15. Templo sa Nauvoo

Kining modelo nga sumala sa sukod sa Templo sa Nauvoo nahimutang sa dapit sa orihinal nga templo. Ang templo gitukod gikan sa lokal nga abuhon-puting anapog. Ang gambalay nagsukod og 39 ka mga metros ang gitas-on ug 27 ka mga metros ang gilapdon. Ang itaas sa tore mibarug og 48 ka mga metros ibabaw sa yuta. Ang mga sakop sa Simbahan mihimo og tumang mga sakripisyo aron pagtukod niining matahum nga templo, nga nagsugod sa trabaho sa 1841. Ang pipila nagtrabaho sulod sa mga bulan diha sa gambalay; ang uban misakripisyo sa ilang salapi. Bisan pa kon dili hingpit nga nahuman, ang templo napuno sa kapasidad sa mga sakop nga miabut alang sa mga ordinansa sa panahon sa mga bulan sa wala pa ang ilang paglayas ngadto sa Kasadpan. Samtang daghan sa mga Santos mibiya sa Nauvoo sayo sa tingpamulak sa 1846 ubos sa pagpanghulga sa kabangis sa manggugubot, usa ka espesyal nga pundok ang nagpabilin aron paghuman sa templo. Sa 30 sa Abril 1846, sila si Elder Orson Hyde ug Wilford Woodruff ug gibanabana nga laing 20 mipahinungod niining balay sa Ginoo. Ang templo gibiyaan sa Septyembre sa diha nga ang nahabilin nga mga sakop sa Simbahan giabug pagawas sa Nauvoo; mga panon sa manggugubot dayon mipanamastamas ug mihugawhugaw sa sagrado nga estraktura. Kini gisunog niadtong Oktubre 1848.

Mahinungdanon nga mga Hitabo: Ang kinatibuk-ang komperensya gihimo sa lawak tigumanan sa templo niadtong 5 sa Oktubre 1845. Ang trabaho sa pagtuga nagsugod niadtong 10 sa Disyembre 1845 ug nagpadayon hangtud sa 7 sa Pebrero 1846. Labaw sa 5,500 ka mga Santos sa Ulahing mga Adlaw nakadawat sa ilang tuga, ug daghang mga bunyag alang sa mga patay ug mga pagbugkos ang gipahigayon.