1 Kedekedeo nan pahr kelimeisek pahieu mie kahngohdi tohto nan mwomwohdiso, oh pil mie pingiping nan pwungen aramas kan, kahrehda aramas tohto kamakamala.

2 Oh pwihn en aramas me kapingada wasa ko ahpw kamakamala oh pwepwekihsang nan sahpwo, oh re kohla rehn nanmwarki en Mehn Leimen kan.

3 Kedekedeo re ahpw nantihong kamwekidada Mehn Leimen kan pwe re en kohdo mahwiniong Mehn Nihpai kan; ahpw kilang, Mehn Leimen kan masak mehlel, kahrehda re sohte men rong ngilen aramas kahngohdi kan.

4 Ahpw kedekedeo nan pahr limeisek keweneu en mwehin sounkopwung kan, mie ekei me pwupwidi kan me kohsang Mehn Nihpai kan kohla rehn Mehn Leimen kan; oh re pweida ni ar iang irail kan me songosong kamwekid re en lingeringerdohng Mehn Nihpai kan; oh nan pahro irail koaros kaukaunop ong mahwin.

5 Oh nan pahr kelimeisek isuh re ahpw kohdihdohng mahwiniong Mehn Nihpai kan, oh re ahpw tapiada doadoahk en mehla; ei, kahrehda nan pahr limeisek waluh en mwehin sounkopwung kan re pweida ni ar kalowehdi sahpw en Saraemla; ei, oh pil sahpw kan koaros, iei lao lel sahpw me karanih sahpw en Rahk.

6 Oh Mehn Nihpai kan oh nein Moronaia sounpei kan kapweiekla lel nan sahpw en Rahk;

7 Oh wasao re ahpw kakehlakahla sileparail kan ong Mehn Leimen kan, sang ni sehd en palikapi, iei kohkohla palimese; Mehn Nihpai kan kin aluhki rahn ehu, nan ahl me wia irepen wasa me re kakehlakahla oh kihong neirail sounpei kan re en kin sinsile arail wehi en paliepeng.

8 Oh met Mehn Nihpai me pwupwidi kan, iangahki sawas en nein Mehn Leimen sounpei ngeder kan, kalowehdier Mehn Nihpai kan koaros me mih nan sahpw en palikapi. Oh soahng pwukat koaros wiawiehr nan pahr limeisek waluh oh duwauo en mwehin sounkopwung kan.

9 Kedekedeo nan pahr weneisek en mwehin sounkopwung kan, Moronaia iangahki nah sounpei kan pweida ni ar kalowehdi tohto sapwarail kan; ei, pwurehng kalowehdi kahnihmw kan me lohdi nan pehn Mehn Leimen kan.

10 Kedekedeo nan pahr weneisek ehu en mwehin sounkopwung kan re pweida nan ar pwurehng kalowehdi elep en sapwarail kan koaros.

11 Met ahn Mehn Nihpai kahpwal lap wet, oh kamakamala lap me wiawihong irail, sohte pahn kak wiawi ma sohte arail wiewia suwed kan oh arail tiahk suwed kan me kin wiawi nanpwungarail; ei, oh e kin sang irail me kin keinahki me re wia tohn mwomwohdiso en Koht.

12 Oh met pwehki pohnmwahsohn nan mohngiongarail kan, pwehki ar kepwehpwehla mehlel, ei, pwehki arail kin kaloke me semwemwe kan, ni ar sohte kin kamwenge me mehn mwenge kan, sohte kin kalikawihda me kilisou kan, oh popohr pohn mesen irail akan me opampap, pwehki ar kin mwamwaliki soahng kan me sarawi, lahlahwe ngehn en kokohp oh kaudiahl, kamkamaramas, kulkulih, likilikamw, piripirap, kamkamwahl, kalaudehla pingiping kan, oh tangatangala nan sahpw en Nihpai, rehn Mehn Leimen kan—

13 Oh pwehki arail wiewia suwed lap wet, oh arail kin aklapalapki pein arail kehlail, re kin kelehpwla nan pein arail kehl; eri re kin sohla pweida, ahpw kin kalokolok oh kamakam, pwepweki mwohn Mehn Leimen kan, lao sapwarail kan koaros kin kereniong kohsang.

14 Ahpw kilang, Moronaia kalohngki soahng tohto ong aramas kan pwehki arail wiewia suwed kan, oh Nihpai oh Lihai, me wia nein Ilemen pwutak kan, pil kalohngki soahng tohto ong aramas kan, ei, oh re kohpada soahng tohto ong irail duwen diparail kan, oh dahme pahn kohieng irail ma re sohte pahn koluhkihla diparail kan.

15 Kedekedeo re ahpw koluhla, oh ni ar kin koluhla re ahpw kin pwurehng tepida kekeirda.

16 Pwe ahnsou me Moronaia kilangada me re koluhlahr e ahpw song kahluwa irail sang ehu wasa lel ehu wasa, oh sang ehu kahnihmw kohla nan ehu kahnihmw, lao irail pwurehng kalowehdi elep en arail dipwisou kan oh elep en sapwarail kan koaros.

17 Oh met kaimwisekalahr pahr weneisek ehu en mwehin sounkopwung kan.

18 Kedekedeo nan pahr weneisek riau en mwehin sounkopwung kan, Moronaia sohla kak kalowehdi luhwen sapwarail kan sang Mehn Leimen kan.

19 Eri re pweieksang arail koasoandi en kalowehdi luhwen sapwarail kan, pwe Mehn Leimen kan me pokon mehlel kahrehda e apwal Mehn Nihpai kan re en kalowehiraildi; eri Moronaia ahpw kadoadoangki nah sounpei kan koaros re en kolokolete wasa kan me eh kalowehdier.

20 Kedekedeo, pwehki Mehn Leimen kan ar tohto mehlel, Mehn Nihpai kan masak mehlel, pwe re de lohdi pahn arail manaman, oh tiakiraildi, oh kemeirailla, oh kamwomwirailla.

21 Ei, re tepida tamanda ahn Alma kokohp kan, oh pil mahsen kan en Mosaia; oh re kasawihadahr me re wia aramas keptakai kei, oh me re sohla kesempwaliki sapwellimen Koht kosonned akan;

22 Oh me re wikidalahr oh mwamwalikilahr kosonned kan en Mosaia, de soahng kan me Kauno mahsanihong ih en kihong rehn aramas akan; oh re kasawihadahr me arail kosonned kan sapwungalahr, oh me re wialahr aramas suwed kei, kahrehda re suwedlahr duwehte Mehn Leimen kan.

23 Oh pwehki diparail kan mwomwohdiso tepida pweiek; oh re tepida sohla kamehlele ngehn en kokop oh ngehn en kaudiahl; oh sapwellimen Koht kadeik kan kangkakil meserail kan.

24 Oh re kasawihadahr me re luwetalahr, duwehte riarail Mehn Leimen kan, oh me Ngehn en Kauno solahr doare irail; ei, e pweieksang irailehr pwehki Ngehn en Kauno sohte kin ketiket nan tehnpas samin kan—

25 Eri Kauno ketin uhdihsang doarehkinirail sapwellime manaman kapwuriamwei me sohte pelie, pwe re pwupwidier nan irair en soupwoson oh kahpwal en arail suwed; oh re kasawihadahr me Mehn Leimen kan tohtohsang irail mehlel, oh ma re sohte pahn loaloapwoationg Kauno re pahn udahn mehla.

26 Pwe kilang, re kasawihadahr me kehlail en Mehn Leimen kan pil duwehte arail kehlail, iei kehlail en emen ohl pahrekiong emen. Oh met re pwupwidiengehr nan dihp lap wet; ei, kahrehda re luwetkihla, pwehki diparail, nan ahnsou mwotomwot.