1 Ere chiney e yibi buch ni, yug napʼan ni yog ngakʼ Amalickiah fare lung me tabab i piiʼ e athamgil nga laniyaenʼ fapi Lamanites ni ngar togopluw gaed ngakʼ fapi gidiiʼ ku Nephi; arragon, i dugliy e gidiiʼ ni ngar nonaed ngakʼ fapi Lamanites ko fapi yungi gilʼ e damit roraed, nib togopluw ngakʼ fapi Nephites.

2 Ere aray rogon ni piiʼ e athamgil nga laniyaenʼraed ngar togopluw gaed ngakʼ fapi Nephites, ni aram rogon iyaen nge chugur nga tungun e bin ragag nge mereb e duw ko fare lung ko fapi tapuf-oloboch, ma bachan e ke muguʼuliy e pinʼen ni i nomeg ni boed ni kan weliy faram, arragon, ma bachan e kan dugliy ni pilung rokʼ fapi Lamanites, ere ki gay rogon ni nge suwey gaʼangin gubin yang e nam, arragon, nge gubin e pi gidiiʼ ni ur moyed u lan fare binaw, ni fapi Nephites nge ku aram rogon ko fapi Lamanites.

3 Ere ke muguʼuliy e tin ni i lemnag, ya ke ʼelʼel nag gumʼirchaʼen fapi Lamanites me maʼew nag e tafnaey roraed, me kʼaring e damomuw ngoraed, ma arame kunuy nga taʼabang ba ulung i salthaw nib yoʼor ni nga ranoed ni mael ngakʼ fapi Nephites.

4 Ma bachan e bayoʼor e gidiiʼ rokʼ, ere kan tafnaey nag, nibe lemnag ni nge guy rogon ni nge gel ngakʼ fapi Nephites, me koelraed nge fekraed nga kalbus.

5 Ere aray rogon ni ire dugliy e pilung ko kapten ko fapi Zoramites, ni bachan e yaed e yaed manang chirogon gelingin fapi Nephites, nge gin ni yaed ma miil ngay, nge gin thʼabi moʼowaer ko pi binaw roraed; ere dugliyraed ni ngar manged e pilung ko kapten ko salthaw rokʼ.

6 Me yibi buch ni rafeked e tamagif roraed, ma ranoed iyaen ko fare binaw nu Zarahemla u lan wuruʼ e binaw.

7 Chiney e yibi buch u napʼan ni ke yog ngakʼ Amalickiah e gelingin u dakean e liyeb nge sabaenbaen rokʼ, ma Moroni, nga barbaʼ i paʼay, e kemʼay i gonopiy rogon rokʼ laniyaenʼ fapi gidiiʼ ni ngar yulʼyulʼ gaed ngakʼ fare Somoel ni Got roraed.

8 Arragon, ma ki i gel nag fapi salthaw ko fapi Nephites, mar ufunged tagilʼ e salthaw nib achichig, ara yungin ni nga un ling ngay; ni yaed be ufung e butʼ ngalang nge liyeg e salthaw rokʼ, ma ki ufung e malang ni rungrung ngki liyegraed, nge liyeg e pi binaw roraed nge mathil ko pi binaw roraed; arragon, nge liyeg gaʼangin yang e binaw.

9 Ma yungin tagilʼ e salthaw roraed ni de noemow e tay e salthaw ngay nib yoʼor; ere aray rogon ni noemow nag me piiʼ gelingin fare binaw ni tafen fapi Nephites.

10 Ere aray rogon ni i falʼeg rogon ni nge ayuweg fare puf-matʼawon roraed, nge binaw roraed, nge pi leʼengiraed, nge pi bitir roraed, nge gapas roraed, ni nge yog ni ngar pired ngar pigpig gaed ngakʼ fare Somoel ni Got roraed, ni gomanga yog nra chaʼariyed fare nʼen ni yoeg e pi toʼogor roraed ni fare gamʼingin e Kristiano.

11 Ma Moroni e immoy ni beeʼ nib moʼon nib gel mab yargael; ir beeʼ nib moʼon ni rib tamilngaenʼ; arragon, beeʼ nib moʼon ni dabun e puʼoeg rachaʼ; beeʼ nib moʼon ni i falfalaenʼ ko puf-matʼawon nge puf-rogon ko nam rokʼ, nge pi walagen ni ur chuw gaed u kalbus ngo paʼ esib;

12 Arragon, beeʼ nib moʼon ni ke tay gumʼirchaʼen nibe oge magaer ngakʼ e Got rokʼ, ya bachan e rib yoʼor yay ni ke bing e kanawoʼ nge tawaʼath ni ke piiʼ ngakʼ e gidiiʼ rokʼ; ma beeʼ nib moʼon ni ma muruwel nib gel ni fan ko paer nge ayuw ko gidiiʼ rokʼ.

13 Arragon, ma ir beeʼ nib moʼon nib miyuluy ko mich ngakʼ Kristus, ma ke thʼaeb i micheg ni nge yororiy e gidiiʼ rokʼ, nge pi matʼawon, nge nam rokʼ, nge mich rokʼ, nge yaeni madaʼ ko ngiyalʼ ni ke mapʼ rachaʼen.

14 Chiney e fapi Nephites e ni fil ngoraed ni ngar ayuweged yaed rokʼ e pi toʼogor roraed, nge yaeni madaʼ ko ngiyalʼ ni ngan puʼoeg e rachaʼ ni faʼanra batʼuf; arragon, ma kun fil ngoraed ni dabra tabolngin niged e kireb, arragon, ma dabra pigicham gaed ngakʼ beeʼ ma kemus ni piʼin toʼogor roraed, ni bachan e ngar ayuweged e yafos roraed.

15 Ere ireray e mich roraed, ni faʼan yira rinʼ ni aram rogon ma ra monʼog nagraed Got u lan e nam, ara ngan pingeg i yoeg, ni faʼan gomanga ur moyed ni yaed be fol ko pi motochiyel ku Got ma ra monʼog nagraed u lan e nam; arragon, me yoeg ngoraed ni ngar miil gaed, ara ngar falʼeged rograed ko mael, ni be yaen u rogon faraed yoyowol;

16 Nge ku arragon, ni Got e ra ayuwegraed ni ngar nanged e gin ni ngar sor gaed ngay ni ngar yororiyed yaed ko pi toʼogor roraed, ni faʼan yaedra rinʼ ni aram rogon, ma fare Somoel e ra chuwegraed u paʼ e pi toʼogor roraed; ere ireray rogon e mich ku Moroni, ma gumʼirchaʼen e ri falfalaenʼ ngay; gathi falfalaenʼ ko puʼoeg rachaʼ ya falfalaen i rinʼ e tin nib mangil, ni nge ayuweg e gidiiʼ rokʼ, arragon, nge fol ko pi motochiyel ku Got, arragon, nge keruʼuy e kireb.

17 Arragon, rriyulʼ, nriyulʼ ni gube yoeg ngomed, ni faʼan gomanga gubin e gidiiʼ niki immoy, nge tin bay e chiney, nge tin ni bay yib, e boed rogon Moroni, ma musap gaed, fapi gelingin e infierno e manga boech ma kar chuw gaed ni gubinfen; arragon, ma fare moʼoniyanʼ e dabiyog ni nge suwey e pi gumʼirchaʼ ko gidiiʼ.

18 Musap gaed, ir beeʼ nib moʼon ni boed Ammon, ni fare pagael ku Mosiah, arragon, ma ku boed fapi pagael ni fak Mosiah, arragon, ma taʼab rogon ngakʼ Alma nge fapi pagael ni fak, ya yaed gubin ma gidiiʼ ku Got.

19 Ere chiney e musap gaed, i Helaman nge pi walagen e de thil rogon e pigpig roraed ngakʼ fapi gidiiʼ ni boed ni rinʼ Moroni; ya ra machib niged fare thin ku Got, mar tawfe niged gubin e gidiiʼ ni ra motoyil ko thin roraed u dakean e kalngaenʼ.

20 Ere aray rogon ni ranoed iyaen, ma fapi gidiiʼ e ra sobutʼ niged laniyaenʼraed ni bachan e thin roraed, ni arame ri yaed ba tʼuf rokʼ Somoel, ere aray rogon nra puf gaed ko mael nge pi togopluw u fithikʼraed, arragon, ni aram rogon u lan aningeg e duw.

21 Ya, boed faram ni kugog, aram u tungun e bin ragag nge mereb e duw, arragon, ni yug aram rogon ni bay e gapas u fithikʼraed, min tawasar ngoraed ngar togopluw gaed ngakʼ pi walagraed ni fapi Lamanites ni de mʼagaenʼraed ngay.

22 Arragon, ma ngan ngoch nag i yoeg, ni pi mael roraed ngakʼ fapi Lamanites e de tal ni boʼor e duw nʼumngin i napʼan, ni yug aram rogon ni dar mʼagaenʼraed ngay.

23 Ere chiney, e ke kirbaenʼraed ngay ni ngar cham gaed fapi Lamanites, ni bachan e de mʼagaenʼraed ngay ni ngar puʼoeged e rachaʼ; arragon, ma gathi kemus aray—ke kirbaenʼraed ngay ni kar manged tapgin ni kan chuweg pi walagraed nib yoʼor ko biney e fayleng, kan tayraed nga lan rebo fayleng nib manechubog, ni dawori muguʼul rograed ni ngar madaʼ niged e Got roraed.

24 Yug aram rogon machane, deyog ni ngar paged yaed ngan liiʼraed, ni nge yaeni aw ni pi leʼengiraed nge bitir roraed e ngan thʼethʼaeb raed u fithikʼ e kireb ko fapi gidiiʼ ni barbarian, ni ur moyed bingyalʼ i nʼen ni yaed walag, arragon, ma kar chuw gaed ko galasia roraed, ni kar chuw gaed roraed mar chelgaed ni kar peth gaed ngakʼ fapi Lamanites ni ngar liiʼedraed.

25 Arragon, dabiyog amithun roraed ni ngar guyed pi walagraed ni yaed be falfalaenʼ i puʼoeg rachaʼen fapi Nephites, u nʼumngin i napʼan ni bay boech i yaed nra fol ko fapi motochiyel ku Got, ya fare michmich rokʼ Somoel e, faʼan yaedra fol ko pi motochiyel rokʼ ma ra felʼ rograed u lan fare nam.