1 Sese ndima nditɔ eka mi, ke ntak emi enɔde mi odudu ete ndi mbine mbufo, ke ntak oro ami ndomo ukeme nditiŋ ikɔ nnɔ mbufo ye usem mi; iŋ, ye inua mi, koro edide akpa ini emi ami ntiŋde ikɔ nnɔ mbufo ke mme ikɔ inua mi, koro ekenimde mi ofuri ofuri ke itie ikpe, koro nkenyenede uwak utom ndinam tutu ami nkanke ndi mbine mbufo.

2 Ndien ami mkpakakanke ndi kpa idahaemi kini emi ekpedi idige ete ke eyak itie ikpe enɔ owo efen, ete akara ke itie mi; ndien Jehovah ke akwa mbɔm ama ayak ete ami ndi sobo ye mbufo.

3 Ndien sese, ami medi ye mme akwa idorenyin ye akwa udɔŋ nte ke ami nyokut ke mbufo ema esuhɔre idem mbufo ke iso Abasi, ndien ke mbufo ema eka iso ke ndibeŋe mfɔn esie, man ami nkut nte ke mbufo iduehe ke iso esie, man ami nkut ete ke mbufo iduhe ke idiɔk edu emi nditɔ eka nnyin ekedude ke Zarahemla.

4 Edi yak ekɔm enyene enyiŋ Abasi, ke ntak emi enye ayakde ete ami mfiɔk, ihŋ, ama ɔnɔ mi ata akwa idaresit ke ndifiɔk ete ke mmɔ efiak eda ke usuŋ nnen nnen ido.

5 Ndien ami modori enyin, nte asaŋade ye Spirit Abasi emi odude ke ami, ke ami nyenyene idaresit ŋko mbaŋa mbufo; edi ami nyomke ete idaresit mi ke abaŋa mbufo edi ke ntak uwak ukut ye mfuhɔ emi ami nkenyenede nnɔ nditɔ eka ke Zarahemla, koro sese, idaresit mi ekedi abaŋa mmɔ kini mmɔ ema ekewɔk ebe uwak ukut ye mfuhɔ.

6 Edi sese, ami modori enyin nte ke mbufo iduhe ke itie ɔkpɔsɔŋ unana mbuɔtidem nte nditɔ eka mbufo ekedude; ami modori enyin nte ke mbufo imenekere ke ntaŋidem esit mbufo; iŋ, ami modori enyin nte ke mbufo isinke esit mbufo ke mme inyene ye mme ikpikpu ŋkpɔ ererimbot; iŋ, ami modori enyin nte ke mbufo ikponoke mme ndem, edi ke mbufo ekpono ata ye odu uwem Abasi, ndien ke mbufo emebeŋe idem ebet erifen ke mme idiɔk ŋkpɔ mbufo, ye nsinsi mbuɔtidem, emi anade nte edi.

7 Koro sese, ami ndɔhɔ mbufo ke ediwak ŋkpɔ edu emi edidide; ndien sese, ŋkpɔ kiet odu emi edide akpan ŋkpo akan kpukpru mmɔ—koro sese, ini ibigike emi Andifak edidude uwem inyuŋ idide ke otu ikɔt esie.

8 Sese, ami ndɔhɔke nte ke enye eyedi ke otu nnyin ke ini enye edidude ke ataya eke mkpa esie; koro sese, Spirit idɔhɔke mi ke emi ana nte edi ntre. Idahaemi ke abaŋa ŋkpɔ emi ami mfiɔkke; edi emi ami mɔfiɔk, ke Jehovah Abasi enyene odudu ndinam kpukpru ŋkpɔ emi asaŋade ye ikɔ esie.

9 Edi sese, Spirit ɔdɔhɔ mi emi, ete: Kwɔrɔ nɔ mbon emi, ete—Mbufo ekabare esit, enyuŋ ediɔŋ usuŋ Jehovah, enyuŋ esaŋa ke mme usuŋ esie, emi edide nnen nnen; koro sese, obio ubɔŋ heaven ke ekpere, ndien Eyen Abasi kedi ke iso ererimbot.

10 Ndien sese, enye edimana ito Mary, ke Jerusalem emi edide isɔŋ mme ete ete nnyin, enye edidi eyenɔwɔŋ aŋwan, ŋkpɔ uto ye ŋkpɔ utom emi emekde, emi edifukde onyuŋ oyomo ke odudu Edisana Spirit, onyuŋ aman eyen eren, ihŋ, kpa Eyen Abasi.

11 Ndien enye ayaka, ɔyɔyɔ mme ubiak ye mme ukut ye mme idomo ke utɔ ke utɔ; ndien emi man ikɔ osu emi ɔdɔhɔde ke enye ayada ɔnɔ idem esie mme ubiak ye mme udɔŋɔ ikɔt esie.

12 Ndien enye ayada mkpa ɔnɔ idem esie, man enye atat mme uruk ŋkpa emi ebɔbde ikɔt esie; ndien enye ayada ɔnɔ idem esie mme mmemidem mmɔ, man esit esie ɔyɔhɔ ye mbɔm, ke obukidem, man enye ɔfiɔk ke obukidem nte aŋwamde ikɔt esie nte asaŋade ye mme mmemidem mmɔ.

13 Idahaemi Spirit ɔfiɔk kpukpru ŋkpɔ; edi Eyen Abasi ɔbɔ ndutuhɔ ke obukidem man enye ada mme idiɔk ŋkpɔ ikɔt esie ɔnɔ idem esie, man enye ɔsɔhi mme ndudue mmɔ osio nte asaŋade ye odudu ubɔhɔ esie; ndien idahaemi sese, emi edi ikɔ ntiense emi odude ke ami.

14 Idahaemi ami ndɔhɔ mbufo nte ke ana mbufo ekabare esit, enyuŋ etɔŋɔ ntak emana; koro Spirit ɔdɔhɔ ete ke edieke mbufo mitɔŋɔke ntak imana mbufo ikemeke ndida obio ubɔŋ heaven nyene; ke ntak oro edi enyuŋ eduɔk mmɔŋ man ekabare esit, man eyet mbufo esio ke mme idiɔk ŋkpɔ mbufo, man mbufo enyene mbuɔtidem ke Eyen-erɔŋ Abasi, emi emende mme idiɔk ŋkpɔ ererimbot efep, emi ɔsɔŋde ke erinyaŋa onyuŋ eyetde asana ke kpukpru idiɔk.

15 Iŋ, ami ndɔhɔ mbufo nte edi ekunyuŋ ufehe ndik, enyuŋ ekpɔŋ kpukpru idiɔk ŋkpɔ, emi ɔsɔpde afina mbufo, emi ɔbɔpde mbufo enim ɔnɔ nsobo, iŋ, edi enyuŋ eka, enyuŋ ewut Abasi mbufo ete ke mbufo emenyene udɔŋ ndikabare esit ke mme idiɔk ŋkpɔ mbufo enyuŋ eduk ke ediomi ye enye ndinim mme ibet esie, enyuŋ etie ntiense esie enɔ enye mfin emi ke ndiduk ke mme mmɔŋ uduɔk mmɔŋ.

16 Ndien owo ekededi emi anamde emi, onyuŋ enimde mme ibet Abasi tɔŋɔ ke emi ka iso, ukem oro eyeti ete ke ami ndɔhɔ enye, iŋ, enye eyeti ete ke ami mɔdɔhɔ enye, ke enye eyenyene nsinsi uwem, nte asaŋade ye ikɔ ntiense Edisana Spirit, emi etiede ntiense ke ami.

17 Ndien idahaemi ndima nditɔ eka mi, ndi mbufo emebuɔt idem ke mme ŋkpɔ emi? Esese, ami ndɔhɔ mbufo, iŋ, ami mɔfiɔk nte ke mbufo emebuɔt idem ke mmɔ; ndien usuŋ emi ami ndade mfiɔk ke mbufo emebuɔt idem ke mmɔ edi ke eriyarare Spirit emi odude ke ami. Ndien idahaemi ke ntak emi mbuɔtidem mbufo ɔsɔŋde kabaŋa enye, iŋ, kabaŋa mme ŋkpɔ emi ami ntiŋde, ɔkpɔsɔŋ ke idaresit mi edi.

18 Koro nte ami nketiŋde nnɔ mbufo tɔŋɔ ke eritɔŋɔ, nte ke ami mma nyene akwa udɔŋ nte mbufo ekudu ke idiɔk edu nte nditɔ eka mbufo, kpa ke ntem ke ami nkut ke mme udɔŋ mi osu.

19 Koro ami mokut nte ke mbufo edu ke usuŋ nnen nnen ido; ami mokut nte ke mbufo edu ke usuŋ emi adade aka obio ubɔŋ Abasi; iŋ, ami mokut nte ke mbufo kenam mme usuŋ esie edi nnen nnen.

20 Ami mokut nte ke enam mbufo efiɔk, ke ikɔ ntiense ikɔ esie, ete ke enye ikemeke ndisaŋa ke mme nkwaŋa usuŋ; ŋko enye ikpuhɔkede ke se enye etiŋde; ŋko enye inyeneke mfut ukpuhɔre ke nnasia nka ufien, mme ke eti nka idiɔk; ke ntak oro, usuŋ esie eyire kiet.

21 Ndien enye iduŋke ke mme temple emi misanake; ŋko ibɔhɔ edidehe mme ŋkpɔ ndomo kiet emi misanake isin ke obio ubɔŋ Abasi; ke ntak oro ami ndɔhɔ mbufo kini eyedi, iŋ, ndien edidi ke akpatre usen, ete ke enye emi edide edidehe ɔyɔsuhɔ ke ndek esie.

22 Ndien idahaemi ndima nditɔ eka mi, ami ntiŋ mme ŋkpɔ emi nnɔ mbufo man ami ndemere mbufo mbaŋa utom mbufo ye Abasi, man mbufo esaŋa enana ntɔi ke iso esie, man mbufo esaŋa ke edisana utɔ Abasi, nte asaŋade ye emi emaekebɔ mbufo.

23 Ndien idahaemi ami nyoyom nte yak mbufo esuhɔre idem, enyuŋ esuk ibuot enyuŋ edi mmem-mmem; ewara ndikop mkpe-ubɔk; eyɔhɔ ye ime ye anyan ime; ekama idem ke ufat ke kpukpru ŋkpɔ; esin ifik ke ndinim mme ibet Abasi ke ofuri ini; ebeŋe ŋkpɔ ekededi emi mbufo eyomde, eke spirit ye emi edibede ifep mbiba; enɔ Abasi ekɔm kpukpru ini ebaŋa ŋkpɔ ekededi emi mbufo ebɔde.

24 Ndien ekut ete ke mbufo emenyene mbuɔtidem, idorienyin, ye ima, ndien ke nte mbufo eyeyɔhɔ ye nti utom.

25 Ndien yak Jehovah ɔdiɔŋ mbufo, onyuŋ enim mme ɔfɔŋ mbufo enana ntɔi, man ke akpatre eda mbufo edisuhɔre etie ye Abraham, Isaac, ye Jacob, ye ndisana prophet emi ekedude tɔŋɔ ke eritɔŋɔ ererimbot, enam mme ɔfɔŋ mbufo enana ntɔi kpa nte mme ɔfɔŋ mmɔ enanade ntɔi, ke obio ubɔŋ heaven man ekuwɔrɔ do aba.

26 Ndien idahaemi ndima nditɔ eka mi, ami ntiŋ mme ikɔ emi nnɔ mbufo nte asaŋade ye Spirit emi etiede ntiense ke ami; ndien ukpɔŋ mi adara ata eti eti, ke ntak ata nsin ifik ye mkpaŋ-utɔŋ emi mbufo enɔde ikɔ mi.

27 Ndien idahaemi, yak emem Abasi odu ye mbufo, ye mme ufɔk ye mme isɔŋ mbufo, ye mme ufene ye mme enaŋ mbufo, ye kpukpru se mbufo enyenede, iban mbufo ye nditɔ mbufo, nte asaŋade ye mbuɔtidem ye nti utom mbufo, tɔŋɔ ke ini emi ka iso ye ke nsinsi. Ndien ntem ke ami ntiŋ. Amen.