1 Musap gaed pi walageg, kam guyed ni kan piiʼ matʼawog ni nggub ngomed, ere gube nomeg ni nggu non ngomed ko birog e thin; arragon, ni nge yib u lʼugnag, kam guyed ni ireray e sommʼon riy ni kug non ngomed ko pi thin nu langag, ni bachan e kan piiʼ matʼawog ni gaʼangin ko fare gilʼ e tapuf-oloboch, ma boʼor bogi banʼen ni ugrinʼ ere deyog ni nggub ngomed.

2 Ma faʼan manga boech ma dabiyog nug ra yib ko ngiyalʼ ney ni faʼanra dawor ni piiʼ fare gilʼ e tapuf-oloboch ngakʼ yug beeʼ, ni nge yinʼ luwag; ere fare Somoel e ke bing woʼen ngog u fithikʼ e murnguy rokʼ ni nggub ngomed.

3 Ere musap gaed, kugub ni gube athapeg ma gubaʼadag ni nggu pirʼegmed ni kam mʼing niged gimed u mit Got, ma kam ululiyed e paer u fithikʼ e murnguy rokʼ, ni nggu pirʼeg ni dariy thibngimed u mit Got, ma nggu pirʼeg ni dam moyed u fithikʼ fare gafgow ni ubchiyaʼ ni immoy pi walagdaed riy u fithikʼ u Zarahemla.

4 Machane kari magaer Got, ni ke piiʼ ngog ni nggu nang, arragon, ni ke piiʼ ngog e falfalaenʼ ni rib gel ni kug nang ni kan yarmiy raed bayay ko yalen rokʼ nib matʼaw.

5 Ma be paganʼug ngay, u rogon fare Kan ni Thothup rokʼ Got ni bay rog, ni kuggu falfalaenʼ ngomed; machane dagur athapeg ni falfalaenʼ rog ngomed e nge yib ni bachan e kirbeanʼ nge gafgow rog ngakʼ pi walageg u Zarahemla, ya musap gaed, falfalaenʼ rog ngoraed e yib u tomuren ni ku guwaen u fithikʼ e kirbaenʼ nge gafgow nib yoʼor.

6 Machane musap gaed, be paganʼug ngay ni dawor mu taw gaed nga ba dodow ni dakuriy e mich romed ni woed pi walagmed; Paganʼug ngay ni dawor mu langlang gaed ngalang ko ʼufʼuf u lan gumʼirchaʼmed; arragon, paganʼug ngay ni dawor mu tayed gumʼirchaʼmed nga dakean e falaʼab nu fayleng nge pinʼen ni dariy fan nu fayleng; arragon, paganʼug ngay ni damur liyoer gaed ko liyos, machane gimed be liyoer ko fare Got nib riyulʼ mab fos, ma gimed be athapeg ni nge taw ngay ni ngan chuweg machaan e pi denen romed, u dakean ba mich ni dabimus biʼid, ni bay yib.

7 Ya musap gaed, gube yoeg ngomed ni bayoʼor bogi banʼen ni bay yib; ma musap gaed, bay taʼareb niʼir e thʼabi gaʼfan u fithikʼ ni gubin—ya musap gaed, fare ngiyalʼ innʼem e daki palog nga orel ma ketaw ngay ni fare Tabiyul e bay yib nga fithikʼ e gidiiʼ rokʼ.

8 Musap gaed, dagur yoeg ni bay yib nga fithikʼ daed ko re ngiyalʼ i nʼen ni be paer u lan e biney e dowef; ya musap gaed, fare Kan ni Thothup e dar yoeg ngog ni aray rogon ni ra yaeni aw. Chiney e rogon e biney e dagnang fan; machane baʼaray rogon ni gumnang, fare Somoel ni Got e bay gelingin ni nge rinʼ gubin banʼen ni boed ni ke yoeg.

9 Machane musap gaed, fare Kan ni Thothup e baʼaray urngin e tin ni ke yoeg ngog, ni be gaʼar: Mmachib nag ngakʼ e pi gidiiʼ ney, ni gabe gaʼar—Mu kalgaed ngaenʼmed, mi gimed falʼeg rogon kanawoʼen fare Somoel, mi gimed yaen ko pi kanawoʼ rokʼ, nib kʼikʼiy; ya musap gaed, fare gilʼilungun e tharmiy e kari chuchugur ni nge taw, ma fachaʼ ni Fak Got e bay yib nga dakean e fayleng.

10 Ere musap gaed, bay ni gargeleg rokʼ Maria, u Jerusalem ni fare nam rokʼ e tin mʼon e pi chitamangdaed, beeʼ ni ppin nib rugod ni dawori nang e pumoʼon, nib mʼuw nni turguy ni rib felʼ, niʼir e bayi ling nga foen me diyen u gelingin fare Kan ni Thothup, me piiʼ beeʼ nib pagael, arragon, ni fachaʼ ni Fak Got.

11 Ma bay iyaen, ni be gafgow ko pi amith nge kirbaenʼ nge pi lumel ni gubin mit; ma biney e aray rogon ni fan ko fare thin ni gomanga muguʼul ni yoeg nra fek nga dakean e pi amith nge pi mʼar ko gidiiʼ rokʼ.

12 Ma yamʼ e ire rafek nga dakean, ni nge yog ni thang e pi wolan e yamʼ niʼir e be mʼag e gidiiʼ rokʼ; ma rafek nga dakean e pi moʼowaer ko gidiiʼ rokʼ, ni nge yog ni sug lan ngorngoren ko murnguy, u rogon e dagur, ni nge yog ni nang ko dagur u rogon ni nge ayuweg e gidiiʼ rokʼ u rogon e pi moʼowaer roraed.

13 Chiney e fare Kan ni Thothup e manang gubin banʼen; machane fachaʼ ni Fak Got e gafgow nrogon e dowef ni gomanga yog ni fek nga dakean e pi denen ko gidiiʼ rokʼ, ni nge yog ni chuweg e pi ngongol roraed nib kireb u rogon fare gelingin e thap rokʼ; ere chiney e musap gaed, ireray e re mich ni bay rog.

14 Chiney e gube yoeg ngomed ni thingar mu kalgaed ngaenʼmed, min gargelegmed bayay; ya fare Kan ni Thothup e yoeg ni faʼanra dawor ni gargelegem bayay ma dabiyog ni ngam thap ko fare gilʼilungun nu tharmiy; ere mired ngan tawfe nagmed u dakean e kalngaenʼ, ni nge yog ni lukuymed nge chuw e pi denen romed, ni nge yog ni michaenʼmed ko fare Saaf ku Got, niʼir e ra chuweg e pi denen ko gidiiʼ nu fayleng, niʼir e bay gelingin ni nge thapeg me beʼech nigey ko gubin mite ngongol ni dematʼaw.

15 Arragon, gube yoeg ngomed ni ngam baed ma dab mu rus gaed, mi gimed chefeg nga barbaʼ gubin e pi denen, niʼir e rib moem ni be chalongbiymed, niʼir e be mʼagmed nge taymed u butʼ u fithikʼ e gafgow, arragon, mired ngam maroed, mi gimed dag ngakʼ e Got romed nib mʼag u wunʼmed ni ngam kalgaed ngaenʼmed ko pi denen romed mi gimed falʼeg e mʼag u thilmed ni gimed rafol ko pi motochiyel rokʼ, mi gimed micheg ngakʼ e daʼir u dakean e tawfe ko raen ni ngan tay ngomed.

16 Ma enra rinʼ e biney, me fol ko pi motochiyel rokʼ Got ko ngiyalʼ nem iyaen nga mʼon, e ireram e enra yib ngaenʼ ni kugog ngakʼ, arragon, ra yib ngaenʼ ni kugog ngakʼ, ni rayog e yafos ni manechubog ngakʼ, u rogon fare mich ko Kan ni Thothup, niʼir e be micheg ngog.

17 Ere chiney o pi walageg nib tʼuf rog, be mich u wunʼmed e pinnʼey? Musap gaed, gube gaʼar ngomed, arragon, gumnang ni be mich u wunʼmed; ma rogon ni kug nang ni be mich u wunʼmed e kug nang u dakean e thogthog ko fare Kan ni Thothup niʼir e bay rog. Ere chiney ni bachan e mich romed e ba gel ni morngaʼagen e pinnʼey, arragon, ni morngaʼagen fapinʼen ni kug weliy, e kar gu falfalaenʼ riy.

18 Ya boed rogon ni kugog ngomed faram ko sommʼon, niʼug athapeg ni gomanga dawor mu taw gaed ko re dodow ni moʼomawʼ e gubin riy ngomed ni boed pi walagmed, ere aray rogon ni kug pirʼeg ni athap rog e kan muguʼuliy.

19 Ya gumnang ni gimed bay ko pi kanawoʼ nib matʼaw; gumnang ni gimed bay ko re kanawoʼ nib sor ko fare gilʼilungun Got; arragon gumnang ni gimed be kʼikʼiyeg e pi kanawoʼ rokʼ.

20 Gumanang ni kan guy rogon kam nanged, u dakean fare mich ko thin rokʼ, niʼir e dabiyog ni nge yaen nib chichiygog e pi kanawoʼ rokʼ; ara thilyeg e pinʼen ni ke yoeg; ara bay rokʼ ba lem ni nge chel nge chuw ko matʼaw nge yaen ko gilaeyʼ, fa nge chuw ko tin nib felʼ nge yaen ko tin nib kireb; ere, woʼen e ri taʼareb ni manechubog nib langob.

21 Ma dar mapaer u lan e pi temple ni de thothup; ara yog ni thap banʼen ni kireb fa ba alit nga langgin gilʼilungun Got; ere gube yoeg ngomed ni fare ngiyalʼ innʼem e bay yib, arragon, ma ra yaeni aw ko bin tomur e rran, ni chaʼ nib kireb e ra magaey nib kireb.

22 Ere chiney o pi walageg nib tʼuf rog, kug weliy e pinnʼey ngomed ni gomanga yog ni ngug pugmed nge yib uran ngomed e muruwel romed ngakʼ Got, ni gomanga yog ni ngam maroed ni dariy thibngimed u pʼoewchen Got, ni gomanga yog ni ngam leaked fare yaram nib thothup ku Got, u tomuren ni kam thap gaed.

23 Ere chiney e gubaʼadag ni ngam mʼing niged gimed, ngam pired ni kam paged laniyaenʼmed ma kam sumunguy niged gimed; nib moem i fil banʼen ngomed; ma gimed sug ko gumʼaenʼ nge athamgil; mi gimed kolchiyaʼ u fithikʼ urngin banʼen; mi gimed yulʼyulʼ i koel falan e pi motochiyel rokʼ Got ni gubin e ngiyalʼ; ni gimed be ning ngakʼ ni demutrug ko bamang e renʼen ni ke tʼuf romed, ni lʼagruw mit, mitin balʼeg rogon ko yaʼel nge mitin balʼeg rogon ko dagur; ma nge gubin e ngiyalʼ ma ngam oged e magaer ngakʼ Got ko pinʼen ni ke yog ngomed.

24 Mi gimed guy rogon ni nge paer ni bay e mich romed, nge athap, nge adag, ma arame gubin e ngiyalʼ ma bay mu gabliyed e muruwel nib felʼ.

25 Ma nge falʼeg fare Somoel waʼathmed, ma ngam tayed e pi mad romed ni dabi alit, ni nge yog ni nga fini fekmed ngam uned ngakʼ Abraham, nge Isaac, nge Jacob, ko paer nga butʼ nge fapi profet nib thothup ni kaʼaram ko sommʼon ni tabab e fayleng, nib beʼech e mad romed ni boed e mad roraed nib beʼech, u lan fare gilʼilungun nu tharmiy ni dab kur thaey gaed riy.

26 Ere chiney o pi walageg nib tʼuf rog, kug weliy e pi thin ney ngomed u rogon nibe micheg fare Kan ni Thothup ngog; me gag ni poloʼ e kar gu falfalaenʼ, ni bachan e lʼagaenʼ nge fol ni kam tayed ko thin rog.

27 Ere chiney, e gube athapeg ni gomanga yibe gapas rokʼ Got nga dakeanmed, nge pi naʼun nge pi binaw romed, ngo dakean e pi gamanman nge piyu ulung i garbaw romed, nge gubin banʼen ni bay ni fanmed, nge pi ppin romed nge bitir romed, u rogon e mich romed nge pi muruwel romed nib mangil, ko ngiyalʼ innʼey iyaen nga mʼon nge gubinfen. Ma aray rogon ni kug weliy. Amen