1 Ere chiney, o fakag, bay banʼen ni gubaʼadag ni nggog ngom nib thil ko nʼen ni kugog ngakʼ walagem; ya musap, dawor muguy fini miyuluy laniyaenʼ walagem, nge yulʼyulʼ rokʼ, nge fini kolchiyaʼ ko fapi motochiyel ku Got? Musap, gathi ke dag ba wok ngom nib mangil?

2 Ya gur e da um motoyil ko thin rog ni boed walagem, u fithikʼ fapi gidiiʼ ko fapi Zoramites. Chiney e ireray e nʼen nib togopluw laninʼug riy ngom; gur e um man iyaen ni kam ʼuf nga gelingim nge gonop rom.

3 Ma gathi kemus aray, tam o fakag. Gur e kam rinʼ banʼen ni ke yib nag e kirbaenʼ ngog; ya gur e kam keruʼuy fare muruwel, ma kam man nga lan fare binaw nu Siron nga mathil ko fapi Lamanites, ni gabe leak fare gathar i Isabel.

4 Arragon, rib yoʼor e piʼin ni unaenʼraed ngakʼ; machane gathi arame ke yib e towaey rom, o fakag. Gur e susun e thingari lʼaganʼum ko fare muruwel niʼir e ni pag gafalngin ngom.

5 Damnang, tam o fakag, ni pinnʼey e rib kireb u pʼoewchen Somoel; arragon, ire thʼabi kireb u fithikʼ gubin e pi denen, ya ire migid ko puʼoeg rachaʼ nge togopluw ko fare Kan ni Thothup?

6 Ya musap, faʼan gara togopluw ko fare Kan ni Thothup ni immoy bingyalʼ rom, ma gamnang ni kam togopluw ngakʼ, ere musap, ireray ba denen ni dabiyog i nʼaegfan; arragon, ma enra thang e pogofan nib togopluw ko tamilang nge tamilngaenʼ ni ke piiʼ Got ngakʼ, e rib moʼomawʼ ni nge yog ngakʼ e manʼaegfan; arragon, gube yoeg ngom, o fakag, ni de moem ni nge yog ngakʼ e manʼaegfan.

7 Ere chiney, tam o fakag, gube athapeg ngakʼ Got ni gomanga siy i buch e roem ko biney e oloboch. Ma dab gupaer nguʼug weliy morngaʼagen e pi oloboch rom, ni nga i magaf anʼug ngom, ni faʼanra gumnang ni dariy gamʼingin ngom.

8 Machane musap, dabiyog ni ngam mithaeg e denen rom rokʼ Got; ma faʼanra dab mu kalngaenʼ ma pi denen rom e ke paer nib togopluw ngom ko bin tomur e rran.

9 Ere chiney o fakag, e gubaʼadag ni ngam kalngaenʼ mag pag e pi denen rom, ma dab kum leak e pi ʼarʼar nu oewchem, ya ngam dugiliyem ko gubin e pinnʼey; ya faʼanra dab mu rinʼ ni aray rogon ma dabiyog ni ngam tafnaʼ boech gilʼilungun Got. O, mu tay u wunʼum, ni ngam fek nga dakeanam, ni ngam dugiliyem ko pinnʼey.

10 Ma gube chiyliy ngom ni ngam michegem ngay ni ngam mogopuruyʼ ngakʼ walagem nib ilal rom ko gubin e pinʼen ni gabe rinʼ; ya musap, gur e kagab bitir, mab tʼuf rom ni nge chathowoliyem walagem. Ere ngam motoyil ko fonow rorow.

11 Dab mu pagem nge wawliyem nga orel e tin dariy fan nge tin meechiyang banʼen; dab mu pag fare moʼoniyanʼ nge wawliy gumʼirchaʼem nga orel bayay nge leak fapi gathar ni denen. Musap, tam o fakag, rib almarin e denen ni kam miliy nga dakean fapi Zoramites; ya napʼan ni kar guyed pangim mar dubuyed ni nge michaenʼraed ko thin rog.

12 Ere chiney e fare Kan ni Thothup rokʼ Somoel e ke gaʼar ngog: Mu chiyliy ngakʼ pi fakam ni ngar rinʼed e tin nib mangil, ara dangay ma yaedra wawliy nga orel fapi gumʼirchaʼ ko fapi gidiiʼ nib yoʼor iyaen ko gafgow; ere gube chiyliy ngom, tam o fakag, u fithikʼ e madguw ngakʼ Got, ni ngam tileg i rinʼ e pi denen rom.

13 Ma ngam chel ngam sap ngakʼ Somoel u poloʼ i laninʼum, nge pasig rom, nge gelingim; ni nge yog ni ngam tal i wawliy e pi gumʼirchaʼ ngar rinʼed e tin nib kireb; machane ngam chel ngam sap ngoraed ngam weliy nib buch e rom, nge pinʼen nib kireb ni kam rinʼ.

14 Dab mu leak e falaʼab ara pinʼen ni dariy fan nu fayleng; ya musap, dabiyog ni ngam fek nge un ngom.

15 Ere chiney, tam o fakag, gubaʼadag ni nggog boech banʼen ngom ni morngaʼagen fare wub ku Kristus. Musap, gube yoeg ngom, ni riyulʼ niʼir e ra yib ni nge chuweg e pi denen nu fayleng; arragon, bay yib ni nge weliy e morngaʼag nib mangil ni morngaʼagen woʼen e thap ngakʼ e pi gidiiʼ rokʼ.

16 Ere chiney, tam o fakag, ireray e re muruwel ni kan piningem ngay, ni ngam weliy e pi morngaʼag ney nib mangil ngakʼ e pi gidiiʼ ney, ni nge yarmiy laniyaenʼraed; ara nge yog nra thap gaed, ni nge yog nra yarmiyed laniyaenʼ e pi bitir roraed ni ngar rungʼaged fare thin u napʼan e wub rokʼ.

17 Ere chiney e nggu waer nag e magafaenʼ rom ko biney e paʼ. Musap, be balyang anʼum ko mangfan ni ngan nang e pinnʼey u mʼon ni nge taw ngay. Musap, gube gaʼar ngom, beeʼ e chiney e gathi ba tʼuf u waenʼ Got ni boed rogon beeʼ ko re ngiyalʼ i nʼen ni bay yib?

18 Gathi fare woʼen e bayul e rib gaʼfan ni nge nang e pi gidiiʼ ney ma ku aram rogon ngakʼ e pi bitir roraed?

19 Gathi taʼab fini moem e ngiyalʼ ney ngakʼ fare Somoel ni nge lʼoeg e angel rokʼ nge weliy e pi morngaʼag ney, nib mangil ngodaed ni taʼab rogon ni rinʼ ngakʼ e pi bitir rodaed, fa ba moem u tomuren e wub nra tay?