1 Ere chiney e yibi buch u napʼan ni tabab e bin guyey e duw ko fare lung ko fapi tapuf-oloboch, ko bin lʼagruw e rran ko bin mʼon e pul, me thap ku Moroni bangi babyor ni yib rokʼ Helaman, ni be weliy rogon e gagyeg ko fapi gidiiʼ u lan e ginem e binaw.

2 Ere baʼaray e pi thin ni yoloey, nibe gaʼar: Walageg ni rib tʼuf rog, i Moroni, ni rogon u paʼarokʼ Somoel e ku aram rogon u fithikʼ e gafgow ko mael; musap, o walageg ni rib tʼuf rog, baʼaray boech banʼen ni nggog ngom ni morngaʼagen rogon yalen e mael romaed u lan e giney e binaw.

3 Musap, lʼagruw e biyuʼ ko fapi pagael ni fak fapi gidiiʼ ni yaed e fekraed Ammon ngar chuw gaed u lan fare binaw ku Nephi—Chiney e gamnang ni ireray e piʼin ni rabaed ko ganong rokʼ Laman, niʼir e bin nganniʼ e pagael ni fak e chitamangdaed i Lehi;

4 Ere detʼuf ni ngug bael ngom u morngaʼagen pi yalraed ara mich roraed ni dariy, ya gur ma gamnang morngaʼagen gubin e pinnʼey—

5 Ere ke mudugil u wunʼug ni nggog ngom ni lʼagruw e biyuʼ ko pi pagael ney nib felʼ yangren e kar feked talin e mael roraed, ma yaed baʼadag ni nggu mang gaaʼ roraed; ma arame kug baed iyib ni nggu ayuweged e nam romaed.

6 Ere chiney e kag manang morngaʼagen fare mʼag ni tay pi chitamangraed, ni dab kur feked talin e mael iyaen ngakʼ pi walagraed ni ngan puʼoeg e rachaʼ.

7 Ya lan e bin riliwʼ nge nelʼ e duw, u napʼan ni kar guyed e pi gafgow nge kirbaenʼ rodaed ni bachraed, me chugur ni ngar thʼaebed fare mʼag nra tayed ni ngar feked talin e mael roraed ngar yororiyed gamaed.

8 Machane da gupagraed ngar thʼaebed e re mʼag ney ni kar tayed, ni bachan e gube lemnag ni Got e ra piiʼ gelingmaed, nge yaeni aw ni dab kug gafgow gaed ni bachan e kar muguʼuliyed fare michmich ni kar tayed.

9 Machane musap, baʼaray rebe banʼen ni rayog e falfalaenʼ riy ngodaed. Ya musap, u lan e bin riliwʼ nge nelʼ e duw, me gag, Helaman, e guwaen ni gag e gireng ko re lʼagruw i biyuʼ i pagael ney nib felʼ yangren ko fare binaw nu Judea, ni nggu ayuweged Antipus, niʼir e kam dugliy niʼir e gaaʼ ko gidiiʼ ko ginem e binaw.

10 Ere gu puthuy fare lʼagruw i biyuʼ i pagael ni fakag, (ya ke taw nga thawingraed ni nga noeg ni pagael ni fakay) ko salthaw ku Antipus, ma arame ri falfalaenʼ Antipus ngay; ya musap, salthaw rokʼ e ke lich nga paʼ fapi Lamanites ni bachan e salthaw roraed e kar liiʼed e gin gaaʼ ko salthaw romaed, ni aram tapgin e kirbaenʼ ni kug tayed.

11 Yug aram rogon machane, gguyed rogon ni nggu gapaseged laniyaenʼ maed ko ngiyalʼ ney, ni kar mʼaed ni fan ko nam roraed nge Got roraed, arragon, ma kar falfalaenʼ gaed.

12 Ere fapi Lamanites e kur tiled e kalbus nib yoʼor, ni yaed gubin ma pilung ko kapten, ya dakun pag boech e gidiiʼ nib fos ngab yang. Ma gamaed be lemnag ni yaed bay e chiney u lan fare binaw ku Nephi; ni aram rogon ni faʼanra dawor ni liiʼraed.

13 Ere chiney e baʼaray fapi binaw ni koel fapi Lamanites u dakean e puʼoeg rachaʼ nni tay ngakʼ e gidiiʼ romaed nib yoʼor ma yaed ba mʼuthaenʼ:

14 Fare nam nu Manti, ara fare binaw ku Manti, nge fare binaw ku Zeezrom, nge fare binaw nu Cumeni, nge fare binaw nu Antiparah.

15 Ere ireray fapi binaw nra suweyed u napʼan nug taw ko fare binaw nu Judea; mug pirʼeg Antipus nge gidiiʼ rokʼ ni yaed be muruwel ni ngar noemow niged fare binaw.

16 Arragon, ma ke magaer e dowef roraed ma ku aram rogon ko yaʼel roraed, ya kar cham gaed u fithikʼ e mʼuthaenʼ ni rran mar muruwel gaed ni nepʼ ni ngar yuluyed u paʼraed e pi binaw roraed; ere aray rogon nra pirʼeged e pi gafgow ni gubin mit.

17 Ere chiney e yibe lemnag ni kar waer gaed u lan e biney e binaw ara kar mʼaed; ere gur e rayog ni ngam lemnag ni chi ulung ney e salthaw nib achig ni kug fek ke un ngog, arragon, fapi pagael rog, e kar piiʼed e athamgil nge falfalaenʼ nga laniyaenʼraed.

18 Ere chiney yibi buch u napʼan ni guy fapi Lamanites Antipus ni ke yoʼor e salthaw rokʼ, me gelfen Ammoron ngoraed ni nga dabra baed ko fare binaw nu Judea, ara ngomaed ko mael.

19 Ere aray rogon ni ayuweg maed Somoel; ya faʼan gomanga ra baed ngomaed ni aray rogon chiyaʼamaed ma sana kar liiʼed e chuʼuw i salthaw romaed ney; ere aray rogon nni ayuweg maed.

20 Ma yaed e yoeg Ammoron ngoraed ni ngar ayuweged fapi binaw ni kar feked. Ma aray rogon ni mus e bin riliwʼ nge nelʼ e duw. Ma napʼan ni tabab e bin riliwʼ nge medilip e duw ma kug falfalʼeged rogon e binaw romaed nge gamaed ni nggu yororiyed gamaed.

21 Chiney e gu athapeged ni fapi Lamanites e ngar baed ngomaed; ya gamaed be athapeg ni nggu oggaed ngoraed u lan e yungi tagilʼ e miith roraed.

22 Me yibi buch ni gu tayed e damit nge liyeg e ginnʼem, ni ngar damit niged rogon e mithmith ko fapi Lamanites, ni nge siy ranoed u charmaed ni ke nepʼ ara rran ni ngar oggaed nga boech fapi binaw romaed ni bay ko leluʼoch.

23 Ya gamaed manang nu lan e tinem e binaw e dawor ra muguʼuliyed yaed riy ni ngar madaʼ niged raed; ere ʼug athapeged, ni faʼanra nga ranoed u charmaed, ma nggu oggaed ngoraed u tomur, ere aray rogon ni nggu waroed ngoraed u tomur, ma ngiyalʼ nem ma kun og ngoraed u mʼon. Gu lemniged ni rayog ni ngug liiʼedraed; machane musap, ri dilbaenʼ maed ko biney nuʼug athapeged.

24 De soraenʼraed ngay ni nga ranoed u charmaed ni yaed e salthaw roraed ni poloʼ, ara soraenʼraed ni yaed boech e salthaw roraed, ya yaed be rus nag ni richey ma dawor ra noemow niged yaed min liiʼraed.

25 Ara soraenʼraed ni ngar thelep gaed iyaen nga lan fare binaw nu Zarahemla; ara soraenʼraed ni ngar thʼaebed nga barbaʼ u bugul fare lulʼ ni Sidon, nga ranoed ko fare binaw ku Nephihah.

26 Ere aray rogon, ni yaed e salthaw roraed, e yaed be lemnag ni kar pired ni ngar yuluyed u paʼraed fapi binaw ni kar feked.

27 Ere chiney e yibi buch nu lan e bin lʼagruw e pul ko re duw ney, min fek iyib ngomaed e ggan nib yoʼor ni yib rokʼ e pi chitamangin fagal biyuʼ i pagael ni fakag.

28 Ma kun piiʼ lʼagruw e biyuʼ e gidiiʼ nge yib ko fare binaw nu Zarahemla ngomaed. Ere aray rogon nug muguʼuliyed gamaed u ragag e biyuʼ e gidiiʼ, nge ggan ni fan ngoraed, nge pi leʼengiraed nge bitir roraed.

29 Ma fapi Lamanites, e aray rogon ni kar guyed e salthaw romaed ni be yoʼor iyaen ni gubin e rran, nge ggan nge talin e cham romaed ni ke taw ni fan ngomaed, ma arame tabab e murus ngoraed, mar tabab gaed ko cham, ni nge yog ni gomanga ra tileged e ggan nge talin e cham romaed ni aram gelingmaed.

30 Chiney e napʼan nug guyed ni fapi Lamanites e ke magafaenʼ raed, mug athapeged ni nggu liyeb niged banʼen ni nge aw angin ngoraed; ere Antipus e yoeg ni nggu thelep gaed fapi pagael ni fakag nga rebe binaw nib bugul yoror, ni gowa gamaed be fek e ggan nge talin e cham romaed iyaen nga rebe binaw nib bugul yoror.

31 Ma nggu thelep gaed iyaen nga charen fare binaw nu Antiparah, ni gowa nggu waroed ko fare binaw nga baʼanem riy, u lan e mathil u charen dappʼelʼay.

32 Me yibi buch ni arame gu thelep gaed iyaen, ni gowa bay e ggan nge talin e cham romaed, ni nggu waroed ko re binaw nem.

33 Me yibi buch ni Antipus e ra thelep gaed boech e salthaw rokʼ iyaen, me pag e tin ni ke magaey ni ngar matangiyed fare binaw. Machane dar mʼonaed nge madaʼ ko ngiyalʼ ni kug thelep gaed e chuʼuw rog e salthaw, iyaen nga charen fare binaw ni Antiparah.

34 Ere chiney, u lan fare binaw ni Antiparah e ireram e gin nibe paer e tin thʼabi gel ko salthaw ko fapi Lamanites riy; arragon, tin thʼabi yoʼor.

35 Me yibi buch u napʼan ni makath e pi spy roraed ngoraed, marbaed iyib ni yaed e salthaw roraed mar baed iyib ngomaed ni cham.

36 Me yibi buch nug miil gaed roraed, iyaen ko leluʼoch. Ere aray rogon nug wawliyed nga orel e tin thʼabi gel ko salthaw ko fapi Lamanites.

37 Arragon, ni ke felʼ palogen, mar guyed fare ulung i salthaw ku Antipus ni yaed be tulufraed, nib mus rograed, ma dar chel gaed nga baʼan matʼaw ara baʼan gilaeyʼ i paʼraed, ere kur tulufed gamaed ni yaed be leakmaed u tomur romaed; ere, mug lemniged, ni kar nomeged ni ngar liiʼed gamaed u mʼon ni nge koelraed Antipus, ma fan e biney e nge dabiyog ni nge chalongbiy raed e gidiiʼ rog.

38 Ere chiney e Antipus, e napʼan ni guy e riyaʼ u puluwmaed, me gur nag e salthaw rokʼ. Machane musap, ngiyalʼ nem e ba nepʼ; ere deyog nra koeled gamaed, ma ku deyog ni nge koelraed Antipus; ere gu toffan gaed e re nepʼ innʼem.

39 Me yibi buch u mʼon ni nge mʼug e yalʼ ni kadbul, mug guyed fapi Lamanites ni yaed be yib ngomaed. Ma dawor gumuguʼul gaed ni nggu cham gaed ngoraed; arragon, ma dabug ni nggu pag fapi pagael ni fakag ngar mulgaed nga lan paʼraed; ere gu ululiyed e yaen romaed, ma gamaed thelep iyaen nga lan wuruʼ e binaw.

40 Ere chiney e darur fineyed ni ngar chel gaed ko matʼaw ara gilaeyʼ ya yaed be rus ngay ni richey min chalongbiy raed; ara gag ni nggu chel ko matʼaw ara gilaeyʼ ya gube rus ngay ni yaedra koeleg, ma dabiyog ni nggu gel gaed ngoraed, min liiʼ maed nggu mʼaed, mar miil gaed; ere aray rogon nug miil gaed ni poloʼ e re rran nem iyaen nga lan wuruʼ e binaw, ni aram rogon iyaen nge madaʼ ko ngiyalʼ ni ke awe lumor.

41 Me yibi buch bayay, u napʼan ni yaen i kakadbul mug guyed ni fapi Lamanites e yaed be yibi yib ngomaed, ma gamaed miil roraed.

42 Machane yibi buch ni dar tulufed gamaed nib palog mar talgaed; ni kakadbul ko bin dalip e rran u lan e bin medilip e pul.

43 Ere chiney, dag nanged ko ke koelraed Antipus fa dawor, ere mug gaʼar ko salthaw rog: Musap gaed, dabisiy ma kar talgaed ni bachan e ngad suloed ni ngad cham gaed ngoraed, ni nge yog nra koeled gadaed ko wup roraed;

44 Ere mang e kamoeged, o pifakag, gimed ra yaen ngoraed ko mael?

45 Ere chiney e gube yoeg ngom, o Moroni ni walageg nib tʼuf rog, ni dariy bingyalʼ ni kug guy e mʼuthaenʼ ni aray rogon, dariy, dawori buch u fithikʼ gubin fapi Nephites.

46 Ya gube piningraed ni fakag (ya yaed gubin ma ku yaed bbitir) ni aram rogon nra gaʼar gaed ngog: Chitamangmaed, musap bay Got romaed, ma dabi pagmaed ni nggu mʼaed; ere mu pagmaed nggu waroed; dab gu liiʼed pi walagmaed ni faʼan yaedra pithiged yaed romaed; ere mu pagmaed nggu waroed, ya richey mar liiʼed fapi salthaw ku Antipus.

47 Ma dawor ruʼuned biʼid ko cham, machane darur rus gaed ko yamʼ; ma yaed be lem nib gaaʼ nga dakean fare puf-matʼawon rokʼ e pi chitamangraed, ko yafos roraed; arragon, ke fil e pi chitiningraed ngoraed, ni faʼanra dabi maerwaer u wunʼraed, ma ra ayuwegraed Got.

48 Mar weliyed ngog e thin rokʼ e pi chitiningraed, ni yaed be gaʼar: Dar maerwaer u wunʼmaed ni pi chitiningmaed e yaed manang.

49 Me yibi buch nug suloed fagal biyuʼ rog ngakʼ e pi Lamanites ney ni kar tulufed gamaed. Ere chiney e musap, fapi salthaw ku Antipus e kar koeled raed, me tabab ba mael ni rib almarin.

50 Ma fapi salthaw ku Antipus ni kar magaer gaed, ni bachan e yaen nib nʼuw yang nib ngoch napʼan, ma ke chugur ni ngar mul gaed nga lan paʼ fapi Lamanites; ma faʼan gomanga dag suloed fare lʼagruw i biyuʼ rog ma ke yog ngoraed rogon ni ur nomeged.

51 Ya Antipus e kan liiʼ ko sayden, nge boech e pi gaaʼ roraed nib yoʼor, ni bachan gelingin e magaer roraed, ni ke yib u macharngin e yaen ni ur tayed—ere fapi gidiiʼ ku Antipus, e kar balyang gaed ni bachan e yamʼ ni ke tay e pi gaaʼ roraed, mar tabab gaed i bing e woʼ ngakʼ fapi Lamanites.

52 Me yibi buch ni fapi Lamanites e athamgil laniyaenʼraed, mar tabab gaed i tulufraed; ere aray rogon ni fapi Lamanites e ur tulufedraed nib almarin u napʼan ni yib Helaman ngoraed u tomur ni yaed fare lʼagruw i biyuʼ rokʼ, mar tabab gaed i liiʼraed nib almarin, ni aram rogon ni fapi salthaw ko Lamanites ni gubin e ratal gaed ngar suloed ku Helaman.

53 Ere napʼan ni guy fapi gidiiʼ ku Antipus ni fapi Lamanites e kar chel gaed u butʼ, mar kunuyed e gidiiʼ roraed ngar baed bayay u tomur ko fapi Lamanites.

54 Ere chiney e yibi buch ni gamaed, fapi gidiiʼ ku Nephi, nge fapi gidiiʼ ku Antipus, nge gag nge fare lʼagruw i biyuʼ rog, e guliyeged fapi Lamanites, mug liiʼed yaed; arragon, ni arame math e liyeb ngoraed mar piiʼed pi talin e mael roraed ma kur piiʼed yaed ni kalbus ko mael.

55 Ere chiney e yibi buch u napʼan nra wenig gaed ngomaed, ma musap, rug thiʼeg fapi pagael nib felʼ yangren ni ruʼuned ngog ko cham, ya gurus nag ni richey ma boʼor i yaed e ke yimʼ.

56 Machane musap, rug falfalaenʼ, ya dariy bagyaed ni ke thig nga butʼ; arragon, ma gowa kar cham gaed u gelingin Got; arragon, dariy bingyalʼ ni yimnang ni bay e gidiiʼ ni cham nga ba gelingin ni aram fini gel; mar oggaed ko fapi Lamanites u fithikʼ e yargael, ni arame ra kʼarnged e murus ngoraed; ere aray tapgin ni fapi Lamanites e ra piiʼed yaed ni kalbus ko mael.

57 Ma bachan e dakuriy tagilʼ e kalbus romaed, ni rayog riy ni nggu matangiyed raed ni ngan ayuwegraed ko fapi salthaw ko Lamanites, ere gu piiʼed yaed nga ranoed ko fare binaw nu Zarahemla, nge boech ko fapi gidiiʼ ku Antipus, ngar uned ngoraed; ma tin ni magaey e gufek nggu chagiy ko fapi Ammonites rog nib felʼ yangren, mug thelep gaed nggu suloed ko fare binaw nu Judea.