ma gube tay u wunʼug e kalbus ni un tay ngoraed; arragon, ma kuʼar rogon ngom ni thingar mu tay u wunʼum, ni boed ni kug rinʼ, nug tay u wunʼug e kalbus ni un tay ngoraed.

30 Machane musap, o fakag, gathi kemus aray; ya thingar munang ni boed ni gumnang, ni nʼumngin i napʼan ni gara fol ko pi motochiyel ku Got ma ra felʼ rogom u lan e binaw; ma thingar kumnang, ni nʼumngin i napʼan ni dab mu fol ko pi motochiyel ku Got ma yira chuwegem u pʼoewchen. Ere rennʼey e aray rogon e thin rokʼ.