1 Fakag, mu lʼegilim ko pi thin rog, ya gube yoeg ngom, ni boed ni kugog ngakʼ Helaman, ni nʼumngin i napʼan ni gara fol ko pi motochiyel ku Got ma ra felʼ rogom u lan e binaw; ma nʼumngin i napʼan ni dab mu fol ko pi motochiyel ku Got ma yira chuwegem ko gin bay riy.

2 Ere chiney, o fakag, be pagaenʼug ngay ni gura falfalaenʼ ngom, ni bachan e ri fanam miyuluy nge yulʼyulʼ rom ngakʼ Got; ya kam tabab u napʼan ni kagab pagael ni ngam sap ngakʼ fare Somoel ni Got rom, ere ku aram rogon ni gube athapeg ni ngam ʼulʼul ngay i koel falan e pi motochiyel rokʼ; ya rib felʼ waʼathan e enra yulʼyulʼ nge madaʼ ko tomur.

3 Gube yoeg ngom, tam o fakag, ni kug falfalaenʼ ngom iyib ke madaʼ ko ngiyalʼ ney, ni bachan e yulʼyulʼ rom nge lʼagaenʼ rom, nge gumʼaenʼ rom nge athamgil ni gabe tay u fithikʼ fapi gidiiʼ ko Zoramites.

4 Ya gumnang ni gur e ni mʼagem; arragon, ma ku gumnang ni un malang nigem ni bachan fare thin; ma gur e kam gumʼaenʼ u fithikʼ e pinnʼey ni bachan e bay Somoel rom; ere chiney e kamnang ni fare Somoel e chuwegem riy.

5 Ere chiney o fakag, gur Siblon, gubaʼadag ni ngam tay u wunʼum, ni nʼumngin i napʼan ni gara tay e pagaenʼ rom ngakʼ Got ma aram nʼumngin i napʼan ni yira chuwegem u fithikʼ e pi moʼomawʼ rom nge pi magawon rom, nge pi kirbaenʼ rom, ma yira chibiyem ngalang ko bin tomur e rran.

6 Chiney, tam o fakag, e gubaʼadag ni dab mu lemnag ni yug gunang rog e pinnʼey, ya fare Kan ni Thothup ku Got ni bay rog e ire ke yoeg e pinnʼey ngog; ya faʼan gomanga dawor gu piiʼeg ku Got ma dabiyog ni nggu nang e pinnʼey.

7 Machane musap, fare Somoel u fithikʼ e murnguy rokʼ nib gel e ke lʼoeg e angel rokʼ riy ni nge weliy ngog nggu nang ni thingar gu tileg fare muruwel ni ma gatheayey u fithikʼ e gidiiʼ rokʼ; arragon, ma kug guy ba angel nga oewcheg, ma kenon ngog, ma laman e boed gaʼangin i lingan e dirraʼ, me rurug e fayleng ni gaʼangin.

8 Me yibi buch ni dalip e rran nge dalip e nepʼ nug paer u fithikʼ e amith nge amithngin e kirbaenʼ; ma dan nʼaegfan e denen rog, nge madaʼ ko ngiyalʼ ni kug yoer ngakʼ fare Somoel ni Yesus Kristus ni nge runguyeg. Machane musap, gu yoer ngakʼ mug pirʼeg e gapas nga laninʼug.

9 Ere chiney, tam o fakag, kug weliy ngom e pinnʼey ni nge yog ni ngam fil e gonop, ni nge yog ni ngam fil rog ni dakuriy rebe kanawoʼ ara rebo yalen nga bayang ni ra yog ni nge thap e gidiiʼ riy, ma kemus ni rokʼ ngu dakean Kristus. Musap, ire yafos nge tamilang ko fayleng. Musap, ir fare thin ko tin riyulʼ nge tin matʼaw.

10 Ere chiney, ni boed ni kam tabab i fil iyaen fare thin e ku aram rogon ni gubaʼadag ni ngam ʼulʼul i fil iyaen; ma gubaʼadag ni ngam yulʼyulʼ mag kolchiyaʼ u fithikʼ urngin banʼen.

11 Muguy rogon ni nge siy mu langlang ngalang ko yowlop; arragon, muguy rogon ni nga dab mu ʼuf ko gonop rom, ara mu ʼuf nga gelingim.

12 Mu pag nga kanawoʼ, machane dab mu thumʼ ngay; ma ngam guy rogon ni ngam gonopiy rogon gubin e pi ʼarʼar rom, ni nge yog ni ngam sug ko murnguy; muguy rogon ngam tilem u orel ko gamead.

13 Dab um meybil ni boed ni ma rinʼ fapi Zoramites, ya kam guy ni yaed ma meybil ni nge rungʼag e gidiiʼ, ma ngan oge magaer ngoraed ko gonop roraed.

14 Dab um gaʼar: O Got, gube oge magaer ngom ya bafelʼ rogmaed ngakʼ pi walagmaed; ya ngam gaʼar: O Somoel, mu nʼaegfan e pi kireb rog, mu nopaʼay pi walageg u fithikʼ e runguy—arragon, mu pogofay nag e kireb rom u pʼoewchen Got ni gubin e ngiyalʼ.

15 Ma manga yigi falaenʼ Somoel ngom, me thapegem ngakʼ ko bin tomur e rran nga lan gilʼilungun, ni ngam paer nga butʼ u fithikʼ e gapas. Ere chiney e ngam man, tam o fakag, ngam fil fare thin ngakʼ e pi gidiiʼ ney. Mu tamilang nigem. Fakag, ma kefelʼ.