1 Ere chiney e yibi buch u tomuren ni ke muʼ Alma ko numon ngakʼ fapi gidiiʼ ko fare galasia, niʼir e kani yarmiy u lan fare binaw nu Zarahemla, me yibliy e priest nge elder, u paʼ ni tay nga dakean loelugraed u rogon fare gamʼing rokʼ Got, ni ngar matʼaweged mar matangiyed fare galasia.

2 Me yibi buch ni piʼin ni dawor ruʼuned ko fare galasia ni kar kalgaed ngaenʼraed ko pi denen roraed e ni tawfe nagraed u dakean e kalngaenʼ, mar uned ko fare galasia.

3 Ma ki yibi buch ni piʼin nib un ko fare galasia ni dar kalgaed ngaenʼraed ko pi denen roraed ma dar sobutʼ niged yaed u mit Got—gube yipʼ fan e piʼin ni kar langlang gaed ngalang ko ʼufʼuf u lan gumʼirchaʼraed—e ireram e pichaʼ nni fek yathraed, min chuweg fithingraed, ma arame da kun uneg fithingraed nga fithikʼ i fithingan e piʼin nib matʼaw.

4 Ere aray rogon nra tabab gaed i yarmiy fare galasia u lan fare binaw nu Zarahemla.

5 Chiney e gubaʼadag ni ngam nanged fan ni fare thin rokʼ Got e rib tamilang ngakʼ gubin e gidiiʼ, ni dariy beeʼ nni siyeg matʼawon ko fare moʼolung nga taʼabang ni ngan rungʼag fare thin rokʼ Got.

6 Machane pi bitir rokʼ Got e ni chiyliy ngoraed ni thingar ur kunuyed yaed nga taʼabang nib yoʼor yay, ma ngar peth gaed ngar baley niged e abich roraed mar meybil gaed nib gel ni fan ko paer rokʼ e piʼin ni dawor ra nanged Got.

7 Ere chiney e yibi buch u napʼan ni ke muʼ Alma i ngongoliy e pi motochiyel ney me yaen nge chuw roraed, arragon, ko fare galasia ni bay u lan fare binaw nu Zarahemla, me yaen nga baʼan ngek fare lulʼ ni Sidon, nga langgin fare loway nu Gideon, ma bay bbinaw ni kan toey riy, ni kanoeg ni fare binaw ku Gideon, ni bay u lan fare loway ni kanoeg ni Gideon, ni kan tunguy fithingan beeʼ nib moʼon ngay ni yimʼ nga paʼ Nehor ko sayden.

8 Ma Alma e yaen nge tabab i yoeg fare thin rokʼ Got ko fare galasia ni kan yarmiy u lan fare loway nu Gideon, u rogon fare yiʼiy ko fare thin ni riyulʼ niʼir e ke weliy e pi chitamangin, ngo rogon fare nangaenʼ ko prophecy ni bay rokʼ, u rogon e mich rokʼ Yesus Kristus, ni fachaʼ ni Fak Got, niʼir e bay yib ni nge bayuliy e gidiiʼ rokʼ ko pi denen roraed, ngo dakean fare yaram nib thothup ni kan pining riy. Ere aray rogon nni yoloey. Amen.