1 Oh met kedekedeo nan pahr isihsek riau en mwehin sounkopwung kan pingiping kan wie kekeirda, kahrehda mie mahwin kei me wiwiawi nan sahpwo pwon rehn aramas en Nihpai kan.

2 Oh iei pwehki pwihn en pirap rir ko me peusehla wiewia doadoahk en kamwomwala oh wiewia suwed wet. Oh mahwin wet wiawi erein pahro; oh pil wiawihte nan pahr isihsek siluho.

3 Kedekedeo nan pahr wet Nihpai ahpw kapakapkiong Kauno, ndinda:

4 Maing Kaun, komw dehr mweidehng aramas pwukat en kamwomwkihla kedlahs; ahpw Maing Kaun komw mweidehng en mie lehk nan sahpwe, pwe en kamwakidiarailda en tamanda Kauno arail Koht, oh mwein re pahn kak koluhla oh sohpeilahng komwi.

5 Oh e ahpw pweida, nin duwen ahn Nihpai koasoi kan. Oh mie lehk lapalap ehu me wiawi nan sahpwo, rehn aramas en Nihpai kan koaros. Oh met nan pahr isihsek pahieu lehko pil wiwiawihte, oh doadoahk en kamwomwkihla kedlahs uhdi ahpw kahpwal en lehko laudla.

6 Oh doadoahk wet en kamwomwala pil doulahte nan pahr keisihsek limauo. Pwe sahpwo keriahla me kahrehda e ngalangal, oh sohte kaosehda werentuhke nan ahnsou en werentuhke; oh sahpwo pwon lokolok, rehn Mehn Leimen kan oh pil rehn Mehn Nihpai kan, eri irail kalokolok me kahrehda kid en irail me suwed kan nan sahpwo mehla.

7 Kedekedeo aramas kan ahpw kilangada me re kereniongehr mehkihla lehko, oh re ahpw tepida tamanda Kauno arail Koht; oh re ahpw tepida tamanda mahsen kan en Nihpai.

8 Oh aramas akan tepida peki rehn arail sounkopwung kan oh arail kaun kan, me re en ndaiong Nihpai: Kilang, se wehwehki me ke wia ohl en Koht men, eri peki rehn Kauno atail Koht en ketkihsang kitail lehk wet, pwe mahsen kan koaros me komw mahsanih nin duwen atail pahn kamwomwala de pweida.

9 Kedekedeo sounkopwung kan ahpw ndaiong Nihpai, nin duwen mahsen kan me re inangih. Kedekedeo ahnsou me Nihpai kilang me aramas akan koluhlahr oh pwurehng likoun nsensuwed oh karakarahkalahr, e ahpw pwurehng kapakapkiong Kauno, ndinda:

10 Maing Kaun, kilang aramas pwukat kolulahr; oh re koahkoahsangehr pwihn en Kadiendon rehrail me kahrehda re sohralahr, oh re sarepidier arail koasoandi rir kan nan pwehl.

11 Met, Maing Kaun, pwehki arail karakarahkala komw kak ketikihwei sapwellimahr engieng, oh komw ketin mweidehng sapwellimahr engieng en meleileidi nan kamwomwalahn ohl suwed ko me komw ketin kamwomwalahr.

12 Maing Kaun, komw kak ketikihwei sapwellimahr engieng, ei, sapwellimahr engieng mwuledek, oh kauhdi lehk wet nan sahpwet.

13 Maing Kaun, komw kak ketin karonge ie, oh ketin wiahda me e pahn pweida nin duwen ei koasoi kan, oh ketikihdo keteu pohn pwel en sampah, pwe en kak kaosehda wah kan, oh ah werentuhke kan nan ahnsou en werentuhke.

14 Maing Kaun, komw ketin karongehier ei koasoi kan ahnsou me I nda, Mweidehng lehk en wiawi, pwe kamakamkihla kedlahs en kak uhdi; oh I ese me komw pahn pil karonge ei koasoi kan nan ahnsou wet, pwe komw ketin mahsanih: Ma aramas pwukat koluhla I pahn doareirailla.

15 Ei, Maing Kaun, oh komw kak mahsani me re kolulahr, pwehki lehk oh soumwahu oh kamwomwala me wiawihongirailehr.

16 Oh met, Maing Kaun, komw kak ketikihwei sapwellimahr engieng, oh pwurehng song ma re pahn papah komwi? Oh ma iei, Maing Kaun, komw ketin kapai irail nin duwen sapwellimahr mahsen kan me komw ketin mahsaniher.

17 Kedekedeo nan pahr isihsek weneuo Kauno ahpw ketikihsang sapwellime engieng rehn aramas akan, oh ahpw ketikihdo keteu pohn sahpwo, kahrehda e kaosehda wah nan ahnsou en rahk. Kedekedeo e ahpw kaosehda werentuhke kan nan ahnsou me werentuhke kin osada.

18 Oh kilang, aramas kan ahpw perenda oh kepinga Koht, oh sahpwo pwon direkihla pereperen; oh re uhdihsang songesong en kawehla Nihpai, ahpw re kin wiahki ih soukohp lap men, oh ohl en Koht men, me ahneki manaman oh mweimwei kohieng ih sang Koht.

19 Oh kilang, Lihai, rie pwutako, sohte mih pahnangi nin duwen soahng kan me pid mour pwung.

20 Oh met kedekedeo aramas en Nihpai kan pwurehng tepida pweida nan sahpwo, oh tepida onehda arail wasahn kousoan me tehnlahr kan, oh tepida kaparaparala oh kohpeseng, lao re kadirehla nan sahpwo, koaros sahpw en paliepeng oh palieir, sang ni sehd en palikapi kohla lel sehd en palimese.

21 Kedekedeo me pahr isihsek weneu ahpw imwisekla nan popohl. Oh pahr isihsek isuh tepida nan popohl; oh mwomwohdiso ahpw kohpeseng pohn sahpwo pwon; oh pali laud en aramas akan, koaros Mehn Nihpai oh Mehn Leimen kan, wia tohn mwomwohdiso; oh re ahneki popohl laud nan sahpwo; oh met kaimwisekalahr pahr isihsek isuh.

22 Oh re pil ahneki popohl nan pahr isihsek waluh, ihte mie ekei me akamaiki duwen iren padahk kan me soukohp akan koasoanehdier.

23 Oh nan pahr isihsek duwauo mie akupwung laud me tepida wiawi. Ahpw kedekedeo Nihpai oh Lihai, oh riarail ohl tohto me ese duwen mehlel en iren padahk kan, pwehki ar kin alehdi kaudiahl tohto kan rahn koaros, kahrehda re kalohk ong aramas akan, lao re katokehdi arail akupwung kan nan pahrohte.

24 Kedekedeo nan pahr welihsek en mwehin sounkopwung kan ong aramas en Nihpai kan, mie ekei me pwupwidi sang rehn aramas en Nihpai kan, me nan pahr kei mwowe irail kohla rehn Mehn Leimen kan, oh alehda ahd en Mehn Leimen kan, oh pil ekei me udahn wia kadaudok en Mehn Leimen kan, pwehki irail Mehn Nihpai kan oh me kahngohdi kan me kin kahrehda ar lingeringer, eri irail tepida mahwin ong riarail kan.

25 Oh re ahpw kin kamaramas oh kulih; oh re ahpw kin tang pwuralahng ni nahna kan, oh nan sapwtehn oh wasa rir kan, rukuruk nan wasa kan me re sohte kak dierek, oh pwehki me kahngohdi kan me kohla rehrail, kahrehda re kin alialehdi iengarail rahn koaros.

26 Oh met mwurin ahnsou mwotomwot, ei, e sohte lel sounpar kei oh re wiahla pwihn en pirap kehlail mehlel; oh irail rapahki ahn Kadiendon koasoandi rir kan koaros; oh met re ahpw wiahla pwihn lipirap en Kadiendon.

27 Met kilang, pwihn lipirap wet wiahda kahpwal lap, iei, kamwomwala lap rehn aramas en Nihpai kan, oh pil rehn aramas en Leimen kan.

28 Kedekedeo e konehng me re pahn kauhdi doadoahk wet en kamwomwala; eri re kadarala sounpei en ohl kehlail kei nan sapwtehno oh pohn nahna kan pwe re en rapahki pwihn en pirap wet, oh kemeirailla.

29 Ahpw kilang, kedekedeo nan pahrohte re pwepwekihdo nan pein sapwarail kan. Oh met kaimwisekalahr pahr welihsek en mwehin sounkopwung kan ong aramas en Nihpai kan.

30 Kedekedeo nan tepidahn pahr welihsek ehuo re pwurehng kohlahng pwihn en pirap ko, oh re kemehla tohto; oh kamwomwala lap kohieng irail.

31 Oh re pwurehng idihdiong en pwuralahsang nan sapwtehno oh sang pohn nahna kan kohla nan pein sapwarail kan, pwehki uwen tohto mehlel en pwihn lipirap ko me koukousoan pohn nahna kan oh nan sapwtehno.

32 Kedekedeo met kaimwisekalahr pahret. Oh pwihn lipirap ko wie tohtohlahte oh kehlaila, kahrehda re sohte lohdi pahn nein Mehn Nihpai sounpei kan pwon, oh pil nein Mehn Leimen sounpei kan; oh re pil kahrehda aramas akan ar masepwehkada nan sahpwo pwon.

33 Ei, pwe re kohla wasa tohto nan sahpwo, oh wiahda kamwomwala lap ong irail; ei, irail kemehla tohto, oh wahsang ekei kohla nan sapwtehno, ei, mehlel arail pwoud kan oh seri kan.

34 Met suwed lap wet, me kohdohng aramas akan pwehki arail wiewia suwed, ahpw pwurehng kamwakidirailda en tamanda Kauno arail Koht.

35 Oh met kaimwisekalahr pahr welihsek ehu en mwehin sounkopwung kan.

36 Oh nan pahr welihsek riauo re pwurehng tepida manokehla Kauno arail Koht. Oh nan pahr welihsek siluho re pwurehng kehlaila nan arail wiewia suwed. Oh nan pahr welihsek pahieuo re sohte kamwahuila arail wiewia kan.

37 Kedekedeo nan pahr welihsek limauo re kehkehlailla nan arail pohnmwahso, oh nan arail mour suwed kan; oh met pwurehng kerkereniong re pahn kamwomwala.

38 Oh met kaimwisekalahr pahr welihsek limauo.