1 Kilang, met kedekedeo ahnsou me Nihpai koasoaiadahr mahsen pwukat, ekei ohloko me mihmi rehrail ahpw tangala ni sehr en sounkopwungo; iei, irail meh limen me kohla, oh re nda nanpwungarail, ni arail kohkohla:

2 Kilang, met kitail pahn ese ni mehlel ma ohl menet wia soukohp oh Koht mahsanihong en kohpada soahng kapwuriamwei pwukat ong kitail. Kilang, kitail sohte kamehlele e ketin mahsanihong; ei, kitail sohte kamehlele me e wia soukohp men; ahpw, ma dahme e koasoaiahki sounkopwungo mehlel, me e mehla, eri kitail pahn kamehlele me koasoai teikan me e koasoaiahier mehlel.

3 Kedekedeo re ahpw tang marahra kohla, oh kohla ni sehr en sounkopwungo; oh kilang, sounkopwungo pwupwidier nan pwehlo, oh wie wonohn nan ah nta.

4 Oh met kilang, ahnsou me re kilangada met re ahpw pwuriamweikihla mehlel, lao re ahpw pwupwidi nan pwehlo; pwe re sohte kamehlele mahsen kan me Nihpai koasoaiahier nin duwen sounkopwungo.

5 Ahpw kilang, ahnsou me re kilangada re ahpw kamehlelehda, oh re ahpw masepwehkada pwe pakadeik kan koaros me Nihpai koasoaia pahn lelohng aramas akan; eri re ahpw rerrer, oh pwupwidi nan pwehlo.

6 Met, mwurinte ahnsou me sounkopwungo kamakamala—pwehki rie ohl me likou rir doakoahdi, oh e mwadangete tangasang, oh ladu ko tangala oh ndaiong aramas akan, ni ar weriwerikihla me mie kamaramas me wiawi rehrail;

7 Oh kilang aramas akan ahpw kapokonpenehr ni sehr en sounkopwungo—oh kilang, re ahpw pwuriamweikihla arail kilangada ohl limen me pwupwidier nan pwehlo.

8 Oh met kilang, aramasoko sohte wehwehki duwen pokon me kohpene ni ahn Nihpai mwetuwelo; eri re nda nanpwungarail: Ohl pwukat iei irail me kemehlasounkopwungo, oh Koht ketin kaloke irail pwe re en sohte kak tangasang kitail.

9 Kedekedeo re ahpw koledi irail, oh salihdi irail oh kesehlong irail nan imweteng. Oh mie pakair ehu me pekederpeseng me sounkopwungo kamakamalahr, oh me aramas kan me kemehla kolkoldier oh lekideklong nan imweteng.

10 Kedekedeo me mandahsang rahno aramas akan ahpw pokonpene pwe re en mwahiei oh kaisihsol, ni seridien sounkopwung lap me kamakamalahro.

11 Oh met irail sounkopwung ko me iang mih ni ahn Nihpai mwetuwelo, oh rong ah mahsen kan, pil iang pokonpene ni seridio.

12 Kedekedeo re ahpw kalelapak rehn aramas akan, ndinda: Ia wasa irail aramas limen me se kadaredo pwe re en kilang ma sounkopwungo mehla? Oh re sapengki oh nda: Duwen aramas limen me kumwail nda me kumwail kadaredohn, se sohte ese; ahpw mie aramas limen me wia kamaramaso, me se kesehlong nan imweteng.

13 Kedekedeo sounkopwung kan ahpw peki re en wisikdo; oh re ahpw wisikdo, oh kilang irail iei aramas limen me pekederdo; oh kilang sounkopwung kan ahpw kalelapak rehrail duwen dahme wiawi, oh re ahpw koasoaiahiong irail soahng koaros me re wia, ni ar ndinda:

14 Se tangedo oh kohdo ni sehr en sounkopwungo, oh ahnsou me se kilangada soahng koaros me Nihpai kadehdehkier, se ahpw pwuriamweikihla mehlel kahrehda se pwupwidi nan pwehlo; oh ahnsou me se kehnda sang aht pwuriamweio, kilang re keseikihtlong nan imweteng.

15 Met, nin duwen kamakamalahn ohl menet, se sohte ese ihs me wia; oh ihte uwen me se ese, se tangedo oh kohdo nin duwen amwail kadarkihtdo, oh kilang e mehlahr, nin duwen mahsen kan en Nihpai.

16 Oh met kedekedeo sounkopwung kan ahpw kasalehiong aramas akan irairo, oh ahpw kedipahki Nihpai, ndinda: Kilang, kitail ese me Nihpai menet udahn wehwehiong emen aramas en kemehla sounkopwungo, oh pwe en kak ndaiong kitail, pwe en kak kamwakidkitailohng nan ah lamalam, pwe en kak kihda me e wia aramas lapalap, me Koht pilada, oh wia soukohp men.

17 Oh met kilang, kitail pahn kadierekehda ohl menet, oh e pahn wehkada ah sapwung oh kasalehiong kitail ihs me udahn kemehla sounkopwungo.

18 Kedekedeo aramas limeno ahpw kasaledekla ni rahn en seridio. Ahpw, re kasapwunge sounkopwungoko nan ar koasoai kan me re uhkihong Nihpai, oh kapwungala emen emen irail, lao re katokeiraildi.

19 Ahpw, re karehda Nihpai eh pahn kolkoldi oh selidi oh wisikdo mwohn pokono, oh re ahpw tepida kalelapak reh ni soahngen wiepe tohto pwe re en kak kasapwungehla, pwe re en kak kedipahki en kamala—

20 Ndindaiong ih: Ke ehukiongehr emen; ihs aramas menet me wiadahr kamaramas wet? Met ndaiong kiht, oh kasalehda ahmw sapwung; ndinda, Kilang iet mwohni; oh se pil pahn mweidala ahmw mour ma ke pahn ndaiong kiht, oh kasalehda inou me ke wiahiong ih.

21 Ahpw Nihpai ndaiong irail: Kumwail pweipwei kei, amwail mohngiong kan sohte sirkumsais, kumwail maskun, kumwail aramas keptakai, kumwail ese ia uwen werei Kauno amwail Koht e pahn ketin mweidehng kumwail en doudoulahte nan dipamwailet?

22 Oh kumwail anahne tepida sengiseng oh mwahiei, pwehki kamwomwala lap me kin awiawih kumail nan ahnsou wet, ma kumwail sohte pahn koluhla.

23 Kilang kumwail nda me I inouieng emen aramas me e pahn kemehla Sihsoram, atail sounkopwungo. Ahpw kilang, I ndaiong kumwail, me met pwehki ei kadehdehiong kumwail duwen soahng wet; iei, pwe en wia kadehde ong kumwail, me I ese duwen wiewia suwed oh tiahk suwed kan me mih rehmwail.

24 Oh pwehki ei wiahier met, kumwail nda me I inoukihong emen aramas en wia soahng wet; ei, pwehki I kasalehiong kumwail kilel wet kumwail lingeringer pahi, oh rapahki en kawehla ei mour.

25 Oh met kilang, I pahn kasalehiong kumwail pil ehu kilel, oh mwuri kitail pahn kilang ma kumwail pahn song en kawehkiniehla.

26 Kilang I ndaiong kumwail: Kohwei ni ihmwen Siendum, me wia rien Sihsoram ohl, oh idek reh—

27 Nihpai, soukohp likamwo, me kohpadahr soahng suwed laud duwen aramas pwukat, koasoandier rehmw, me ke en kemehla Sihsoram, riomw ohl?

28 Oh kilang, e pahn ndaiong kumwail, Soh.

29 Oh kumwail pahn kalelapak reh: Kowe me kemehla riomw ohlo?

30 Oh e pahn kesihnen ni masepwehk, oh sohte pahn ese dahme e pahn nda. Oh kilang, e pahn kahmahm ong kumwail; oh e pahn mwomwehda me e pwuriamwei; ahpw, e pahn ndaiong kumwail me sohte dipe.

31 Ahpw kilang, kumwail pahn tehk mwahu ih, oh kumwail pahn diarada nta pohn ah likouo.

32 Oh ahnsou me kumwail pahn kilang met, kumwail pahn nda: Nta kohsang ia? Se sohte ese ma e sou ntahn riomw ohlo?

33 Oh e ahpw pahn salohda, oh pahn pwetepwetala pohn mese, duwehte me pahn mehlahr.

34 Oh kumwail ahpw pahn ndaiong: Pwehki masepwehk oh pwetepwetalahn pohn mesemwen, kilang, se ese me kowe me dipahniki.

35 Oh e pahn masepwehkada mehlel; oh ahpw pahn wehkadahng kumwail, oh sohla kahmahmki me ih me wia kamaramaso.

36 Oh e ahpw pahn ndaiong kumwail, me ngehi, Nihpai, sohte ese duwen irair wet ihte ma e kohiengie sang ni manaman en Koht. Oh kumwail pahn ese me ngehi wia ohl mehlel men, oh me I pekederdo sang rehn Koht.

37 Kedekedeo re ahpw kohla oh wia, nin duwen dahme Nihpai ndaiong irail. Oh kilang, mahsen kan me e mahsanih mehlel; pwe nin duwen ah mahsen kan e kahmahmki; oh pil nin duwen ah mahsen kan e wehkada.

38 Oh e kahrehiong en kasalehda me ih me wia kamaramaso, me kahrehda aramas limeno saledekla, oh pil Nihpai.

39 Oh mie ekei Mehn Nihpai kan me kamehlelehda mahsen kan en Nihpai; oh mie ekei me pil kamehlele pwehki kadehde en aramas limeno, pwe re wiliakapwala ni ar mihmi nan imweteng.

40 Oh met mie ekei rehn aramasoko, me nda me Nihpai wia soukohp men.

41 Oh mie ekei me nda: Kilang, ih koht men, pwe koht kelehpw me kak ese soahng kan koaros. Pwe kilang, e ndaiong kitail madamadau en mohngiongatail kan, oh pil ndaiong kitail soahng kan; oh e kasalehiong kitail ni mehlel ihs me udahn kemehla atail sounkopwungo.