1 Ere chiney e yibi buch ni Moroni e de tal i tʼaer midlen e mael, ara ayuweg e pi gidiiʼ rokʼ u paʼ fapi Lamanites; ya guy rogon e pi salthaw rokʼ ni ngar tabab gaed aram ko tabolngin e bin riliwʼ e duw ko fare lung ko fapi tapuf-oloboch, ni ngar tabab gaed i fuʼog e butʼ ngalang nge liyeg gubin e binaw, u dakean gaʼangin yang e nam ni suwon fapi Nephites.

2 Ma pʼebugul e yu ulung i butʼ ney e reg yulaey i rayean ngay, arragon, yulaey i rayean ni kan reg ni boed nʼumngin beeʼ, ke liyeg e pi binaw nem.

3 Me guy rogon ngan toey nga taban e yulaey i rayean nem, ba yoror ni nochi laey i gakʼiy nib mʼuthmʼuth nge liyeg; nib noemow mab tolang.

4 Me guy rogon ngan suwneg e pi tagilʼ e damit nib tolang ko pi yoror nem, me guy rogon ngan falʼeg e yoror u pʼebugul e pi yungi tagilʼ e damit nem, ya nga dabra madʼad gaed ko pi malang nge gane gatʼing ko fapi Lamanites.

5 Ma kan falʼeg rogon ni rayog ni nga ur yinʼed e malang riy nga butʼ, u rogon ni yaed baʼadag ngo gelingraed, ni ngar liiʼed e enra nomeg ni nge chugur ko yoror ko fare binaw.

6 Ere aray rogon ni falʼeg Moroni yungi rungrung nib gel ni fen e maling nge liyeg gubin yang e binaw u gaʼangin yang e nam ni fan ko wub ko pi toʼogor roraed.

7 Me yibi buch ni Moroni e guy rogon e salthaw rokʼ nga ranoed nga lan wuruʼ e binaw u baʼan ngael; arragon, ma ranoed ngar tulufed gubin fapi Lamanites ni yaed bay u lan wuruʼ e binaw u baʼan ngael iyaen nga lan e pi binaw roraed, ni bay nga yimuch ko fare binaw nu Zarahemla.

8 Ma fare binaw ku Nephi e bayaen nib kʼikʼiy u baʼan ngek e day nge madaʼ nga baʼan ngael.

9 Me yibi buch u napʼan ni Moroni e ke tuluf gubin fapi Lamanites nga wuruʼ e binaw u baʼan ngael, ni bay nga leluʼoch ko fapi binaw ni taferaed, me guy rogon ni fapi gidiiʼ ni yaed bay u lan fare binaw nu Zarahemla ngu lan e pi binaw nib liyeg ni nga ranoed iyaen nga lan wuruʼ e binaw u baʼan ngek, ni aram rogon iyaen nge madaʼ ko day, ni ngar pired ko binaw riy.

10 Me ki tay e salthaw u baʼan yimuch, u mathil ko pi binaw ni taferaed, me yoeg ngoraed ni ngar ufunged e yoror ni nge yog ni nge ling e salthaw nge gidiiʼ roraed nga foen u paʼ e pi toʼogor roraed.

11 Ere aray rogon ni chuweg gubin fapi yungi tagilʼ e miith ko fapi Lamanites u lan wuruʼ e binaw u baʼan ngek, arragon, nge ku aram rogon nga baʼan ngael, me noemow nag e yoror u thilin fapi Nephites nge fapi Lamanites, u thilin fare binaw nu Zarahemla nge fare binaw ku Nephi, u baʼan ngael e day nib peth nga bugul fare lulʼ ni Sidon—fapi Nephites ni kar tafanyed gubin e binaw nib kan nga leluʼoch, arragon, ni gubin e pi binaw ni bay nga baʼan leluʼoch ko fare binaw ni Galwog, u rogon ni yaed baʼadag.

12 Ere aray rogon ni Moroni, nge pi salthaw rokʼ, ni yaed be yoʼor ni gubin e rran ni bachan e pagaenʼ roraed ko ayuw ni ke tay e pi muruwel rokʼ ngoraed, e ra gayed rogon ni ngar chuweged e gelingin nge yargael rokʼ fapi Lamanites ko pi binaw ni taferaed, ni nga dab ki gel lungraed ko pi binaw ni taferaed.

13 Me yibi buch ni fapi Nephites e ra tabab gaed i ufung e dayif u bbinaw, mar tunguyed fithingan e re binaw nem ni Moroni; ni immoy nga charen e day ko ngek; ma immoy nga yimuch nga charen e mathil u tafen fapi Lamanites.

14 Ma kur tabab niged i ufung e chabog u rebo binaw ni bay nga thilin fare binaw nu Moroni nge binaw nu Aaron, nib ʼulʼul ko mathil nu Aaron ngu Moroni; mar tunguyed fithingan e chi binaw nem, ara fare binaw, ni Nephihah.

15 Ma kur tabab niged u lan e re duw nem i ngogliy e binaw nib yoʼor nib kan nga leluʼoch, ma bay reb nni ngongoliy min tunguy fithingan ni Lehi, ni bay nga lan e leluʼoch u charen e mathil u dappʼeday.

16 Ma aray rogon ni mus e bin riliwʼ e duw.

17 Ere monʼog fapi gidiiʼ ku Nephi ni aray rogon u napʼan ni tabab e bin riliwʼ nge taʼareb e duw ko fare lung ko fapi tapuf-oloboch nga dakean fapi gidiiʼ ku Nephi.

18 Mar monʼog gaed nib almarin, ma rigel e falaʼab roraed; arragon, mar yoʼor gaed mar gel gaed u lan e nam.

19 Ere aray rogon ni kad guyed fini gel e murnguy mab matʼaw gubin e gagyeg ku Somoel, ni nge muguʼuliy gubin e thin rokʼ ngakʼ e gidiiʼ; arragon, rayog ni ngad guyed ni pi thin rokʼ e rib magagyel, ni boed e ngiyalʼ ney, ni ke weliy ngakʼ Lehi, nibe gaʼar:

20 Nge felʼ waʼatham nge pi fakam; ma yira tawaʼath nagraed, u nʼumngin i napʼan ni yaedra fol ko pi motochiyel rog ma ra felʼ rograed u lan e binaw. Ere mu tayed u wunʼmed, ni nʼumngin i napʼan ni dabra fol gaed ko pi motochiyel rog ma yira chuwegraed ko gin bay Somoel riy.

21 Ere kad guyed ni pi michmich ney e kan micheg nib riyulʼ ngakʼ fapi gidiiʼ ku Nephi; ya ire kemang tugthin roraed nge maleʼeg thin roraed, arragon, nge pi mathang pogofan roraed, nge pi yargael roraed, nge liyoer ko liyos roraed, nge pi gathar roraed, nge pi ngongolen e pi fananikan roraed, ni bay u fithikʼraed, niʼir e ke miliy nga dakeanraed e pi mael roraed nge pi mogothgoth ni ke aw ngoraed.

22 Ma piʼin ni ur yulʼyulʼ gaed i koel falan e pi motochiyel ku Somoel e ni thapegraed ni gubin e ngiyalʼ, ko ngiyalʼ ni yu biyuʼ e piʼin ni walagraed nib kireb e kar dugil gaed nga kalbus, ara ngar mʼaed ko sayden, ara ngar mul gaed ko mich, mar maʼathuk gaed nga fithikʼ fapi Lamanites.

23 Machane musap gaed dariy bingyalʼ i banʼen ni aram fini gel e falfalaenʼ riy u fithikʼ fapi gidiiʼ ku Nephi, aram ko pi rran rokʼ Nephi, ni boed rogon u lan e pi rran ku Moroni, arragon, ni boed e ngiyalʼ ney, u lan e bin riliwʼ nge taʼareb e duw ko fare lung ko fapi tapuf-oloboch.

24 Me yibi buch ni bin riliwʼ nge lʼagruw e duw ko fare lung ko fapi tapuf-oloboch e ki mʼay u fithikʼ e gapas; arragon, nge ku bin riliwʼ nge dalip e duw.

25 Me yibi buch u napʼan ni tabab e bin riliwʼ nge aningeg e duw ko fare lung ko fapi tapuf-oloboch, ma manga boech ma bay e gapas u fithikʼ fapi gidiiʼ ku Nephi ni faʼan gomanga gathi bachan e maleʼeg thin niʼir e buch u fithikʼraed ni morngaʼagen fare binaw ku Lehi, nge fare binaw ku Morianton, ni yibi peth nga mathil nu Lehi; ni yow lʼagruw ni yow bay nga mathil u charen e day.

26 Ya musap gaed, fapi gidiiʼ ni taferaed fare binaw ku Morianton e kar feked bayang ko fare binaw ku Lehi; ere yibi tabab ba damomuw ni togopluw nga thilraed, nge yaeni madaʼ ko ngiyalʼ ni fapi gidiiʼ ku Morianton e kar feked talin e cham iyaen ngakʼ pi walagraed, ni kar lemniged ni ngar liiʼed raed ko sayden ngar mʼaed.

27 Machane musap gaed, fapi gidiiʼ ni taferaed fare binaw ku Lehi e ra miil gaed iyaen ko fare tamagif ku Moroni, mar ninged e ayuw ngakʼ; ya gathi yaed e yaed ba kireb.

28 Me yibi buch u napʼan ni fapi gidiiʼ ku Morianton, ni be powiʼiyraed beeʼ nib moʼon ni Morianton fithingan, e ra pirʼeged ni fapi gidiiʼ ku Lehi e kar miil gaed ko fare tamagif ku Moroni, mar rus gaed ni rib gel ni ra yib fapi salthaw ko Moroni ngoraed ngar liiʼed yaed.

29 Ere, Morianton e tay nga lan gumʼirchaʼraed ni ngar miil gaed iyaen ko fare binaw ni bay ko leluʼoch, nib liyeg e day nib gaaʼ yang, ngar tafnayed fare binaw nib kan nga leluʼoch.

30 Ere musap gaed, manga boech make yog ni ngar muguʼuliyed e biney e gagyeg, (ni manga boech make mang tapgin e mʼingaenʼ) machane musap gaed, Morianton e bachan e beeʼ nib moʼon nib sug ko fananikan, ere puwaenʼ ngakʼ rebe ppin ni tapigpig rokʼ, me og nga dakean nge liiʼ nib almarin.

31 Me yibi buch ni miil fare ppin, me yib ko fare tamagif ku Moroni, me yoeg ku Moroni gubin e pinʼen ni morngaʼagen e binem ni kan rinʼ ngakʼ, nge ku morngaʼagen ni yaed be nomeg ni ngar miil gaed nga lan fare binaw nib kan nga leluʼoch.

32 Ere chiney e musap gaed, fapi gidiiʼ ni ur moyed u lan fare binaw ni Galwog, ara Moroni, e rus nag ni yaedra motoyil ko thin ku Morianton mar cheag gaed ko gidiiʼ rokʼ, ma aray rogon ni rayog ngakʼ yu yang nem e binaw, niʼir e ra sunmiy ba dayif ko gagyeg nib yoyowol u fithikʼ fapi gidiiʼ ku Nephi, arragon, ni bogi gagyeg ni ra powiʼiyraed iyaen ngar paged e pufmatʼawon roraed.

33 Ere Moroni e lʼoeg ba ulung i salthaw, ni kar feked e tamagif roraed, ni ngar thabeyed fapi gidiiʼ ku Morianton, ni ngar tileged raed ko miil nga lan e binaw nib kan nga leluʼoch.

34 Me yibi buch ni dar thabeyed raed nge yaeni madaʼ ko ngiyalʼ ni karbaed nga mathil ko fare binaw ni Kanpag; mu roem e ra thabeyedraed riy, u bangi banʼen nib achig radan nib weeliy e day iyaen nga lan fare binaw nib kan nga leluʼoch, arragon, u charen e day, u baʼan ngael nge baʼan ngek.

35 Me yibi buch ni fapi salthaw ni lʼoeg Moroni, ni i powiʼiyraed beeʼ nib moʼon ni fithingan e Teancum, e ra madaʼ gaed fapi gidiiʼ ku Morianton; ma rib gelaenʼ fapi gidiiʼ ku Morianton, (ni bachan e kari lʼagaenʼ raed ko pi ngongol rokʼ rib kireb nge pi falʼfalʼ thin rokʼ) ma arame tabab ba mael u thilraed, me liiʼ Teancum Morianton maki gel ko pi salthaw rokʼ, min fekraed ni kalbus, mar suloed ko fare tamagif ku Moroni. Ere aray rogon ni mus e bin riliwʼ nge aningeg e duw ko lung ko fapi tapuf-oloboch nga dakean fapi gidiiʼ ku Nephi.

36 Ere aray rogon ni fapi gidiiʼ ku Morianton e ni sulwegraed. Ma napʼan ni kar og niged yaed nga lan ba mʼag ni ngar aw niged e gapas, min sulwegraed ko fare binaw nu Morianton, me yibi mʼug ni ke peth thilraed nge fapi gidiiʼ ku Lehi; ma yaed e kun sulwegraed ko pi binaw roraed.

37 Me yibi buch ni ku lan e re duw innʼem ma fapi gidiiʼ ku Nephi e sul e gapas ngoraed, ma Nephihah, niʼir e bin lʼagruw e pilung ko tapuf-oloboch e yimʼ, ni ke gagyeg u tagilʼ e tapufthin nib matʼaw u pʼoewchen Got.

38 Yug aram rogon machane, de rinʼ ni boed ni yoeg Alma ngakʼ ni nge fek fapi chep nge pinʼen ni rib gaʼfan ma rib thʼabi thothup u waenʼ Alma nge pi chitamangin; ere Alma e fek nge piiʼ ngakʼ fare pagael ni fak, ni Helaman.

39 Musap gaed, i yibi buch ni bay ba pagael ni fak Nephihah niʼir e ni dugliy ni nge paer ko fare tagilʼ e tapufthin, ni ke yinʼ luwan e chitamangin; arragon, ire ni dugliy nge mang Pilung ko tapuf-oloboch nge am ko fapi gidiiʼ, ni ke ognag ir ngab michmich nge ba gamʼing nib thothup ni nge pufthin nigey nib matʼaw, ma nge tay e gapas me piiʼ e puf-rogon ko fapi gidiiʼ, ma nge piiʼ ngoraed matʼawngiraed nib thothup ni ngar liyoer gaed ku Somoel ni Got roraed, arragon, ni nge ayuwegraed me ayliy e tin baʼadag Got u lan e pi rran rokʼ, me fek e piʼin kireb iyib nggilʼ e justice u rogon e oloboch roraed.

40 Ere chiney e musap gaed, fithingan e re moʼon ney e Pahoran. Ere Pahoran e paer nga gilʼ e chitamangin, me tabab nag e lung rokʼ u tungun e bin riliwʼ nge aningeg e duw, ko fapi gidiiʼ ku Nephi.