1 Kedekedeo ahnsou me pahr weneisek riau en mwehin sounkopwung kan nekier, mepwukat koaros wiawiher oh pali laud en Mehn Leimen kan wialahr aramas mwahu kei, kahrehda arail wiewia mwahu kan siksang ahn Mehn Nihpai kan, pwehki arail kehlail oh arail tengediong nan pwosono.

2 Pwe kilang, Mehn Nihpai tohto me keptakailahr oh apwal en koluhla oh suwed mehlel, kahrehda re soikala mahsen en Koht oh pakahk kan oh kokohp kan koaros me kin kohieng irail.

3 Ahpw, aramas en mwomwohdiso ahniki peren laud pwehki wiliakapwalahn Mehn Leimen kan, ei, pwehki mwomwohdisohn Koht, me wiawihdahr rehrail. Oh re kin miniminpene nanpwungarail, oh kin pereperenpene, oh kin ahniki peren laud.

4 Kedekedeo Mehn Leimen tohto kohdihdo nan sahpw en Saraemla, oh kalohngkihong aramas en Nihpai kan ia mwomwen arail wiliakapwala, oh koangoangehkinirail re en ahniki pwoson oh koluhla.

5 Ei, oh tohto me kalohk ni manaman oh mweimwei kowahlap, pwe en karakarahkihla tohto irail, pwe re en kak idawehn Koht oh Sihmpwulo ni karakarahk.

6 Kedekedeo Mehn Leimen tohto ahpw kohla nan sahpw en paliepeng; oh pil Nihpai oh Lihai kohla nan sahpw en paliepeng, pwe re en kalohk ong aramas akan. Oh met kaimwisekalahr pahr weneisek siluh.

7 Oh kilang, mie popohl nan sahpwo pwon, kahrehda Mehn Nihpai kan kohwei nan sahpw sohte lipilipil kan me re men kohla, rehn Mehn Nihpai kan de Mehn Leimen kan.

8 Kedekedeo Mehn Leimen kan pil kohwei wasa sohte lipilipil me re men kohwei, rehn Mehn Leimen kan de rehn Mehn Nihpai kan; oh met re ahnikier saledek en patpene nanpwungarail, ong pwainda de netiki, oh kalaudehla arail dipwisou, nin duwen me re inangih.

9 Kedekedeo re kepwehpwehla kowahlap, Mehn Leimen oh Mehn Nihpai kan; oh re nainki kohl tohto, oh silper, oh soahngen mete kesempwal koaros, pali koaros sahpw en palieir oh sahpw en paliepeng.

10 Met sahpw en palieir kin kahdaniki Lihai, oh sahpw en paliepeng kin kahdaniki Miulek, me iei eden nein Sedekaia pwutak; pwe Kauno ketin wahdo Miulek nan sahpw en paliepeng, oh Lihai nan sahpw en palieir.

11 Oh kilang, mie soahngen kohl koaros nan pali koaros en sahpw pwukat, oh silper, oh soahngen mete kesempwal koaros; oh pil mie aramas semen nan doadoahk, me kin wiahda soahngen mete kan koaros oh kamwahuiala; oh met kahrehda ar kepwehpwehla.

12 Re kin mwetiwelih werentuhke tohto, pali koaros nan paliepeng oh nan palieir; oh re keirda mehlel, ni paliepeng oh palieir. Oh re kaparaparala oh kehlail mehlel nan sahpwo. Oh re apwalihda pelin sihpw oh kou tohto, ei, nahi mworourou tohto.

13 Kilang neirail lih akan kin pwerisek oh wiahda dereht, oh dehkada soahngen likou koaros, likou linen kaselel oh soahngen likou koaros, pwe en kalikauwihkin irail. Oh met pahr keweneisek pahieu imwisekla nan popohl.

14 Oh nan pahr weneisek limauo re ahpw pil ahniki peren oh popohl mehlel, ei, kalkalohk laud oh kokohp tohto duwen dahme pahn kohdo. Oh met kaimwisekalahr pahr weneisek weneuo.

15 Kedekedeo nan pahr keweneisek weneu en mwehin sounkopwung kan, kilang, mie emen me kemehla Sesoram ni sohte sansal ahnsou me e mwomwohd nan sehr en sounkopwungo. Kedekedeo nan pahrohte aramas akan ahpw pilada nah pwutako en wiliandi, e pil kamakamala. Oh met kaimwisekalahr pahr keweneisek weneu.

16 Oh ni tepidahn pahr weneisek isuho aramas akan pwurehng tepida susuwedla mehlel.

17 Pwe kilang, Kauno ketin kapaiahkinirail kepweh kan en sampah ahnsou reirei kahrehda re sohte mwekidkihda lingeringer, mahwin kan, de kamaramas; eri re tepida poakehng arail dipwisou kepwehpweh kan; ei, re tepida rapahki en kepwehpwehla pwe re en aklapalapkipene; eri re tepida kamaramas ni rir, oh pirap oh kulih, pwe re en kak kepwepwehla.

18 Oh met kilang, sounkamaramas oh sounkulih ko re wia pwihn me Kiskumen oh Kadiendon wiahdahr. Oh met kedekedeo pwihn en Kadiendon me tohtohla, mehlel rehn mehn Nihpai kan. Ahpw kilang, re pokon rehn Mehn Leimen kan me suwed mehlel ko. Oh re kin kahdaniki sounpirap oh sounkamaramas en Kadiendon kan.

19 Oh iei irail me kemehla sounkopwung Sesoram, oh nah pwutako, ni ar mihmi nan sehr en sounkopwung; oh kilang, re sohte dierek.

20 Kedekedeo ahnsou me Mehn Leimen kan diarada mie sounpirap rehrail, re pahtoula mehlel; oh re nantihong doadoahngki wiepe koaros me re kak pwe re en kamwomwirailla sang nin sampah.

21 Ahpw kilang, Sehdan kamwakidada nan mohngiong en Mehn Nihpai kan, kahrehda re miniminiong pwihn en pirap ko, oh alehda arail inou kesempwal kan oh kahula kan, me re pahn doarehla emen emen irail nan arail apwal sohte lipilipil kan me re pahn kin lelohng, pwe re sohte pahn kin kalokolongki arail kamaramas kan, oh arail kulih kan, oh arail pirap kan.

22 Kedekedeo mie kilel kan me re kin wehwehkipene, ei, arail kilel rir kan, oh arail koasoai rir kan; oh met pwe re en kak kasawihada riarail ohl men me iangehr wiahda inouo, pwe sohte lipilipil soahngen tiahk suwed me riarail men pahn wiahda e sohte pahn ohkihla rehn rie mehteio, de pil rehn irail kan me iangehr ah pwihno, me wiahdahr inou wet.

23 Oh met pwe re en kak kamaramas, oh kulih, oh pirap, oh wia tiahk en nenek kan oh soahngen tiahk suwed kan koaros, me uhwong kosonned en arail wehi oh pil kosonned kan en arail Koht.

24 Oh mehmen me iang arail pwihn wet ahpw kasalehiong sampah arail wiewia suwed kan oh tiahk suwed kan, pahn kopwungki, kaidehn nin duwen kosonned en arail wehi, ahpw nin duwen kosonned en arail wiewia suwed kan, me Kadiendon oh Kiskumen koasoanehdier.

25 Met kilang, iei ih kahula oh inou rir pwukat me Alma kehkehlingkihong nah pwutako en dehr mweidehng en kohieng sampah, pwe re de elehiong kamwomwalahn aramas pwukat.

26 Met kilang, kahula oh inou rir pwukat sohte kohieng Kadiendon sang nan poadoapoad ko me kohieng Ilemen; ahpw kilang, re kohieng nan mohngiong en Kadiendon sang aramasohte me kasongehdi tepin atail pahpa oh nohno re en tungoale wahntuhke keinepwio—

27 Ei, aramasohte me wiahiong Kein koasoandio, ma e pahn kemehla rie pwutak Eipel sampah sohte pahn ese. Oh e ahpw kihong Kein koasoandi wet oh irail kan me kin idawehn sang ahnsouo kohla.

28 Oh pil iei aramasohte me kihong nan mohngiong en aramas kan ma re pahn kauwada douliko ileile re kak leldahla nanleng. Oh iei aramasohte me elehiong aramas ko me kohsang ni douliko kohdo nan sahpw wet; me kadaurpeseng doadoahk rotorot oh tiahk suwed kan pohn sahpwet pwon, lao e waikidihong aramas ko nan kamwomwala, oh nan ehl poatoapoat.

29 Ei, iei aramasohte me kihongehr nan mohngiong en Kadiendon en peusehla wiewia doadoahk rotoroto, oh pil kamarams rir; oh e kadkadauredo sangete ni tepin aramas e miehda lelledo ahnsou wet.

30 Oh kilang, iei ih me wia sounwiahda dihp koaros. Oh kilang, e kin wiewiahte ah doadoahk rotorot oh kamaramas rir, oh kin kadaurehdo arail koasoandi kan, oh arail kahula kan, oh arail inou kan, oh arail koasoandi en wiewia suwed kan, sang ehu dih lel ehu dih nin duwen me e kak kalowehdi mohngiong en aramas akan.

31 Oh met kilang, e kalowehdier mohngiong en Mehn Nihpai kan; ei, kahrehda re suwedlahr mehlel; ei, pali laud en irail sohpeisangehr ahl en mour pwung kan, oh sohlahr kesempwaliki sapwellimen Koht kosonned akan, oh sohpeiohng pein arail koahiek, oh ahpw wiahiong irail dikadik en arail kohl oh arail silper kan.

32 Kedekedeo wiewia suwed pwukat koaros kohdohng irail nan erein ahnsou mwotomwot, kahrehda pali laud en mepwukat ahpw lelohng irail nan pahr keweneisek isuh en mwehin sounkopwung kan ong aramas en Nihpai kan.

33 Oh re pil laudla nan arail wiewia suwed kan nan pahr keweneisek waluh, me elehiong pahtou laud oh mwahiei rehn me mwahu kan.

34 Oh met kitail kilang me Mehn Nihpai kan arail pwoson tepidahr tikitikila, oh arail wiewia suwed oh tiahk suwed kan lalaudla, aMehn Leimen kan tepidahr kekeirda mehlel nan marain en arail Koht; ei, re tepidahr kapwaiada sapwellime koasoandi kan oh kosonned kan, oh weweidki mehlel oh mour pwung nin duwen sapwellime koasoandi kan.

35 Oh met kitail kilang me Ngehn en Kauno tepida pweieksang Mehn Nihpai kan, pwehki wiewia suwed kan oh keptakailahn mohngiongarail kan.

36 Oh met kitail kilang me Kauno ketin tepidahr ketikihong sapwellime Ngehno rehn Mehn Leimen kan, pwehki arail mpahi oh inangih kamehlele sapwellime mahsen kan.

37 Kedekedeo Mehn Leimen kan ahpw rapahki pwihn en Kadiendon lipirap kan; oh re kalohngkihong irail mahsen en Koht rehn irail me keieu suwed, kahrehda pwihn en pirap wet kamwomwasang mehlel rehn Mehn Leimen kan.

38 Kedekedeo ah Mehn Nihpai kan ahpw kakehlakairailda oh utungirailda, tepida rehn irail me keieu suwedkan, lao re kohpeseng nan sahpw en Mehn Nihpai koaros, oh kasongehdier irail kan me kin mour pwung lao re iang kamehlele arail doadoahk kan oh alehda wahn arail kul kan, oh patehng irail nan arail kamaramas rir oh pwihn suwed kan.

39 Oh met re ahpw alehdier udahn pwukoahn apwalih koapworment, kahrehda irail tiahkidi pahn nehrail kan oh pohr oh kaloke oh sohpeisang aramas me semwehmwe oh mpahi, oh opampap me kin idawehn Koht.

40 Oh met kitail kilang me irail miher nan irair suwed mehlel oh irail kereniongehr kamwomwala soutuk.

41 Kedekedeo met ahpw kaimwisekala pahr weneisek waluh en mwehin sounkopwung kan ong aramas en Nihpai kan.