1 Idahaemi edikem ke ɔyɔhɔ isua ukara itiokiet mme ebiere ikpe nnɔ ikɔt Nephi, mme eneni mme mme ekɔŋ ikeduhe ke isɔŋ Zarahemla;

2 Edi ukut ama anam mme owo, iŋ, ukut ama okpon ke ntak mkpa nditɔ eka mmɔ, ŋko ye ke ntak unana mme ufene ye mme enaŋ mmɔ, ŋko ye ke ntak unana mme iŋwaŋ mkpasip mmɔ, emi mme Lamanite ekedigide ke ikpat enyuŋ ebiatde.

3 Ndien mme ukut mmɔ ema ekpon eti eti tutu ukpɔŋ kiet kiet enyene ntak ndifuhɔ; ndien mmɔ ema ebuɔtidem ete ke edi ubiere ikpe Abasi ke edɔŋ enɔ mmɔ ke ntak ibak mmɔ ye mme mbubiam mmɔ; ke ntak oro ema edemere mmɔ ete eti utom mmɔ.

4 Ndien mmɔ etɔŋɔ ndisiak ufɔk Abasi ata ɔyɔhɔ ɔyɔhɔ; iŋ, ndien ema eduɔk ediwak mmɔŋ ke mme mmɔŋ Sidon ndien mmɔ eduk ufɔk Abasi Abasi; iŋ, ekeduɔk mmɔ mmɔŋ ke ubɔk Alma, emi ekesiode enim nte akwa oku enɔ mbon ufɔk Abasi, ke ubɔk ete esie Alma.

5 Ndien edikem ke ɔyɔhɔ isua ukara itiaba mme ebiere ikpe ete ke ŋkpɔ nte ukpɔŋ tɔsin ita ye ikie ition ema edian idem mmɔ kiet ye ufɔk Abasi Abasi ndien ema eduɔk mmɔ mmɔŋ. Ndien ke ntem ke ɔyɔhɔ isua ukara itiaba mme ebiere ikpe eketre ɔnɔ ikɔt Nephi; ndien nka iso emem ama odu ke ofuri ini oro.

6 Ndien edikem ke ɔyɔhɔ isua ukara itiaita mme ebiere ikpe, ete ke mbon ufɔk Abasi etɔŋɔ ndikɔri ke ntaŋidem, ke ntak ediwak inyene mmɔ, ye mme ediye silk mmɔ, ye eti edifiak linen mmɔ, ye ke ntak ediwak ufene ye mme enaŋ mmɔ, ye gold mmɔ ye silver mmɔ, ye kpukpru utɔ ŋkpɔ uto, emi mmɔ ekenyenede eto ɔkpɔsɔŋ utom mmɔ; ndien ke ntak kpukpru ŋkpɔ emi ke mmɔ ekemenere ke ntaŋidem enyin mmɔ, ke ntak oro mmɔ etɔŋɔ ndisine ata nsɔŋ urua ɔfɔŋ.

7 Idahaemi emi ekedi ntak uwak ukut ɔnɔ Alma, iŋ, ye ediwak mbon emi Alma okosiode enim ete edi mme andikpep, ye mme oku, ye mme ebio-owo ke ufɔk Abasi; iŋ, ediwak mmɔ ema efuhɔ ata eti eti ke ntak ibak emi mmɔ ekekutde ete ke ɔtɔŋɔ ndidu ke otu ikɔt mmɔ.

8 Koro mmɔ ema ekut enyuŋ ese ye akwa mfuhɔ ete ke mbon ufɔk Abasi ema etɔŋɔ ndimenere ke ntaŋidem enyin mmɔ, ye ndisin esit mmɔ ke inyene ye ke mme ikpikpu ŋkpɔ ererimbot, ete ke mmɔ etɔŋɔ ndisari, kiet eken, ndien mmɔ etɔŋɔ ndikɔbɔ mbon emi mikibuɔtke idem nte asaŋade ye uduak ye inemesit mmɔ.

9 Ndien ke ntem, ke ɔyɔhɔ isua ukara itiaita mme ebiere ikpe emi, etɔŋɔ ndidu mme ɔkpɔsɔŋ eneni ke otu mbon ufɔk Abasi; iŋ, mme ufip ema edu, ye eŋwan, ye utɔk, ye mme ukɔbɔ, ye ntaŋidem, tutu edikan ntaŋidem mbon emi mikidukke ufɔk Abasi Abasi.

10 Ndien ke ntem ke ɔyɔhɔ isua ukara itiaita mme ebiere ikpe eketre; ndien ibak mbon ufɔk Abasi ekedi akwa ŋkpɔ utuaha-nduɔ ke usuŋ ɔnɔ mbon emi mikidukke ufɔk Abasi; ndien ke ntem ke ufɔk Abasi ɔkɔtɔŋɔ ndifiak edem ke nkɔri esie.

11 Ndien edikem ke ntɔŋɔ ɔyɔhɔ isua usukkiet, Alma ama okut ibak mbon ufɔk Abasi, ndien enye okut ŋko ete ke uwut-ŋkpɔ mbon ufɔk Abasi ama ɔtɔŋɔ ndida mbon unana mbuɔtidem nto ukwaŋ-ŋkpɔ kiet ŋka efen, ke ntem ada nsobo mme owo edi.

12 Iŋ, enye ama okut akamba ubahare ke otu mme owo, usuk emenere idem mmɔ ke enyɔŋ ye ntaŋidem mmɔ, ese usuk ke ndek, eŋwɔŋɔre edem mmɔ ewut mbon unana ye mbon edide iferi ye mbon emi biɔŋ ɔkɔdɔŋde, ye mbon emi itɔŋ akasatde, ye mbon emi ekedɔŋɔde ye emi ukut akanamde.

13 Idahaemi emi ekedi akwa ntak mme eseme ke otu mme owo, ke ini usuk ekesukde idem mmɔ, eŋwam mbon ekeyomde uŋwam mmɔ, ke nte ndinɔ mme ubuene ye mbon unana se mmɔ enyenede, enɔ mbon ɔbiɔŋ udia, enyuŋ eyɔ utɔ kpukpru ukut, ke ntak Christ, emi anade nte edi nte asaŋade ye spirit prophecy;

14 Ese usen oro, ke ntre enyene erifen enɔ mme idiɔk ŋkpɔ mmɔ; eyɔhɔ ye akwa idaresit ke ntak eriset ke mkpa, nte asaŋade ye uduak ye odudu ye edibɔhɔ eke Jesus Christ ke mme uruk mkpa.

15 Ndien idahaemi edikem ete Alma, ke ama okokut mme ukut mme ɔsuhɔre idem emi etienede Christ, ye mme ukɔbɔ emi mbon ekesuhɔde ekedoride mmɔ ke idem, onyuŋ okut kpukpru ubahare mmɔ, ɔtɔŋɔ ndifuhɔ eti eti; edi Spirit Jehovah ikikpɔŋke enye.

16 Ndien enye emek ɔfiɔk ŋkpɔ owo kiet emi okodude ke otu mme eebiowo ufɔk Abasi, onyuŋ ɔnɔ enye odudu nte asaŋade ye uyo mme owo, man enye enyene odudu ndinim mme mbet emi ekenɔde, ye ndinam mmɔ nte asaŋade ye ibak ye mme idiɔk edinam mme owo.

17 Idahaemi enyiŋ owo emi ekedi Nephihah, ndien enye ke ekemek ada ibuot mme ebiere ikpe; ndien enye etie ke itie ikpe ndi biere ikpe nnyuŋ nkara mme owo.

18 Idahaemi Alma ikinɔhɔ enye itie utom nte akwa oku ke ufɔk Abasi, edi enye enim itie utom eke akwa oku ɔnɔ idem esie; edi enye ayak itie ikpe ɔnɔ Nephihah.

19 Ndien emi enye akanam man enye ke idem esie aka ke otu ikɔt esie, mme ke otu ikɔt Nephi, man enye ɔkwɔrɔ ikɔ Abasi ɔnɔ mmɔ, ndidemere mmɔ ete eti utom mmɔ, ndien man enye etre, oto ke ikɔ Abasi, kpukpru ntaŋidem ye ŋkari ye kpukpru mme eneni emi ekedude ke otu ikɔt esie, ke mikikutke usuŋ emi enye edifiakde ida mmɔ inyene ibɔhɔke ekedi ke ndiyire ke edisana ikɔ ntiense nnɔ mmɔ.

20 Ndien ke ntem ke ntɔŋɔ ɔyɔhɔ isua ukara usukkiet mme ebiere ikpe nnɔ ikɔt Nephi, Alma ayak itie ikpe ɔnɔ Nephihah, onyuŋ enim idem esie ofuri ofuri nte akwa oku eke edisana utɔ Abasi, ɔnɔ ikɔ ntiense abaŋa ikɔ, nte asaŋade ye spirit eke eriyarare ye prophecy.