1 Ահա, ես ասում եմ քեզ, որ քանի որ իմ ծառա Մարտին Հարրիսը վկայություն է փափագել իմ ձեռքից, որ դո՛ւ, իմ ծառա Ջոզեֆ Սմիթ կրտսերդ, ունես այն թիթեղները, որոնց մասին դու վկայել ես ու արձանագրել, որ ստացել ես ինձանից.

2 Եվ արդ, ահա, դու պիտի ասես նրան հետևյալը,– նա, ով խոսել է քեզ հետ, ասել է քեզ. Ես՝ Տերս եմ Աստված, և այս բաները տվել եմ քեզ, իմ ծառա Ջոզեֆ Սմիթ կրտսեր, և պատվիրել եմ, որ դու պետք է կանգնես որպես այս բաների վկա.

3 Եվ ես կարգադրել եմ քեզ, որ դու ինձ հետ ուխտի մեջ պիտի մտնես, որ դրանք ցույց չպետք է տաս, բացի այն անձանցից, որոնց համար պատվիրեցի քեզ. և դու զորություն չունես դրանց վրա, եթե ես չշնորհեմ այն քեզ:

4 Եվ դու պարգև ունես՝ թիթեղները թարգմանելու. և դա առաջին պարգևն է, որ ես շնորհեցի քեզ. և ես պատվիրեցի, որ ուրիշ այլ պարգևի հավակնություն դու չպիտի ունենաս, մինչև այս մեկում իմ նպատակը չիրականանա. քանզի ուրիշ այլ պարգև ես քեզ չեմ շնորհելու, մինչև այս մեկը չավարտվի:

5 Ճշմարիտ եմ ասում քեզ, որ վա՛յ պիտի գա երկրի բնակիչների վրա, եթե նրանք ականջ չդնեն իմ խոսքերին.

6 Քանզի, այսուհետև, դու պիտի կարգվես և առաջ գնաս ու հասցնես իմ խոսքերը մարդկանց զավակներին:

7 Ահա, եթե նրանք չկամենան հավատալ իմ խոսքերին, նրանք չեն հավատա քեզ, իմ ծառա՛ Ջոզեֆ, եթե հնարավոր լիներ, որ դու նրանց ցույց տայիր բոլոր այս բաները, որոնք ես հանձնել եմ քեզ:

8 Ա՜խ, այս անհավատ և խստապարանոց սերունդը,– իմ բարկությունը բռնկվել է նրանց դեմ:

9 Ահա, ճշմարիտ ասում եմ քեզ. Այն բաները, որոնք ես վստահել եմ քեզ, իմ ծառա՛ Ջոզեֆ, ես պահպանել եմ իմ իմաստուն նպատակի համար, և այն հայտնի պիտի դարձվի ապագա սերունդներին.

10 Բայց այս սերունդն իմ խոսքը կունենա քո միջոցով.

11 Եվ ի լրումն քո վկայության, իմ ծառաներից երեքի վկայությունը ևս, որոնց ես պիտի կանչեմ և կարգեմ, որոնց ես ցույց կտամ այս բաները, և նրանք առաջ պիտի գնան իմ խոսքերով, որոնք տրվել են քո միջոցով:

12 Այո, նրանք անկասկած պիտի իմանան, որ այս բաները ճշմարիտ են, քանզի ես երկնքից այն կհայտարարեմ նրանց:

13 Ես զորություն կտամ նրանց, որ նրանք կարողանան նայել ու տեսնել այս բաները՝ ինչպես դրանք կան.

14 Եվ այս սերնդի մեջ ուրիշ ոչ ոքի ես չեմ շնորհի այդ զորությունը՝ ստանալու այդ նույն վկայությունը, այժմ, երբ իմ եկեղեցին բարձրանում և դուրս է գալիս անապատից՝ պարզ, ինչպես լուսինը, և մաքուր, ինչպես արևը, և ահարկու, ինչպես դրոշակակիր զորքը:

15 Եվ երեք վկաների վկայությունը, իմ խոսքի վերաբերյալ, ես առաջ կուղարկեմ:

16 Եվ ահա, ովքեր որ հավատան իմ խոսքին, նրանց ես կայցելեմ իմ Հոգու դրսևորմամբ. և նրանք կծնվեն ինձանից, այսինքն՝ ջրից և Հոգուց,–

17 Եվ դու դեռ պետք է մի քիչ սպասես, քանզի դու դեռ կարգված չես,–

18 Եվ նրանց վկայությունը նույնպես առաջ կգնա՝ ի դատապարտություն այս սերնդի, եթե նրանք կարծրացնեն իրենց սրտերը նրանց դեմ.

19 Քանզի ամայացնող մի պատուհաս պիտի գա երկրի բնակիչների մեջ և ժամանակ առ ժամանակ պիտի շարունակի դուրս թափվել, եթե նրանք չապաշխարեն, մինչև որ երկիրը դատարկվի, և նրա բնակիչներն այրվեն ու ամբողջովին կործանվեն իմ գալստի պայծառությունից:

20 Ահա, ես ասում եմ քեզ այս բաները, ճիշտ այնպես, ինչպես մարդկանց ասացի Երուսաղեմի կործանման վերաբերյալ. և իմ խոսքը պիտի հաստատվի այս ժամանակ, ինչպես այն հաստատվել է մինչ այժմ:

21 Եվ այժմ, իմ ծառա՛ Ջոզեֆ, ես պատվիրում եմ քեզ ապաշխարել, և ավելի ուղիղ քայլել իմ առաջ, և այլևս չտրվել մարդկային համոզմունքներին.

22 Եվ որ դու հաստատուն լինես այն պատվիրանները պահելիս, որոնք ես պատվիրել եմ քեզ. և եթե դու կատարես դրանք, ահա ես շնորհում եմ քեզ հավերժական կյանք, նույնիսկ եթե դու սպանվես:

23 Եվ այժմ, բացի դրանից, իմ ծառա՛ Ջոզեֆ, ես ասում եմ քեզ այն մարդու վերաբերյալ, որը վկայություն է փափագում.

24 Ահա, ես ասում եմ նրան՝ նա բարձրացնում է իրեն և բավականաչափ չի խոնարհեցում իրեն իմ առաջ. սակայն, եթե նա խոնարհվի իմ առաջ և խոնարհեցնի իրեն զորավոր աղոթքով ու հավատքով, իր սրտի անկեղծությամբ, այն ժամանակ, ես նրան մի տեսարան կշնորհեմ այն բաների վերաբերյալ, որոնք նա ցանկանում է տեսնել:

25 Եվ այն ժամանակ, նա պիտի ասի այս սերնդի մարդկանց. Ահա, ես տեսել եմ այն բաները, որոնք Տերը ցույց է տվել Ջոզեֆ Սմիթ կրտսերին, և ես գիտեմ, անկասկած, որ դրանք ճշմարիտ են, քանզի ես տեսել եմ դրանք, քանզի դրանք ինձ ցույց են տրվել Աստծո զորությամբ, ոչ թե մարդու:

26 Եվ ես՝ Տերս, պատվիրում եմ նրան՝ իմ ծառա Մարտին Հարրիսին, որ այս բաների վերաբերյալ նա նրանց չպիտի ասի ավելին, բացի այն, որ նա պիտի ասի. Ես տեսել եմ դրանք, և դրանք ինձ ցույց են տրվել Աստծո զորությամբ. և սրանք են այն խոսքերը, որոնք նա պիտի ասի:

27 Բայց եթե նա ուրանա այդ, նա կդրժի այն ուխտը, որը նախկինում ուխտել է ինձ հետ, և ահա, նա դատապարտված է:

28 Եվ արդ, եթե նա չխոնարհեցնի իրեն և չխոստովանի ինձ այն բաները, որոնք նա արել է, որոնք սխալ են, և ուխտ չկապի ինձ հետ, որ նա կպահի իմ պատվիրանները, և հավատք չգործադրի առ ինձ, ահա, ես ասում եմ նրան՝ նա չի ունենա այդպիսի տեսարաններ, քանզի ես չեմ շնորհի այն բաների տեսարանները, որոնց մասին ես ասել եմ:

29 Եվ եթե այդպես լինի, ես պատվիրում եմ քեզ, իմ ծառա Ջոզեֆ, որ դու ասես նրան, որ նա ոչինչ չպիտի անի ավելին, ոչ էլ այլևս ինձ անհանգստացնի այս հարցի վերաբերյալ:

30 Եվ եթե այդպես լինի, ահա, ես ասում եմ քեզ, Ջոզե՛ֆ, երբ դու մի քանի էջ ևս թարգմանես, դու որոշ ժամանակ պիտի դադարես, նույնիսկ մինչև որ ես կրկին պատվիրեմ քեզ. այն ժամանակ դու կարող ես կրկին թարգմանել:

31 Եվ եթե դու այդպես չվարվես, ահա, դու այլևս պարգև չես ունենա, և ես ետ կվերցնեմ այն բաները, որոնք վստահել եմ քեզ:

32 Եվ արդ, քանի որ ես կանխատեսում եմ, որ դարան են մտել կործանելու քեզ, այո, ես կանխատեսում եմ, որ, եթե իմ ծառա Մարտին Հարրիսը չխոնարհեցնի իրեն և վկայություն չստանա իմ ձեռքից, ապա նա կընկնի օրինազանցության մեջ.

33 Եվ կան շատերը, որ դարան են մտել՝ կործանելու քեզ երկրի երեսից. և դրա համար, որպեսզի քո օրերը երկարացվեն, ես տվել եմ քեզ այս պատվիրանները:

34 Այո, դրա համար եմ քեզ ասել. Դադար առ և խաղաղվիր, մինչև քեզ պատվիրեմ, և ես միջոցներ կապահովեմ, որոնցով դու կկարողանաս իրագործել այն, ինչ պատվիրել եմ քեզ:

35 Ու եթե դու հավատարիմ լինես իմ պատվիրանները պահելիս, վերջին օրը դու պիտի բարձրացվես: Ամեն: