1 Kedekedeo aramas kan ahpw tohrohrpeseng, kahrehda re kohpeseng oh ekei kohkohla nan ar ahl kan, Nihpai ahpw kelehpwala, ni eh wie keskesihnen nanpwungarail.

2 Kedekedeo Nihpai ahpw kohla nan ahl me kohlahng pein ihmwehu, ni eh medemedewe soahng kan me Kauno ketin kasalehiong ih.

3 Kedekedeo ni eh wie medemedewe—eh pahtou pwehki wiewia suwed en aramas en Nihpai kan, arail doadoahk rotorot rir kan, oh arail kamaramas kan, oh arail kulih kan, oh soahngen wiewia suwed kan koaros—kedekedeo ni eh wie medemedewe nan ah mohngiong, kilang, ngihl ehu ahpw kohdohng ih ketihtihki:

4 Meid pai kowe, Nihpai, pwehki soahng kan me ke wiadahr; pwe I kilangadahr ia uwen ahmw sohte kin pwangahkihda kalohngki mahseno, me I kihonguhkehr, ong aramas pwukat. Oh ke sohte kin masak irail, oh ke sohte rapahki pein ahmw mour, ahpw ke rapahki insenei, oh kapwaiada ei kosonned kan.

5 Oh met, pwehki ahmw wiahier met ni ahmw sohte pwangahki, kilang, I pahn kapaiuhk kohkohlahte; oh I pahn wiahionguhk ke en ahneki manaman laud ni koasoai oh wia me mwahu, nan pwoson oh nan doadoahk kan; iei, soahng koaros pahnwiawihonguhk nin duwen ei mahsen, pwe ke sohte pahn peki mehkot me uhwong insenei.

6 Kilang, kowe me Nihpai, oh Ngehi me Koht. Kilang, I mahsanihonguhk mwohn nei tohnleng kan, me ke pahn ahneki manaman pohn aramas pwukat, oh pahn kalokehki sampah lehk, oh iangahki soumwahu, oh kamwomwala, nin duwen wiewia suwed en aramas pwukat.

7 Kilang, I kihonguhk manaman, me soahng koaros me ke pahn katengehdi pohn sampah pahn katengetengehdi nanleng; oh soahng koaros me ke pahn mweidada pohn sampah pahn mweimweida nanleng; oh pwehki met me ke pahn ahneki manaman rehn aramas pwukat.

8 Oh met, ma ke pahn ndaiong tehnpas sarawi wet en pwalpeseng wiahda riau, e pahn wiawi.

9 Oh ma ke pahn ndaiong nahna wet, Rengkidi oh patapatala, e pahn wiawi.

10 Oh kilang, ma ke pahn nda me Koht pahn ketin kaloke aramas pwukat, e pahn pweida.

11 Oh met kilang, Ipahngokionguhk, me ke pahn kohwei oh kalohngkihong aramas pwukat, me Kauno Koht Wasa Lapalap ketin mahsanih: Ma kumwail sohte pahn koluhla kumwail pahn kalokolok, lao kumwail kamwomwala.

12 Oh kilang, met kedekedeo ahnsou me kauno ketin mahsanihongehr Nihpai mahsen pwukat, e ahpw uhdi oh sohte kohla ni pein ihmwehu, ahpw pwuralahng pokon en aramas me kohpeseng nan sahpwo, oh tepida kalohngkihong irail mahsen en Kauno me e ketin mahsanihongehr, duwen arail pahn kamwomwala ma re sohte pahn koluhla.

13 Met kilang, mehndahte manaman kapwuriamwei me Nihpai wiadahr ni eh ndaiong irail duwen mehlahn sounkopungo, mohngiongarail kan keptakailahte oh sohte men rong mahsen kan en Kauno.

14 Eri Nihpai ahpw kalohngkihong irail mahsen en Kauno, ketihtihki: Kauno ketin mahsanih, ma kumwail sohte pahn koluhla kumwail pahn kalokolok lao kumwail kamwomwala.

15 Kedekedeo ahnsou me Nihpai kalohngkihongirailehr mahseno, kilang, mohngiongarail kan keptakaite oh sohte men rong ah koasoi kan; eri re ahpw lahlahwe ih, oh song en salihedipwe re en kak kesehlong nan imweteng.

16 Ahpw kilang, manaman en Koht ketin ieiang ih, oh re sohte kak salihedi ih oh kesehlong nan imweteng, pwe Ngehno kin ketikihda oh ketikihlahsang nanpwungarail.

17 Kedekedeo Ngehno ahpw kin ketikihwei ih, sang ehu pokon kolahng ehu pokon, kalkalohngki mahsen en Koht, lao e ahpw kalohngkihong irail koaros, de kadarewei rehn aramas koaros.

18 Kedekedeo re ahpw sohte men rong ah koasoi kan; oh mie pingiping me tepida wiawi, kahrehda ar tohrohrpeseng nanpwungarail oh tepida kamaramaski kedlahs nanpwungarail.

19 Oh met kaimwisekalahr pahr isihsek ehu en mwehin sounkopwung kan ong aramas en Nihpai kan.