1 Chiney e yibi buch ni Alma e tabab i piiʼ fare thin rokʼ Got ngakʼ fapi gidiiʼ, ni sommʼon riy u lan fare binaw nu Zarahemla, me fini garar u roem u dakean gaʼangin yang fare nam.

2 Ma ireray fapi thin ni weliy ngakʼ fapi gidiiʼ ko galasia nni yarmiy nga lan fare binaw nu Zarahemla, u rogon e chep rokʼ, ni gaʼar:

3 I gag, Alma, ni ke gapgep nigeg e chitamag, i Alma, ni nggu mang tolang ko priest ko galasia rokʼ Got, ya ke piiʼ Got gelingin nge matʼawon ni nge rinʼ e pinnʼey, ere musap gaed, gube yoeg ngomed ni tabab i yarmiy ba galasia nga lan fare binaw ni bay kopi mathil ku Nephi; arragon, fare binaw ni kanoeg ni fare binaw ku Mormon; arragon, me tawfe nag pi walagen u lan farengi raen ku Mormon.

4 Ere musap gaed, gube gaʼar ngomed, ni yaed e ni chuwegraed u paʼ fapi gidiiʼ rokʼ fare pilung i Noah, u dakean e murnguy nge gelingin rokʼ Got.

5 Ma musap gaed, tomuren e binem, me koelraed fapi Lamanites ngan fekraed ni kalbus nga lan wuruʼ e binaw; arragon, gube gaʼar ngomed, ur moyed u kalbus, nge ku bayay fare Somoel e chuwegraed u kalbus u dakean gelingin e thin rokʼ; ma kan fek daed iyib nga lan e biney e binaw, ere ireray e gin ni kug tabab gaed i yarmiy fare galasia rokʼ Got riy ma ki garar u dakean e biney e nam.

6 Ere chiney e musap gaed, gube gaʼar ngomed pi walageg, gimed e piʼin ni gidiiʼ ko re galasia ney, kubay u wunʼmed fare kalbus nni tay ngakʼ e pi chitamangmed? Arragon, ma kubay u wunʼmed e murnguy nge gumʼaenʼ rokʼ ngoraed? Nge ku boech, kubay u wunʼmed ni ke chuweg e yaʼel roraed u tafen e infierno?

7 Musap gaed, i piliyeg gumʼirchaʼraed; arragon, i pug raed ngar od gaed u fithikʼ e mol aran, mar od gaed ngakʼ Got. Musap gaed, ur moyed u fithikʼ e lumor; machane, pi yaʼel roraed e gael raʼen nga rogon fini tamilang fare bugithin ni dabimus biʼid; arragon, ni liyeg raed ko fare wolbuw ko yamʼ, nge fare chen nu infierno, nge ba gafgow ni dabimus biʼid e be soen nagraed.

8 Ere chiney e gube fithmed pi walageg, gul ni gatheayraed? Musap gaed, gube gaʼar ngomed, Dangay, dan gatheayraed.

9 Ere chiney e gube fith, gul fare wolbuw ko yamʼ e keputh, nge fare chen nu infierno nib liyeg raed e ke puf? Gube yoeg ngomed ni, Arragon, ke puf laniyaenʼraed, mar pogofan gaed, mar tang niged e falfalaenʼ ni kan bayuliyraed u dakean e murnguy. Ere gube yoeg ngomed ni kar thap gaed.

10 Ere chiney e nggu fithmed ko buʼuw rogon ma kar thap gaed? Arragon, buʼuw fan ni ngar athapeged fare woʼen e thap? Mang tapgin ni ngan pithig roraed fare wolbuw ko yamʼ, arragon, nge fare chen nu infierno?

11 Musap gaed, rayog ni nggog ngomed—de mich u waenʼ e chitamag i Alma fapi thin ni yoeg Abinadi? Ma gathi ir ba profet nib thothup? De weliy fapi thin rokʼ Got, me mich u waenʼ e chitamag i Alma?

12 Ma rogon e mich rokʼ me thil lan gumʼirchaʼen. Musap gaed gube yoeg ngomed ni gubin e pinnʼey mab riyulʼ.

13 Ere musap gaed, ire machib nag fare thin ngakʼ e pi chitamangmed, me thil lan e pi gumʼirchaʼ roraed, mar mʼing gaed mar tayed e pagaenʼ roraed ngakʼ fare Got ni riyulʼ mab fos. Ere muguyed, ra yulʼyulʼ gaed nge madaʼ ko tomur; ma aram fin ra thap gaed.

14 Ere chiney e musap gaed, nggu fithmed, o pi walageg ko fare galasia, ke yog ni mu piiʼed gimed ngakʼ Got? Napʼan ni kam chugur gaed nga pʼoewchen Got gul be mʼug falʼngin u oewchmed? Ke yog ni mu thamiyed e biney e thil nga lan gumʼirchaʼmed?

15 Gimed be gay rogon ni nge mich u wunʼmed nra bayuliymed e chaʼ ni sunmiymed? Gimed be sap nga mʼon u ba oewchef nib mich, ma kam guyed e biney e dowef ni ba dagur ni ma yimʼ nra fos ni dab ki yimʼ, ma biney e mogothgoth e ra piliyeg nge aw ni gathi mogothgoth, me sakʼiy nga pʼoewchen Got ni ngan pufthin nag u rogon e pi ngongol ni irinʼ u lan e biney e dowef?

16 Gube gaʼar ngomed, rayog ni ngam guyed gimed u laniyaenʼmed ni kam rungʼaged laman Somoel, ni be gaʼar ngomed, u lan e binem e rran: Mired ngog e piʼin ni kug falaenʼ ngomed, ya muguyed, pi muruwel romed ni kam rinʼed e bogi muruwel nib matʼaw u dakean e fayleng?

17 Ara, gimed be guymed ni rayog ni ngam baen niged Somoel u lan e binem e rran, mi gimed gaʼar—Somoel, pi muruwel ni kug rinʼed e bogi muruwel nib matʼaw u dakean e fayleng—ma rayog ni nge thapegmed?

18 Ara, rayog ni ngam guyed gimed u tagilʼ e pufthin rokʼ Got nib buchfenmed ma ke mʼingaenʼmed, ni bachan e ke yib ngaenʼmed gubin i thibngimed, arragon, ni ke yib ngaenʼmed gubin e pi denen romed, arragon, ni ke yib ngaenʼmed ni kuʼum togopluw gaed ko pi motochiyel rokʼ Got?

19 Gube gaʼar ngomed, rayog ni ngam sap gaed ngakʼ Got ko binem e rran nib machalbog gumʼirchaʼmed mab beʼech paʼmed? Gube gaʼar ngomed, rayog ni ngam sap gaed ngalang, u napʼan ni gimed be chugur nga pʼoewchen Got ma bay yib i gagyel falʼngin u oewchmed?

20 Gube gaʼar ngomed, rayog ni ngam lemniged ni ngam thap gaed u napʼan ni kam paged gimed nga paʼ fare moʼoniyanʼ?

21 Gube gaʼar ngomed, gimed ra nang ko binem e rran ni dab kiyog ni ngam thap gaed; ya dariy beeʼ nra yog ni nge thap ma kemus ni faʼanra kan luknag e mad rokʼ ke wechwech; arragon, mad rokʼ e thingar ni machalbog nag nge madaʼ ko ngiyalʼ ni ke mʼay gubin e nochiyang i alit riy, u dakean rachaʼen fachaʼ niʼir e ke weliy e pi chitamangdaed morngaʼagen, nra yib nge bayuliy e gidiiʼ rokʼ ko pi denen roraed.

22 Ere chiney e gube fithmed, pi walageg, buʼuw rogon laniyaenʼ bi gimed nra yaeni paer, ni faʼanra ngam sakʼiy nga mʼon u tagilʼ e pufthin rokʼ Got, nib sug e mad rom ko rachaʼ nge tin nib galong? Musap gaed, manga ra micheg e pinnʼey nib togopluw ngomed?

23 Musap gaed gathi yaedra micheg ni gimed bogi tamthang fan, arragon, ma kub buchfenmed ko gubin mite kireb?

24 Musap gaed, pi walageg, gimed be lemnag ma bay beeʼ ni aram rogon ni bay tagilʼ ni rayog ni nge paer riy nga butʼ u gilʼilungun Got, ni yaed Abraham, nge Isaac, nge Jacob, nge gubin fapi profet nib thothup, ni mad roraed e beʼech ni de pupnunʼ, nib machalbog mab wechwech?

25 Gube gaʼar ngomed, Dabiyog; ara dangay ma gimed be yoeg ni en Tasunmiy rodaed e ba sasalap lʼugun ni aram ko sommʼon iyib, ara gimed be lemnag niʼir e beeʼ nib sasalap lʼugun ni aram ko sommʼon iyib, dabiyog ni ngam lemniged ni beeʼ ni aram rogon e rayog ni nge yib tagilʼ u lan e gilʼilungun nu tharmiy; machane bay ninʼraed nga wean ya yaed e bitir ko fare gilʼilungun rokʼ moʼoniyanʼ.

26 Ere chiney e musap gaed, gube gaʼar ngomed, pi walageg, faʼanra kam thamiyed gumʼirchaʼmed ni ke thil, ma faʼanra kam thamiyed ni gimed baʼadag ni nga munʼed tangin e falfalaenʼ u dakean e bayul, me ere gubaʼadag ni nggu fithmed, be yog ni ngam thamiyed e chiney?

27 Kuʼum maroed, ni kam tayed gimed ni dariy thibngimed u mit Got? Rayog ni nga moeged romed, ni faʼanra kan piningmed ni ngam mʼaed e ngiyalʼ ney, nib gaman e sobutʼaenʼ ni kam tayed? Ni mad romed e beʼech ma kan wechwech nag u dakean rachaʼen Kristus, niʼir e bay yib ni nge bayuliy e gidiiʼ rokʼ ko pi denen roraed?

28 Musap gaed, kam chuweged e ʼufʼuf romed? Gube gaʼar ngomed, faʼanra dawor ma dawori felʼ rogmed ni ngam madaʼ gaed Got. Musap gaed thingar mu falʼeged rogmed ni papay; ya fare gilʼilungun nu tharmiy e kari chugur iyib, ma chaʼ ni aram rogon e dabiyog e yafos ngakʼ ni manechubog.

29 Musap gaed, gube gaʼar, bay beeʼ u fithikʼmed ni dawori pag e moʼowaenʼ? Gube yoeg ngomed ni chaʼ ni aram rogon e dawori muguʼuliy ir; ere gubaʼadag ni nge muguʼuliy ir ni papay, ya fare awa e kari chuchugur, ma denang ko wiʼin e ra taw fare ngiyalʼ innʼem; ya chaʼ ni aram rogon e dabiyog ni ngan pirʼeg ni dariy thibngin.

30 Ere bayay gube gaʼar ngomed, bay beeʼ u fithikʼmed ni be kuʼ nag walagen, ara be gafgow nag?

31 Gafgow ngakʼ e chaʼ ni aram rogon, ya dawori muguʼuliy ir, ma fare ngiyalʼ innʼem e kari chugur ngay ni thingari kalngaenʼ fa dangay ma dabiyog nra thap.

32 Arragon, ma ku gafgow ngomed ni gubin e piʼin ni gimed be muruwliy e ngongol ko denen; mu kalgaed ngaenʼmed, mu kalgaed ngaenʼmed, ya fare Somoel ni Got e ke yoeg.

33 Musap gaed, ke piiʼ ba thiibach nge yaen ngakʼ gubin e gidiiʼ, ya fagal rabaʼ i paʼayif ko murnguy e ke kʼiyeg ngoraed, me gaʼar: Mu kalgaed ngaenʼmed, mi gimed thap ngog.

34 Arragon, i gaʼar: Mired ngog ma rayog ni ngam kayed waʼamngin fare ke gakʼiy ko yafos; arragon, gimed ra kay mi gimed unum fare falowa nge raen ko yafos nib puf rogmed;

35 Arragon, mired ngog ngam rinʼed e muruwel nib matʼaw, ma dab ni thʼaeb med nga butʼ nga ninʼ med nga lanmit e nifiy—

36 Ya musap gaed, fare ngiyalʼ innʼem e ke chugur ni enra piiʼ e waʼamngin ni defelʼ, ara chaʼ ni dar rinʼ e pi muruwel nib matʼaw, e ireram e chaʼ nra yoer ma ra kirbaenʼ.

37 O gimed e pi tamongongol denen; gimed e piʼin ni kam gaaʼ gaed ngalang ko tin dariy fan nu fayleng, gimed e piʼin ni kam weliyed ni gimed manang e pi kanawo nib matʼaw machane kam maroed nga wuruʼ e woʼ, ni boed e saaf ni demoy e tachathowol rokʼ, ni yug aram rogon ni bay ba tachathowol ni ke piningmed ma kube piningmed, machane damur motoyil gaed nga laman!

38 Musap gaed, gube yoeg ngomed, ni fare tachathowol nib mangil e be piningmed; arragon, ma dakean fithingan e be piningmed riy, ni ireram fithingan ni Kristus; ma faʼanra dab motoyil gaed nga laman fare tachathowol nib mangil, ko fare fithingan ni yibe piningmed u dakean, ere musap gaed, gathi gimed fapi saaf rokʼ fare tachathowol nib mangil.

39 Ere chiney e faʼanra gathi gimed fapi saaf rokʼ fare tachathowol nib mangil, meʼere mang ulung e gimed bay riy? Musap gaed, gube yoeg ngomed, ni fare moʼoniyanʼ e tachathowol romed, ma gimed ba mang ko ulung rokʼ; ere chiney e, miniiʼ e rayog rokʼ ni nge yoeg ni deriyulʼ e rannʼey? Musap gaed, gube yoeg ngomed, ni enra yoeg ni deriyulʼ e rannʼey e beeʼ nib sasalap lʼugun ma beeʼ ni bitir rokʼ fare moʼoniyanʼ.

40 Ya gube yoeg ngomed ni demutrug banʼen nib mangil ma mayib rokʼ Got, ma demutrug banʼen nib kireb ma mayib rokʼ fare moʼoniyanʼ.

41 Ere, faʼanra bay beeʼ nra rinʼ e pi muruwel nib mangil ma be motoyil nga laman fare tachathowol nib mangil, ma be leak; machane enra rinʼ e pi muruwel nib kireb, ma ireram e chaʼ ni ra mang bitir rokʼ fare moʼoniyanʼ, ya be motoyil nga laman, ma be leak.

42 Ma enra rinʼ e biney e thingari fek puluwon rokʼ; ere, ya puluwon nra yog ngakʼ e yamʼ, nib lʼeag rogon ko tin nib matʼaw banʼen, ni kanimʼ nga dakean gubin e muruwel nib mangil.

43 Ere chiney, pi walageg, gu baʼadag ni ngam motoyil gaed ngog, ya gube non ngomed u poloʼ i gelingig; ya musap gaed, kug weliy ngomed nib tamilang ere dabiyog ni nga dab mu nanged fan, ara kug weliy u rogon fapi motochiyel rokʼ Got.

44 Ya kan piningeg ni nggu non ni aray rogon, u rogon e yaram nib thothup ku Got, niʼir e bay rokʼ Kristus Yesus; arragon kan chiyliy ngog ni nggu sakʼiy nggu micheg ngakʼ e pi gidiiʼ ney e pinʼen ni ke weliy e pi chitamangmaed ni morngaʼagen e pinʼen ni bay yib.

45 Ma gathi kemus aray. Damur lemniged me gagrog ma gumnang e pinnʼey? Musap gaed, gube micheg ngomed ni gumnang ni pinnʼey niʼir e kug weliy ngomed e riyulʼ. Ma buʼuw rogon ni gimed be lemnag ni gumnang e pinnʼey nib riyulʼ?

46 Musap gaed, gube yoeg ngomed ni kan gagyeg nag ngog ni nggu nang u dakean fare Kan ni Thothup rokʼ Got. Musap gaed, kug baley nag e abich rog ma kug meybil nib yoʼor e rran ni gomanga yog nug nang e pinnʼey. Ere chiney e gagrog ma gumnang ni yaed ba riyulʼ; ya fare Somoel ni Got e kedag ngog u dakean fare Kan ni Thothup rokʼ; ma ireray fare nangaenʼ ko yiʼiy ni bay rog.

47 Ma ku arragon, ni gube yoeg ngomed ni kan yiʼiy ngog, ni fapi thin ni weliy e pi chitamangdaed e ba riyulʼ, ni aram rogon u rogon fare nangaenʼ ko prophecy ni bay rog, ni ku ire bay u dakean e nangaenʼ ko fare Kan ni Thothup rokʼ Got.

48 Gube yoeg ngomed, ni gagrog ma gumnang ni pinnʼey ni gura yoeg ngomed, ni morngaʼagen e pinʼen ni nge yib, e ba riyulʼ; ma gube yoeg ngomed, ni gumnang ni Yesus Kristus e ra yib, arragon, fare Fak, fare Maʼagirag ko en Chitamangiy, nib sug ko murnguy, nge wurengaenʼ, nge riyulʼ. Ere musap gaed, ire nge yib ni nge chuweg e pi denen ko gidiiʼ nu fayleng, arragon, pi denen rokʼ gubin e piʼin ni yaed be paer nib michaenʼraed nga fithingan.

49 Ere chiney e gube yoeg ngomed ni ireray e re gamʼing ni kan piningeg ngay, arragon, ni nggu machib nag ngakʼ pi walageg, arragon, nge gubin e gidiiʼ ni be paer u lan fare binaw; arragon, ni nggu machib nag ngakʼ gubin e gidiiʼ, ni pilibthir nge bitir, nge kalbus nge piʼin dekalbus; arragon, gube yoeg ngomed e labthir, nge pi felʼ yangren, nge fare mfen ni be yib; arragon, ni nga moeged ngoraed ni thingar ra kalgaed ngaenʼraed min gargelegraed bayay.

50 Arragon, i gaʼar fare Kan ni Thothup: Mu kalgaed ngaenʼmed, ni gimed gubin e gidiiʼ ni gimed bay ko tin tomur e rran u fayleng, ya fare gilʼilungun nu tharmiy e kari chugur ni nge taw; arragon, fachaʼ ni Fak Got e ra yib u fithikʼ e rir rokʼ, nge gelingin laniyaenʼ, nge falʼngin, nge gelingin, nge suwon. Arragon, pi walageg nib tʼuf rog, gube yoeg ngomed, ni gaʼar fare Kan ni Thothup: Muguy e rir ko fare Pilung ko fayleng ni gaʼangin; ma ku fare Pilung ko tharmiy e kari chuchugur ni bay yib i gaelʼ raʼen nga fithikʼ gubin e gidiiʼ.

51 Ma ki gaʼar fare Kan ni Thothup ngog, arragon, ri non ngog ni rib gaaʼ laman, ni be gaʼar: Mman nga moeg ko pi gidiiʼ ney—Mu kalgaed ngaenʼmed, ya faʼanra dab mu kalgaed ngaenʼmed ma dariy rogon me yog ngomed fare gilʼilungun nu tharmiy.

52 Nge ku bayay gube yoeg ngomed, ni fare Kan ni Thothup e gaʼar: Musap gaed, farengi tow e kan moleg nga charen i likʼngin fare ke gakʼiy; ere gubin kean e gakʼiy ni dar piiʼ e waʼamngin nib felʼ e ngan thʼaeb nga butʼ mininʼ nga mite nifiy, arragon, ba nifiy ni dabiyog i thang, ya ba nifiy ni dabi math. Musap gaed, mi gimed tay u wunʼmed, ni Fachaʼ nib Thothup e ke yoeg.

53 Ere chiney o pi walageg nib tʼuf rog, gube gaʼar ngomed, rayog ni ngam togopluw gaed ko pi thin ney; arragon, rayog ni ngam yirifyed e pinnʼey nga barbaʼ, mi gimed yitʼ nga butʼ Fachaʼ nib Thothup nga rifrifan aymed; arragon, rayog ni ngam langlang gaed ngalang ko ʼufʼuf u gumʼirchaʼmed; arragon, kagmed ra ʼulʼul ko muchuw nga mad ni totolang puluwon mi gimed tay gumʼirchaʼmed nga dakean e tin nu fayleng banʼen ni dariy fan, ngo dakean e pi falaʼab romed?

54 Arragon, kagmed ra ʼulʼul i lemnag nib felʼ rogmed ngakʼ boech e gidiiʼ; arragon, kagmed ra ʼulʼul i gafgow nag pi walagmed, ni yaed e kar mʼing niged yaed ma yaed be yaen u rogon fare yaram nib thothup ku Got, ni aramfan nni fekraed nga langgin e re galasia ney, ma ke machalbog nagraed fare Kan ni Thothup, ma yaed be rinʼ e pi muruwel nib lʼeag fan ko kalngaenʼ—

55 Arragon, ma kagmed ra ʼulʼul i piiʼ keruʼmed ko piʼin gafgow, nge piʼin nib tʼuf banʼen roraed, mi gimed tel e tiromed roraed?

56 Ere fin aray, e gimed gubin e piʼin ni gimed ra ululiy i rinʼ e pi ngongol ni kireb, gube yoeg ngomed ni ireray e piʼin ni yira thʼaeb raed nga butʼ ma ninʼ raed nga mite nifiy ma kemus ni faʼan yaedra kalngaenʼ nib papay.

57 Ere chiney e gube yoeg ngomed, gimed gubin e piʼin ni gimed baʼadag ni ngam leaked laman fare tachathowol nib mangil, mired ngam chuw gaed rokʼ e piʼin ni ma rinʼ e ngongol nib kireb, mu palog niged gimed roraed, ma dab mmath gaed ko tin ba alit banʼen roraed; ma musap gaed, pi fithingraed e bay ni chuweg, ya pi fithingan e piʼin nib kireb e dab ni uneg nga fithikʼ i fithingan e piʼin nib matʼaw, ya fare thin rokʼ Got e nge yog ni muguʼul, ni boed ni gaʼar: Fapi fithingan e piʼin kireb e dabi maʼathuk nga fithikʼ i fithingan e pi gidiiʼ rog;

58 Ya pi fithingan e piʼin nib matʼaw e yira yoloey nga langgin fare ke babyor ko yafos, ma yaed e gura piiʼ tagilʼ raed u baʼan matʼaw i paʼag. Ere chiney, o pi walageg, manga bay ni nga moeged nib togopluw ko rennʼey? Gube yoeg ngomed ni faʼanra ngam nonnaed nib togopluw ngay, ma dariy fan, ya fare thin rokʼ Got e thingari muguʼul ni dabi siy.

59 Ya mang tachathowol e bay u fithikʼmed nib yoʼor e saaf rokʼ ma dar matangiyraed, ni nge dabi yibe wolf i longuy e gamanman rokʼ? Ere musap gaed, faʼanra yib ba wolf nga fithikʼ e gamanman rokʼ ma gathi nge tuluf nge chuw? Arragon, ma tomur riy, e faʼanra yog rokʼ, ma ra koel nge liiʼ ngemʼ.

60 Ere chiney e gube yoeg ngomed ni fare tachathowol nib mangil e be piningmed; ma faʼan gimed ra motoyil nga laman ma ra fekmed iyaen ko ulung rokʼ, ma gimed e saaf rokʼ; me chiyliy ngomed ni dab mu paged e wolf ni ke kʼiy nge yib nga fithikʼmed, ni nga dabra liiʼed gimed.

61 Ere chiney e gag, Alma, e gube chiyliy ngomed u dakean fare thin rokʼ fachaʼ ni chiyliy ngog, ni ngam guyed rogon ni ngam rinʼed e pi thin ni kug weliy ngomed.

62 Gube non u dakean e motochiyel ngomed e piʼin ni gimed mmang ko fare galasia; ma gimed e piʼin ni dam manged ko fare galasia e kug piiʼ e thiibach ngomed, ni gube gaʼar: Mired ngan tawfe nagmed u dakean e kalngaenʼ, ya ngki yog ni ngam koyed waʼamngin fare ke gakʼiy ko yafos.