1 Ere chiney e yibi buch ni fapi pagael ni fak Alma e ranoed u fithikʼ e gidiiʼ iyaen, ni ngar weliyed fare thin ngoraed. Nge Alma, ni kuʼir, ma dabiyog ni nge toffan, ere ki yaen nibe weliy iyaen.

2 Ere chiney e dab kud weliyed morngaʼagen e machib roraed, kemus ni nga doeged nra machib niged fare thin, nge tin riyulʼ, u rogon fare nangaenʼ ko prophecy nge yiʼiy; ere ra machib gaed u rogon fare yaram nib thothup rokʼ Got u dakean e tin ni kan piningraed ngay.

3 Ere chiney e nggu sul nga ba chipin e pi mael u thilin fapi Nephites nge fapi Lamanites, u lan e bin ragag nge meruk e duw ko lung ko fapi tapuf-oloboch.

4 Ere musap, yibi buch ni fapi Zoramites e ra manged Lamanites; ere, napʼan ni tabab e bin ragag nge meruk e duw me guy fapi gidiiʼ ko Nephites ni fapi Lamanites e karbaed ngoraed ni mael; ere aramfan nra falʼeged rograed ko mael; arragon, ra kunuyed e salthaw roraed nga taʼabang nga lan fare binaw nu Jershon.

5 Me yibi buch ni fapi Lamanites e rabaed ni yu biyuʼ; marbaed nga lan fare binaw nu Antionum, ni fare binaw ko fapi Zoramites; ma bay beeʼ nib moʼon ni fithingan e Zerahemnah niʼir e gaaʼ roraed.

6 Ere chiney, e bachan ni fapi Amalekites e bagel e kireb roraed nge mathang pogofan ni yaed matay ngakʼ fapi Lamanites, ni yaed roraed, ere, Zerahemnah e dugliy e pi pilung ko kapten ko fapi Lamanites, ma yaed gubin ma Amalekites nge Zoramites.

7 Ere i rinʼ e biney ni fan e nge yog ni paer e fananikan roraed ngakʼ fapi Nephites, ni nge yog ni fekraed ngar mʼing gaed nga tanpaʼ me bung rogon ni ngar muguʼuliyed e tin be nomeg.

8 Ya musap, nʼen nibe nomeg e nge kʼaring fapi Lamanites ngar damomuw gaed ngakʼ fapi Nephites; ma ke rinʼ e biney ni nge yog ni gagyeg nag gelingin u fithikʼ e yargael nga dakeanraed, ma ngki yog ni nge gaaʼ lungun nga dakean fapi Nephites u dakean e kalbus ni ngan tay ngoraed.

9 Ere chiney e nʼen nibe nomeg fapi Nephites e ngar ayuweged e pi binaw roraed, nge pi naʼun roraed, nge pi leʼengiraed, nge pi bitir roraed, ni nge yog nra ayuweged raed u paʼ e pi toʼogor roraed; ma ngki yog nra ayuweged e pi matʼawngiraed nge pi yalraed ko gubin banʼen, arragon, nge puf-matʼawon roraed, ni nge yog nra liyoer gaed ku Got ni rogon ni yaed baʼadag.

10 Ya yaed manang ni faʼan yaedra mul nga lani paʼ fapi Lamanites, ma enra liyoer ngakʼ Got u laniyaenʼ ngo fithikʼ e yulʼyulʼ, ni bin riyulʼ mab fos e Got, e ra gatheayraed fapi Lamanites.

11 Arragon, ma kuyaed manang gelingin e fananikan rokʼ fapi Lamanites ngakʼ pi walagraed, ni yaed fapi gidiiʼ ku Anti-Nephi-Lehi, ni kanoeg ni yaed fapi gidiiʼ ku Ammon—ma dabra puged paʼraed ngalang ni ngar cham gaed, arragon, ya kar pired nga lan ba mʼag ma dabra thʼaebed—ere, faʼan yaedra mul nga lani paʼ fapi Lamanites ma yira liiʼraed ngar mʼaed.

12 Ma fapi Nephites e dabra pagedraed ngan liiʼraed ngar mʼaed; ere kar piiʼed e binaw ngoraed ni ngar tafnayed.

13 Ere fapi gidiiʼ ku Ammon e ra piiʼed ngakʼ fapi Nephites e gin gaaʼ ko tin bay roraed ni ayuw ko salthaw roraed; ere aray rogon nni tawasar ngakʼ fapi Nephites, ni yigoʼ yaed, ni ngar togopluw gaed ngakʼ fapi Lamanites, ni yaed ba maʼathuk ni gidiiʼ ku Laman nge Lemuel, nge fapi pagael ni fak Ishmael, nge gubin e piʼin nra chuw gaed ko fapi Nephites, ni yaed fapi Amalekites nge Zoramites, nge fapi gachalpen fapi priest ku Noah.

14 Chiney e piʼin gachalpen nem e kar yoʼor gaed ni ke chugur ni nge taʼareb urngiraed ngakʼ fapi Nephites; ere aray rogon ni fapi Nephites e ni tawasar ngoraed ni ngar togopluw gaed ngakʼ pi walagraed, nge madaʼ ko ngiyalʼ ni kan puʼoeg e rachaʼ.

15 Me yibi buch u napʼan ni mukun nga taʼabang fapi salthaw ko fapi Lamanites nga lan fare binaw nu Antionum, me ere musap, fapi salthaw ko fapi Nephites e ra falʼeged rograed ni ngar madaʼ gaed nga lan fare binaw nu Jershon.

16 Chiney, e fachaʼ ni gaaʼ ko fapi Nephites, ara fare moʼon niʼir e kan dugliy ni nge mang pilung ko kapten ko fapi Nephites—ere fare pilung ko kapten e ire mang gaaʼ ko gubin fapi salthaw ko fapi Nephites—ma fithingan e Moroni;

17 Ere Moroni e fek gubin e gafal, nge rogon e gagyeg ko pi mael roraed. Ma kemus ni riliwʼ nge lal e duw yangren min dugliy ni nge mang Pilung ko kapten ko fapi salthaw ko fapi Nephites.

18 Me yibi buch ni yibi madaʼ nag fapi Lamanites u lan e mathil u Jershon, ma fapi gidiiʼ rokʼ e kar feked talin e cham roraed ni sayden, nge sarey, nge gubin mit e tatalin e mael.

19 Ma napʼan ni guy fapi salthaw ko Lamanites fapi gidiiʼ ku Nephi, ara fachaʼ i Moroni, ni kar falʼeged rograed ma kar upnguyed ngorngor raed ko breastplate nge paʼraed ko arm-shields, arragon, nge upong ni nge ayuweg loelugraed, ma kur chuw gaed nga mad nib dubʼag—

20 Ere chiney e fare ulung i salthaw ku Zerahemnah e dar falʼeged rograed ko pinnʼem ni aram rogon; kemus ni yigoʼ talin e cham ni bay roraed e sayden nge sarey roraed, nge gatʼing, nge gane gatʼing roraed, nge malang, nge gawulʼ roraed; ma dariy e mad u dakeanraed, kemus ni keruʼ e gamanman e kar mʼaged nga lukung raed; arragon, yaed gubin ni dariy e mad u dakeanraed, ma kemus ni yigoʼ fapi Zoramites nge fapi Amalekites;

21 Machane dariy e breastplate roraed, arm-shields—ere, ur rus gaed nib gel ko fapi salthaw ko Nephites ni bachan madan e mael ni bay roraed, ni yug aram rogon ni yaed bayoʼor ngakʼ fapi Nephites.

22 Musap, ere yibi buch ni de mʼagaenʼraed ngay ni ngar mael gaed fapi Nephites u lan e mathil u Jershon; ere ra chuw gaed u lan fare binaw nu Antionum nga ranoed nga lan wuruʼ e binaw, iyaen nga palog nga bugul fare lulʼ nu Sidon, ni nge yog ni ngar baed nga lan fare binaw nu Manti ngar suweyed fare binaw; ya dar lemniged ni fapi salthaw ku Moroni e rayog ni ngar nanged e gin ni kar sor gaed ngay.

23 Machane yibi buch, u napʼan nra chuw gaed nga ranoed nga lan wuruʼ e binaw me lʼoeg Moroni e spy nga lan wuruʼ e binaw ni ngar matangiyed e tamagif roraed; ma bachane kum nang Moroni morngaʼagen fapi prophecy ku Alma, ere lʼoeg bogi pumoʼon nga ranoed ngakʼ, ni nga roeged ngakʼ ni baʼadag ni nge deʼriy Somoel ko gin ni nge sor fapi salthaw ko Nephites ngay, ni ngar mael gaed fapi Lamanites.

24 Ere yibi buch ni yib e thin ku Somoel ngakʼ Alma, me yoeg Alma ngakʼ fapi tamalʼog ku Moroni, ni fapi salthaw ko fapi Lamanites e yaed be liyeg u lan wuruʼ e binaw, ni nge yog ni ngar baed nga lan fare binaw nu Manti, ni nge yog ni ngar tabab niged e mael ko rabaʼ ni moʼowaer ko fapi gidiiʼ. Ere fapi tamalʼog e ranoed nga roeged e thin ngakʼ Moroni.

25 Ere, tomuren ni ke tay Moroni boech ko salthaw rokʼ u lan fare binaw nu Jershon, ya be magar nag ni richey me yib fapi Lamanites nga lan e re binaw nem ngar suweyed, ere me fek e tin ni ke magaey ko salthaw rokʼ nga ranoed nga lan fare binaw nu Manti.

26 Me guy rogon ni gubin fapi gidiiʼ ni yaed bay u lan e ginem e binaw e ngar kunuyed yaed nga taʼabang ni ngar mael gaed fapi Lamanites, ni ngar matangiyed e pi binaw roraed nge nam roraed, matʼawngiraed nge pi puf-matʼawon roraed; ere ra falʼeged rograed ngar pired ngar soen niged fare ngiyalʼ i nʼen ni bay yib fapi Lamanites.

27 Me yibi buch ni Moroni e guy rogon e salthaw rokʼ ngar miith gaed nga langgin ba loway nib chugur nga mirichlen fare lulʼ ni Sidon, ni bay nga baʼan ngael fare lulʼ ni Sidon u lan wuruʼ e binaw.

28 Ere Moroni e tay e spy ni makath nge liyeg e re ginnʼem, ni nge yog ni nang e ngiyalʼ ni nge yib fapi salthaw ko fapi Lamanites.

29 Ere chiney, ni Moroni e manang e tafnaey rokʼ fapi Lamanites, ni yaed be lemnag ni ngar liiʼed pi walagraed, ara ngar gagyeg niged raed min tay raed nga kalbus ngar manged sib roraed ni nge yog nra falʼeged ba lung ni fan ngoraed u gaʼangin yang e nam;

30 Ma ku manang ni karimus e athap rokʼ fapi Nephites ni ngar ayuweged e pi nam roraed, nge puf-matʼawon roraed, nge galasia roraed, ere lemnag ni gathi ba denen ni nge yororiy raed u dakean e liyeb; ere, nang rokʼ fapi spy rokʼ ko gin nra yib fapi Lamanites riy.

31 Ere, kiiʼeg e salthaw rokʼ nge fek buʼulung iyib nga langgin fare loway, me mithaeg raed nga baʼan ngek, nge baʼan yimuch ko farengi falang ni Riplah;

32 Ma tin ni magaey e mithaeg u lan e loway ko ngek, nga baʼan ngael ko fare lulʼ ni Sidon, me yibi yib nga butʼ nga lan e mathil ko fare binaw nu Manti.

33 Ere tomuren ni ke tay e salthaw rokʼ ni rogon ni baʼadag, ma arame kefelʼ rogon ni nge madaʼ nagraed.

34 Me yibi buch ni fapi Lamanites e rabaed u baʼan leluʼoch ko farengi falang, ko gin bay ba ulung fapi salthaw ku Moroni riy ni kar miith gaed.

35 Ere napʼan ni yib fapi Lamanites ngar paged farengi falang ni Riplah, marbaed nga langgin fare loway, mar tabab gaed i thʼaeb fare lulʼ ni Sidon, ma fare ulung i salthaw ni kar miith gaed nga baʼan yimuch ko farengi falang, ni bay beeʼ nib moʼon nibe gafaliy raed ni fithingan e Lehi, ere lʼoeg e salthaw rokʼ ngar liyeged fapi Lamanites u baʼan ngek u keruʼraed.

36 Me yibi buch ni fapi Lamanites, e napʼan ni kar guyed fapi Nephites ni karbaed ngoraed u keruʼraed, mar chelgaed u butʼ mar tabab niged e mael ngakʼ fapi salthaw ku Lehi.

37 Ma arame tabab e cham ni yamʼ ko gal rabaʼ i salthaw nem, machane baʼ boechi bagaʼ fan nga dakean e baʼ rokʼ fapi Lamanites, ni bachan e de upong doewraed ko madan e mael nib felʼ rogon ni nge stiltileg boech mirin e sayden nge sarey ko fapi Nephites, ni bagaʼ niʼir e yaed be yimʼ riy.

38 Ma baʼan baʼaram, e bayi munmun me aw beeʼ riy nga butʼ u fithikʼ fapi Nephites, ko sayden roraed nge rachaʼen ni ke yaen, ya kan upnguy e yungin tagilʼ e yamʼ u doewey, ara yungin tagilʼ e yamʼ u doewey e ba upnguy e breastplate roraed, nge arm-shields roraed, nge head-plates roraed, ni fan ko dumow ko fapi Lamanites; ere aray rogon ni fapi Nephites e ra ululiyed e cham ni yamʼ u fithikʼ fapi Lamanites.

39 Me yibi buch ni fapi Lamanites e riyib e murus ngoraed, ni bachan e mogothgoth ni ke ʼaw nga fithikʼraed, nge yaeni madaʼ ko ngiyalʼ ni kar tabab niged e miil iyaen ko fare lulʼ ni Sidon.

40 Me tulufraed Lehi nge fapi salthaw rokʼ; me suruyraed Lehi iyaen nga lan farengi raen nu Sidon, mar thʼaebed nga barbaʼ farengi raen nu Sidon. Ere Lehi e tileg e salthaw rokʼ u mirichlen fare lulʼ ni Sidon ni nga dabra thʼaebed nga barbaʼ.

41 Me yibi buch ni Moroni nge salthaw rokʼ e ra madaʼ niged fapi Lamanites u lan fare loway, u barbaʼ fare lulʼ ni Sidon, mar og gaed ngoraed ngar liiʼedraed.

42 Ere fapi Lamanites e ra miil gaed bayay roraed, iyaen ko fare binaw nu Manti; ma kur baed bayay ra madaʼ gaed e salthaw ku Moroni.

43 Ere chiney e fapi Lamanites e ra cham gaed ni rib almarin; arragon, dariy bingyalʼ ni yimnang morngaʼagen ni fapi Lamanites e kar cham gaed ni aram rogon fini almarin u fithikʼ e mʼuthaenʼ, dariy bingyalʼ, ni mus aram ko tabolngin iyib.

44 Ma fapi Zoramites nge fapi Amalekites e ra piiʼed e athamgil nga laniyaenʼraed, ni yaed fapi pilung ko kapten nge pi gaaʼ roraed, nge Zerahemnah, niʼir e pilung ko kapten, ara pilung ko gereng mael nge commander roraed; arragon, ra cham gaed ni boed rogon e pi dragon, ma boʼor i yaed fapi Nephites e yimʼ nga paaʼraed, arragon, ya boʼor i yaed e kan sey nge ruw rabaʼ e head-plates roraed, mar kurufed e breastplate roraed nib yoʼor, mab yoʼor paʼraed nra thʼaebed nge mul; ere aray rogon ni fapi Lamanites e ra cham gaed u fithikʼ e damomuw roraed.

45 Yug aram rogon machane, fapi Nephites e i athamgil laniyaenʼraed, ya gathi yaed be cham ni nge gaaʼ lungraed ara gelingin ni nge yog ngoraed, ya ur cham gaed ni fan ko pi tabinaew roraed nge pi puf-matʼawon roraed, nge pi leʼengiraed nge bitir roraed, nge gubin banʼen roraed, arragon, ni fan ko pi gamʼingin e liyoer roraed ngakʼ Got nge galasia roraed.

46 Ere ur rinʼed e nʼen ni yaed be lemnag nib muruwel niʼir e ngar sulweged ko Got roraed; ya fare Somoel e ke yoeg ngoraed, ma ku aram rogon ngakʼ e pi chitamangraed, ni gaʼar: Nʼumngin i napʼan ni gathi gimed e bbuch e romed ko bin sommʼon e mael, ara bin lʼagruw, ma dab mu paged gimed ngam mʼaed nga paʼ e pi toʼogor romed.

47 Ma ku bayay, fare Somoel e gaʼar: Ngam yororiyed pifakmed ni nga dabra madʼad gaed ni mus ni faʼanra ke yaeni madaʼ ko ngiyalʼ ni nge mapʼ e rachaʼ. Ere arayfan ni fapi Nephites e ra cham gaed fapi Lamanites, ni ngar yororiyed yaed, nge pifakraed, nge pi binaw roraed, nge pi nam roraed, nge pi matʼawngiraed, nge mich roraed.

48 Ere yibi buch u napʼan ni guy fapi gidiiʼ ku Moroni e maʼangech nge damomuw ko fapi Lamanites, me yaen ni ngar suloed nga tomur ngar miil gaed roraed. Ma Moroni e manang laniyaenʼraed, ere piiʼ e thin rokʼ nge yaen ngoraed nge piiʼ e athamgil nga laniyaenʼraed ko tin baʼaray e lem—arragon, ni ngar lemniged e pi binaw roraed, nge puf-matʼawon roraed, arragon, nge rogon e machuw roraed u kalbus.

49 Me yibi buch ni arame ra chel gaed ngakʼ fapi Lamanites, mar non gaed nib gaaʼ lamraed u taʼabang ngakʼ fare Somoel ni Got roraed, ni fan ko paer roraed nib puf-rogon nge machuw roraed u kalbus.

50 Ma aram mar tabab niged i gel nag laniyaenʼraed ngar sakʼiy gaed ngar cham gaed fapi Lamanites nib almarin; ma ku lan e re awa nem mar yoer gaed ngakʼ fare Somoel ni fan ko puf-rogon roraed, ma fapi Lamanites e arame ra miil gaed roraed; mar miil gaed iyaen ko farengi raen nu Sidon.

51 Ere chiney, e fapi Lamanites e riyaed bayoʼor, arragon, ni lʼagruw yay i urngin fapi Nephites; machane, ni suruyraed nge madaʼ ko ngiyalʼ ni kar mukun gaed nga taʼabang ni taʼareb e ulung nga langgin fare loway, nga dakean mirichlen fare lulʼ ni Sidon.

52 Ere fapi salthaw ku Moroni e ra liyegedraed, arragon, ni aram rogon ni ruw rabaʼ fare lulʼ, ya musap, baʼan ngek e bay fapi salthaw ku Lehi riy.

53 Ere napʼan ni guy Zerahemnah fapi salthaw ku Lehi u baʼan ngek fare lulʼ ni Sidon, nge fapi salthaw ku Moroni u baʼan ngael fare lulʼ ni Sidon, ma ke liyegraed fapi Nephites, me yib i awe murus ngoraed nib gel.

54 Ere chiney, e napʼan ni guy Moroni rogon e murus roraed, me yoeg ko salthaw rokʼ ni ngar tileged i puoeg rachaʼraed.