1 Ere chiney, tam o Helaman ni fakag, gube chiyliy ngom ni ngam fek fapi chep ni kan pag gafalngin ngog;

2 Ma kug be chiyliy ngom ni ngam chaʼariy ba babyor ni morngaʼagen e pi gidiiʼ ney, ni boed rogon ni kug rinʼ, nga dakean fapi plate ku Nephi, ma ngam chaʼariy gubin e pinnʼey niʼug chaʼariy nge paer nib thothup, ni boed rogon ni kuʼug chaʼariy; ya fan nga ba lem nib gonop ni ngan chaʼariy.

3 Ma pi plate ney ni brass, niʼir e kan ker e yol nga dakean, niʼir e bay chipin fapi chep nib thothup u dakean, niʼir e bay e chep ni morngaʼagen e pi chitamangdaed ni kakrom riy, ni tabab aram iyib ko tabolingin—

4 Musap, ke muʼ i prophesy nag rokʼ e pi chitamangdaed, ni thingar ni chaʼariy ma ngan thapeg u rebo mfen ngo reb, ma bayi ayuweg me chaʼariy Somoel u paʼ nge madaʼ ko ngiyalʼ ni ke thap ko gubin e nam, nge mfen, nge thin, nge gidiiʼ, ni ngar nanged morngaʼagen e pinʼen nib riyulʼ nib miith ni bay riy.

5 Ere chiney e musap, faʼanra ngan chaʼariy ma thingar ni ayuweg nge paer nib gael raʼen; arragon, ngan ayuweg nge paer nib gael raʼen; arragon, nge ku gubin e pi plate ni bay e tin nib thothup ni kan yoloey ngay.

6 Chiney e rayog ni ngam lemnag nib meechiyang e rennʼey ni kug rinʼ; machane musap gube yoeg ngom, nu dakean e tin baʼachig mab moem banʼen e yima muguʼuliy e tin nib gaaʼ banʼen riy; ma tin nib achig banʼen e ke yoʼor yay ni ke athkuy laniyaenʼ e piʼin gonop.

7 Ma fare Somoel ni Got e muruwel nib yoʼor rogon ni nge muguʼuliy e gamʼing rokʼ nib gaʼfan mab manechubog; ma, u dakean e tin nib achig banʼen e ma athkuy Somoel riy laniyaenʼ e piʼin ba gonop me gagyeg nag woʼen e thap ko gidiiʼ ni poloʼ riy nib yoʼor.

8 Ere chiney, e ke yibi madaʼ ko ngiyalʼ ney ni gonop rokʼ Got ni pinnʼey e thingar ni chaʼariy; ya musap, kegaʼ nag bugwan e pi gidiiʼ ney, arragon, ma ke micheg ngakʼ boʼor i yaed ni pi yalen roraed e ba kireb, me tamilang laniyaenʼraed ko Got roraed me yog ni ngar thap gaed ni poloʼ riy.

9 Arragon, gube yoeg ngom, faʼan manga boech ni gathi bachan e pinnʼey ni bay ko yuke chep ney, ni bay u dakean e pi yungi plates ney, ma Ammon nge pi walagen e dabiyog ni ngar micheged ngakʼ boʼor e biyuʼ ko fapi Lamanites morngaʼagen fapi yalen ko pi chitamangraed ni dematʼaw; arragon, pi babyor ney nge pi thin riy e rafekedraed iyaen ko kalngaenʼ; ni arame, ke fekraed iyib kar nanged morngaʼagen fare Somoel ni Got roraed, ma kar falfalaenʼ gaed ngakʼ Yesus kristus ni Tabiyul roraed.

10 Ma miniiʼ e manang, ya faʼanra yog ma sana pi chep ney e ire nge fekraed iyib ni yaed ba bukun e biyuʼ, arragon, ma kub bukun e biyuʼ i pi walagdaed nib ʼelʼel laniyaenʼraed, ni fapi Nephites, ni arame chiney e kar ʼelʼel niged gumʼirchaʼraed nga fithikʼ e denen nge ngongol ni kireb, ko tamilang ni morngaʼagen e Tabiyul roraed?

11 Chiney e pinnʼey nib riyulʼ nib miith e dawor ni tamilngeg ngog nib felʼ rogon; ere nggu tal i weliy morngaʼagen.

12 Ma rayog nib gaman ni kemus ni nggog ni yibe chaʼariy ni fan nga ba gamʼing nib gaʼfan, nib gamʼing ni Got e manang; ya ma fonow u fithikʼ e gonop u dakean gubin e muruwel rokʼ, ma woʼen e rib kʼikʼiy, ma woʼen e ba manechubog.

13 O mu tay u wunʼum, mu tay u wunʼum, o Helaman ni fakag, arib yalen fapi motochiyel ku Got. Ni gaʼar: Faʼan gimed ra fol ko pi motochiyel rog ma ra felʼ rogmed u lan e binaw—machane faʼanra dab mu fol ko pi motochiyel rokʼ ma yira chuwegem u pʼoewchen.

14 Ere chiney e ngam tay u wunʼum, o fakag, ni Got e ke pag gafalngin ngom e pinnʼey, nib thothup, niki i ayuweg nge paer nib thothup, nge ku pinʼen ni bayi ayuweg me chaʼariy ni fan nga ba gamʼing nib gonop rokʼ, ni nge yog ni dag gelingin ko tin ni kubay e mfen nga mʼon.

15 Ere chiney e musap, gube yoeg ngom u dakean e nangaenʼ ko prophecy, ni faʼan gara rinʼ e ngongol nib togopluw ko fapi motochiyel ku Got, ma musap, pinnʼey nib thothup e yira fek nge chuw roem u gelingin Got, ma yira pagem nga paʼ Moʼoniyanʼ, ni nge pingegem ni rogon ni baʼadag ni boed fitiruʼ e grain nibe unupaʼ e nifeng.

16 Machane faʼan gara fol ko pi motochiyel ku Got, mag rinʼ ko pinnʼey nib thothup e pinʼen ni ke chiyliy Somoel ngom ni ngam rinʼ, (ya gur e ngam sabliy Somoel riy ngam weliy ngakʼ ni gubin e pinʼen ni kam rinʼ ngay) ere musap, dariy ba gelingin u fayleng ara infierno ni rayog ni nge fek rom, ya Got e rib gel ni rayog ni nge muguʼuliy gubin e thin rokʼ.

17 Ya ra muguʼuliy gubin e michmich rokʼ nga rogon ni tay ngom, ya ke muguʼuliy e pi michmich rokʼ nga rogon ni tay ngakʼ e pi chitamangdaed.

18 Ya ke michmicheg ngoraed ni ra chaʼariy e pinnʼey ni fan nga ba gamʼing nib gonop rokʼ, ni nge yog ni dag gelingin ko tin kubay e mfen nga mʼon.

19 Ere chiney e musap, reb e gamʼing ni ke muguʼuliy, e baʼaram ni ke sul bukun e biyuʼ fapi Lamanites ke tamilang laniyaenʼraed ko tin riyulʼ; ma ke dag gelingin u dakean e pinnʼey, ma kura dag gelingin u dakean e pinnʼem ko tin kubay e mfen nga mʼon; ere ngan chaʼariy e pinnʼey.

20 Ere gube chiyliy ngom, o Helaman ni fakag, ni ngam yulʼyulʼ i muguʼuliy gubin e pi thin rog, ni ngam yulʼyulʼ i koel falan e pi motochiyel ku Got ni kan yoloey.

21 Ere chiney, e nggu weliy ngom morngaʼagen fa riliwʼ nge aningeg yang i plate, ni ngam chaʼariy, me yog ni ngongol ni kireb nib miith nge pi muruwel nu malumor, nge pi muruwel roraed nib mamith morngaʼagen, ara fapi muruwel rokʼ fa piʼin ni kan liiʼraed nib mamith morngaʼagen, e nge yog ni ngan dag ngakʼ e pi gidiiʼ ney; arragon, gubin e pi mathang pogofan ni ur tayed, nge moroʼroʼ, nge pi matgael roraed, nge gubin e pi denen roraed nge pi ngongol roraed nib kireb, e nge yog ni ngan dag ngakʼ e pi gidiiʼ ney; arragon, ma ngam chaʼariy e pi mamaʼen e piliyeg thin ney.

22 Ya musap, fare Somoel e guy ni gidiiʼ rokʼ e kar tabab gaed ko muruwel u milmor, arragon, ni yaed be mathang pogofan nib miith morngaʼagen nge pi ngongol ko fananikan; ere fare Somoel e gaʼar, faʼanra dabra kalgaed ngaenʼraed ma yira thang oewchraed u dakean e fayleng.

23 Ere fare Somoel e gaʼar: Bay gu falʼeg rogon ba malang, ni fan ngakʼ fare tapigpig rog i Gazelem, ni ra mat raʼen u fithikʼ e lumor nge piiʼ e tamilang, ni nge yog nug dag ko gidiiʼ rog ni yaed ma pigpig ngog, ni nge yog nug dag ngoraed e pi muruwel rokʼ pi walagraed, arragon, pi muruwel roraed nib mamith morngaʼagen, nge pi muruwel roraed nu milmor, nge pi denen roraed nge fananikan roraed.

24 Ere chiney, o fakag, pi mamaʼen e pi piliyeg thin ney e ni tʼaer midlen ni nge yog ni muguʼul fare thin ku Got, niʼir e yoeg ni gaʼar:

25 Bay gu fek u fithikʼ e lumor nga langgin e tamilang gubin e pi muruwel roraed nib miith morngaʼagen nge pi fananikan roraed; ma faʼanra dabra kalgaed ngaenʼraed ma gura thang oewchraed u dakean e fayleng; ma gura fek nga langgin e tamilang gubin e pinʼen roraed nib miith morngaʼagen nge pi fananikan roraed, ni nge nang gubin e gidiiʼ ni bay rabaed nga tomur ngar tafnayed e binaw.

26 Ere chiney, o fakag, kad guyed ni dar kalgaed ngaenʼraed; ere kan liiʼraed, ma arame ke yibi madaʼ ko ngiyalʼ ney ma fare thin ku Got e ke muguʼul; arragon, ya pi ngongol ko fananikan roraed nib miith morngaʼagen e kan fek u fithikʼ e lumor nga tamilang kad nanged.

27 Ere chiney, o fakag, gube chiyliy ngom ni ngam tel gubin e pi thum, nge mʼag, nge mʼagaenʼ roraed u fithikʼ e ngongol ko fananikan nib miith morngaʼagen rokʼ e pi gidiiʼ ney, ni nga dabra nanged, ya richey ma kur uned ko mul nga milmor min thangraed.

28 Ya musap, bay ba riyaʼ u dakean e rangi nam ney ni gaʼangin, ni yira liiʼ gubin e piʼin ni yaed ma rinʼ e ngongol nu milmor, u rogon i gelingin Got, u napʼan ni kar luk gaed nga fithikʼ e kireb; ere gube athapeg ni nga dab ni liiʼ e pi gidiiʼ ney.

29 Ere ngam mithaeg e pi yalen rarogon i tuʼog nib miith e pi thum roraed nge pi mʼag roraed rokʼ e pi gidiiʼ ney, ma kemus ni pi denen roraed nge pi mathang pogofan ni ur tayed nge pi fananikan roraed e ire ngam guy rogon ngar nanged; mag fil ngoraed ni ngar dubuyed e denen nge fananikan nge mathang pogofan; ma kag rafil ngoraed ni pi gidiiʼ ney e ni liiʼ raed ni bachan e denen roraed nge fananikan roraed nge pi mathang pogofan ni ur tayed.

30 Ya musap, ra thanged e pogofan rokʼ gubin fapi profet ku Somoel ni rabaed nga fithikʼraed ni ngar weliyed ngoraed morngaʼagen e pi denen roraed; ma rachaʼen e piʼin ni kar thanged e pogofan roraed e yoer ngakʼ fare Somoel ni Got ni nge sul wengan ngakʼ e piʼin nra thanged e pogofan roraed; ere aray rogon e gechig ku Got ni yibi aw nga dakean e pichaʼaney ni yaed ma rinʼ e ngongol nu milmor nge pi gafarig nib mamith morngaʼagen.

31 Arragon, ma farengi nam e nge paer nib kireb waʼathan ni gubinfen ni fan ngakʼ e piʼin ni yaed ma rinʼ e ngongol nu milmor nge pi gafarig nib mamith morngaʼagen, nge yaeni madaʼ ko ngiyalʼ ni kan thang oewchraed, ma kemus ni faʼan yaedra kalngaenʼ u mʼon ni ngar luk gaed nga fithikʼ e kireb.

32 Ere chiney, o fakag, nopaʼam fapi thin ni kug weliy ngom; dab mu tamilngeg ngakʼ e pi gidiiʼ ney fapi yalen ni rarogon i tuʼog banʼen nib miith, machane ngam fil ngoraed ba fananikan ni dabimus biʼid ko denen nge ngongol ni kireb.

33 Mu machib nag ngoraed ni ngar kalgaed ngaenʼraed, me michaenʼraed ngakʼ fare Somoel ni Yesus Kristus; mu fil ngoraed ni ngar sobutʼ niged laniyaenʼraed ma ngar muding gaed mar munguy niged gumʼirchaʼraed; mu fil ngoraed ni ngar keruʼuyed gubin e pi lumel ku moʼoniyanʼ, u fithikʼ e mich roraed ngakʼ fare Somoel ni Yesus Kristus.

34 Mu fil ngoraed ni dabi ngochngochaenʼ raed i rinʼ e tin nib felʼ e muruwel, ma ngar muding gaed mar munguy niged yaed u gumʼirchaʼraed; ya ireray e piʼin ni yaedra pirʼeg e gapas ko yaʼel roraed.

35 O, mu tay u wunʼum, tam o fakag, mag fil e gonop u napʼan ni kagab pagael; arragon, mu fil u napʼan e felʼ yangren rom ni ngam fol ko pi motochiyel ku Got.

36 Arragon, mag meybil ngakʼ Got ni fan ko gubin e tin nib tʼuf rom banʼen; arragon, mu rinʼ e pi ngongol rom ni gubin ni fan ngakʼ Somoel, ma demutrug e re ginʼen ni ngam sor ngay ma ngam pag nge gagyeg nigem Somoel; arragon, mu yunʼuy e pi tafnaey rom ni gubin ngakʼ Somoel; arragon, mpag e murnguy u gumʼirchaʼem nge paer ngakʼ Somoel ni gubinfen.

37 Ngam mogow puruyʼ ngakʼ Somoel u fithikʼ gubin e pinʼen ni gama rinʼ, ma ra powiʼiyem ko gin ni ra felʼ rogom riy; arragon, napʼan ni bay mu thig nga butʼ ni nepʼ mag thig nga butʼ ni bay Somoel u wunʼum, ni nge yog ni matangiyem u napʼan ni gabe mol; ma napʼan ni bay muʼod ni kakadbul mag oge magaer ngakʼ Got; ma faʼan gara rinʼ e pinnʼey, ma yira chibiyem ngalang ko bin tomur e rran.

38 Ere chiney, tam o fakag, e bay banʼen ni gubaʼadag ni nggog ngom ni morngaʼagen banʼen ni ma yoeg e pi chitamangdaed e batʼ ngay, ara paluw—ara pi chitamangdaed e karoeged ni Liahona, ni kan piliyeg fan kanoeg ni, ba compass; ni fare Somoel e gonopiy rogon.

39 Ere musap, dariy beeʼ ni rayog rokʼ ni nge ngongoliy ni aram fini felʼ rogon e muruwel riy. Ere musap, nni falʼeg rogon ngan tay ni nge dag ngakʼ e pi chitamangdaed e gin ni nga ʼur sor gaed ngay u napʼan e malekag roraed u lan wuruʼ e binaw.

40 Ma i muruwel ni fan ngoraed u rogon e mich roraed ngakʼ Got; ere, faʼanra bay e mich roraed ni Got e rayog rokʼ ni nge guy rogon fagalochi lay i wasey riy ni nge yalʼuw ko gin ni ngar sor gaed ngay, me buch ni aram rogon, ere bay e biney e maʼangʼang roraed, nge ku boech e maʼangʼang ni buch u gelingin Got, u rebo rran ngo reb.

41 Machane, bachan e pi maʼangʼang nem e i muruwel u dakean nochi banʼen nib achig me dag ngoraed e muruwel nib maʼangang. Mar pired ni kar gamead gaed, makar paged talin ni ngar muruwel gaed ko mich roraed nge gumʼaenʼ roraed ma arame tal e pi muruwel nem nib maʼangʼang, ma dakur monʼog gaed ko milekag roraed.

42 Ere, nʼuw napʼraed u lan wuruʼ e binaw, ara de yog ni ngar milekag gaed nib kʼikʼiy e woʼ roraed, mar gafgow gaed ni makʼiy nge balel, ni bachan e pi denen roraed.

43 Ere chiney, tam o fakag, gubaʼadag ni ngam nangfan ni pinnʼey e gathi dariy foen; ya boed e pi chitamangdaed nra malmal gaed ko motoyil ko nʼen ni yoeg e re compass ney (chiney e pinnʼey e bogi banʼen nu fayleng) ma dakiyog ni ngar monʼog gaed; ere ku aram rogon ni dakiyog ni monʼog e yaʼel roraed.

44 Ya musap, rib moem ni ngan motoyil ko fare thin rokʼ Kristus, niʼir e ra yalʼuwegem ko falfalaenʼ ni manechubog, ni boed rogon ngakʼ e piʼin chitamangdaed ni ngar motoyil gaed ko re compass ney, niʼir e ra yalʼuwegraed ko woʼ nib kʼikʼiy iyaen ko fare nam nni michmicheg.

45 Ere chiney e gube yoeg, gathi bay ba pow ko rennʼey? Ya aram fini yulʼyulʼ e re compass ney ni fek e pi chitamangdaed iyib, ni yaed be leak e gin ni puluwegraed iyaen ngay, ko fare nam nni michmicheg, e aram rogon ko fapi thin rokʼ Kristus, ni faʼan gadaed ra leak e gin ni be powiʼiydaed iyaen ngay, ma rafek daed iyaen nga baʼanem e biney e yafos nib sug ko kirbaenʼ nga daroed nga reb e yafos nni michmicheg nib gel e felʼ riy.

46 O fakag, dabda malmal gow ni bachan e kanawo riy e rib moem; ya ku aram rogon ngakʼ e piʼin chitamangdaed; ya ku aram rogon nni falʼeg ni fan ngoraed, ni faʼan yaedra sap ngay ma yaedra paer ni yaed bafos; ere ku aram rogon ngodaed. Fare woʼ e kan falʼeg rogon, ni faʼan gadaed ra sap ngay ma rayog ni ngad pired ni gubinfen.

47 Ere chiney, tam o fakag, muguy ni ngam ayuweg e pinnʼey nib thothup, arragon, muguy rogon ni ngam sap ngakʼ Got mag paer ni gab fos. Mman ngakʼ e pi gidiiʼ ney ngam weliy fare thin ngoraed, mag tamilang nigem. Fakag, ma kefelʼ.