1 Oh met kitail kak kilang ia uwen likamw, oh pil wikiwikidek en mohngiong en aramas akan; ei, kitail kak kilang me Kauno nan sapwellime kupwuramwahu poatoapoat e kin ketin kapaiada oh kekeirda irail akan me kin koapwoaroapwoarki ih.

2 Ei, oh kitail kak kilang ahnsou wet ni eh ketin kapai sapwellime aramas, ei, re keirda nan arail mwetuel kan, neirail pelen mahn tikitik oh laud kan, oh nan kohl, oh nan silper, oh nan soahngen dipwisou kesempwal koaros; doarehla arail mour kan, oh ketin doareirailla sang pahn manaman en ar imwintihti kan; kameleileidi mohngiong en arail imwintihti kan pwe re dehr mahwiniong irail; ei, oh ni mehlel, wiewia soahng koaros ong kamwahupen mour oh peren en sapwellime aramas; ei, ih ahnsouo me mohngiongarail kan kin keptakaila, oh re kin manokehla Kauno arail Koht, oh kin tiakidi pahn patehn nehrail kan me Keieu Sarawio—ei, oh met pwehki arail nsenamwahu, oh arail kepwehpwehla mehlel.

3 Oh met kitail kak kilang ma Kauno sohte pahn kalokehki sapwellime aramas kahpwal tohto, ei, ma e sohte pahn ketin pwarengkinirail mehla oh soahng kamasepwehk kan, oh iangahki lehk oh soahngen soumwahu kan koaros, re sohte pahn tamataman ih.

4 Oh ia uwen aramas akan ar pweipwei, oh ia uwen ar likamw, oh ia uwen ar suwed, oh ia uwen ar kin mwadangete wiewia suwed, oh ia uwen ar kin pwand en wiewia me mwahu; ei, ia uwen ar kin mwadangete rong koasoai kan en me suwedo, oh kin koasoanehdi mohngiongarail kan pohn soahng mwahl kan en sampah!

5 Ei, ia uwen mwadangete ar kin aklapalapla; ei, ia uwen ar kin madangete pohnmwahsola, oh kin wia soangsoahngen dihp kan koaros; oh ia uwen pwand en arail tamataman Kauno arail Koht, oh kin rong sapwellime kaweid kan, ei, ia uwen pwand en arail kin keid nan ahl en erpit!

6 Kilang, re sohte kin inangih Kauno arail Koht, me kapikirailda, en kaunirailda oh apwalih irail; mehndahte sapwellime kupwuramwahu oh sapwellime kupwurkalahngan ong irail, re sohte kin kesempwaliki sapwellime kaweid kan, oh re kin sohte men en wia arail sounkaweid.

7 Oh ia uwen ahn aramas akan ar sohte; ei, re pahnangin pwehl en sampah.

8 Pwe kilang, pwehl en sampah kin mwekid oh pwalpeseng, sang ni pahngok en atail Koht soutuk wasalapalap.

9 Ei, kilang kepitie kin kamwakidada oh itikada dohl kan oh nahna kan.

10 Oh sang ni manaman en kepitie re kin pwalpeseng, oh patapatala, iei, duwehte nan wahu.

11 Ei, sang ni manaman en kepitie sampah pwon kin rerrer;

12 Ei, sang ni manaman en kepitie, poahsoan kan en sampah kin mwekid, lel nan werenge.

13 Ei, oh ma e kin mahsanihong sampah—Mwekid—e pahn mwekid.

14 Ei, ma e pahn mahsanihong sampah—Ke pahn pwurala mwuri, pwe en kareireila awahn rahno—e pahn wiawi;

15 Oh met, nin duwen sapwellime mahsen sampah kin pwurala, oh e mwomwen sansalohng aramas me ketipin uhdi; ei, oh kilang, met mehlel; pwe kilang sampah me kin mwekid oh kaidehn ketipino.

16 Oh pil kilang, ma e pahn mahsanihong pihl en nan madau kan—Ngalangalada—e pahn wiawi.

17 Kilang, ma e pahn mahsanihong nahna wet—Patohda, oh kohla oh pwupwidi pohn kahnihmwo, pwe en sarepidi—e pahn wiawi.

18 Oh kilang, ma aramas men pahn nekidala e pai kan nan sampah, oh Kauno pahn mahsanih—Mweidehng en riahla, pwehki dipen me nekidalao—kilang, e pahn riahla.

19 Oh ma Kauno pahn mahsanih—Ke en riahla, pwe sohte aramas men pahn kak diaruhk sang ahnsou wet kohkohla—kilang, sohte aramas pahn diar sang ahnsouo kohkohla.

20 Oh kilang, ma Kauno pahn mahsanihong aramas men—Pwehki dipomw kan, ke pahn riahla kohkohlahte—e pahn wiawi.

21 Oh ma Kauno pahn mahsanih—Pwehki dipomw kan ke pahn lekidek sang mwohn sihlangi—e pahn ketin wiahda pwe en wiawi.

22 Oh meid suwediong aramaso me e pahn ketin mahsanihong koasoi wet, pwe e pahn wiawihong ih me pahn wia dihpo, oh e sohte pahn kak komourla; eri, pwehki kahrepe wet, me kalohk en koluhla wiawiher, pwe aramas en kak komourla.

23 Eri, meid pai irail me pahn koluhla oh rong kepitien Kauno arail Koht; pwe iei irail me pahn komourla.

24 Oh Koht en ketin mweidehng, nin duwen sapwellime lapalap unsek, pwe aramas akan en kak koluhla oh wia doadoahk mwahu kan, pwe re en kak kapwuropwuriong kalahngan ong kalahngan, nin duwen arail doadoahk kan.

25 Oh I men aramas koaros en komourla. Ahpw kitail wadekehr me nan imwilahn rahn lapo mie ekei me pahn lekidekla, ei, me pahn lekideksang mwohn silangin Kauno;

26 Ei, me pahn koasoandieng en mih nan irair en pahtou kohkohlahte, me pahn kapwaiada mahseno me mahsanih: Irail me wiahda mwahu pahn alehdi mour poatoapoat; oh irail me wiahda suwed pahn alehdi lokolok poatoapoat. Oh iei met duwen me pahn wiawi. Ahmen.