1 Oh met kedekedeo me Samuel, Mehn Leimeno, ahpw kohpada soahng tohto me sohte kak ntingidi.

2 Oh kilang, e ahpw mahsanihong irail: Kilang, I kihong kumwail kilel ehu; pwe sounpar limau pahn kohdo, oh kilang, Sapwellimen Kohto ahpw pahn ketido pwe en doarehla koaros me pahn kamehlele mware.

3 Oh kilang, met I pahn kihong kumwail ong kilel en ahnsou me e pahn ketido; pwe kilang, e pahn mie marain lap nanleng, kahrehda pwohngo me e pahn ketin ipwidi e sohte pahn rotorot, kahrehda e pahn mwomwen me e wia rahn ehu ong aramas.

4 Eri, e pahn mie rahn ehu oh pwohng oh rahn, me pahn mwomwen rahn ehu oh sohte pwohng; oh met pahn wia kilel ehu ong kumwail; pwe kumwail pahn ese ahnsou me ketipin kin dakada oh pil kihrila; eri kumwail udahn pahn ese me mie rahn riau oh pwohng ehu; ahpw pwohngo sohte pahn rotorotala; oh e pahn wia pwohngo mwohn eh pahn ipwidi.

5 Oh kilang, mie usu kapw ehu me pahn pwarada, soahng ehu me kumwail saikinte kilang; oh met pil pahn wia kilel ehu ong kumwail.

6 Oh kilang kaidehn ihte koaros met, mie kilel oh manaman kapwuriamwei tohto nanleng me pahn wiawi.

7 Oh ahnsouo pahn kohdo me kumwail koaros pahn pwuriamweikihla, kahrehda kumwail pahn pwupwidi nan pwehl.

8 Oh ahnsouo pahn kohdo me koaros me pahn kamehlele Sapwellimen Kohto, iei irail me pahn alehdi mour poatoapoat.

9 Oh kilang, Kauno ketin mahsanihong ie, sang ni sapwellime tohnleng, me I pahn kohdo oh ndaiong kumwail; ei, e mahsanihong ie me I pahn kohpada mepwukat ong kumwail; ei, e ketin mahsanihong ie: Kalohngkiong aramas pwukat, re en koluhla oh kaunopada ahl en Kauno.

10 Oh met, pwehki ei wia Mehn Leimen, oh ndaiong kumwail mahsen kan me Kauno ketin mahsaniong ie, oh pwehki e ahpwal ong kumwail, kumwail lingeringerda pahi oh song en kaweiehla, oh kausiehla sang rehmwail.

11 Oh kumwail pahn rong ei koasoai kan, pwehki kahrepe wet me I kohkihdo oh douda pohn kehl en kahnihmw wet, pwe kumwail en kak rong oh ese kopwung en Koht me awiawih kumwail pwehki amwail wiewia suwed kan, oh pil pwe kumwail en kak ese koasoandi kan en koluhla;

12 Oh pil pwe kumwail en kak ese duwen ketidohn Sises Krais, Sapwellimen Kohto, Sahm en nanleng oh sampah, Sounkepikipik en soahng koaros sangete ni tapio; oh pwe kumwail en kak ese duwen kilel en sapwellime ketido, pwe kumwail en kak kamehlele mwarehu.

13 Oh ma kumwail pahn kamehlele mwarehu kumwail pahn koluhkihla dipamwail kan, pwe kumwail en kak alehda lapwapen dipamwail kan sang ni kapai kan me kohsang sapwellime wiewia pwung kan.

14 Oh kilang, pil ehu kilel I pahn kihong kumwail, ei, kilel en sapwellime pwoulao.

15 Pwe kilang, e udahn pahn pwoula pwe komour en kak wiawi; ei, e koasoandi ong ih oh e konehng me e pahn pwoula, pwe en kak ketikihda iasadahn me mehlahr kan, pwe aramas akan en kak mweimweiong mwohn silangin Kauno.

16 Ei, kilang, pwoula wet me elehiong iasada, oh doarehla aramas koaros sang keieu en mehlao—mehlahn palingehno; ong aramas koaros, pwehki i pwupwidien Adam irail kalipesang mwohn silangin Kauno, me duwehte re mehla, pali koaros nin duwen mour en paliwar oh mour en palingehn.

17 Ahpw kilang, iasadahn Krais doarehla aramas, iei, aramas koaros, oh kapwureiraildohng mwohn silangin Kauno.

18 Ei, oh e kahrehda koasoandi en koluhla en wiawi, me kahrehiong mehmen me pahn koluhla e sohte pahn palidi oh lekidekla nan kisiniei; ahpw mehmen me sohte pahn koluhla e pahn palidi oh lekidekla nan kisiniei; oh mehlahn palingehno pahn pwurehng wiawihong irail, ei, keriau en mehla, pwe re pwurehng kalipesang nin duwen mour pwung.

19 Eri kumwail koluhla, kumwail koluhla, pwe ni amwail wehwehkier mepwukat oh sohte pahn kapwaiada, kumwail pahn elehiong kumwail en kalokolok, oh kumwail pahn lohdiong nan keriau en mehla wet.

20 Ahpw kilang, nin duwen ei koasoaiahong kumwail pil ehu kilel, kilel en sapwellime pwoulao, kilang, nan rahno me e pahn ketin lokolongki mehla ketipin pahn rotorotla oh sohte pahn kihong kumwail marain; oh pil maram oh usu kan; oh sohte marain pahn mie pohn sahpwet, iei sangete ahnsou me e pahn lokolongki mehla, erein rahn siluh, kohla lel ahnsou me e pahn pwurehng iasadahsang mehla.

21 Ei, ni ahnsou me e pahn ketin mweidala ngeni nansapwe pahn posopos oh lioal piripir erein awa tohto, oh sampah pahn rerrer oh itikek; oh paip akan me mih pohn sampah, koaros me mih pohn pwehl oh pahn pwehl, me kumwail ese me re pwon ahnsou wet, de pali laudih pwon itpene, pahn pwalpeseng;

22 Ei, re pahn pwalpeseng wiahda riau, oh pahn dierek nan elenpwal oh lipwenpwal, oh me pwalasang kan me mihseli pohn sampah pwon, ei, koaros pohn pwehl oh pahn pwehl.

23 Oh kilang, mie kisinieng kehlail kan me pahn wiawi, oh tohto nahna kan pahn rengkidi patapatala, duwehte wahu, oh tohto wasahkan me ahnsou wet kahdaniki wahu kan pahn wiahla nahna kan, me ileilehi pahn ileile mehlel.

24 Oh tohto ahl lap akan pahn ohla, oh tohto kahnihmw kan pahn tehnla.

25 Oh sousou tohto pahn ritida, oh pahn mweidala tohto me mehla kan; oh souleng tohto pahn pwarehng aramas tohto.

26 Oh kilang, met me tohnlengo mahsanihong ie; pwe e mahsanih me nansapwe pahn posopos oh lioal piripir erein awa tohto.

27 Oh e mahsanihong ie me nan erein ahnsouo me nansapwe pahn posopos oh lioal piripir, oh kisinieng kehlail, me mepwukat pahn wiawi, oh me rotorot pahn kipehdi sampah pwon erein rahn siluh.

28 Oh tohnlengo mahsanihong ie me tohto me pahn kilangada soahng kan me lapasang mepwukat, me pahn kahrehiong re en kamehlele me kilel pwukat oh kapwuriamwei pwukat pahn wiawi pohn sapwet pwon, me pahn kahrehda sohte kahrepen re soupwoson rehn aramas akan.

29 Oh met me pahn kahrehda mehmen me pahn kamehlele pahn komourla, oh mehmen me sohte pahn kamehlele, kopwung pwung pahn kohieng ih; oh pil ma re pahn lekidekla irail me pein elehiong arail lekidekla.

30 Oh met tamataman, tamataman, rieiko, me mehmen me pahn mehla, mehkihla pein ih; oh mehmen me pahn wiewia suwed, wiahiong pein ih; pwe kilang, kumwail saledek; kumwail mweimweiong en wia pein amwail pilipil; pwe kilang, Koht ketikihong kumwail marain oh kasaledekiala kumwail.

31 E ketikihong kumwail pwe kumwail en kak ese me mwahu sang me suwed, oh ketikihong kumwail pwe kumwail en kak pilada mour de mehla; oh kumwail kak wia me mwahu oh kopwurupwurieng me mwahu, de alehdi me mwahuo kopwurupwuriong kumwail; de kumwail kak wia me suwed, oh alehdi me suwedo kopwurupwurieng kumwail.