1 Ere chiney, e yibi buch u napʼan lan e bin riliwʼ nge nelʼ e duw ko fare lung ko fapi tapuf-oloboch nga dakean fapi gidiiʼ ku Nephi, ma musap gaed, napʼan ni fapi Lamanites e ra odgaed ko bin sommʼon e kadbul ko bin mʼon e pul, musap gaed, mar pirʼeged Amalickiah nib yamʼ u lan e tent rokʼ; ma kur guyed ni Teancum e ke falʼeg rogon ni nge yib ngoraed ko mael e re rran nem.

2 Ere chiney, e napʼan ni guy fapi Lamanites e biney mar rus gaed; mar paged i lemnag e yaen ko fare binaw ni bay ko leluʼoch, mar suloed ni yaed gubin e salthaw roraed nga lan fare binaw ku Mulek, mar gayed e gin ni yaed ba murungrung riy u lan e yoror roraed.

3 Me yibi buch ni walagen Amalickiah e ni dugliy ni nge pilung ko fapi gidiiʼ; ma fithingan e Ammoron; ere pilung Ammoron, ni walagen fare pilung i Amalickiah, e ni dugliy ni nge yinʼ luwan.

4 Me yibi buch ni yoeg ngakʼ e gidiiʼ rokʼ ni nge paer e pi binaw nem u paʼraed, niʼir e ke yog ngoraed u dakean e puʼoeg rachaʼ; ya dawori yog ni ngar feked ba binaw ni de mapʼ rachaʼraed riy nib yoʼor.

5 Ere chiney, e Teancum e guy ni fapi Lamanites e kar lemniged ni nge paer e pi binaw nem u paʼraed ni ke yog ngoraed, nge yung ni baʼaram e binaw ni kar suweyed; ma ki guy urngin e salthaw roraed, me lemnag Teancum ni detʼuf ni nge ognag e mael ngoraed nga lan e yoror roraed.

6 Machane me tay e salthaw rokʼ nib liyeg e ginnnʼem, ni gowa kan falʼeg rogoy ni ngan mael; arragon, ma bin riyulʼ e be falfalʼeg rogon ni nge yororiy ir roraed, ni nge ufung e yoror nge liyeg raed me falʼeg tagilʼ e gin ni ngar miith gaed ngay.

7 Me yibi buch ni aram rogon ni falʼeg rogon ko mael nge madaʼ ko ngiyalʼ ni Moroni e ke piiʼ e gidiiʼ nib yoʼor ni nge gel nag e salthaw rokʼ.

8 Ma Moroni e ki piiʼ e milwol nge yaen ngakʼ ni nge chechʼey paʼ ko pi kalbus ni kar mul gaed nga lan paʼ; ya faʼanra fapi Lamanites e kar feked e kalbus nib yoʼor, ma nge tay rokʼ gubin e kalbus ko fapi Lamanites nib bbayul ko piʼin baʼaram ni ke fekraed fapi Lamanites.

9 Ma ki piiʼ e milwol nge yaen ngakʼ ni nge ayuweg fare binaw ni Galwog, ma nge noemow nag fagin nib achig radan ni yima yaen riy nga lan fare nam nib kan nga leluʼoch, ya be rus nag ni richey me thap nga lan paʼ fapi Lamanites e gi nam nem me yib gelingraed ni ngar gafgow nigedraed u gubin rabaʼ.

10 Ere Moroni e ki malʼog nge yaen ngakʼ, ni baʼadag ni nge yulʼyulʼ i matangiy e ginem e binaw, ma nge guy rogon ni gubin e ngiyalʼ ma nge liiʼ fapi Lamanites u lan e gi binaw nem, ni rogon nrayog u gelingin, ni sana gomanga rayog ni fek bayay u rogon e tanam ara rebo kanawoʼ fapi binaw ni kan fek u paʼraed; ma kub baʼadag ni nge noemow nag me gel nag fapi binaw nib liyeg e ginnʼem, ni dawori mul nga lan paʼ fapi Lamanites.

11 Ma ki gaʼar ngakʼ, bay gub ngom, machane musap, fapi Lamanites e kar oggaed ngomaed u lan e mathil ko fare binaw ni bay u charen e day ko ngael; ere musap, ngguwon ngoraed ni mael, ere dabiyog ni nggub ngom.

12 Ere, fare pilung i (Ammoron) e chuw u lan fare binaw nu Zarahemla, me yoeg ngakʼ faʼen leʼengin e pilung morngaʼagen e yamʼ ni ke tay walagen, me kunuy nga taʼabang ba ulungi gidiiʼ nib yoʼor, ma ranoed iyaen ngakʼ fapi Nephites ni bay nga mathil u charen e day ko ngael.

13 Ere aray rogon ni i nomeg ni nge gafgow nag fapi Nephites, ma nge wawliy nga orel e salthaw roraed iyaen ko ginem e binaw, u napʼan ni ke yoeg ngakʼ e piʼin ni pagraed ni ngar tafnayed fapi binaw ni ke fek, ni nge yog ni ngar gafgow niged fapi Nephites u mathil ni bay nga charen e day ko ngek, ma ngar feked e pi binaw roraed u rogon ni rayog u gelingraed, ni rogon gelingin e pi salthaw roraed.

14 Ere aray rogon ni fapi Nephites e kar awgaed nga fithikʼ e dodow nib yoyowol u tungun e bin riliwʼ nge nelʼ e duw ko fare lung ko fapi tapuf-oloboch nga dakean fapi gidiiʼ ku Nephi.

15 Machane musap gaed, i yibi buch nu lan e bin riliwʼ nge medilip e duw ko fare lung ko fapi tapuf-oloboch, ma Teancum, ni ke chiyliy Moroni ngakʼ—niʼir e ke yarmiy e salthaw ni nge matangiy e mathil u yimuch ngu ngael ko fare binaw, ma ke tabab nag e milekag rokʼ iyaen ko fare binaw ni Galwog, ni nge yog niʼir nge salthaw rokʼ e ngar ayuweged Teancum ngar sulweged fapi binaw ni ke chuw u paʼraed—

16 Me yibi buch ni Teancum e thap ngakʼ e milwol ni nge ognag e mael ko fare binaw ku Mulek, ni nge sulweg ni faʼanra yog.

17 Ere yibi buch ni Teancum e falfalʼeg rogon e mael ni nge yaen ko fare binaw ku Mulek, ere ra thelep gaed e pi salthaw rokʼ iyaen ni mael ngakʼ fapi Lamanites; machane me guy nib math liyiben ni nge gel ngoraed u napʼan ni yaed bay u lan e yoror roraed; ere pag e tin ni i nomeg me sul ko fare binaw ni Galwog, ni nge soen nag e wub ku Moroni, ni nge yog ni gel boech e salthaw rokʼ.

18 Me yibi buch ni Moroni nge salthaw rokʼ e ra taw gaed ko fare binaw ni Galwog, ni ke chugur nga tungun e bin riliwʼ nge medilip e duw ko fare lung ko fapi tapuf-oloboch nga dakean fapi gidiiʼ ku Nephi.

19 Ma napʼan ni tabab e bin riliwʼ nge meruk e duw, me Moroni nge Teancum nge tin yoʼor ko fapi pilung ko kapten e ra tayed ba moʼolung nib lʼeag rogon ko mael—ko mang e ngar rinʼed me yib fapi Lamanites nga tamilang ni ngar mael gaed; ara gomanga baʼrogon ni rayog ni ngar sabaenbaen nigedraed ngar baed nga wuruʼ e yugin tagilʼ e miith roraed, ni nge yog ni ngar liiʼedraed mar feked bayay fare binaw ku Mulek.

20 Me yibi buch ni ra lʼoeged ba ulung i tamalʼog nga ranoed ko fapi salthaw ko Lamanites, ni yaed be matangiy fare binaw ku Mulek, ngakʼ e chaʼ ni gaaʼ roraed, ni fithingan e Jacob, ni yaed be yoeg ni yaed baʼadag ni ngar baed e salthaw rokʼ nga tamilang ngar madaʼ gaed nga dakean e falang u thilin e galyang i binaw nem. Machane musap gaed, Jacob, niʼir ba Zoramite, e dabi yib nge salthaw rokʼ nga tamilang ngar madaʼ gaed nga dakean e falang.

21 Me yibi buch ni Moroni, e arame ke pag i athapeg ni ngar madaʼ gaed nga dakean e gin nib puf, ere, ki lemnag rogon rebo kanawoʼ ni gomanga rayog ni nge baen nag fapi Lamanites riy ngar baed nga wuruʼ e yugin tagilʼ e miith roraed.

22 Ere yoeg ni Teancum e nge fek buchʼuw e salthaw ngar ranoed u charen e dappʼelʼay; ma Moroni nge salthaw rokʼ, e napʼan ni ke nepʼ, ma ranoed nga lan wuruʼ e binaw, nga baʼan ngael fare binaw u Mulek; ere aray rogon, ni yaeni rebo rran riy, me pirʼeg fapi matanag ko Lamanites i Teancum, mar miil gaed nga roeged ngakʼ Jacob, niʼir e gaaʼ roraed.

23 Me yibi buch ni fapi salthaw ko Lamanites e ranoed iyaen ni mael ngakʼ Teancum, ni yaed be lemnag ni urngiraed e ngar gelgaed riy ngakʼ Teancum ni bachan e ba lich e salthaw rokʼ. Ma napʼan ni guy Teancum fapi salthaw ko Lamanites ni karbaed iyib ngakʼ me tabab nag e miil u dappʼe lʼay, iyaen ko leluʼoch.

24 Me yibi buch u napʼan ni guy fapi Lamanites ni ke tabab nag e miil, ma fin arame ra tulufedraed nib almarin. Ma napʼan ni aram rogon nibe miil Teancum rokʼ fapi Lamanites ni yaed be tulufraed, ma musap gaed, Moroni e yoeg ngakʼ boech e salthaw rokʼ ni yaed bay rokʼ e nga ranoed iyaen nga lan fare binaw, ngar koeled nge gaaʼ lungraed riy.

25 Ere aray rogon ni rrinʼed, mar liiʼed gubin e piʼin ni magaey ni ngar matangiyed fare binaw, arragon, gubin e piʼin ni dabra tayed e pi talin e mael roraed nga butʼ.

26 Ere aray rogon ni Moroni e yog ni suwey fare binaw ni Mulek ni yaed boech e salthaw rokʼ, u napʼan ni yaed be thelep e tin kubay ko salthaw rokʼ iyaen, ni ngar madaʼ gaed fapi Lamanites ko ngiyalʼ ni bay ra suloed i tuluf Teancum.

27 Me yibi buch ni fapi Lamanites e ra tulufed Teancum nge madaʼ ko ngiyalʼ ni karbaed nga charen fare binaw ni Galwog, ma arame ra madaʼ gaed Lehi nge boechi ulung i salthaw, ni kan tayraed ni ngar matangiyed fare binaw ni Galwog.

28 Ere chiney e musap gaed, napʼan ni fapi pilung ko kapten ko fapi Lamanites e kar guyed Lehi nge salthaw rokʼ ni yaed be yib ngoraed, mar miil gaed ni ke balyangaenʼraed, ma kar rus gaed ni richey ma dabiyog ni ngar suloed ko fare binaw nu Mulek u mʼon ni nge mʼon Lehi roraed; ya kar magaer gaed ni bachan e yaen ni kar tayed, ma fapi gidiiʼ ku Lehi e dawor ra magaer gaed.

29 Chiney e fapi Lamanites e dar nanged ni Moroni nge salthaw rokʼ e yaed be lay u tomur; ma kemus ni piʼin ni yaed be rus ngoraed e Lehi nge gidiiʼ rokʼ.

30 Ere Lehi e de athapeg ni nge koelraed nge madaʼ ko ngiyalʼ ni kar madaʼ gaed Moroni nge salthaw rokʼ.

31 Me yibi buch u mʼon ni fapi Lamanites e ngar miil gaed nga palog me liyegraed fapi Nephites, ni fapi gidiiʼ ku Moroni nga barbaʼ nge fapi gidiiʼ ku Lehi nga barbaʼ, ni yaed gubin ma dawor ra magaer gaed ma kubay gelingraed; machane fapi Lamanites e kar magaer gaed ni bachan e ba nʼuw yang e gin ni ka ranoed riy.

32 Ere Moroni e yoeg ko gidiiʼ rokʼ ni ngar oggaed ngoraed nge madaʼ ko ngiyalʼ ni kar tayed e pi talin e mael roraed nga butʼ.

33 Me yibi buch ni Jacob, niʼir e gaaʼ roraed, ni ir rebo Zoramite, ma bachan e bay ba lem rokʼ ni dabiyog ni ngan liiʼ, ere powiʼiy fapi Lamanites nga ranoed ko mael nib almarin ngakʼ Moroni.

34 Ere Moroni e yib nga puluwon e gin ni yaed be sor ngay, ere lemnag Jacob ni nge liiʼraed nge bing e gin ni nge yaen riy nga lan fare binaw nu Mulek. Machane musap gaed, Moroni nge gidiiʼ rokʼ e riyaed bagael; ere dar binged e woʼ ngakʼ fapi Lamanites.

35 Me yibi buch ni ra mael gaed ni ruw rabaʼ ni rib maʼangech; ma rib yoʼor e piʼin ni yimʼ ko gal rabaʼ i salthaw nem; arragon, ma Moroni e madʼad me Jacob e ni liiʼ ngemʼ.

36 Ma Lehi e yib ngoraed u wuryal ni yaed e salthaw rokʼ nib yargael ngar cham gaed u fithikʼ e maʼangech, ma fapi Lamanites ni yaed bay nga wuryal e ra yinʼed e talin e mael roraed nga butʼ; ma piʼin ni magaey roraed, e ra balyang gaed, mada kur nanged e gin ni ngar sor gaed ngay ara ngar cham gaed ngay.

37 Ere napʼan ni guy Moroni ni kar balyang gaed, me gaʼar ngoraed: Faʼan gimed ra fek iyib e pi talin e mael romed ngam piiʼed ngomaed, ma musap gaed, gamaed ra tileg i puʼoeg rachaʼmed.

38 Me yibi buch u napʼan ni rungʼag fapi Lamanites e pi thin ney, ma fapi pilung ko kapten roraed, ni gubin i yaed ni dawor ra mʼaed, e rabaed nga mʼon ngar yinʼed talin e mael roraed nga butʼ nga charen rifrifanʼay Moroni, ma ku roeged ko gidiiʼ roraed ni ngar rinʼed ni aram rogon.

39 Machane musap gaed, boʼor i yaed e derinʼ; ere piʼin ni dar piiʼed e sayden roraed e ni koelraed ngan mʼagraed, ma pi talin e mael roraed e ni fek nge chuw roraed, man tawasariy raed ngar uned ngakʼ pi walagraed iyaen nga lan fare binaw ni Galwog.

40 Ere chiney e urngin e kalbus rib yoʼor nga oren e piʼin ni kar mʼaed, arragon, rib yoʼor nga oren e piʼin ni kar mʼaed ko ruw rabaʼi salthaw.