1 Ere chiney, tam o fakag, bay banʼen ni nggog u morngaʼagen fare sulyarmen ni morngaʼagen e nʼen ni kan weliy; ya musap, bay boech e gidiiʼ ni ke thilthilyeg fan fapi chep nib thothup, ma kar malog gaed nga orel ni aray fan. Ma kug pirʼeg fan niki i magaf anʼug u morngaʼagen e rennʼey. Machane musap, bay gu tamilang nag ngom.

2 Gube yoeg ngom, o fakag, ni fare woʼen e sulyarmen e rib tʼuf ni ngan rinʼ u yalen fare justice ku Got; ya rib tʼuf ni nge gubin banʼen ma nge sulyarmen. Musap, rib tʼuf mab matʼaw, u rogon fare gelingin nge foskoyamʼ ku Kristus, ni fare yaʼel ko gidiiʼ e thingar ni sulweg ko dagur, nge gubin yang ko dagur ma thingari sul ko dagur.

3 Ma rib tʼuf u yalen e justice ku Got ni gidiiʼ e nga ni pufthin nagraed u rogon e pi muruwel roraed; ma faʼanra muruwel roraed e ba mangil u lan e biney e yafos, nge pi athap nu gumʼirchaʼraed e ba mangil, ma rayog ko bin tomur e rran, ni ngan sulwegraed ko tin nib mangil banʼen.

4 Ma faʼanra muruwel roraed e ba kireb ma yira sulwegraed ko tin nib kireb banʼen. Ere, gubin banʼen ma yira sulweg nga yarmen, gubin banʼen ma ra sul nga rarogon yalen—tin ni ra yimʼ e ra fos ma dab ki yimʼ, tin be mogothgoth e dabki mogothgoth—ma gubin banʼen ma ra fos nga fithikʼ e falfalaenʼ ni dariy nʼumngin i napʼan ni ngar tafnayed boech gilʼilungun Got, ara nga fithikʼ e kirbaenʼ ni dariy nʼumngin i napʼan ni ngar tafnayed boech gilʼilungun fare moʼoniyanʼ, ya boech nga barbaʼ i paʼay, ma boech nga barbaʼ—

5 Ya barbaʼ e ra fos nga fithikʼ e falfalaenʼ u rogon nibe athapeg e falfalaenʼ, ara felʼ u rogon nibe athapeg e felʼ; ma barbaʼ e ra fos nga fithikʼ e kireb u rogon nibe athapeg e kireb; ya boed nibe athapeg ni nge rinʼ e kireb u nʼumngin e yafos rokʼ, e ku aram rogon ni yira tawaʼath nag ko kireb u napʼan nra taw ko fare nepʼ innʼem.

6 Ere ku aram rogon nga barbaʼ i paʼay. Faʼanra kalngaenʼ beeʼ ko pi denen rokʼ, me athapeg e tin nib matʼaw nge yaeni madaʼ nga tomuren e pi rran rokʼ, ma ku aram rogon ni yira tawaʼath nag ko tin nib matʼaw.

7 Ireray e piʼin ni bayuliyraed Somoel; arragon, ireray e piʼin nni fekraed, min chuwegraed ko fare nepʼ nib lumor ni dariy nʼumngin i napʼan; ere ireray e pichaʼ ni yaedra paer ara yaedra mul; ya musap, yaed e bay roraed, ko ngar rinʼed e tin nib mangil fa ngar rinʼed e tin nib kireb.

8 Ere, fapi thin rokʼ Got e dabiyog ni ngan thilyeg; ma kan yarmiy rogon woʼen ni piʼin nib mʼagaenʼraed ngay e rayog ni nga ranoed riy mar thap gaed.

9 Ere chiney e musap, tam o fakag, dab kum nomeg ni ngam kʼaring e damomuw bayay ko Got rom u dakean fapi nʼen nib gaʼfan ko machib, niʼir e mu denen riy ko sommʼon ke yibi madaʼ ko ngiyalʼ innʼey.

10 Ere dab mu lemnag, ni bachan e kan weliy morngaʼagen e sulyarmen, ma arame rayog ni ngan sulwegem ko denen iyaen ko falfalaenʼ. Gube yoeg ngom, ni denen e dariy bingyalʼ ni bay e falfalaenʼ riy.

11 Ere chiney, tam o fakag, gubin e gidiiʼ ni bay u lan e dodow ko fekyath, ara nggog nu, lan e dodow ko falwok ko tinu fayleng banʼen, e kar awgaed nga fithikʼ i luben e amith ngo fithikʼ e pi ngongol ni kireb; ma demoy Got roraed u fayleng, ma kar pired nib togopluw nga rarogon Got; ere, yaed bay u lan ba dodow nib togopluw nga rarogon e falfalaenʼ.

12 Ere chiney e musap, gabe lemnag ni fan fare bugithin ni sulyarmen, e ngan fek banʼen ni bay ko dodow ni rarogon ngan tay ko dodow ni gathi rarogon, fa ngan tay nga ba dodow nib thil nga rarogon?

13 O, fakag, gathi aray rogon; ya fan fare bugithin ni sulyarmen e ngan sulweg bayay e kireb ko kireb, ara falwok nu fayleng ko falwok nu fayleng, papngin e moʼoniyanʼ ko papngin e moʼoniyanʼ—felʼ ko tin nib felʼ; matʼaw ko tin nib matʼaw; yulʼyulʼ ko tin nib yulʼyulʼ; nge wurengaenʼ ko tin nib wurengaenʼ.

14 Ere, gur fakag, e ngam guy rogon nge wureng anʼum ngakʼ pi walagem; mu rinʼ ngoraed nib matʼaw yalen, mu dugliy u wunʼum rograed ngoraed nib matʼaw, mag ʼulʼul ngay ngam rinʼ e tin nib felʼ; ma faʼan gara rinʼ gubin e pinnʼey ma arame rayog ni nge yog ngom e tawaʼath rom; arragon, ma rayog ni ngan sulweg e murnguy ngom bayay; ma rayog ni ngan sulweg yalen e justice ngom bayay; ma rayog ni ngan sulweg yalen e pufthin nib matʼaw ngom bayay; ma rayog ni nge yog ngom e tawaʼath nib felʼ bayay.

15 Ya renʼen ni gara piiʼ e rasul ngom bayay, min sulweg nga rogon; ere, fare bugithin ni sulyarmen e bagaʼ nib gechig ngakʼ e en ma denen, ma dariy liyiben me felʼ e rokʼ.