1 Oh met kedekedeo ni ahnsou me Nihpai ndahier koasoai pwukat, kilang, mie ohl kei me wia sounkopwung kan, me pil iang wia pwihn en Kadiendon rir ko, oh re lingeringerda, oh re ahpw uhwongada ih oh koasoai ngihl laudida, ndindaiong aramas kan: Dahme kumwail sohte kolkihdi ohl menet oh wahdo, pwe en kak kopwungki nin duwen dihp me e wiadahr?

2 Dahme kumwail kilikilangki ohl menet, oh rongorongki eh lahlahwe aramas pwukat oh atail kosonned?

3 Pwe kilang, Nihpai koasoaiahiong irail duwen arail kosonned ah sapwungalahr; ei, soahng tohto me Nihpai koasoaiahiong irail me sohte kak ntingdi; oh sohte mehkot me e koasoaia uhwongada sapwellimen Koht kosonned akan.

4 Oh sounkopwung kan lingeringer pahn Nihpai pwehki e koasoaiahda duwen arail doadoahk rotorot rir kan ni sansal; ahpw, re sohte men koledi ih, pwe re masak aramas kan de lahlahwe irail.

5 Eri re ahpw weriwerkihong aramas akan, ndinda: Dahme kumwail mweidehng ohl menet e wie lahlahwe kitail? Pwe kilang e keriahla aramas pwukat, me re pahn kamwomwala; ei, oh pil me atail kahnihmw lap kan pahn kohsang kitail, me pahn kahrehda kitail pahn sohla kak kousoan loalle.

6 Oh met kitail ese me e sohte kak wiawi, pwe kilang, kitail udahn kehlail, oh atail kahnihmw kan kehlail, eri atail imwintihtih kan sohte kak poweikitaildi.

7 Kedekedeo re ahpw kamwakidadahr aramas kan re en lingeringer ong Nihpai, oh akamaipene nanpwungarail; pwe mie ekei me werikihla: Kumwail dehr kedirepwe ohl menet, pwe e wia ohl mwahu men, oh soahng kan me e kin nda udahn pahn wiawi ma kitail sohte koluhla;

8 Ei, kilang, kopwung kan koaros pahn kohieng kitail me e kadehdehkiong kitailehr; pwe kitail ese me e kadehdehkidahr mehlel ong kitail duwen atail wiewia suwed kan. Oh kilang re tohto, oh e kin ese mehlel soahng kan me pahn lelohng kitail duwehte eh kin ese atail wiewia suwed kan;

9 Ei, oh kilang, ma kaidehn ih soukohp men e sohte kak kadehdehki duwen soahng pwuko.

10 Kedekedeo aramas ako me song en kawehla Nihpai re ahpw uhdier pwehki ar masepwehk, me kahrehda re sohte doahke ih; eri e ahpw pwurehng tepida koasoaiong irail, ni ah kilikilang me ekei irail pwungkidahr, kahrehda luhwehko masepwehkada.

11 Eri e idihdiong en koasoaiahiong irail pil ekei, ni eh ndinda: Kilang, rieiko, kumwail sohte wadek me Koht ketikihong emen ohl manaman, iei Moses, en kihpeseng pihl en Sehd Weitahtao, oh pwalpeseng, kahrehda Mehn Israel kan, me wia atail pahpa kahlapko, kak keid nan pwehl ngalangal, oh pihlo pwurpenehng pohn sounpei en Mehn Isip ko oh kaduhirailla?

12 Oh met kilang, ma Koht ketkihong ohl menet soahngen manaman wet, eri dahme kumwail pahn mwoaroamwoarongki nan pwungamwail, oh nda me e sohte ketkihongie manaman pwe I en kak wehwehki duwen kopwung kan me pahn kohieng kumwail ma kumwail sohte pahn koluhla?

13 Ahpw, kilang, kumwail sohte kahmahmkihte ei mahsen kan, ahpw kumwail pil kahmahmki mahsen kan koaros me atail pahpahko koasoaia, oh pil mahsen kan me ohl menet, Moses, koasoaiahier, me manaman lap kohieng ih, ei, mahsen kan me e koasoaiahier duwen ketidohn Mesaia.

14 Ei, e sou kadehdedahr me Sapwellimen Kohto pahn ketido? Oh nin duwen e ketin langahda sineik meteo nan sapwtehno, iei pil duwehte ih me pahn ketido e pahn ketin langada.

15 Oh koaros me pahn kilenglahng sineiko pahn komourla, iei pil duwehte koaros me pahn kilenglahng Sapwellimen Kohto ni pwoson, ahniki ngehn peik, pahn komourla, mehlel ong mouro me soutuk.

16 Oh met kilang, kaidehn Moses kelehpw me kadehdehki mepwukat, ahpw pil soukohp sarawi koaros, sangete ah mwehi kohla lel mwehin Eipraam.

17 Ei, oh kilang, Eipraam kilangada e pahn ketido, oh direkihla popohl oh pereperenki.

18 Ei, oh kilang I ndaiong kumwail, me kaidehn Eipraam kelehpw me wehwehki mepwukat, ahpw mie tohto mwohn mwehin Eipraam me malipilipda sang ni koasoandi en Koht; iei, nin duwen koasoandi en Sapwellimeho; oh met pwe en kak kasalehiong aramas akan, sounpar kid kei mwohn eh pahn ketido, pwe komourla en kak kohdohng irail.

19 Oh met I men kumwail en ese, me pil mwurin mwehin Eipraam mie soukohp tohto me kadehdehkier mepwukat; ei, kilang, soukohp Sihnos kadehdehki ni eimah; me kahrehda e kamakamkihla.

20 Oh kilang, pil Sihnok, oh pil Isaias, oh pil Aiseia, oh Seremaia, (Seremaia me wia soukohp ohte me pil kadehdehki kamwomwalahn Serusalem) oh met kitail esehier me Serusalem kamwomwalahr nin duwen mahsen kan en Seremaia. Oh dahme Sapwellimen Kohto sohte pahn ketidohki, nin duwen ah kokohpo?

21 Oh met kumwail pahn peikasalki me Serusalem kamwomwalahr? Kumwail pahn nda me nein Sedekaia pwutak ko sohte kamakamala, koaros ahpw ihte Mulek? Ei, oh kumwail sohte kilang me mie kadaudoken Sedekaia rehtail, oh re pwepwekihsang nan sahpw en Serusalem? Ahpw kilang, kaidehn koaros met—

22 Atail pahpa Lihai pwepwekihsang nan Serusalem pwehki e kadehdehki mepwukat. Nihpai pil kadehdehki mepwukat, oh pil kereniong atail pahpahko koaros, iei lao lel ahnsou wet; ei, re kadehdehki ketidohn Krais, oh wie kasikasik, oh pereperenki sapwellime rahno me pahn kohdo.

23 Oh kilang, ih iei Koht, oh e ketiket rehrail, oh e ketin kasalehiong irail pein ih, kahrehda re komourkihla ih; oh re kalinganahla ih, pwehki mehkan me pahn kohdo.

24 Oh met, pwehki amwail esehier mepwukat oh sohte kak kahmahmki ihte ma kumwail likamw, eri met kumwail wiadahr dihp, pwehki amwail soikalahr mepwukat koaros, mehndahte amwail alehdier kadehde tohto; iei, kumwail alehdier soahng koaros, sang nanleng, oh soahng koaros me mih pohn sampah, me kadehdehki me mepwukat mehlel.

25 Ahpw kilang, kumwail kasohwe mehlelo, oh uhwongadahr amwail Koht sarawio; oh iei pil ahnsou wet, kumwail sohte kin nahkpene pai en nanleng, wasa me sohte mehkot kak kawehla, oh wasa me sohte mehkot samin kak kohla, ahpw kumwail kapkaposokehda engieng me pahn kohieng kumwail ni rahn en kopwungo.

26 Iei pil ahnsou wet kumwail kereniongehr kamwomwala soutuk, pwehki amwail kam aramas kan oh amwail tiahk en nenek kan oh wiewia suwed kan; ei, oh ma kumwail sohte pahn koluhla e pahn wiawihong kumwail ahnsou keren.

27 Ei, kilang ahnsou wet e mihmi ni amwail wenihmw kan; ei, kumwail kohwei ni sehr en sounkopwungo, oh rapahki; oh kilang, amwail sounkopwung kamakamalahr, oh e wie wonohn nan ah nta; oh rie ohl kemelahr, me songosong en alehdi sehr en sounkopwungo.

28 Oh kilang, ira koaros wia kisehn amwail pwihn rir, me Kadiendon oh me suwedo wiahda me raparapahki en kawehla palingehn en aramas.