1 Ere musap gaed, chiney yibi buch ni bin migid e tanam romaed e nggu koeled fare binaw nu Manti; machane musap gaed, dariy woʼen ni rayog ni nggu wawliyedraed nga wuruʼ fare binaw u dakean fachi ulung romaed nib achig. Ya musap gaed, kubay u wunʼraed e pinʼen ni kad rinʼed aram ko sommʼon; ere dakiyog nug sabaenbaen nigedraed nga wuruʼ e yugin ni yaed ba gel riy.

2 Ma riyaed boʼor ko salthaw romaed ni arame de soraenʼmaed ngay ni nggu waroed gu oggaed ngoraed ko yungin tagilʼ e miith roraed.

3 Arragon, me yibi aw nib tʼuf ni nggu piiʼed e muruwel ko gidiiʼ romaed ni ngar ayuweged e yungin baʼaram e binaw ni kug sulweged ni tafen maed; ere yibi aw nib tʼuf ni nggu soen gaed, ni nge yog ni yog boech e salthaw ngomaed ko fare binaw nu Zarahemla nge ku boech e chugum ni ggan nge talin e cham nib beʼech.

4 Me yibi buch ni gag e gu lʼoeg ba tamalʼog nge yaen ko fare am ko binaw romaed, ni nge tamilngeg u morngaʼagen laniyaenʼ e gidiiʼ romaed. Me yibi buch ni arame gusoen niged e ggan nge talin e cham nge salthaw ni nge yib ko fare binaw nu Zarahemla ngomaed.

5 Machane musap, biney e buchʼuw e ayuw ni piiʼ ngomaed; ya fapi Lamanites e ki i mun dakean e yoʼor roraed u rebo rran ngo reb, nge ggan nge talin e cham ni yoʼor; ere aray rogon e rengi gagyeg ni gamaed bay riy ko ngiyalʼ innʼey.

6 Ma fapi Lamanites e rabaed ngomaed nga tamilang ko cham nib thilthil e ngiyalʼ, ni yaed be liyeb nag rogon mar liiʼed gamaed; machane daryog ni nggu waroed ngoraed ko mael, ni bachan e gin ni yaed be miith riy nge yungin ni bay gelingraed riy.

7 Me yibi buch nug soen gaed u napʼan e tiney gagyeg ni wogwog nib yoʼor e pul, nge yaeni madaʼ ko ngiyalʼ ni ke chugur ni nggu mʼaed ni bilig.

8 Machane yibi buch ni taw e ggan ngomaed, ni i matangiy lʼagruw i biyuʼ i salthaw iyib ngomaed ni nge ayuweg maed; ma kemus rogon e ayuw ni thap ngomaed, ni nggu ayuweged gamaed nge nam romaed ni nga dabi mul nga lani paʼ e pi toʼogor romaed, arragon, ni nggu togopluw gaed nga buʼulung i toʼogor romaed ni dabiyog i thiʼeg oringraed.

9 Ere chiney e tapgin e tiney e magawon, ara tapgin i fan ni dar piiʼed e salthaw ngomaed nib yoʼor, e dag nanged fan; ere ri kirbaenʼ maed ma kug rus gaed, ni richey me yibi aw e gechig rokʼ Got nga dakean e nam romaed, ni ngan chuwegmaed min thang oewchmaed.

10 Ere gu piiʼed gamaed ni poloʼ u lan e meybil romaed ngakʼ Got, ni nge piiʼ gelingmaed me chuweg maed u paʼ e pi toʼogor romaed, arragon, ma ngki piiʼ gelingmaed ni nge yog ni nggu sulweged fa nochi binaw romaed, nge pi binaw romaed, nge pi tafen maed, ni fan ko ayuw ngakʼ e gidiiʼ romaed.

11 Arragon, me yibi buch ni fare Somoel ni Got romaed e yibi piiʼ e pagaenʼ ngomaed ni ra chuweg maed u paʼ e pi toʼogor romaed; arragon, ni arame ri piiʼ e gapas nga laniyaenʼmaed, me piiʼ e mich ngomaed nib gel, me guy rogon ni nge pagaenʼmaed ko ayuw rokʼ ngomaed.

12 Me yibe athamgil nga laniyaenʼ maed ni bachan fachi ulung i salthaw nib achig ni ke yog ngomaed, mab miyuluy laniyaenʼraed ni kar dugiliyed ni ngar gelgaed ko pi toʼogor roraed, ma nge paer e binaw romaed u paʼmaed, nge urngin banʼen romaed, nge pi leʼengimaed, nge bitir romaed, nge rogon e paer romaed nib puf rogon.

13 Ere aray rogon nug waroed iyaen ko mael u poloʼ i gelingmaed ngakʼ fapi Lamanites, ni bay u lan fare binaw nu Manti; mug nʼufed ngalang e pi tent romaed u baʼan migid nga wuruʼ e binaw, ni bay nga charen fare binaw.

14 Me yibi buch ni rebo rran riy, u napʼan ni fapi Lamanites e kar guyed ni gamaed bay u mathil u wuruʼ e binaw ni bay nga charen fare binaw, mar lʼoeged e tafekthin roraed ngar liyeged gamaed ni gomanga yog ni ngar nanged urngimaed nge gelingin e salthaw romaed.

15 Me yibi buch u napʼan ni kar guyed ni gamaed ba moʼowaer, u rogon urngimaed, u tomuren ni kar rus gaed ngay ni richey mug thabeyed raed ko ayuw ngoraed, ma kemus ni faʼan yaedra yib ni mael ngomaed ngar liiʼed gamaed, ere ra lemniged nib moem ni rayog ni ngar liiʼed gamaed ko salthaw roraed nib yoʼor, ere ra tabab gaed i falfalʼeged rograed ni ngar baed ngomaed ko mael.

16 Ma napʼan nug guyed ni yaed be falfalʼeged rograed ni ngar baed ngomaed, ma musap, gguy rogon ni Gid, nge buchʼuw e salthaw ngar miith gaed iyaen nga lan wuruʼ e binaw, nge ku aram rogon ngakʼ Teomner nge buchʼuw e salthaw ni ngar miith gaed iyaen nga lan wuruʼ e binaw.

17 Ere ranoed ni Gid nge salthaw rokʼ e yaed bay nga baʼan matʼaw, ma boech e gidiiʼ e yaed bay nga baʼan gilaeyʼ; ere napʼan nra miith gaed iyaen ni aray rogon, ma musap, mug magaey, rokʼ e tin ni ke magaey ko salthaw rog, ko fare ginnʼem niʼir e gu nʼufed e pi tent romaed riy ngalang ko sommʼon ko fare ngiyalʼ innʼem nug soen niged fapi Lamanites ni bay rabaed riy nga wean ni ngan mael.

18 Me yibi buch ni fapi Lamanites e rabaed e salthaw roraed nga wean ko mael ngomaed. Ma napʼan ni rabaed ni arame ka ranoed ni ngar oggaed ngomaed ni bay e sayden roraed, mug guy rogon ni salthaw rog, ni yaed bay rog, e ngar miil gaed nga lan wuruʼ e binaw.

19 Me yibi buch ni fapi Lamanites e ra leaked gamaed ni rib papay, ya riyaed be athapeg ni ngar koeled gamaed ni nge yog ni ngar liiʼed gamaed; ere ra leaked gamaed iyaen nga lan wuruʼ e binaw; ma gamaed yaen u thilin Gid nge Teomner, ni arame deyog ni pirʼegraed fapi Lamanites.

20 Me yibi buch u napʼan ni fapi Lamanites e kar thimur gaed, ara napʼan ni fapi salthaw e kar thimur gaed, me Gid nge Teomer e ra puw gaed ngalang ko gin ni yaed be miith riy, mar thabeyed fapi spy ko Lamanites ni nga dab kur suloed ko fare binaw.

21 Me yibi buch u napʼan ni kar thabeyed raed, mar miil gaed iyaen ko fare binaw mar oggaed ko fapi matanag nni tay raed ni ngar matangiyed fare binaw, ni arame ra liiʼed raed mar gagyeg niged fare binaw.

22 Chiney e nrinʼ e biney ni bachan fapi Lamanites e ra paged e salthaw roraed ni gubin, ngan wawliyraed nga wuruʼ e binaw, ma kemus ni buchʼuw e matanag roraed e magaey.

23 Me yibi buch ni Gid nge Teomner e aray rogon ni yog ngorow mar suweyew fapi yungi tagilʼ e miith roraed. Me yibi buch ni arame guwaroed iyaen, u tomuren e milekag ni kug tayed u lan wuruʼ e binaw iyaen ko fare binaw nu Zarahemla.

24 Ma napʼan ni guy fapi Lamanites ni yaed be yaen iyaen ko fare binaw nu Zarahemla, mar rus gaed nib gel, ya richey ma bay e puruyʼ ni kan tay u butʼ ni nge wawliyraed ko gafgow; ere mar suloed bayay nga lan wuruʼ e binaw, arragon, ma arame ra suloed ko gin ni rabaed riy.

25 Ere musap, banepʼ e ngiyalʼ nem nra nʼufed e pi tent roraed ngalang, ya fapi pilung ko kapten ko fapi Lamanites e ra lemniged ni fapi Nephites e kar magaer gaed ni bachan e yaen ni kar tayed; ma kuyaed be lemnag ni kar tulufed gubin e salthaw roraed ni poloʼ ere dakur lemniged fare binaw nu Manti.

26 Ere chiney e yibi buch u napʼan ni ke nepʼ mug guy rogon e salthaw rog ni dabra moloed, ya nga ranoed u rebo kanawoʼ iyaen ko fare binaw nu Manti.

27 Ere bachan e milekag romaed nug tayed nib nepʼ, ere musap, napʼan ni yaeni rebo rran riy ma ke yog nug paged fapi Lamanites nga tomur, ni arame gu taw gaed ni gamaed ba mʼon roraed ko fare binaw nu Manti.

28 Ere aray rogon ni yibi buch, nu dakean e biney e liyeb me yog nug koeled fare binaw nu Manti ni dan puʼoeg rrachaʼen beeʼ.

29 Me yibi buch u napʼan ni fapi salthaw ko Lamanites e ra taw gaed nga charen fare binaw, mar guyed ni kug falfalʼeged rogmaed ni nggu madaʼ gaed, mari balyangaenʼraed me awe murus ngoraed ni gel, ma arame ra miil gaed nga lan wuruʼ e binaw.

30 Arragon, me yibi buch ni fapi salthaw ko Lamanites e ra miil gaed ni yaed gubin nga wuruʼ e giney e binaw ko fare nam. Machane musap, kar feked e ppin nge bitir nib yoʼor ngar uned ngoraed.

31 Ma fayungi binaw ni koel fapi Lamanites, e gubin ko ngiyalʼ ney make thap nga lani paʼ maed; ere pi chitamangmaed nge pi ppin romaed nge bitir romaed e yaed be sul ko tabinaew roraed ni yaed gubin, ma kemus ni yigoʼ piʼin ni ke koelraed fapi Lamanites kan fekraed ni kalbus.

32 Machane musap, salthaw romaed e riyaed balich ni ngar matangiyed e binaw nib yoʼor nge chugum ni yoʼor.

33 Machane musap, be pagaenʼmaed ngakʼ Got romaed niʼir e ke pagmaed kuggel gaed u dakean e yungney e nam, ma arame yog ngomaed nochiyang i binaw nem nge pi binaw nem, ni immoy ni tafen maed.

34 Ere chiney e dagur nanged fan ko mangfan ni fare am e dar piiʼ boech gelingmaed; ara fapi salthaw ni karbaed ngomaed e dar nanged fan ni dawor gu thapeged gelingmaed.

35 Musap, dag nanged machane sana rayog ni gimed be magawon, ma sana kam feked gubin e salthaw nga langgin e ginir e binaw; ere faʼanra ri arragon, ma dagur athapeged ni nggu nonnon gaed.

36 Ma faʼanra gathi ri arragon, ma musap, gamaed be rus ngay ya bay ba ulung u lan e gagyeg ko am, ya darur piiʼed e salthaw nib yoʼor nge ayuweg maed; ni gamaed manang ni yaed boʼor ko oren e tin ni kar piiʼed karbaed ngomaed.

37 Machane, musap, dariy fan—ba pagaenʼmaed ngakʼ Got ni ra ayuweg maed, ni yug aray rogon nib lich e salthaw romaed, arragon, ma ra chuweg maed u paʼ e pi toʼogor romaed.

38 Musap, ireray e bin riliwʼ nge mereb e duw, ni ke chugur nga tungun, ma kagu suweyed e pi binaw romaed; ma fapi Lamanites e kar miil gaed ko fare binaw ku Nephi.

39 Ma fapi pagael ni fak fapi gidiiʼ ku Ammon, ni yaed faram e kug weliy morngaʼagraed ni gub ʼuf ngay, ma yaed bay rog u lan fare binaw nu Manti; ma fare Somoel e ke ayuwegraed, arragon, ma ke ayuwegraed ni dar mʼaed ko sayden, ni aram rogon ni dariy bagyaed ni ke yimʼ.

40 Machane musap, kar madʼad gaed nib yoʼor yang u doewraed; machane kar chichiʼiyed yaed nga rogon e paer ni ke tayraed Got ngay nib puf rograed riy; ma riyaed ma yulʼyulʼ i lemnag fare Somoel ni Got roraed u rebo rran ngo reb; arragon, ma yaed ma guy rogon ni ngar koeled chiyalen e pi gamʼing rokʼ, nge pi morngaʼag rokʼ, nge pi motochiyel rokʼ ni gubin e ngiyalʼ; mab gel e mich roraed ko pi prophecy ni morngaʼagen e pinʼen ni bay yib.

41 Ere chiney, o Moroni, ni walageg nib tʼuf rog, nge falaenʼ Somoel ni Got rodaed ngom, niʼir e ke bayuliydaed ma ke tay daed nib puf rogdaed ko paer, ni nge tayem ni gubin e ngiyalʼ ko gin ni bay riy; arragon, ma nge falaenʼ ko pi gidiiʼ ney, ni nge yog ni ngam muguʼuliy rogon i sulweg gubin e pinʼen ni fapi Lamanites e kar feked rodaed, ni fan ko ayuw ngodaed. Ere chiney, e musap, nggu museg e babyor rog. I gag Helaman, ni fare pagael ni fak Alma.