Բաժին 34
Հայտնություն՝ տրված Ջոզեֆ Սմիթ Մարգարեի միջոցով Օրսոն Պրատին, Ֆայեթում, Նյու Յորք, 1830թ. նոյեմբերի 4-ին (History of the Church, 1.127–128): Եղբայր Պրատն այդ ժամանակ տասնինը տարեկան էր: Նա դարձի էր եկել և մկրտվել, երբ վեց շաբաթ առաջ առաջին անգամ լսել էր վերականգնված ավետարանի քարոզումն իր ավագ եղբոր՝ Փարլի Պ. Պրատի կողմից: Այս հայտնությունը ստացվել էր Պիտեր Ուիթմեր ավագի տանը:
1–4՝ Քավության միջոցով հավատարիմները դառնում են Աստծո որդիներ. 5–9՝ Ավետարանի քարոզումը ճանապարհ է պատրաստում Երկրորդ Գալստի համար. 10–12՝ Մարգարեությունը գալիս է Սուրբ Հոգու զորությամբ:
1 Իմ որդի՛ Օրսոն, ականջ դիր և լսիր ու տես, թե ինչ պիտի ասեմ քեզ, ես՝ Տեր Աստվածս, այսինքն՝ Հիսուս Քրիստոսը՝ քո Քավիչը.
2 Լույսը և կյանքն աշխարհի, լույս, որը շողում է խավարում, և խավարը չի ըմբռնում այն.
3 Նա, ով այնպես սիրեց աշխարհը, որ տվեց իր կյանքը, որ բոլոր նրանք, ովքեր կհավատան, դառնան Աստծո որդիներ: Ուստի դու իմ որդին ես.
4 Եվ օրհնված ես դու, որովհետև հավատացիր.
5 Եվ օրհնված ես դու ավելի շատ, որովհետև ես կանչել եմ քեզ՝ քարոզելու իմ ավետարանը,–
6 Քո ձայնը բարձրացնելու, ինչպես փողի հնչումով՝ երկար ու բարձր, և ապաշխարություն աղաղակելու ծռված ու խոտորյալ մի սերնդի՝ պատրաստելով Տիրոջ ճանապարհն իր երկրորդ գալստի համար:
7 Քանզի ահա, ճշմարիտ, ճշմարիտ ասում եմ քեզ, որ ժամանակը շուտով մոտ է, երբ ես կգամ ամպի մեջ՝ զորությամբ ու մեծ փառքով:
8 Եվ մեծ օր կլինի իմ գալստյան ժամանակը, քանզի բոլոր ազգերը պիտի դողան:
9 Բայց նախքան այդ մեծ օրվա գալը, արեգակը պիտի խավարեցվի, և լուսինը դարձվի արյուն, և աստղերը պիտի հրաժարվեն շողալ, և մի քանիսը վայր պիտի ընկնեն, և մեծ ավերածություններ են սպասվում ամբարիշտներին:
10 Ուստի, բարձրացրու ձայնդ և մի խնայիր, քանզի Տեր Աստվածն է խոսել. ուստի մարգարեացիր, և այն պիտի տրվի Սուրբ Հոգու զորությամբ:
11 Եվ եթե դու հավատարիմ ես, ահա՛, ես քեզ հետ եմ, մինչև իմ գալը,–
12 Եվ ճշմարիտ, ճշմարիտ ասում եմ քեզ, ես շուտով գալիս եմ: Ես քո Տերն ու քո Քավիչն եմ: Ճիշտ այդպես: Ամեն: