1 Oh met, kedekedeo mie tohto me rong mahsen kan en Samuel, Mehn Leimen, me e kalohngki pohn kehl en kahnihmwo. Oh koaros me kamehlele ah mahsen kan kohla oh rapahki Nihpai; oh ahnsou me re kohla oh diarada ih, irail ahpw wehkadahng ih diparail kan oh sohte kahmahmki, oh inangih me re papidaisla ong Kauno.

2 Ahpw koaros me sohte kamehlele mahsen kan en Samuel lingeringerda pah; oh kostakai ih pohn kehlo, oh tohto me pil kasikihki arep kan ni e keskesihnen pohn kehlo; ahpw Ngehn en Kauno ketiket reh, kahrehda re sohte kak lel katehkihdi neirail takai kan de pil neirail arep kan.

3 Met ni ahnsou me re kilang me re sohte kak katehdi, mie tohto me kamehlelehda ah mahsen kan, kahrehda re kohkohla rehn Nihpai pwe re en papidaisla.

4 Pwe kilang, Nihpai wiewia papidais, oh wiewia kokohp, oh wie padapadahk, oh kalkalongkihong aramas akan koluhla, kasakasalehiong irail kilel oh soahng kapwuriamwei kan, wiewia doadoahk kapwuriamwei kan rehn aramas kan, pwe re en kak ese me ketidohn Krais kereniongehr—

5 Ndindaiong irail soahng kan me kereniongehr pahn kohda pwe re en kak ese oh tamataman nan ahnsouo me soahng pwukat pahn kohdo mepwukat kasansalohng irailehr mwowe, pwe re en kak kamehlele; eri koaros me kamehlele mahsen kan en Samuel ahpw kohla reh pwe re en papidaisla, pwe irail kohla oh kolkoluhkihla oh wewehkada diparail kan.

6 Ahpw pali laud en irail sohte kamehlele mahsen kan en Samuel; eri ahnsou me re kilangada me re sohte kak katehkihdi neirail takai kan oh neirail arep kan, re werikilahng neirail kaun en sounpei kan, ndinda: Koledi aramas menet oh salihdi, pwe kilang mie tepil me mih reh; oh pwehki manaman en tepil me mih reh kitail sohte kak katehkihdi neitail takai kan oh arep kan; eri koledi oh salihdi, oh wahlahsang ih me.

7 Oh ni arail kokolahng pwe en koledi ih, kilang, e ahpw lusdihsang pohn kehlo, oh tangasang nan sahpwo, iei, pwuralahng pein ah wehi, oh tepida kalohk oh kokohp rehn pein nah aramas akan.

8 Oh kilang, sohte mie ronge rehn Mehn Nihpai kan; oh met iei irair kan en aramas kan.

9 Oh met kaimwisekalahr pahr kawelihsek weneu en mwehin sounkopwung kan ong aramas en Nihpai.

10 Oh met kaimwisekalahr pahr kawelihsek isuh en mwehin sounkopwung kan, pali laud en aramas akan mihmihte nan arail pohnmwahso oh mour suwed, oh malaulau irail me kin kanakanaiehng kohwei mwohn Koht.

11 Oh mepwukat iei pil irair kan, nan pahr kawelihsek waluh en mwehin sounkopwung kan.

12 Oh mie kisin wekidekla tikitik nan irair kan rehn aramas kan, ahpw ihte aramas tepida keptakaila nan wiewia suwed, oh kalakalaudehla nan wiewia soahng kan me kin uhwong sapwellimen Koht kosonned akan, nan pahr kawelihsek duwau en mwehin sounkopwung kan.

13 Ahpw kedekedeo nan pahr keduweisek en mwehin sounkopwung kan, mie kilel kapwuriamwei kan kasansalehng aramas kan, oh soahng kapwuriamwei kan; oh mahsen en soukohp kan tepida pweida.

14 Oh tohnleng kan pwarehng aramas kan, ohl loalokong kan, oh pakairkihong irail rongamwahu en popohl mehlel; eri nan pahrwet pwuhk sarawi kan tepida pweida.

15 Ahpw, mohngiong en aramas akan tepida keptakaila, koaros ihte pwihn me keieu kamehlele, sang Mehn Nihpai kan oh pil Mehn Leimen kan, oh re tepida likih pein arail kehlail oh pein arail erpit, ndinda:

16 Ekei mehkot re mwein kasariki pwung, nanpwungen me tohto; ahpw kilang, se wehwehki me doadoahk kesempwal oh kapwuriamwei pwukat koaros sohte kak pweida, me kokohpdahr.

17 Oh re tepida wie lamalamki oh akamaipene nanpwungarail, ndinda:

18 Me e kasapwurupwur me Krais menet pahn ketido; ma iei, oh ma e wia Sapwellimen Kohto, Sahm en nanleng oh sampah, nin duwen me kokohpda, dahme kahrehda e sohte pahn pwarehng kitail duwehte irail me mih nan Serusalem?

19 Ei, dahme e sohte pahn pwaredo nan sahpw wet duwehte nan sahpw en Serusalem?

20 Ahpw kilang, kitail wehwehki me met iei tiahk likamw, me wie kadakadaukohdo lel rehtail sang atail pahpa ko, pwe en kahrehiong kitail en kamehlele soahng kesempwal oh kapwuriamwei me pahn kohdo, ahpw kaidehn rehtail, ahpw nan sahpw me doh, nan sahpw ehu me kitail sohte wehwehki; pwe re en kolokol kitail nan rotorot, pwe kitail sohte kak kadehdehki pein mesatail kan me re mehlel.

21 Oh re pahn, wia doadoahk rirsang ni widing oh doadoak rir en me suwedo me kitail sohte kak wehwehki, me pahn kihong kitail en wia lidu en arail koasoi kan, oh pil wia lidu ong irail, pwe kitail kin koapwoaroapwoarki me re pahn padahkihong kitail mahseno; oh met re pahn kolokol kitail nan rotorot ma kitail pahn mweidkitailla rehrail, erein atail mour.

22 Oh soahng tohto me aramas akan medewe nan mohngiongarail kan, me wia mehkot mwahl oh likamw; oh re ahneki kapwunod laud, pwe Sehdan kamwakidirailda re en wiewia suwed ahnsou koaros; ei, e kohseli oh kamwakamwoaronge oh kapkapingada wasa koaros nan sahpwo, pwe mohngiong en aramas en kak keptakaila ong me mwahu oh ong me pahn kohdo.

23 Oh mehndahte kilel kan oh soahng kapwuriamwei kan me wiawihongehr aramas en Kauno, oh doadoahk kapwuriamwei tohto me re wiahda, Sehdan koledier mohngiong en aramas akan pohn sahpwo pwon.

24 Oh met kaimwisekalahr pahr keduweisek en mwehin sounkopwung kan ong aramas en Nihpai.

25 Oh met kaimwisekalahr pwuhk en Ilemen, nin duwen poadoapoad en Ilemen oh nah pwutak kan.