1 Chiney e yibi buch u lan e bin nelʼ e duw ko lung ko fapi tapuf-oloboch nga dakean fapi gidiiʼ ku Nephi, ma dariy e togopluw ara mael u lan fare binaw nu Zarahemla;

2 Machane fapi gidiiʼ e ri kirbaenʼ raed, arragon ri kirbaenʼ raed ni bachan e ke yimʼ pi walagraed, nge ku bachan e yamʼ ni tay e pi gamanman roraed nge pi yu ulung i garbaw roraed, nge mogothgoth ko pi yungi rad ko grain roraed, ni kanitʼ nga butʼ kan yaen u dakean, ni ke gatheay fapi Lamanites.

3 Ere rib gel e kirbaenʼ roraed nri gubin e gidiiʼ ni yoer riy; me mich u wunʼraed ni ireram e pi gechig rokʼ Got ni kan piiʼ ngoraed ni bachan e pi denen roraed nge pi fananikan roraed; ere yib uran ngoraed e muruwel roraed.

4 Ma arame ra tabab gaed i yarmiy fare galasia nge felʼ nib poloʼ; arragon, ma bayoʼor e piʼin ni tawfe nagraed u lan e raen u Sidon mar uned ko fare galasia rokʼ Got; arragon, ra thapeged e tawfe u paʼ Alma, niʼir e kan bangbeng nag me mang tolang ko priest ko fapi gidiiʼ ko fare galasia, u paʼ e chitamangin ni Alma.

5 Me yibi buch nu lan e bin medilip e duw ko lung ko fapi tapuf-oloboch ma bay gonpon dalip e biyuʼ nge lal miriʼay e gidiiʼ ni kar kunuyed yaed ko fare galasia rokʼ Got min tawfe nagraed. Ma aray rogon ni mus e bin medilip e duw ko lung ko fapi tapuf-oloboch nga dakean e gidiiʼ ku Nephi; ma arame ki ʼulʼul iyaen e gapas ni poloʼ e ngiyalʼ innʼem.

6 Me yibi buch nu lan e bin meruk e duw ko lung ko fapi tapuf-oloboch, ma fapi gidiiʼ ko fare Galasia e ra tabab gaed ko ʼufʼuf, ni bachan e falaʼab roraed ni ke yoʼor, nge mad roraed ni falelʼ, nge mad roraed ni falelʼ ni kan firgiy, nge gamanman roraed nge yu ulung i garbaw roraed ni ke yoʼor, nge gol roraed nge silber roraed, nge gubin mit e tin ni thʼabi gaʼfan, niʼir e ke yog ngoraed ko muruwel roraed; ma gubin e pinnʼey ma kar ʼuf gaed ngay, ya ra tabab gaed ko muchuw nga mad ni rib totolang puluwon.

7 Chiney e ireray tapgin e kirbaenʼ nib gel ngakʼ Alma, arragon, nge ngakʼ fapi gidiiʼ ni yoʼor ni ke bangbeng nagraed Alma ni ngar manged sensey, nge priest, nge elder ko fare galasia; arragon, rib yoʼor i yaed e ri kirbaenʼraed nib gel ni bachan e denen ni ubchiyaʼ ni kar guyed ni ke tabab nga fithikʼ e gidiiʼ roraed.

8 Ya kar sap gaed ma kar guyed u fithikʼ e kirbaenʼ ni gel ni bachan fapi gidiiʼ ko fare galasia e kar tabab gaed ko ʼufʼuf, ma kar tayed gumʼirchaʼraed nga dakean e falaʼab ngo dakean e tin dariy fan banʼen nu fayleng, ni arame ra tabab gaed ko moning, roraed ngoraed, mar tabab gaed i gafgow nag e piʼin ni dar michaenʼraed nga rogon laniyaenʼraed nge tin ni yaed baʼadag.

9 Ere aray rogon, u lan e bin meruk e duw ko lung ko fapi tapuf-oloboch, ma arame tabab e maleʼeg thin nib noemow nga fithikʼ fapi gidiiʼ ko fare galasia; arragon, ma be awaenʼraed, ma yaed be togopluw, nge athap ko fananikan, nge thibthib, nge ʼufʼuf, ni gel nge thumʼ nga wuruʼ e ʼuf ni be tay e piʼin ni darur uned ko fare galasia rokʼ Got.

10 Ere aray rogon ni mus e bin meruk e duw ko lung ko fapi tapuf-oloboch; nge fare denen ni ubchiyaʼ ko fare galasia e immoy nib maen woʼ ngakʼ e piʼin dawor ra uned ko fare Galasia; ere aray rogon ni fare galasia e tal ni daki monʼog.

11 Me yibi buch ni tabab e bin mereb e duw, ma Alma e guy e denen ni ubchiyaʼ ko fare galasia, ma ki guy ni wokon fare galasia e tabab i wawliy e piʼin ni dar michaenʼraed u reb e denen ngo reb, ere aray e nʼen ni fek iyib e gafgow ngakʼ fapi gidiiʼ.

12 Arragon, i guy ni dakir tataʼareb lungun fapi gidiiʼ, boech i yaed e kar lang-lang niged yaed ngalang ko ʼufʼuf, ma yaed be dariy fan nag boech e gidiiʼ, ma yaed be piiʼ keruʼ raed ko piʼin nib tʼuf banʼen roraed nge piʼin ni dariy madraed nge piʼin ni kar mʼaed ko bilig, nge piʼin ni kar balel gaed, nge piʼin nib mʼar nge piʼin nibe gafgow ko amith.

13 Chiney e ireray tabolngin e kirbaenʼ nga fithikʼ fapi gidiiʼ, u napʼan ni kubay boech i yaed nibe gumʼaenʼ, ma yaed be ayuweg e piʼin nib tʼuf e ayuw roraed, ni woed rogon i piiʼ boech banʼen roraed ngakʼ e piʼin gafgow nge piʼin nib tʼuf banʼen roraed, ma yaed be duruwʼiy e piʼin ni kar gafgow gaed ni bilig, nge piʼin ni yaed be gafgow ni gubin mite kirbaenʼ nge gafgow, ni fan ngakʼ Kristus, niʼir e bay yib u rogon fare nangaenʼ ko prophecy.

14 Ma yaed be athapeg fare rran, ni ngan nʼaegfan e pi denen roraed; ma kar falfalaenʼ gaed ni bachan fare foskoyamʼ ko pi yamʼ, u rogon laniyaenʼ nge gelingin nge thap ni tay i Yesus Kristus ngakʼ e gidiiʼ u wolbuwen e yamʼ.

15 Ere chiney e yibi buch ni Alma, e ke guy ni fa piʼin gachalpen Got ni sobutʼaenʼ raed e ke kirbaenʼ raed, nge pi gafgow ni ke tay e tin ni ke magaey ko fapi gidiiʼ rokʼ ngoraed, ma kiguy gubin banʼen roraed ni de taʼareb rogon, ma arame ri kirbaenʼraed nib gel; machane fare Kan ni Thothup rokʼ Somoel e dechuw rokʼ.

16 Me melʼeg beeʼ nib moʼon nib gonop ni bay u fithikʼ fapi elder ko fare galasia, me piiʼ gelingin u rogon lungun e gidiiʼ ni yoʼor, ni nge yog ni gagyeg nag e pi motochiyel u rogon fapi motochiyel ni kan piiʼ, ma ngan gagyeg nag u rogon e pi kireb nge oloboch rokʼ fapi gidiiʼ.

17 Chiney e fithingan e re moʼon ney e Nephihah, ma kan dugliy niʼir e pilung ko tapuf-oloboch; me paer nga gilʼ e tapuf-oloboch ni nge pufthin nag me gagyeg nag fapi gidiiʼ.

18 Chiney e Alma e de piiʼ fare liw nib tolang ko priest ko fare galasia ngakʼ, machane me tay niʼir e nge paer ko fare liw ni tolang ko priest; me piiʼ fare gilʼ e tapuf-oloboch ngakʼ Nephihah.

19 Ma biney e rinʼ ni nge yog ni yaen nga fithikʼ e gidiiʼ rokʼ, ara nga fithikʼ fapi gidiiʼ rokʼ Nephi, ni nge yog ni machib nag fare thin rokʼ Got ngoraed, ni nge pug uran ngoraed e muruwel roraed, ni gomanga yog ni girngiy nga butʼ, u dakean ko fare thin rokʼ Got, gubin e ʼufʼuf nge sasaliyeb nge gubin e maleʼeg thin ni bay u fithikʼ e gidiiʼ rokʼ, ma dar guy woʼen nra yog ni nge tileg raed riy ma kemus ni nge yog rogon nib tamilang u dakean e michaenʼ nib wup ngoraed.

20 Ere aray rogon ni tabab e bin mereb e duw ko lung ko fapi tapuf-oloboch nga dakean e gidiiʼ ku Nephi, Alma e piiʼ fare gilʼ e tapuf-oloboch nga paʼ Nephihah, me tay ir ni poloʼ ko fare priesthood nib tolang ni matʼawon Got nib thothup, nge mich ko fare bugithin, u rogon e nangaenʼ ko yiʼiy nge prophecy.