1 නුඹගේ මිදුම්කරුවාණන් වන, යේසුස් ක්‍රිස්තුස්වහන්සේගේ හඬට සවන්දෙන්න, උන්වහන්සේගේ දයාවේ හස්තයෙන් නුඹලාගේ පාපයන්ට වන්දිගෙවා ඇති, ශ්‍රේෂ්ඨ තැනැන්වහන්සේ මම වන්නෙමි;

2 මාගේ හඬට උවමනාවෙන් සවන්දී මා ඉදිරියේ ඔවුන්වම යටහත් කරගෙන, තවද බලවත් යාච්ඤාවකින් මා හට හඬ නගන උන්වහන්සේගේ ජනතාව ඕනෑම ප්‍රමාණයක්, කිකිළියක් ඇයගේ පැටවුන් ඇයගේ පියාපත් යටතට රැස්කරන්නාක් මෙන් රැස්කරන උන්වහන්සේය.

3 බලන්න, සැබවක්, සැබවක්, මම නුඹලා හට පවසන්නෙමි, එනම් මෙම අවස්ථාවේදී නුඹලාගේ පාපයන්ට නුඹලාට සමාවක් දී ඇත්තේය, එසේහෙයින් නුඹලා මෙම දේවල් ලබන්නෙහුය; එහෙත් නුඹලා මත උපද්‍රවයන් නොපැමිණෙන පිණිස, තවදුරටත් පව් නොකිරීමට මතක තබාගන්න.

4 සැබවක්, මම නුඹලා හට පවසන්නෙමි එනම් නුඹලාව ලෝකයෙන් තෝරාගෙන ඇත්තේ මාගේ ශුභාරංචිය ප්‍රීති ප්‍රමෝදයේ හඬකින් සහ හොරණෑවක හඬක් සමඟ මෙන් ප්‍රකාශ කරන පිණිසය.

5 නුඹලාගේ හදවත් ඔසවා තවද ප්‍රීතිමත් වන්න, මක්නිසාද මම නුඹලා මධ්‍යයේ වන්නෙමි, තවද පියාණන්වහන්සේ සමඟ මම නුඹලාගේ මැදහත්කරුවාණන් වන්නෙමි; තවද නුඹට රාජ්‍යය ලබාදීම උන්වහන්සේගේ යහපත් කැමැත්තය.

6 තවද, එය ලියා ඇති ලෙස—මාගේ ආඥාවට අනුව යාච්ඤාවෙන් එක්සත්ව, කුමනාකාර දෙයක් වුවත් නුඹලා ඇදහිල්ලෙන් ඉල්ලන්නේ නම්, නුඹලාට ලැබෙන්නේය.

7 තවද නුඹලාව මාගේ තෝරාගත්තවුන් රැස්කරගැනීමට කැඳවා ඇත්තෙමි; මක්නිසාද මාගේ තෝරාගත්තා වූ අය මාගේ හඬ අසා, තවද ඔවුන්ගේ හදවත් දැඩිකර නොගන්නෝය;

8 එසේහෙයින් අධර්මිෂ්ඨයන් මත මහත් විපත සහ මහත් විනාශය යවන දවසේ සියලු දේවලට සූදානම්ව සිටීමට සහ ඔවුන්ගේ හදවත් සූදානම් කිරීම සඳහා, මෙම දේශය මතුපිට එක් ස්ථානයක් වෙතට ඔවුන්ව රැස්කිරීමට පියාණන්වහන්සේ වෙතින් නියෝගයක් පෙරට ගොස් ඇත.

9 මක්නිසාද පැය ලඟාවී ඇත්තේය තවද පොළොව මෝරා ඇති දවස ඉතා ආසන්නය; තවද සියලු උඬඟු වූවන් සහ දුෂ්ටකම් කරන්නෝ පිදුරු මෙන් වන්නෝය; තවද මම ඔවුන්ව දවා දමන්නෙමියි, සේනා වල ස්වාමින්වහන්සේ පවසන සේක, එනම් පොළොව මත දුෂ්ටකම නොවන්නේය;

10 මක්නිසාද එම පැය ආසන්නය, තවද එනම් මාගේ ප්‍රේරිතවරුන් කතා කළ ඒ දේවල් සම්පූර්ණ විය යුත්තේය; මක්නිසාද ඔවුන් ඒවා ප්‍රකාශ කළාක් මෙන් ඒවා සිදුවන්නේය;

11 මක්නිසාද මම ස්වර්ගය වෙතින් මාගේ බලයෙන් සහ මහත් මහිමයෙන්, එහි වූ සියලු සේනාවන් සමඟ, එළිදරව් වන්නෙමි, තවද පොළොවේ මනුෂ්‍යයන් සමඟ වසර දහසක් ධර්මිෂ්ඨකමින් වාසය කරන්නෙමි, තවද දුෂ්ටයින් නැගී නොසිටින්නෝය.

12 තවද නැවත, සැබවක්, සැබවක්, මම නුඹලා හට පවසන්නෙමි, පියාණන්ගේ කැමැත්ත මගින්, තවද එය ස්ථීර නියෝගයක්ව පෙරට ගොස් ඇත්තේය, එනම් මාගේ ප්‍රේරිතවරුන්, එනම් යෙරුසලමේ මාගේ දේවසේවයේ මා සමඟ සිටි දොළොස්දෙනා, ධර්මිෂ්ඨකමේ සළු පැළඳ, ඔවුන්ගේ හිසෙහි ඔටුනු දරමින්, මා මෙන් මහිමයෙන්, ගින්දර කුළුනක් තුළින් මාගේ පැමිණීමේ දවසේ, මට ප්‍රේම කළ බොහෝ අය සහ මාගේ ආඥාවන් පැවැත්වූ මුළු ඉශ්‍රායෙල් වංශයම, විනිශ්චය කිරීමට මාගේ දකුණු භාගයේ සිටගෙන සිටින්නෝය, තවද වෙන කිසිවෙක් නොවන්නේය.

13 මක්නිසාද දිගින් දිගටම සහ ශබ්ද නගමින් යන දෙකෙන්ම, සීනායි කන්ද මත මෙන්, හොරණෑවක් ශබ්ද වන්නේය, තවද සියලු පොළොව සොළවනු ලබන්නේය, තවද ඔවුහු පෙරට පැමිණෙන්නෝය—එසේය, මා තුළ මරණයට පත්වූ, මැරුණ අය ධර්මිෂ්ඨකමේ ඔටුන්නක් ලබා, මා මෙන්, සළු පැළඳ, මා සමඟ සිටීමටය, එනම් අපි එක් අයකු මෙන් වන පිණිසය.

14 එහෙත්, බලන්න, මම නුඹලා හට පවසන්නෙමි මෙම මහත් දවස පැමිණීමට පෙර හිරු අඳුරු වන්නේය, තවද සඳ ලේ බවට හැරෙන්නේය, තවද ස්වර්ගයෙන් තරු වැටෙන්නේය, තවද ඉහළ අහසේ සහ පහළ පොළොවේ මහත් සංකේතයන් වන්නේය;

15 තවද එහි මනුෂ්‍ය සේනා අතර හැඬීම් සහ විලාපද වන්නේය;

16 තවද එහි මහත් හිම කුණාටුවක් පොළොවේ වැවිලි විනාශ කිරීමට පෙරට යනු ඇත.

17 තවද එය මෙසේ සිදුවන්නේය, ලෝකයේ දුෂ්ටකම නිසා, එනම් මම දුෂ්ටයන් වෙතින් පලිය ගන්නෙමි, මක්නිසාද ඔවුහු පසුතැවිලි නොවන්නෝය; මක්නිසාද උදහස නැමැති මාගේ කුසළානය පිරී ඇත්තේය; මක්නිසාද බලන්න, මා හට ඔවුන් සවන්නොදෙන්නේ නම් මාගේ රුධිරය ඔවුන්ව පිරිසිඳු නොකරන්නේය.

18 එසේහෙයින්, ස්වාමින් වූ දෙවියන්වහන්සේ වන මම පොළෝ තලය මතුපිටට මැස්සන් එවන්නෙමි, උන් එහි වූ පදිංචිකරුවන්ව ග්‍රහණය කර, තවද ඔවුන්ගේ මාංශය බුදින්නෝය, තවද එමගින් ඔවුන් මතට පණුවන් පැමිණවීමට සලස්වන්නෙමි;

19 තවද ඔවුන්ගේ දිවවල් බැඳ තබන්නෙමි එනම් ඒවා මට විරුද්ධව කතා නොකරන්නේය; තවද ඔවුන්ගේ මාංශය ඔවුන්ගේ අස්ථි වලින්ද, තවද ඔවුන්ගේ ඇස් ඒවායේ කුහරයන්ගෙන්ද වැටෙන්නේය;

20 තවද එය මෙසේ සිදුවන්නේය එනම් වනයේ මෘගයන්ද අහසේ පක්ෂීන්ද ඔවුන්ව ගිල දමන්නෝය.

21 තවද මහත් වූ පිළිකුල් සභාව, එය පොළොවේ සියල්ලන්ගේ වෙසඟනය, මෙම දේවල් කතා කළා වූ අනාගතවක්තෘ එසකියෙල්ගේ මුඛයෙන් එය පැවසූ ආකාරයට අනුව, දවා දමන ගින්දරෙන් පහතට හෙලනු ලබන්නේය, ඒවා තවමත් සිදුනොවුනද, එහෙත් මා ජීවත්වන්නාක් මෙන්, ස්ථිරවම සිදුවන්නේය, මක්නිසාද පිළිකුල්කම් රජ නොකරන්නේය.

22 තවද නැවත, සැබවක්, සැබවක්, මම නුඹලා හට පවසන්නෙමි එනම් වසර දහස අවසන් වූ විට, තවද මනුෂ්‍යයෝ නැවත ඔවුන්ගේ දෙවියන්වහන්සේ ප්‍රතික්ෂේප කිරීම ආරම්භ කරන්නෝය, එවිට මම පොළොව ඉතිරි කරන්නෙමි, නමුත් ස්වල්ප කාලයකටය;

23 තවද අවසානය පැමිණෙන්නේය, තවද අහසත් පොළොවත් ක්ෂය වී තවද පහව යන්නේය, තවද එහි අලුත් ස්වර්ගයක් සහ අලුත් පොළොවක් වන්නේය.

24 මක්නිසාද සියලු පැරණි දේවල් පහව යන්නේය, තවද ස්වර්ගය සහ පොළොවද, තවද එහි වූ සියල්ලේ පූර්ණත්වයද, මනුෂ්‍යයන් සහ මෘගයන් දෙගොල්ලන්මද, අහසේ පක්ෂීන්ද, මුහුදේ මාළුන්ද, සියලුම දේවල් අලුත් වන්නේය;

25 තවද එක් කෙස් ගසක්වත්, කුඩා දූවිල්ලක්වත් නැතිව නොයන්නේය, මක්නිසාද එය මාගේ හස්තයේ හස්ත කර්මයක් වන්නේය.

26 එහෙත්, බලන්න, සැබවක් මම නුඹලා හට පවසන්නෙමි, පොළොව පහව යෑමට ප්‍රථම, මිකායෙල් මාගේ අග්‍ර දේවදූතයා, ඔහුගේ හොරණෑව හඬ නගන්නේය, තවද එවිට මරණයට පත්වූ සියල්ලෝම නැගිටින්නෝය, මක්නිසාද ඔවුන්ගේ සොහොන් විවෘත වන්නේය, තවද ඔවුහු—එසේය, සියල්ලන් වුවත් පෙරට පැමිණෙන්නෝය.

27 තවද ධර්මිෂ්ඨයෝ මාගේ දකුණු පාර්ශවයේ සදාකාල ජීවනය වෙතට රැස්කරනු ලබන්නෝය; තවද දුෂ්ටයන් මාගේ වම් පාර්ශවයේ සිටීම පිළිබඳ පියාණන් ඉදිරියේ මා ලැජ්ජාවට පත්වන්නේය;

28 එසේහෙයින් මම ඔවුන් හට පවසන්නෙමි—යක්ෂයාට සහ ඔහුගේ දූතයන්ට සූදානම් කර ඇති, සදාකාලික ගින්දර තුළට, ශාපය ලැබූ නුඹලා, මා වෙතින් ඉවත්වෙයල්ලා.

29 තවද දැන්, බලන්න, මම නුඹලා හට පවසන්නෙමි, ඔවුන් නැවත හැරී එන ලෙස මාගේ ස්වකීය මුඛයෙන් මම කිසිවිටෙකවත් ප්‍රකාශ කර නොමැත්තෙමි, මක්නිසාද මම සිටින්නේ කොතනැද ඔවුන්ට පැමිණිය නොහැක්කේය, මක්නිසාද ඔවුන්ට බලයක් නොමැත්තේය.

30 එහෙත් සිහිකරන්න එනම් මාගේ සියලු විනිශ්චයන් මනුෂ්‍යයන් හට දී නොමැත්තේය; තවද වචන මාගේ මුඛයෙන් පිටත්ව පෙරට ගිය ලෙස එසේම ඒවා සම්පූර්ණ වන්නේය, එනම් පළමු අය අන්තිමයන් වන්නෝය, තවද එනම් අන්තිමයෝ මාගේ වචනයේ බලයෙන් මම මවා ඇත්තාවූ කවරාකාර දෙයක වුවත් සියලු දේවලදී පළමු අය වන්නෝය, එය මාගේ ආත්මයේ බලයෙන් වන්නේය.

31 මක්නිසාද මාගේ ආත්මයේ බලයෙන් මම ඔවුන් මැවූවෙමි; එසේය, සියලු ආත්මික සහ ලෞකික දේවල් යන දෙකමය—

32 පළමුව ආත්මිකවය, දෙවනුව ලෞකිකවය, එය මාගේ කාර්යයේ ආරම්භයයි; තවද නැවතත්, පළමුව ලෞකිකවය, සහ දෙවනුව ආත්මිකවය, එය මාගේ අවසන් කාර්යය වන්නේය—

33 නුඹලාට ස්වභාවිකව තේරෙන පිණිස එනම් මම නුඹලාට කතා කරන්නෙමි; එහෙත් මා හට මාගේ කාර්යයන්ට අවසානයක් හෝ ආරම්භයක් නොමැත්තේය; එහෙත් නුඹ හට එය දී ඇත්තේ එනම් නුඹ තේරුම්ගන්නා පිණිසය, මක්නිසාද නුඹ එය මාගෙන් අසාගෙන තවද එකඟ වී ඇත්තෙහිය.

34 එසේහෙයින්, සැබවක් මම නුඹ හට පවසන්නෙමි එනම් මා හට සියලු දේවල් ආත්මික වන්නේය, තවද කිසිවිටෙක මම නුඹට, කිසිම මනුෂ්‍යයකු හටද, මනුෂ්‍ය දරුවන්ටද; මා විසින් මවන ලද්දා වූ නුඹගේ පියා වූ ආදම් හටද, ලෞකික නීතියක් දී නොමැත්තෙමි.

35 බලන්න, මම ඔහු හට ලබාදුන්නේ එනම් ඔහු ඔහුටම නියොජිතයෙකු විය යුතු වීමටය; තවද මම ඔහුට ආඥාවක් දුන්නෙමි, එහෙත් ඔහු හට මා දුන්නේ ලෞකික ආඥාවක් නොවේ, මක්නිසාද මාගේ ආඥාවන් ආත්මික වන්නේය; ඒවා ස්වාභාවික හෝ ලෞකික හෝ නොවේ, එමෙන්ම කායික හෝ කාමුක හෝ නොවේ.

36 තවද එය මෙසේ සිදුවිය එනම් ආදම්, යක්ෂයාගෙන් පරීක්ෂා කරනු ලැබ—මක්නිසාද, බලන්න, යක්ෂයා ආදම්ට පෙර වන්නේය, මක්නිසාද මෙසේ කියමින්, මට විරුද්ධව කැරලි ගැසීය, මා හට ඔබගේ ගෞරවය දෙන්න එය මාගේ බලයයි; තවද එසේම ස්වර්ගීය සේනාවෙන් තුනෙන් එකක් ඔවුන්ගේ නිදහස් කැමැත්ත නිසා ඔහු මා වෙතින් ඉවත්කරගත්තේය;

37 තවද ඔවුන්ව පහතට හෙලනු ලැබ, තවද මෙසේ යක්ෂයා සහ ඔහුගේ දූතයන් බවට පැමිණියෝය;

38 තවද, බලන්න, ආරම්භයේ පටන් ඔවුන් උදෙසා සූදානම් කළ ස්ථානයක් ඇත්තේය, එම ස්ථානය නිරය වේ.

39 තවද යක්ෂයා මනුෂ්‍ය දරුවන්ව පරීක්ෂාවට පත්කිරීම අවශ්‍යවම තිබින, එසේ නැතහොත් ඔවුන්ට ඔවුන් හටම නියෝජිතභාවය ලබාගත නොහැකි වන්නේය; මක්නිසාද ඔවුන්ට කිසිදා තිත්ත නොතිබුනේ නම්, ඔවුන්ට මිහිර දැනගැනීමට නොහැකිය—

40 එසේහෙයින්, එය මෙසේ සිදුවිය එනම් යක්ෂයා ආදම්ව පරීක්ෂාවට ලක්කොට, තවද ඔහු තහනම් ඵලය අනුභව කොට, ආඥාව කඩ කළේය, එහෙයින් ඔහු යක්ෂයාගේ කැමැත්තට යටත් විය, මක්නිසාද ඔහු පරීක්ෂාවට ලක්වූ හෙයින්ය.

41 එසේහෙයින්, ස්වාමින් වූ දෙවියන්වහන්සේ වන මම, මාගේ අභිමුඛයෙන්, ඔහුව ඒදන් උයනෙන් පිටතට නෙරපා දැමිය යුතු වීමට සැලැස්සුවෙමි, මක්නිසාද ඔහුගේ වරද හෙයින්ය, එමගින් ඔහු ආත්මික මරණයට පත්විය, එය පළමු මරණයයි, අවසාන මරණය මෙන් සමාන වූ එය, ආත්මික වන්නේය, එය දුෂ්ටයන් මත ප්‍රකාශ කරමින් මම මෙසේ කියමි: ශාප ලද්දාවූ නුඹලා, මා වෙතින් පිටත්වෙයල්ලා.

42 එහෙත්, බලන්න, මම නුඹලා හට පවසන්නෙමි, ස්වාමින් වූ දෙවියන්වහන්සේ වන මම, ආදම් සහ ඔහුගේ වංශයට එනම් ඔවුන් ලෞකික මරණයකට පත්නොවීමට ස්වාමින් වූ දෙවියන්වහන්සේ වන මම දේවදූතයන් ඔවුන් හට පෙරට යවමින්, මාගේ ඒකජාතක පුත්‍රයාණන්ගේ නාමයේ ඇදහිල්ල තුළින්, පසුතැවිල්ල සහ මිදීම ප්‍රකාශ කරන්නෙමි.

43 තවද මෙසේ ස්වාමින් වූ දෙවියන්වහන්සේ වන මම, මනුෂ්‍යයා හට ඔහුගේ පරිවාස දවස් නියම කළෙමි—එනම් බොහෝ අයවළුන්ගේ විශ්වාසය පරිදි, ඔහුගේ ස්වභාවික මරණය මගින් ඔහු අමරණීයත්වය තුළින් සදාකාල ජීවනයට නැගිටුවීමටය;

44 තවද සදාකාලික විනාශයට පත්කිරීම විශ්වාස නොකරන අය; මක්නිසාද ඔවුන්ගේ ආත්මික වැටීමෙන් ඔවුන්ව මුදවාගැනීමට නොහැකිය, මක්නිසාද ඔවුන් පසුතැවිලි නොවන නිසාය;

45 මක්නිසාද ඔවුන් ආලෝකයට වඩා අන්ධකාරයට ප්‍රේම කරන්නෝය, තවද ඔවුන්ගේ ක්‍රියාවන් නපුරු වන්නේය, තවද ඔවුන්ගේ වේතනය ලබන්නේ ඔවුන් කීකරු වීමට කැමති අයගෙනි.

46 එහෙත් බලන්න, මම නුඹලා හට පවසන්නෙමි, එනම් මාගේ ඒකජාතකයාණන් තුළින් ලෝකයේ පටන්ගැන්මේ සිටම කුඩා දරුවන්ව මුදවාගනු ලැබ ඇත්තේය;

47 එසේහෙයින්, ඔවුන්ට පව් කිරීමට නොහැකිය, මක්නිසාද මා ඉදිරියේ ගණන්දීමට ඔවුන් පැමිණෙන තුරු, කුඩා දරුවන්ව පරීක්ෂා කිරීමේ බලය සාතන් හට දී නොමැත්තේය;

48 මක්නිසාද එය මාගේ කැමැත්තට අනුව ඔවුන්ට දී ඇත්තෙමි, මාගේ ස්වකීය සතුට අනුව, එනම් ඔවුන්ගේ පියවරුන්ගේ හස්තය මගින් මහත් දේවල් සිදුකිරීම අවශ්‍ය වන්නේය.

49 තවද, නැවතත්, මම නුඹලා හට පවසන්නෙමි, එනම් දැනීම ඇත්තා වූ කවර අයෙකු හට හෝ, පසුතැවිලි වීමට මා ආඥා කර නොමැත්තේද?

50 තවද එනම් අවබෝධයක් නැති තැනැත්තා හට, ලියා තිබෙන ආකාරයට ක්‍රියා කිරීම මා වෙත රැඳී ඇත. තවද දැන් මම මේ අවස්ථාවේදී නුඹලා හට වැඩිදුර ප්‍රකාශ නොකරන්නෙමි. ආමෙන්.