1 Kedekedeo nan pahrohte, kilang, Nihpai kihong pwukoahn sehr en sounkopwungo rehn ohl emen me adaniki Sesoram.

2 Pwe nin duwen arail kosonned kan oh arail koapworment e kin koasoandi sang ni pilipil en aramas akan, oh irail kan me kin pilada suwed tohtohsang me kin pilada me mwahu, eri kerkereniong re pahn kamwomwala, pwe kosonned kan sapwungalahr.

3 Ei, oh kaidehn ih koaros met; re wialahr aramas keptakai, kahrehda re sohte kak mih pahn manaman en kosonnedo de nan kopwung, ihte ong kamwomwarail.

4 Kedekedeo Nihpai ahpw luwetkihla pwehki arail wiewia suwed kan; oh e mweidala sehr en sounkopwungo, oh alehda pwukoahn kalohngki mahsen en Koht nan erein luhwen ah rahn akan koaros, oh pil iangahki rie pwutako Lihai, nan erein luhwen ah rahn akan koaros;

5 Pwe re tamatamante mahsen kan me ara pahpa Ilemen ndaiong ira. Oh iet mahsen kan me e ndaiong ira:

6 Kilang, nei pwutak kan, I men kumwa en tamataman kapwaiada sapwellimen Koht kosonned akan; oh I men kumwa en kalohngkihong aramas kan mahsen pwukat. Kilang, I kihongedemwa kan eden tepin atail pahpahko me kohsang nan sahpw en Serusalem; oh met I wiahier pwe ni ahnsou me kumwa pahn tamanda edemwa kan a kumwa pahn tamanda irail; oh ni ahnsou me kumwa pahn tamanda irail kumwa pahn tamanda arail doadoahk mwahu kan; oh ni ahnsou me kumwa pahn tamanda arail doadoahk mwahu kan a kumwa pahn ese duwen koasoiperail, oh pil ntingdi, duwen ar mwahu.

7 Eri, nei pwutak ko, I men kumwa en wia dahme mwahu, pwe en pil kak mie koasoipemwa, oh pil ntingdi, duwehte koasoiparail oh me ntingdier duwen irail.

8 Oh met nei pwutak ko, kilang I men kumwa en pil wia mehkot laud, me iei, kumwa en wia mepwukat kaidehn pwe kumwa en kalahki, ahpw kumwa en wia mepwukat pwe kumwa en kepwehpwehkihla pai en nanleng, ei, me poatoapoat, oh sohte kak sohrala; ei, pwe kumwa en kak alehdi kisakis kesempwal en mour soutuk, me kitail kak kamehlele me e kohieng atail pahpa kahlapoko.

9 Oh tamataman, tamataman, nei pwutak ko, mahsen kan me nanmwarki Pensamin mahsanihong sapwellime aramas akan; ei, tamataman me sohte ehu ahl de wiepe me aramas kak komourkihla, ihte sang ni ntahn tomwpen Sises Krais, me pahn ketido; ei, tamataman me e pahn ketido pwe en komourala sampah.

10 Oh pil tamataman mahsen kan en Amulek me e ndaiong Siesrom, nan kahnihmw en Amonaia; pwe e ndaiong ih Kauno udahn pahn ketido komourala sapwellime aramas, ahpw e sohte pahn ketido komourirailla nan diparail kan, ahpw komourirailla sang diparail kan.

11 Oh e ketin sapwellimanki manaman sang rehn Sahmo pwe en komourirailla sang diparail kan pwehki koluhla; eri e kadarewei tohnleng kan pwe re en kalohngki rongamwahu en koasoandi en koluhla, me kin kahrehiongmanaman en Soundoaro, ong komourpen palingenarail kan.

12 Oh met, nei pwutak ko, tamataman, tamataman me pohn paip en atail Soundoaro, me iei Krais, Sapwellimen Kohto, me kumwa pahn kauwada amwa poahsoan powe; pwe ahnsou me tepilo pahn kadaredo ah kisinieng kehlail kan, ei, piripir en ah elipipo, ei, ni ahnsou me ah keteu ais pahn pwupwidiong pohmwa oh kisinieng kehlail pahn ipidohngkumwa, e sohte pahn ahneki manaman en waik kumwadi nan wahu en pahtou oh kahpwal soutuk, pwehki paip me kumwa kokouda powe, me wia poahsoan kehlail, poahsoan ehu ma aramas pahn kokouda powe re sohte pahn kak pwupwidi.

13 Kedekedeo ih mahsen pwukat me Ilemen padahkihong nah pwutak ko: ei, e padahkihong ira soahng tohto me sohte ntingdiehr, oh pil soahng tohto me ntingdiehr.

14 Oh re tamataman ah mahsen kan; oh re ahpw kohwei, kapwkapwaiada sapwellimen Koht kosonned akan, en padahngki mahsen en Koht ong aramas en Nihpai koaros, tepida nan kahnihmw en Rahk;

15 Oh sang mwo kohla nan kahnihmw en Kid; oh sang kahnihmw en Kid kohla nan kahnihmw en Mulek;

16 Oh iei sang nan ehu kahnihmw kohla nan pil ehu, lao re kohwei rehn aramas en Nihpai koaros me mih nan sahpw en palieir; oh sang mwo kohla nan sahpw en Saraemla, rehn Mehn Leimen kan.

17 Kedekedeo re ahpw kalohk sang ni manaman kehlail, kahrehda re katokehdi tohto irail akan me kahngohdi kan me kohkohsang Mehn Nihpai kan, kahrehda arail kohdo oh wehkada diparail kan oh papidaisla sang ni koluhla, oh mwadangete pwurala rehn Mehn Nihpai kan pwe re en song kapwungala sapwung kan me re wiahiong irail.

18 Kedekedeo Nihpai oh Lihai ahpw kalohk ong Mehn Leimen kan sang ni manaman oh mweimwei kehlail, pwe re ahniki manaman oh mweimwei kohieng ira pwe re en kak koasoai, oh soahng kan me re pahn anahne koasoaia pil kin kohieng ira—

19 Eri re koasoaiong Mehn Leimen kan me kahrehda arail pwuriamwei mehlel, oh kamehlele, kahrehda me welikid Mehn Leimen me mihmi nan sahpw en Saraemla oh wasa kapilpene kan ar papidaisla sang ni koluhla, oh kamehlelehda wiewia suwed en tiahk en arail pahpa ko.

20 Kedekedeo Nihpai oh Lihai ahpw uhsehla sang wasao kohla nan sahpw en Nihpai.

21 Kedekedeo re ahpw kolkoldi rehn nein Mehn Leimen sounpei kan oh lekideklong nan imweteng; iei, nan imwetengohte me Amon oh rie ohl akan selidi sang ladu en Limai kan.

22 Oh mwurin ara lekideklong nan imweteng sohte mwengehki erein rahn kei, kilang, re ahpw kohla nan imwetengo pwe re en ale ira oh kemeirahla.

23 Kedekedeo e mwomwen kisiniei ehu ahpw kapilpene Nihpai oh Lihai, kahrehda re sohte men doahke ira pwe re masak re de mwasikala. Ahpw, Nihpai oh Lihai sohte mwasikala; oh re mwomwen keskesihnen nan werengen kisiniei oh sohte mwasikala.

24 Oh ahnsou me re kasawihda me uhr en kisiniei ehu kapilirapene, oh me e sohte kamwasikahla ira, ara mohngiong ahpw kehlailkihda.

25 Pwe re kilang me Mehn Leimen kan sohte men doahke ira; de kohdo karanih ira, ahpw irail kesihnen duwehte re lohtengkihla ar pwuriamwei.

26 Kedekedeo Nihpai oh Lihai ahpw kesihnenda oh tepida koasoaiong irail, ndinda: Kumwail dehr masak, pwe kilang, Koht me ketin kasalehiong kumwail soahng kapwuriamwei wet, ni e kasalehiong kumwailehr me kumwail sohte kak kohkihtdi pwe en kemeikihtla.

27 Oh kilang, ni ahnsou me re ndahier koasoai pwukat, sampah rerrer mehlel, oh dihd en imwetengo rerrada ni mwomwen me e pahn rengkidi nan pwehlo; ahpw kilang, re sohte pwupw. Oh kilang, irail kan me mih nan imwetengo re wia Mehn Leimen oh Mehn Nihpai me pwupwidi kan.

28 Kedekedeo depwek rotorot ehu ahpw pereirailla, oh pepehm en masepwehk mehlel lelohng irail.

29 Kedekedeo mie ngihl ehu ahpw peido mwomwen me sang pohn depweko, ketihtihki: Kumwail koluhla, kumwail koluhla, oh uhdihsang songosong kawehla nei ladu kan me I kin kadarewehng kumwail pwe re en kalohngki rongamwahu.

30 Kedekedeo ni ahnsou me irail rongada ngihl wet, oh wehwehkihda me e sohte wia ngihlen nahnsapwe, de pil ngihlen mwoaroang, ahpw, e wia ngihl meleilei unsek ehu, mwomwen me e mwenginingin, oh e sair nan palingehn ni mehlel—

31 Oh mehndahte ngihl meleilei wet, kilang sampah rerrer mehlel, oh dihd en imwetengo pwurehng rerrada, mwomwen me e pahn pwupwidi nan pwehlo; oh kilang depwek rotoroto, me pereirailla, sohte sohrala—

32 Oh kilang ngihlo pwurehng peido, ketihtihki: Kumwail koluhla, kumwail koluhla, pwe wehin nanleng kerendohr; oh uhdihsang songosong kawehla nei ladu kan. Kedekedeo sampah pwurehng rerrer, oh dihd ko rerrada.

33 Oh pil pak kesiluh ngihlo e pwurehng peido, oh mahsanihong irail mahsen kapwuriamwei kei me aramas sohte kak koasoai; oh dihdo pwurehng rerrada, oh sampah rerrer mwomwen me e pahn pwalpeseng.

34 Kedekedeo Mehn Leimen kan sohte kak tang pwehki depwek rotoroto me kipeiraildi; ei, oh re pil sohte kak mwekid pwehki masepwehk me lelohng irail.

35 Met mie emen rehrail me wia Mehn Nihpai sang ni ah ipwidi, me wia emen tohn mwomwohdisohn Koht mahs ahpw kohkohlasang irail.

36 Kedekedeo e ahpw sohpeila, oh kilang, e ahpw kilangada nan depwek rotorot mesen Nihpai oh Lihai; oh kilang, re udahn marain mehlel, duwehte mesen tohnleng kan. Oh e kilangada me re kilikilengdahla nanleng; oh re mwomwen koasoakoasoai de lokolokaiong aramas men me re kilengdahng ni ngihl laud.

37 Kedekedeo ohl menet ahpw eker pokono, pwe re en sohpeila oh kilang. Oh kilang, mie manaman me kohieng irail pwe re en kak sohpeila oh kilang; oh re ahpw kilangada mesen Nihpai oh Lihai kan.

38 Oh irail ahpw kalelapak rehn ohlo: Kilang, ia wehwehn mepwukat koaros, oh ihs me ohl riemenet wie koasoakoasoaiong?

39 Met eden ohl menet iei Aminadap. Oh Aminadap sapengkinirail: Ira wie koasoakoasoaiong tohngleng kan en Koht.

40 Kedekedeo Mehn Leimen kan ahpw idek reh: Dahme se pahn wia, pwe depwek rotorot wet en kak kohsang poht?

41 Oh Aminadap sapengkinirail: Kumwail anahne koluhla, oh peki rehn ngihlo, lao kumwail pahn pwosonla Krais, me Alma, Amulek, oh Siesrom padahkiong kumwailehr; oh ni ahnsou me kumwail pahn wia met, depwek rotorot wet pahn kohsang pohmwail.

42 Kedekedeo irail koaros ahpw tepida peki rehn ngihl en ih me itikada sampah; ei, irail ahpw pekipeki lao depwek rotoroto kohsang.

43 Kedekedeo ahnsou me re kilangseli, oh kilangada me depwek rotoroto kohsangehr pohrail, kilang, irail kilangada me uhr en kisiniei ehu kapilpenehr emenemen irail koaros.

44 Oh Nihpai oh Lihai mihmi nanpwungarail: ei, re kapilkipene; ei, re mwomwen mihmi nan werengen kisiniei, ahpw e sohte kamedekeirahla, de pil isikada dihd en imwetengo; oh re direkihla peren me apwal en kawehwehda oh diren lingan.

45 Oh kilang, Ngehn Sarawi en Koht ahpw ketidihdo sang nanleng, oh ahpw ketilong nan mohngiongarail kan, oh re direkihla ni mwomwen kisiniei, oh re kak koasoaikihwei mahsen kapwuriamwei kan.

46 Kedekedeo mie ngihl ehu ahpw kohdohng irail, ei, ngihl mwahu ehu, ni eh mwomwen mwenginingin, ndinda:

47 Popohl, popohl ong kumwail, pwehki amwail pwoson nei Pwutak Kempoakeo, me sangete ni kepikipikdahn sampah.

48 Oh met, ahnsou me re rongada re ahpw kilengdahla pwe re en kilang wasa me ngihlo peidohsang ia; oh kilang, re ahpw kilangada nanleng ritpeseng; oh tohnleng kan kohkohdihdo sang nanleng oh kalohkiong irail.

49 Oh irail aramas me silipwiki me kilangada oh rongehr mepwukat; oh re kaweidki re en kohwei oh dehr pwuriamweiki, de pil peikasalki.

50 Kedekedeo re ahpw kohwei, oh kalohk ong aramas akan, padapadahngki wasa koaros duwen soahng kan koaros me irail rongehr ohkilangadahr, kahrehda pali laud en Mehn Leimen kan kamehlelehda irail, pwehki kadehde kesempwal kan me re alehdi.

51 Oh koaros me kamehlelehda irail ahpw pwilikihdi neirail dipwisou en mahwin kan, oh pil arail kailok oh tiahk en arail pahpah ko.

52 Kedekedeo re ahpw mweidalang Mehn Nihpai kan sapwerail kan me re kihsang.