1 Idahaemi edikem ete ke Alma ɔtɔŋɔ nditiŋ ikɔ Abasi nnɔ mme owo, akpa ke isɔŋ Zarahemla, ndien oto do aka ke ofuri isɔŋ.

2 Ndien emi edi mme ikɔ emi enye eketiŋde ɔnɔ mme owo ke ufɔk Abasi emi ekesiakde ke obio Zarahemla, nte asaŋade ye ŋwed esie, ete:

3 Ami, Alma, ke ete mi, Alma, ama okosio mi enim, ndidi akwa oku ke Ufɔk Abasi Abasi, enye ekenyenede odudu ye unen oto Abasi ndinam mme ŋkpɔ emi, sese, ami ndɔhɔ mbufo nte ke enye ɔtɔŋɔ ndisiak ufɔk Abasi ke isɔŋ emi okodude ke mme adaŋa Nephi; iŋ, isɔŋ emi ekekotde isɔŋ Mormon; iŋ, ndien enye ama ɔduɔk nditɔ eka esie mmɔŋ ke mme mmɔŋ Mormon.

4 Ndien sese, ami ndɔhɔ mbufo, ema enam mmɔ ebɔhɔ ewɔrɔ ke ubɔk edidem Noah, oto ke mbɔm ye odudu Abasi.

5 Ndien sese, ke odo ama ekebe, ema eda mmɔ esin ke ufin ke ubɔk mme Lamanite ke wilderness; iŋ, ami ndɔhɔ mbufo, mmɔ ekedu ke ufin, ndien Jehovah afiak anam mmɔ ewɔrɔ ke ufin oto ke odudu ikɔ esie; ndien eda nnyin edisin ke isɔŋ emi, ndien mi nnyin itɔŋɔ ndisiak ufɔk Abasi Abasi ke ofuri isɔŋ emi ŋko.

6 Ndien idahaemi sese, ami ndɔhɔ mbufo, nditɔ eka mi, mbufo emi edukde ufɔk Abasi emi, ndi mbufo emetim eti ufin mme ete mbufo? Ihŋ, ndien ndi mbufo emetim eti mbɔm ye anyan ime esie kabaŋa mmɔ? Ndien ke ndidian do, ndi mbufo emetim eti ete ke enye anam ukpɔŋ mmɔ ebɔhɔ ke hell?

7 Sese, enye ama ɔkpuhɔ esit mmɔ; iŋ, enye ama edemere mmɔ ke ntɔtuŋɔ idap, ndien mmɔ edemere ebaŋa Abasi. Sese, mmɔ ekedu ke otu ekim; edi, ukpɔŋ mmɔ ama ayama ye uŋwana nsinsi ikɔ; iŋ, mme uruk mkpa ema ekanare mmɔ ekuk, ye mme ŋkpɔkɔbi hell, ndien nsinsi nsobo ama ana ɔnɔ mmɔ.

8 Ndien idahaemi ami mbup mbufo, nditɔ eka mi, ndi ema esobo mmɔ? Sese, ami ndɔhɔ mbufo, Iŋ iŋ, owo ikisoboke mmɔ.

9 Ndien ami mfiak mbup, ndi ema esibe mme uruk mkpa, ye mme ŋkpɔkɔbi hell emi eke kanarede mmɔ okuk, ndi ema etat mmɔ? Ami ndɔhɔ mbufo, Iŋ, ema etat mmɔ, ndien esit mmɔ ema etara, ndien mmɔ ema ekwɔ edifak ima. Ndien ami ndɔhɔ mbufo nte ke enyaŋa mmɔ.

10 Ndien idahaemi ami mbup mbufo nte ke nsutɔ ntak ke enyaŋa mmɔ? Iŋ, ke efe ntak ke mmɔ ekenyene ndidorienyin ke erinyaŋa? Nso ŋkpɔ idi ntak emi etatde mmɔ ke mme uruk mkpa, iŋ, ŋko ye mme ŋkpɔkɔbi hell?

11 Sese, ami mekeme ndidɔhɔ mbufo—ndi ete mi Alma ikibuɔtke idem ke mme ikɔ emi eketiŋde ke inua Abinadi? Ndien ndi enye ikedige edisana prophet? Ndi enye iketiŋke mme ikɔ Abasi, ndien ete mi Alma ɔbuɔt idem ke mmɔ?

12 Ndien nte mbuɔtidem esie edide ama anam akwa ukpuhɔre ke esit esie. Sese ami ndɔhɔ mbufo nte ke kpukpru emi edi akpanikɔ.

13 Ndien sese, enye ama ɔkwɔrɔ ikɔ ɔnɔ mme ete mbufo, ndien ama anam akwa ukpuhɔre ŋko ke esit mmɔ, ndien mmɔ esuhɔre-idem mmɔ enyuŋ esin mbuɔtidem mmɔ ke akpanikɔ ye odu uwem Abasi. Ndien sese, mmɔ ema ebuɔtidem tutu esim utit; ke ntak oro ema enyaŋa mmɔ.

14 Ndien idahaemi sese, ami mbup mbufo, nditɔ eka mi eke ufɔk Abasi, ndi mbufo ememana ke spirit ke Abasi? Ndi mbufo emebɔ mbiet esie ke iso mbufo? Ndi mbufo emenyene akwa ukpuhɔre emi ke esit mbufo?

15 Ndi mbufo emenyene mbuɔtidem ke erifak eke enye emi okobotde mbufo? Ndi mbufo emese iso ye enyin mbuɔtidem, enyuŋ ese idem mkpa emi esinde ke uwem emi mkpa miduhe, ye mbiara emi emi esinde ke se mikemeke ndibiara, ndida ke iso Abasi man ebiere ikpe nte asaŋade ye mme edinam emi enamde ke idem eke mkpa?

16 Ami ndɔhɔ mbufo, ndi mbufo emekeme ndikere nnɔ idem mbufo ete ke mbufo emekop uyo Jehovah, ɔdɔhɔde mbufo, ke usen oro ete: Etiene mi mbufo emi ediɔŋde, koro sese, mme utom mbufo ema edi mme nnen nnen utom ke iso ererimbot?

17 Mme ndi mbufo emekere ke idem mbufo ete ke mbufo emekeme ndisu nsu nnɔ Jehovah ke usen oro, nyuŋ ndɔhɔ ete—Jehovah, utom nnyin ekedi nnen nnen utom ke iso isɔŋ—ndien ete ke enye ayanyaŋa mbufo?

18 Mme ke usuŋ efen, nte mbufo emekere nte edade mbufo edi ke iso esop Abasi ye ukpɔŋ mbufo emi ɔyɔhɔde ye ndudue ye ŋkpɔfiɔk, etide kpukpru ndudue mbufo, iŋ, etide nte ɔfɔnde ama kpukpru ibak mbufo, iŋ, eti ete ke mbufo emetut utɔŋ ye mme ibet Abasi?

19 Ami mbup mbufo, ndi mbufo emekeme ndimenere enyin nse Abasi ke usen oro ye edisana esit ye ubɔk emi mideheke? Ami mbup mbufo, ndi mbufo emekeme ndimenere iso, enyenede mbiet Abasi emi emiŋde ke iso mbufo?

20 Ami mbup mbufo, ndi mbufo emekeme ndikere ete enyaŋa mbufo kini mbufo ekeyakde idem mbufo esin ke idak satan?

21 lAmi ndɔhɔ mbufo, ke mbufo eyefiɔk ke usen oro ke owo ikanke inyaŋa mbufo; koro owo ikemeke ndinyaŋa owo ndomo kiet ibɔhɔke eyet mme ɔfɔŋ esie edi afia; iŋ, ana nte enam mme ɔfɔŋ esie esana tutu mmɔ esana enana kpukpru ntɔi, oto ke iyip enye emi mme ete nnyin eketiŋde, emi anade nte edi edifak ikɔt esie osio ke mme idiɔk ŋkpɔ mmɔ.

22 Ndien idahaemi ami mbup mbufo, nditɔ eka mi, editie owo mbufo ndomo kiet didie, edieke mbufo edidade ke ebiet uda ikpe ke esop Abasi, mme ɔfɔŋ mbufo eyɔhɔ ye ntɔi iyip ye kpukpru utɔ ndek? Sese, nso ke mme ŋkpɔ emi editie ntiense ibaŋa mbufo?

23 Sese ndi mmɔ iditiehe ntiense ite ke mbufo edi mme owot owo, iŋ, ndien ŋko ke mbufo emedue ye kpukpru utɔ ibak?

24 Sese, nditɔ eka mi, ndi mbufo ekere ete ke utɔ owo oro ekeme ndinyene itie nditie ke obio ubɔŋ Abasi, ye Abraham, ye Isaac, ŋko ye Jacob, nko ye kpukpru ndisana prophet, emi mme ɔfɔŋ mmɔ esanade enyuŋ enanade ndo, esana enyuŋ efia?

25 Ami ndɔhɔ mbufo, Iŋ iŋ; ibɔhɔke mbufo enam Andibot nnyin osu nsu tɔŋɔ ke eritɔŋɔ, mme ekere ke enye edi osu nsu tɔŋɔ ke eritɔŋɔ, mbufo ikemeke ndikere ke utɔ oro ekeme ndinyene itie ke obio ubɔŋ heaven; edi eyebin mmɔ esio koro mmɔ edi nditɔ obio ubɔŋ satan.

26 Ndien idahaemi sese, ami ndɔhɔ mbufo, nditɔ eka mi, mme mbufo emenyene ukpuhɔre ke esit, ndien mme mbufo emenyene udɔŋ ndikwɔ ikwɔ edifak ima, ami nyobup, ndi mbufo emekop ntre idahaemi?

27 Ndi mbufo emesaŋa, enim idem mbufo ke iso Abasi ikpe itipke? Ndi mbufo emekeme ndidɔhɔ, edieke ekotde mbufo ete ekpa ke ini emi, ke esit mbufo, ete ke mbufo emetim esuhɔre idem? Ete ke enam mme ɔfɔŋ mbufo esana enyuŋ efia eto ke iyip Christ, emi edidide man edifak ikɔt esie osio ke mme idiɔk ŋkpɔ mmɔ?

28 Sese, ndi esio mbufo ntaŋidem ke idem? Ami ndɔhɔ mbufo, edieke owo misioho mbufo ntaŋidem ke idem mbufo ibeŋeke idem ndisobo ye Abasi. Sese ana nte mbufo esɔp ebeŋe idem; koro obio ubɔŋ heaven kɔsɔp ekpere, ndien utɔ owo ntre inyeneke nsinsi uwem.

29 Sese, ami ndɔhɔ, ndi odu owo ke otu mbufo emi owo misioho enye ufup ke idem? Ami ndɔhɔ mbufo ke utɔ owo oro ibeŋeke idem; ndien ami mkpoyom nte enye ɔsɔp ebeŋe idem, koro ini ekpere, ndien enye ifiɔkke ini emi ini edidide; koro owo isehe utɔ owo oro nte miduehe.

30 Ndien ami mfiak ndɔhɔ mbufo, ndi owo odu ke otu mbufo emi asahide eyen eka esie, mme emi odoride enye ukɔbɔ ke idem?

31 Ɔyɔdiɔk ɔnɔ utɔ owo oro, koro enye ibeŋeke idem, ndien ini ke ekpere emi anade nte enye akabare esit midige ntre owo idikemeke ndinyaŋa enye!

32 Iŋ, ke akpanikɔ eyedɔdiɔk ɔnɔ kpukpru mbufo mme anam ukwaŋ-ŋkpɔ; ekabare esit, ekabare esit, koro Jehovah Abasi ɔdɔhɔ ntre!

33 Sese, enye ɔdɔŋ ete ekot kpukpru owo, koro enyanare ubɔk mbɔm enɔ mmɔ, ndien enye ɔdɔhɔ ete: Ekabare esit, ndien ami nyebɔ mbufo.

34 Iŋ, enye ɔdɔhɔ ete: Etiene mi ndien mbufo eyedia mfri eto uwem; iŋ, mbufo eyeta enyuŋ eŋwɔŋ uyo ye mme mmɔŋ uwem nte emama;

35 Iŋ, etiene mi enyuŋ eda mme nnen nnen utom edi, ndien owo idikpihi mbufo inyuŋ imen isin ke ikaŋ—

36 Koro sese, ini ke ekpere ete owo ekededi emi midaha eti mfri idi, mme owo ekededi emi minamke mme nnen nnen utom, ukem oro enyene ntak ndiseme nyuŋ mfuhɔ.

37 O mbufo mme anam ukwaŋ-ŋkpɔ; mbufo emi etaŋde idem ke mme ikpikpu ŋkpɔ ererimbot, mbufo emi ekerede ke imifiɔk mme usuŋ nnen nnen ido edi eyo, nte erɔŋ emi minyeneke andikpeme, isehe ke andikpeme ama okot mbufo ndien kosuk okokot mbufo, edi mbufo ikpaŋke utɔŋ inɔ uyo esie!

38 Sese, ami ndɔhɔ mbufo, nte ke eti ekpeme erɔŋ kokot mbufo; iŋ, ndien ke enyiŋ esie- mmɔŋ ke enye okot mbufo, emi edide enyiŋ Christ; ndien edieke mbufo midikpaŋke utɔŋ inɔ uyo eti ekpeme erɔŋ, inɔ enyiŋ emi ekotde mbufo, sese, mbufo idige erɔŋ eke eti ekpeme erɔŋ.

39 Ndien idahaemi edieke mbufo midige erɔŋ eke eti ekpeme erɔŋ, efe eboho ke mbufo edi? Sese, ami ndɔhɔ mbufo, nte ke satan edi andikpeme mbufo, ndien mbufo edi eke eboho esie; ndien idahaemi, anie owo ikeme ndikaŋ emi? Sese, ami ndɔhɔ mbufo, owo ekededi emi akaŋde emi edi osu nsu ye eyen satan.

40 Koro ami ndɔhɔ mbufo nte ke ŋkpɔ ekededi emi edide eti oto Abasi, ndien ŋkpɔ ekededi emi ɔdiɔkde oto satan.

41 Ke ntak oro, edieke owo anamde nti utom enye akpaŋutɔŋ ɔnɔ uyo eti ekpeme erɔŋ, ndien enye etiene enye; edi owo ekededi emi anamde mme idiɔk utom, ukem oro akabare eyen satan, koro enye akpaŋde utɔŋ ɔnɔ uyo esie, onyuŋ etienede enye.

42 Ndien owo ekededi emi anamde emi ana nte enye ɔbɔ mme utip esie; ke ntak oro, enye ɔbɔ mkpa nte utip esie, ke abaŋa mme ŋkpɔ nnen nnen ido, koro enye akpade ke abaŋa kpukpru nti utom.

43 Ndien idahaemi, nditɔ eka mi, ami moyom nte yak mbufo ekpaŋ utɔŋ enɔ mi, koro ami ntiŋ ye odudu ukpɔŋ mi, koro sese, ami ntiŋ ikɔ nnɔ mbufo iŋwaŋ-iŋwaŋ man mbufo ekudue, mme metiŋ ikɔ nte asaŋade ye mme ibet Abasi.

44 Koro ekot mi ete ntiŋ ikɔ ke utɔ usuŋ emi, nte asaŋade ye edisana utɔ Abasi, emi edide ke Christ Jesus; iŋ, enɔ mi uyo ete nda nyuŋ ntie ntiense nnɔ mbon emi mbaŋa mme ŋkpɔ emi mme ete nnyin eketiŋde ebaŋa mme ŋkpɔ emi edidide.

45 Ndien emi idige kpukpru. Ndi mbufo ekere ete ke ami mɔfiɔk mme ŋkpɔ emi ke idem mi? Sese, ami ntie ntiense nnɔ mbufo nte ke ami mɔfiɔk ke mme ŋkpɔ emi emi ami ntiŋde edi akpanikɔ. Ndien didie ke mbufo ekere ke ami mɔfiɔk mbaŋa akpanikɔ mmɔ?

46 Sese, ami ndɔhɔ mbufo ke edi Edisana Spirit Abasi anam mi mfiɔk mmɔ. Sese, ami metre udia nyuŋ mbɔŋ akam ke ediwak usen man ami mfiɔk mme ŋkpɔ emi ke idem mi. Ndien idahaemi ami mɔfiɔk ke idem mi nte ke mmɔ edi akpanikɔ; koro Jehovah Abasi ama ayarare mmɔ ɔnɔ mi ke Edisana Spirit esie; ndien emi edi spirit eriyarare emi odude ke ami.

47 Ndien ke ediande do, ami ndɔhɔ mbufo nte ke ntem ke ekeyarare enɔ mi, ete ke mme ikɔ emi mme ete nnyin eketiŋde edi akpanikɔ, kpa ntre nte asaŋade ye spirit prophecy emi odude ke ami, emi edide ŋko nte asaŋade ye eriyarare Spirit Abasi.

48 Ami ndɔhɔ mbufo, nte ke ami mɔfiɔk ke idem mi nte ke ŋkpɔ ekededi emi ami nditiŋde nnɔ mbufo, kabaŋa se anade nte edi, edi akpanikɔ; ndien ami ndɔhɔ mbufo, nte ke ami mɔfiɔk ke Jesus Christ eyedi, iŋ, Eyen, Ikpɔŋ Eyen Ete, ɔyɔhɔde ye mfɔn, ye mbɔm, ye akpanikɔ. Ndien sese, edi enye edidi man emen mme idiɔk ŋkpɔ ererimbot efep, iŋ, mme idiɔk ŋkpɔ owo kiet kiet emi ɔsɔŋde ada ɔbuɔtidem ke enyiŋ esie.

49 Ndien idahaemi ami ndɔhɔ mbufo nte ke emi edi utɔ emi ekotde mi, iŋ, ndikwɔrɔ ikɔ nnɔ ndima nditɔ eka mi, iŋ, ye owo kiet kiet emi oduŋde ke isɔŋ; iŋ, ndikwɔrɔ ikɔ nnɔ kpukpru, akwaowo ye eyenɔwɔŋ mbiba, ifin ye eyen isɔŋ mbiba; iŋ, ami ndɔhɔ mbufo usɔŋ, ŋko ye owo emi misɔŋke ikaha, ye emana emi ekpoŋde edi; iŋ, ndidɔhɔ mmɔ nte ke ana mmɔ ekabare esit enyuŋ etɔŋɔ ntak emana.

50 Iŋ, ntem ke Spirit ɔdɔhɔ: Ekabare esit, kpukpru utit ererimbot, koro obio ubɔŋ heaven ɔsɔp ekpere; iŋ, Eyen Abasi kedi ke ubɔŋ esie, ke ukeme, uyai, odudu, ye ukara esie. Iŋ, ndima nditɔ eka mi, ami ndɔhɔ mbufo, nte ke Spirit ɔdɔhɔ ete: Esese ubɔŋ Edidem ofuri ererimbot; ndien ŋko Edidem heaven ɔyɔsɔp ndi yama ke otu kpukpru nditɔ owo.

51 Ndien ŋko Spirit ɔdɔhɔ mi, iŋ, ofiori ɔnɔ mi ke ɔkpɔsɔŋ uyo, ete: Ka nyuŋ dɔhɔ mbon emi—Ekabare esit, koro ibɔhɔke mbufo ekabare esit mbufo ikemeke ndida obio ubɔŋ heaven nnyene.

52 Ndien ami mfiak ndɔhɔ mbufo, ke Spirit ɔdɔhɔ ete: Esese, enim ekuri ke etak eto; ke ntak oro eyekpi enyuŋ etop esin ke ikaŋ kpukpru eto emi miŋwumke eti mfri, iŋ, ikaŋ emi owo mikemeke ndikpan, kpa ikaŋ emi midinimeke. Esese, enyuŋ eti, Ata Edisana etiŋ.

53 Ndien idahaemi ndima nditɔ eka mi, ami ndɔhɔ mbufo, ndi mbufo emekeme ndifaŋa ye se etiŋde emi; iŋ, ndi mbufo emekeme ndisin mme ŋkpɔ emi, enyuŋ edihi Ata Edisana ke idak ikpat mbufo; iŋ, ndi mbufo emekeme nditaŋ idem ke ntaŋidem esit mbufo; iŋ, ndi mbufo eyeka iso eyire ke ndisine nsɔŋ urua ɔfɔŋ ye ke ndisin esit mbufo ke mme ikpikpu ŋkpɔ ererimbot, ke inyene mbufo?

54 Iŋ, ndi mbufo eyeka iso eyire ke ndikere ke mbufo emefɔn ekan kiet eken; iŋ, ndi mbufo eyeka iso eyire ke ndikɔbɔ nditɔ eka mbufo, emi esuhɔre idem mmɔ enyuŋ esaŋa nte asaŋade ye edisana utɔ Abasi, emi ekedade mmɔ edi ufɔk Abasi emi, ke ema ekenam mmɔ esana ke Edisana Spirit, ndien mmɔ enam mme utom emi ekemde ye erikabare esit—

55 Iŋ, ndi mbufo eyeka iso eyire ke ndiŋwɔŋɔre edem mbufo nwut mme ubuene, ye mbon unana, ye ke ndisin ndinɔ mmɔ inyene mbufo?

56 Ndien ke akpatre, kpukpru mbufo emi edikade iso iyire ke ibak mbufo, ami ndɔhɔ mbufo nte ke mmɔ emi edi mbon emi edikpide inyuŋ itop isin ke ikaŋ ibɔhɔke mmɔ esɔp ekabare esit.

57 Ndien idahaemi ami ndɔhɔ mbufo, kpukpru mbufo emi enyenede udɔŋ nditiene uyo eti ekpeme erɔŋ, eŋwɔŋɔ ke otu mbon ibak, enyuŋ edianare eda, ekunyuŋ utuk mme ndedehe ŋkpɔ mmɔ; ndien sese, eyesɔhi enyiŋ mmɔ efep, man owo ukubat mme enyiŋ mbon ibak usin ye mme enyiŋ ndinen owo, man ikɔ Abasi osu, emi ɔdɔhɔde ete: Enyiŋ mme idiɔk owo idibuahake ye mme enyiŋ ikɔt mi;

58 Koro eyewet mme enyiŋ ndinen owo ke ŋwed uwem, ndien mmɔ ke ami ndinɔ inyene ke ubɔk nnasia mi. Ndien idahaemi, nditɔ eka mi, nso ke mbufo enyene ndifaŋa mbaŋa mme ŋkpɔ emi? Ami ndɔhɔ mbufo, edieke mbufo etiŋde ikɔ ebiat enye, idihe akpan ŋkpo, koro ana nte ikɔ Abasi osu.

59 Koro nsutɔ ekpeme erɔŋ idu ke otu mbufo emi enyenede ediwak erɔŋ edi ikpemeke mmɔ, man mme wolf ekuduk enyuŋ uta ufene esie? Ndien sese, edieke wolf odukde otu mme ufene esie enye ibinke enye isio? Iŋ, ndien ke akpatre, edieke enye akande, enye eye owot enye.

60 Ndien idahaemi ami ndɔhɔ mbufo nte ke eti ekpeme erɔŋ kokot mbufo; ndien edieke mbufo edikpaŋde utɔŋ inɔ uyo esie enye ayada mbufo esin ke eboho esie, ndien mbufo edi erɔŋ esie; ndien enye ɔnɔ mbufo uyo ete mbufo ekuyak idiɔk wolf ɔbiɔŋ oduk ke otu mbufo, man owo ukusobo mbufo.

61 Ndien idahaemi ami, Alma, nnɔ mbufo uyo ke usem enye emi ekɔnɔde mi uyo, nte yak mbufo ekpeme ndinam mme ikɔ esie emi ami ntiŋde nnɔ mbufo.

62 Ami ntiŋ ikɔ nte uyo nnɔ mbufo emi edude ke ufɔk Abasi; ndien mbon emi miduhe ke ufɔk Abasi ami ntiŋ ikɔ nte ikot, nte: Edi enyuŋ eduɔk mmɔŋ man ekabare esit, man mbufo ŋko edia mfri eto uwem.