1 Oh met, riei kempoakepahi ko, kilang, I ndaiong kumwail ma kumwail sohte pahn koluhla ihmwamwail kan pahn tehnla.

2 Ei, ma kumwail sohte koluhla, amwail pwoud kan pahn wie sengiseng nan ahnsou me re pahn kadihdi neirail seri kan; pwe kumwail pahn song en tang oh sohte pahn diar wasahn keiru; ei, oh meid suwediong me pahn wewa seri, pwe re pahn toutoula oh sohte kak tang; eri, re pahn tiatipeseng oh pahn kamakamala.

3 Ei, meid suwediong aramas pwukat me kahdaniki aramas en Nihpai ma re sohte pahn koluhla, ahnsou me re pahn kilang kilel pwukat koaros oh soahng kapwuriamwei kan me pahn kasansalohng irail; pwe kilang, irail wia aramas pilipil kei ong Kauno; ei, aramas en Nihpai me e ketin poakehng, oh e pil ketin kaloke irail; ei, nan ahnsou me re kin wia me suwed e kin ketin kaloke irail pwehki eh ketin poakehng irail.

4 Ahpw kilang riei kempoakepahi ko, Mehn Leimen kan e ketin kailongki pwehki arail wiewia kan me suwed ahnsou koaros, oh met pwehki wiewia suwed en tiahk en arail pahpa ko. Ahpw kilang, komour kohdohng irail sang ni kalkalohk en Mehn Nihpai kan; oh pwehki kahrepe wet me Kauno ketin kareireila arail ahnsou.

5 Oh I men kumwail en ese me pali laud en irail re wie ideidawehn arail pwukoah, oh re kin kanakanaiehng kohwei mwohn Koht, oh re kin nantihong en kapwaiada sapwellime kosonned kan oh sapwellime koasoandi kan, oh sapwellime koasoandi en kopwung kan nin duwen kosonned en Moses.

6 Ei, I ndaiong kumwail, me pali laud en irail wiewia met, or re kin nannantihong ni ar sohte pwangahkida loaloapwoat pwe re en kak wahdo luhwen riarail kan re en wehwehkihda mehlelo; eri mie me tohto me kin iangirailla nan ehu ehu rahn.

7 Oh kilang, kumwail pein esehier, pwe kumwail kadehdehier, me irail koaros me kin wehwehkihda mehlelo, oh esehda mour suwed oh tiahk suwed en arail pahpa ko, oh kamehlelehda pwuhk sarawi kan, ei, kokohp kan en soukohp sarawi kan, me ntingdi, me kin kahluwahiong irail en pwoson Kauno, oh koluhla, iei pwoson oh koluhla me kin elehiong wiliakapw en mohngiongarail—

8 Eri, nin duwen irail koaros me marainkidahr met, kumwail pein esehier me re kehlail oh tengeteng nan pwoson, oh nan dahme irail saledengkihla.

9 Oh kumwail pil ese me irail saripidi neirail dipwisou en mahwin kan, oh re masak pwurehng alehda pwe re de pahn dipikihda; ei, kumwail kak kilang me re masak wiahda dihp—pwe kilang re pahn kin mweidala re en tiatihdi oh kamakamala rehn arail imwintihti kan, oh sohte pahn peliankin irail neirail kedlahs kan, oh met pwehki arail pwoson Krais.

10 Oh met, pwehki arail tengeteng ni ahnsou me re kamehlele dahme irail kamehlelehu, pwehki arail kehlail ni ahnsou me re tepin marainkihda, kilang, Kauno pahn ketin kapai irail oh kareireila arail ahnsou, mehndahte arail wiewia suwed—

11 Ei, mehndahte ma arail pwoson tikitikila, Kauno pahn ketin kareireila arail ahnsou, lao lel ahnsouo pahn kohdo me atail pahpako koasoaiahda, oh pil soukohp Sihnos, oh soukohp tohto teikan, nin duwen kopwurupwurdohn riatail, Mehn Leimen, en pwurehng wehwehkihda mehlelo—

12 Ei, I ndaiong kumwail, me ni imwin ahnsou kan sapwellimen Kauno inou kan pahn kohieng riatail, Mehn Leimen kan; oh mehndahte lokolok tohto me pahn lelohng irail, oh mehndahte arail imwintihti pahn pwakihrailseli pohn sampah, oh rapahkinirail, oh kemeirail oh katangirailpeseng, oh sohla wasahn arail keiru, Kauno pahn kupwurkalahngih irail.

13 Oh met duwen kokohpo, me re pahn pwurehng kopwurupwurdohng marain mehlelo, me iei marainkihda arail Soundoaro, oh arail silepen sihpw lapalap oh mehlelo, oh iang wadawadiong sapwellime sihp kan.

14 Eri I ndaiong kumwail, me e pahn mwahu ong irail sang kumwail ihte ma kumwail sohte pahn koluhla.

15 Pwe kilang, ma doadoahk kapwuriamwei kan me kumwail kilangehr sansalohng irail, ei, ong irail me arail pwoson tikitikla pwehki tiahk en arail pahpako, kumwail kak pein ese me arail pwoson sohte pahn pwurehng tikitikila.

16 Eri, Kauno ketin mahsani: I sohte pahn udahn kamwomwirailla, ahpw I pahn wiahda me ni ahnsou me I pahn kupwuriki re pahn pwurehng pwurodohng ie, Kauno ketin mahsanih.

17 Oh met kilang, Kauno ketin mahsanih, duwen aramas en Mehn Nihpai kan: Ma re sohte pahn koluhla, oh nantihong en wia kupwurei, I pahn udahn kamwomwirailla, Kauno ketin mahsanih, pwehki arail pwoson tikitikla mehndahte doadoahk kapwuriamwei tohto me I wiahiong irailehr; oh ni mehlel nin duwen Kauno e ketin ieias mepwukat pahn wiawi, Kauno ketin mahsanih.